Amós 5:11 - Biblia Enxet

¹¹ Megkólhakha sa' ma'a kélxanák apkeltaqmalma kélláneyak axta meteymog eñama kélnaqtawáseykegkoho m'a meyke nak aqsok apagkok tén han kéltémo elyánmagkasek chá'a hótáhap apaktek elmések kéxegke, megkólyenagkek sa' nahan vino éleñama m'a kélcheneykekxa nak.

Amós 5:11 ပူးပေါင်းရင်းမြစ်များ

Job 20:19

Apnaqtawáseykegkok ma'a meyke nak aqsok apagkok, apkexeykekxeyk aqsa meyke appasmo; apkelmomchek ma'a tegma megkatnahakxoho apkelane.

Isaías 16:10

Kamaskok sa' ekpayheykekxa egwáxok tén han negátseykha m'a yókxexma; kamaskok sa' ma'a negwóncháseykha nak ekpayheykekxa egwáxok, tén han ma'a negmeneykmáseykha nak neyseksa anmen yámet kélcheneykekxa, kamaskok sa' nahan kalyaqhapaxchek ma'a anmen yámet ekyexna yaqwayam kalanaxchek ma'a égmenek. Massegwokmek ma'a nélpáxameykha nak negátseykha.

Ezequiel 26:12

Meyke aqsok kélagkok sa' etnessásekxa', elmenyexchesek sa' ma'a aqsok kélchexeykekxa nak chá'a, elyaqnegkessesagkok sa' ma'a meteymog kélhaxta nak nepyáwa tegma apwányam kélagkok, epalchessásegmak sa' náxop ma'a tegma apkelyawe apkeltaqmalma kélagkok nak; ekxák sa' wátsam ekwányam awáxok ma'a meteymog, tén han ma'a éltegyésso nak, ekweykekxoho m'a nápakha'a apketkók apkelpaqxo nak.

Ezequiel 34:21

Kélyetnakhassegkek chá'a kéxegke kélyégeykha m'a apkelyelqamákpoho nak, kélchetámeykegkek chá'a kéltegweykmo, tén kélántekkessama chá'a.

Oseas 9:2

Mexek sa' hótáhap apaktek apagkok ma'a énxet'ák Israel, tén han vino apagkok, ketsék agko' sa' katnehek ma'a vino kaxwe élánamáxche nak.

Levítico 26:16

sa' atnéssesek ko'óxa kélxegkáxa s'e: wáphássesek sa' aqsok segyegwakkassamo nak, tén han negmasse segaqhamo nak, ekmexanma egyempehek, tén han negmasse élmaso nak egaqta'ák, tén han ma'a ekyelqamáxche egyempehek; kaqhok sa' kólchenekxak aqsok, hakte kélenmexma sa' etókasek ma'a aqsok kélcheneykekxa kélnakxo.

Amós 2:6

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Israel, megkatnehek sa' mallegassáseykegkoho; hakte apkexeykekxeyk chá'a apyaqmagkáseykekxo selyaqye m'a énxet'ák meyke nak apkeltémakxa, keñe m'a énxet'ák apkelmopyóseka nak apkelyaqmagkáseykekxo chá'a kéltéto kélmagkok.

Amós 2:7

Máxa xapop nélteyammeykha apteméssessók apnaqtawáseykegkoho m'a énxet'ák apkelmopyóseka nak, mepékessessók chá'a apkelánekxésso amya'a m'a meyke nak ekpasmo. Apkelyaqmagkásamákpek chá'a appathetéyak xama kelán'a m'a apyáp tén han apketche, aptawáseykha chá'a sekwesey ekpagkanamaxche aptamhéyak xa ektáha nak.

Amós 3:15

Amasséssók sa' ma'a tegma kélanchesso nak chá'a kammok ekhem apmopsamágexa, tén han ma'a kélanchesso nak chá'a kammok ekhem ekmexanmakxaxma, amasséssók sa' ma'a tegma apkeltaqmalma kélnáxegkáseykha nak chá'a apkelánamap ma'a yánnapóxeg apma'ák, nápakha'a apketkók sa' atnessásekxak ma'a tegma apkelyawe apkeltaqmalma nak.” Wesse' egegkok apxeyenma xa.

Amós 3:9

Kóllegés sa' kéxegke apheykha nak tegma apkelyawe kelwesse'e apxanák Asdod, tén han tegma apkelyawe kelwesse'e apxanák nak Egipto s'e amya'a nak. Sa' kóltéhek se'e: “Kólmeyenta sa' egkex'a nak Samaria; kóllano sa' magya'áseyak nak nentáhakxa ekyetno m'a kañe' nak, tén han nennaqtawáseykegkoho egnámakkok ekyetnama nak ma'a.”

Amós 4:1

Kóleyxho sa' se'e kelán'ák nak Samaria, kélhémo nak weyke eknaqmele Basán, kélyentaxnéssesso nak chá'a apheykha m'a meyke nak aqsok apagkok, kélnaqtawáseykegkoho nak chá'a m'a apkelmopyóseka nak, kéltémo nak chá'a elsantagkasek anmen yámet égmenek ma'a kélnaqteyegka'a, yaqwayam kólyenagkok.

Amós 6:11

Hakte Wesse' egegkok sa' yának kóllegássesagkohok ma'a énxet'ák apheykha nak tegma apkelyawe, tén han ma'a ketcheyetse nak, nápakha'a apketkók sa' etnekxak ma'a apyókxoho nak.

Amós 6:12

¿Apwancheya yenyahagkok yátnáxeg neyseksa meteymog? ¿Kélwancheya kólpeynchók xapop ma'a neyseksa wátsam ekwányam? ¡Pánaqte segaqhamo kélteméssáseykekxak kéxegke m'a ekpéwomo kéllánekxésso nak amya'a m'a énxet'ák, keñe m'a ektekkesso nak chá'a nentémakxa ekpéwomo kéltemessáseykekxo ekmáske!

Amós 8:4

Kóleyxho s'e, kéxegke kélnaqtawáseykegkoho nak chá'a m'a apkelmopyóseka nak, tén han kéltawassáseykha nak chá'a apheykha m'a meyke nak aqsok apagkok ma'a kélókxa;

Amós 9:14

Keñe sa' anaqlanták ko'o makham ma'a énxet'ák ahagkok Israel, kélnaqleykekxa axta megkatnahakxa apkelókxa. Enaqxétekhasagkokxak sa' makham ma'a tegma apkelyawe kélnaqtawáseykha axta, keñe sa' exmakha makham ma'a; eknagkok sa' makham anmen yámet, énagkok sa' nahan ma'a égmenek nak; eknagkokxak sa' makham aqsok aktek namyep, etawagkok sa' nahan ma'a ekyexna nak.

Miqueas 1:6

Cháxa keñamak aptáha nak Wesse' egegkok se'e: “Nápakha'a apketkók sa' ko'o atnessásekxak ma'a tegma apwányam Samaria, yókxexma eyáxñe sa' katnekxa' kélcheneykekxexa nak anmen yámet. Waxpánchesha sa' meteymog nekha'a nak tegma apwányam ma'a ekyapwátegweykenxa nak xapop, yáxña'akxoho sa' apekkenchásekxak ma'a apowhók nak.

Miqueas 2:2

Katsapok chá'a apnegya'ák elanok xapop, keñe elmok chá'a; katsapok chá'a apnegya'ák elanok tegma, keñe elmenyexek chá'a. Enaqtawasagkohok chá'a énxet yetlo apnámakkok, cham'a ektáha nak chá'a apagkok xapop, tén han ma'a aqsok apkelxaweykekxa nak.

Miqueas 6:15

Eknekxak sa' eykhe chá'a aqsok aktek, menakxek sa' eyke chá'a ekyexna; elyaqhápok sa' eykhe olivo ekyexna, memha sa' eyke m'a pexmok agkok; elteyammok sa' eykhe m'a anmen yámet ekyexna, ménhek sa' eyke m'a égmenek nak.

Sofonías 1:13

Cháxa keñamak peya nak kalmaxchek ma'a aqsok élmomnáwa apagkok nak, tén han kólmasséssessók ma'a apxanák nak, elanagkok sa' eykhe apxanák, mexnakha sa' eyke m'a; eknagkok sa' eykhe anmen yámet, ménagkehek sa' eyke m'a égmenek nak.”

Hageo 1:6

Xámok kéxegke kélcheneykekxa aqsok, ántawók eyke kélnakxo ekyexna; kélteykegkek eykhe kéltéyak, makke kólyaqkáneykmok; kélyeneykegkek eykhe vino, makke kamassék élnapma ekhem; kélántaxneykekxeyk eykhe kélántaxno apkelyentaxno, makke kalmexanmak kélyempe'ék; keñe m'a énxet kélyánmagkasso nak chá'a apkeltamheykha xama ekhem, megkawakxók chá'a ekyánmaga aptamheykha m'a aqsok élmomnáwa.

Malaquías 1:4

Aptemék sa' agkok énxet'ák apheykha nak Edon se'e, cham'a aptawán'ák neptámen nak Esaú: “Ẽltawassáseykha eykhe negko'o negókxa, anxátekhásekxak sa' eyke makham,” Tén sa' etnehek Wesse' egegkok se'e: “Exátekhásekxak sa' makham apchókxa m'a, atwássesha sa' eyke ko'o makham. Kaltamhaxchek sa' apchókxa ‘Apchókxa Ekmaso Ektémakxa', tén han ‘Énxet'ák Apkeltaqnagko nak Wesse' egegkok meyke néxa.”

Deuteronomio 28:30

Kamáwhok sa' eykhe chá'a kalyamhopagkok, pók énxet sa' eyke chá'a epathetagkok ma'a kelán'a kélmáheyo kólmok; kóllanagkok sa' eykhe chá'a m'a kélxanák, megkólhemek sa' eyke m'a kañe' nak; kólchenekxak sa' eykhe chá'a m'a anmen yámet, megkóltewek sa' eyke m'a ekyexna nak;