Amós 4:5 - Biblia Enxet

⁵ Kólwet sa' kelpasmaga meyke nak kempáseyak kélmésso naqsa nak chá'a eñama kélmésso ekxeyenma kélwáxok, kóltennasák nahan ekyókxoho yókxexma m'a aqsok kélmésso naqsa ekxeyenma agko' nak kélwáxok yaqwayam kólmések, hakte cháxa ekleklamo nak chá'a kélwáxok kéxegke kóltéhek xa ektáha nak.” Wesse' egegkok apxeyenma xa.

Amós 4:5 ပူးပေါင်းရင်းမြစ်များ

Salmos 81:12

Cháxa keñamak seyhayo aqsa apkeláneykegko m'a élxeyenmakxa nak chá'a apkelwáxok elanagkok, etnahagkok chá'a m'a apmakókxa enxoho chá'a etnahagkok.

Isaías 1:1

Aqsok apwete axta m'a Isaías, eñama kélxekmósso, ektémakxa axta m'a tegma apwányam Judá tén han ma'a Jerusalén, cham'a Amós apketche nak, neyseksa aptamhéyak axta kelwesse'e apkelwányam Judá m'a Ozías, Jotam, Ahaz, tén han ma'a Ezequías.

Isaías 1:11

Aptáhak Wesse' egegkok se'e: “¿Yaqsa ektáha sélsántegkesa nak ekxámokma kélnaqtósso kélnapma? Élekleykmek ko'o m'a nepkések apkelennay'a nak kélwatno tén han ma'a weyke étkók pexmok agkok nak; ektaqnawágweykmek ko'o m'a weyke kelennay'a nak éma agkok tén han ma'a nepkések apkelennay'a nak tén han ma'a yát'ay apketkók nak éma apagkok.

Jeremías 7:10

keñe chá'a kólmeyenták se'e tegma appagkanamap sélpeykessamókxa nak chá'a ko'o, kólchaqnágwaták nahaqto'. Kólának chá'a méko katnehek kélheykha s'e; kólának chá'a kélwanchek kóllenxanmagkohok kéllánéyak xa aqsok sektaqnagkamo nak ko'o.

Jeremías 7:9

Kélmenyexeykegkek chá'a, kélnapmeyk chá'a kélnámakkok, kélnaqtawáseykegkók chá'a kélnaqteyegka'a kéllánegweykmo chá'a mók kelán'a, kélméssegkek chá'a kélpeywa Wesse' egegkok kélmowána amya'a, kélméssegkek chá'a aqsok ánek ekmátsa nak ekpaqneyam ma'a Baal, kélpeykessamók chá'a aqsok kéláyókxa megkólya'ásegko nak kéxegke,

Oseas 9:1

Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.

Oseas 9:10

Aptáhak Wesse' egegkok se'e: “Payheykekxeyk axta ko'o ewáxok sekweteya m'a Israel, máxa axta ektemék énxet apwetágwayam la'a anmen yámet ekyexna m'a yókxexma meykexa nak énxet. Máxa axta ektemék ko'o sélányo kélyapmeyk nanók axta kéxegke m'a higo ekyexna amonyel'a. Keñe axta apkelweykmo m'a Baal-peor, apkelmeyásamákpo m'a aqsok kéláyókxa élmowancha'a amya'a nak, apkelmopsagcha'a apagko' axta apkeltemessásamákpok, ektéma nak ma'a aqsok kéláyókxa apkelmopmenyého nak ma'a.

Levítico 23:17

kólsók sa' han apqánet kelpasmaga apkeleñama m'a kélxanák, kéllané nak hótáhap aptaqmalma, kélmakhetchesso nak yetlo kempáseyak, cuatro kilos sa' chá'a xama, yaqwayam enxoho kólteméssesek aqsok kélmésso naqsa éltaqmela, émha amonye' ekyexna kélcheneykekxa', kélmésso m'a Wesse' egegkok.

Amós 5:21

“Ataqnawhok agko' ko'o m'a ekhem kélessawássessamókxa nak chá'a; megkalchek ewáxok ma'a ektémakxa nak chá'a kélaqneykekxa hélpeykesho'.

Amós 5:22

Mómenyeyk ko'o m'a aqsok kélwatno sélwatnésso nak chá'a ko'o, tén han ma'a sélmésso naqsa nak chá'a aqsok aktek ekyexna kélcheneykekxa; malmehek sa' ko'o takha' m'a weyke étkók eknaqmele kélnapma ekwetassamól'a chá'a kélásekhamaxchekxoho.