Amós 4:1 - Biblia Enxet

¹ Kóleyxho sa' se'e kelán'ák nak Samaria, kélhémo nak weyke eknaqmele Basán, kélyentaxnéssesso nak chá'a apheykha m'a meyke nak aqsok apagkok, kélnaqtawáseykegkoho nak chá'a m'a apkelmopyóseka nak, kéltémo nak chá'a elsantagkasek anmen yámet égmenek ma'a kélnaqteyegka'a, yaqwayam kólyenagkok.

Amós 4:1 ပူးပေါင်းရင်းမြစ်များ

1 Reyes 16:24

Apmeykekxeyk axta han ma'a egkexe nak Samaria apagkok axta m'a Sémer, sesenta y seis kilos axta han ekyánmaga m'a sawo ekmope ekmomnáwa, apkeláneyak axta han tegma apwányam ekyennaqte kélhaxtegkesso nepyáwa', apteméssessama axta apwesey Samaria, hakte Sémer axta apwesey apagkok apmonye' m'a egkexe nak.

Job 20:19

Apnaqtawáseykegkok ma'a meyke nak aqsok apagkok, apkexeykekxeyk aqsa meyke appasmo; apkelmomchek ma'a tegma megkatnahakxoho apkelane.

Job 24:4

Elyetnakhaksek chá'a énxet'ák meyke aqsok apagkok ma'a ámay apagkok, keñe m'a énxet'ák apkelmopyóseka nak elyexanmok chá'a.

Salmos 12:5

Aptáhak appeywa Wesse' egegkok se'e: “Kélnaqtawáseykegkók ma'a meyke nak aqsok apagkok, kéllegassáseykegkók ma'a apkelyelqamákpoho nak. Cháxa keñamak peya nak ko'o wampekxak néten, apasmok sa' ekhawo ektémakxa nak chá'a apkelmopmenyého.”

Salmos 140:12

Ekya'ásegkók ko'o elánekxéshok chá'a apheykha Wesse' egegkok ma'a meyke nak aqsok apagkok, emyókashok han chá'a ektémakxa nak chá'a apheykha m'a ekyentaxno nak apheykha.

Salmos 22:12

Máxa weyke kelennay'awók aptamheykegkok sewakhaya m'a sélenmexma, ektéma nak weyke kelennay'awók éllo m'a Basán;

Proverbios 22:7

Ekxákma apkelnaqta aqsa etnehek wesse' m'a nepyeseksa nak énxet'ák meyke aqsok apagkok; keñe m'a apmassáseykha nak chá'a selyaqye apagkok pók, etnehek apkemha apmonye' apagkok ma'a ektáha nak chá'a apmassáseykha selyaqye apagkok.

Eclesiastés 4:1

Élanawók axta ko'o énxet'ák ektémakxa apnaqtawáseykegkoho apnámakkok apheykha nak keso náxop. Ekwet'ak axta apkellekxagweyncha'a m'a énxet'ák kélnaqtawáseykegkoho nak, méko axta eyke élpeykessásekxo chá'a apkelwáxok; asagkók agko' axta chá'a apteméssesakxa m'a ektáha nak apnaqtawáseykegkoho, méko axta eyke élpeykessásekxo apkelwáxok.

Eclesiastés 5:8

Nágkatlakkas aqsa apwet'a enxoho énxet'ák meyke aqsok apagkok kélnaqtawásegkoho xama apchókxa, tén han megkóltaqmelchessásekxo enxoho chá'a apheykha, essenhan megkóllánésa enxoho chá'a m'a ekpayhawo nak kólteméssesek, hakte énxet ekha nak kéláyo, elanha chá'a m'a aptáha nak kéláyo apagko', keñe apteme nak néten agko' kéláyókxa, elanha chá'a xa apqánet nak.

Isaías 28:1

¡Samaria laye, eyaqheykencha'a nak chá'a apwáxok ma'a Efraín, apteméssessama nak chá'a néten agko' ektaqmalma, apheykegkaxa nak ma'a énxet'ák anmen át'ák; élyamaka nak kaxwók kélnáxegkáseykha m'a pánaqte exnók, ekyetnama nak néten egkexe, néten nak ma'a xapop ekyapwate ektaqmalma, tegma apwányam élnápeykegkaxa nak vino m'a énxet!

Isaías 5:8

¡Kéxegke laye, kélxámáséyak nak kélmà kélxanák, kélxámáséyak nak yókxexma kélagkok, ekweykmoho megkóleygkesa ketsék ma'a kélnámakkok, tén han kélheykha nak ma'a kañe', kélanagko nak kóltáhak wánxa kélxakcha'awók kélagkok ma'a apchókxa!

Isaías 56:12

Etnehek chá'a elpaqmétek se'e: “Antegyagkok sa' vino tén han ma'a anmen agko' nak yaqwayam sa' hẽlnápok. Antamhagkok sa' nahan saka s'e ekhawo nak nentamhágkaxa s'e sakhem nak, essenhan agyeykhássamho'.”

Isaías 58:6

Háwe'. Manto nento ekleklamo nak ko'o ewáxok katnehek se'e ektéma nak: kólyétekkesek ma'a cadenas ekméssama nak chá'a ekyentaxno apheykha énxet'ák, kólhaxyawaksek ma'a kélnaqtete ekyennaqte nak kélyespok ma'a aqsok ekyentaxno; kólántekkesek ma'a énxet'ák kélnaqtawáseykegkoho nak, kólmasséssók ekyókxoho m'a ektawassáseykencha'a nak chá'a apheykha énxet'ák;

Jeremías 50:11

“Kéxegke caldeos, kélyementaméyak axta aqsok apagkok énxet'ák ahagkok, ¡kalpayhekxa kélwáxok, kólnéwha! ¡Kólnextegmakha néten, ektémól'a weyke étkok ma'a neyseksa pa'at! ¡Kólwehesha aptémól'a elpáwha yátnáxeg!

Jeremías 50:27

¡Kólnáhap apyókxoho m'a sẽlpextétamo apagkok nak, kólnaqlakxa yaqwánxa nak etekyók! ¡Apyósekak eyke eykhel'a! ¡Wokmek ekhem yaqwánxa kóllegássesagkoho'!

Jeremías 51:34

Aptáhak Jerusalén se'e, tegma apwányam Sión nak: “Nekha'a étkók axta ko'o etnéssáseykekxak Nabucodonosor wesse' apwányam nak Babilonia, emasséseykmek axta; máxa axta etnessáseykekxak ma'a sokpayhe meykel'a aqsok awáxok. Máxa yegmen askok ekyawe axta aptemék senaqsapma, ekyetno nak wátsam ekwányam; apyaqkáneykmek axta aptama ekleklamókxa nak apwáxok ekyetno sekyókxa, keñe m'a nekha nak apkexakhama. ¡Kólyaqmagkásekxak sa' setnéssessamakxa axta ko'o m'a Babilonia! ¡Kólyaqmagkásekxa sa' ektémakxa axta sẽlnapma negko'o m'a caldeos!”

Jeremías 6:6

Aptáhak Wesse' egegkok ekha nak apyennaqte s'e: “¡Kólyaqtén sa' yenta'a, kóllána sa' kélyetlamakxa néten, yaqwayam sa' kólchetamagkok ma'a Jerusalén! Apxénamakpek kóllegássesagkohok xa tegma apwányam nak, hakte sawheykekxók apnaqtawáseykegkoho apnámakkok énxet'ák ma'a kañe' nak.

Jeremías 7:6

megkólnaqtawásegkoho enxoho m'a apkeleñama nak mók nekha, tén han ma'a élyéheykha nak, tén han ma'a xentampe'e nak, tén han megkólnapa enxoho chá'a énxet'ák meyke nak apkeltémakxa s'e yókxexma nak, tén han megkólpeykásawo enxoho m'a mók aqsok kéláyókxa, yaqwayam enxoho kólsexnánéxkohok kélagko' kéxegke,

Ezequiel 18:12

aptawáseykegkoho nak chá'a m'a énxet apmopyósa nak tén han ma'a ekhakxa nak chá'a eyeyméxchexa aqsok apxagkok, tén han apmenyexchesso nak chá'a aqsok apagkok pók, tén han megkeyáseykekxa nak aqsa chá'a aqsok apmésso ekyaqmageykekxa apméyák ma'a pók, tén han apcháyo nak chá'a m'a aqsok kéláyókxa élmasagcha'a nak tén han apkelane nak chá'a m'a aqsok megkaleklamakxa nak chá'a ko'o ewáxok,

Ezequiel 22:12

Yetneyk han chá'a nápakha énxet'ák apagkok apma nak chá'a kólmések ekyánmaga yánékpok yaqhek ma'a pók. Emássesha nahan chá'a selyaqye apagkok pók yetlo apma ekyawe agko' ekyánmaga tén han apkeltémo eyánmagkásekxohok chá'a mók néten, elyennaqtésha nahan chá'a apyempe'ék enaqtawasagkohok ma'a apnámakkok, keñe ko'o megkaxénhek chá'a apkelwáxok. Ko'o sekxeyenma xa, sektáha nak Wesse'.

Ezequiel 22:27

Máxa aqsok nawha'ák éllo élyeptamól'a ekyógkexma apkelwesse'e s'e apchókxa nak, apkelpenchesso nak chá'a yaqwayam elnápok énxet yaqwayam enxoho kaxámekxak ma'a aqsok apagkok.

Ezequiel 22:29

Apkelmenyexéyak aqsa apkeláneykegkok chá'a m'a kelwesse'e ekha nak chá'a xapop apagkok ma'a apchókxa tén han apkelyennaqteyáseykha chá'a apyempe'ék; apnaqtawáseykegkok chá'a m'a énxet'ák apmopyóseka nak tén han ma'a ekha nak chá'a eyeyméxchexa aqsok ma'a apxanák, apkelyennaqteyáseykha nahan chá'a apyempe'ék apkeláneya m'a énxet'ák apkeleñama nak mók nekha, Apteméssessegkek chá'a m'a megkapayhawo nak anteméssesek.

Ezequiel 22:7

Méko apkelyeheykekxoho apyapmeyk tén han chána m'a énxet'ák apagkok nak xép, meltaqmelchesek nahan chá'a m'a énxet'ák apkeleñama nak mók nekha, enaqtawasagkohok nahan chá'a m'a élyéheykha nak tén han ma'a xentampe'e nak.

Ezequiel 34:16

Alchetmok sa' ma'a nepkések apkelxegányam nak, anaqlanták sa' ma'a apkelyetnakhágwayam nak chá'a apkelxega, alpextehetchesagkok sa' nahan ma'a ekhakxa nak chá'a énté xama apyók, apasmok sa' nahan ma'a apkelyelqamákpoho nak, keñe sa' amasséssók chá'a m'a apnaqmele nak tén han ma'a apkelyennaqte nak. Alanha sa' chá'a ko'o m'a, yetlo sekteméssesso m'a ekpayhawo nak chá'a anteméssesek nenláneykha.

Ezequiel 39:18

katawagkok sa' ma'a sẽlpextétamo aphápetek, keynagkok sa' nahan ma'a kelwesse'e apkeltaqmelchesso nak chá'a apkelókxa éma apagkok, máxa sa' katnéssesek ma'a ektémól'a nepkések apkelennay'a, tén han apketkók la'a, tén han ma'a yát'ay apketkók la'a essenhan ma'a weyke étkók kélennay'a eknaqmelel'a m'a yókxexma Basán.

Joel 3:3

Apmelassamákpek axta énxet'ák ahagkok, aptawáseykegko chá'a xama aqsok, apkexeykekxeyk axta ekha ekyánmaga wokma'ák apketkók, tén han kelwán'ák étkók, keñe axta selyaqye apyánmagkassama chá'a vino, tén han ma'a kelán'a ekyaqmagkáseyak nak pók énxet ekpathetéyak ekma chá'a ekyánmaga.

Amós 3:1

Israelitas, kóleyxho aptáhakxa nak appeywa Wesse' egegkok apkelxéna kéxegke, ektáha axta apkelántekkesso m'a Egipto:

Amós 3:3

Magkenatchesek apkelxega enxoho apqánet énxet, hawók eyke katnehek mók apkeláneykekxa apkelpaqmeyesma;

Amós 5:11

Megkólhakha sa' ma'a kélxanák apkeltaqmalma kélláneyak axta meteymog eñama kélnaqtawáseykegkoho m'a meyke nak aqsok apagkok tén han kéltémo elyánmagkasek chá'a hótáhap apaktek elmések kéxegke, megkólyenagkek sa' nahan vino éleñama m'a kélcheneykekxa nak.

Amós 6:1

¡Énxet'ák laye, apheykha nak meyke élyetnakhayo apkelwáxok ma'a Sión! ¡Énxet'ák laye, apheykha nak chá'a meyke apkelakakxa m'a Samaria, apkelámha apmonye'e nak chá'a apkelókxa ekyawe kéláyo, apkelye'eykekxoho nak chá'a m'a israelitas!

Amós 6:6

kólmaha chá'a egheykok élyawe kólyenagkok ma'a vino, kólexpaqhaxchek chá'a m'a sokmátsa élmátsa agko' nak élpaqneyam élmomnáwa, ¡megkalyetnakhassamók kélwáxok ekmasagko m'a kélókxa!

Malaquías 3:5

Aptáhak Wesse' egegkok ekha apyennaqte s'e: “Awaták sa' ko'o yaqwayam alyekpelchágwatámhok kéxegke. Keytlawhok sa' ko'o sélxéncháseykekxoho apkeltémakxa m'a aptamhéyak nak chá'a apkelyohóxma, tén han ma'a apnaqtawáseykegkoho nak chá'a apnaqteyegka'a apkelane chá'a mók, tén han ma'a eyaqhémo nak chá'a etnéssesek ekmámnaqsoho apkelpeywa, tén han ma'a apnaqtawáseykegkoho nak chá'a énxet'ák ekha nak apkeltamheykha, tén han ma'a xentampe'e nak, tén han ma'a élyéheykha nak, tén han meltaqmelchesso nak ma'a apkeleñama nak mók apkelókxa, tén han ma'a meheyáyo nak chá'a.

Números 21:33

Tén axta apkelchexyekmo makham apkelpéwo m'a ámay ekmahéyak nak Basán, apkelanyexchek axta eyke m'a Og, wesse' apwányam nak Basán, yetlo apyókxoho sẽlpextétamo apagkok, peya yempakhak ma'a yókxexma nak Edrei.

Deuteronomio 24:14

“Nágkólnaqtawasagkoho chá'a m'a énxet'ák meyke agko' nak chá'a aqsok apagkok, kólyánmagkas chá'a heykxe m'a ekyánmaga apkeltamheykha, cham'a xama kélókxa xamo' nak kéxegke essenhan ma'a énxet apkeñama nak mók apkelókxa apheykha nak chá'a pók xam'a m'a tegma apkelyawe kélagkok.

Deuteronomio 28:33

Keñe sa' ma'a kélnakxo nak aqsok kélcheneykekxa m'a xapop kélagkok tén han ma'a ekyókxoho ekyexna eñama nak kéltamheykha, etókasek sa' ma'a énxet'ák megkólweteya axta kéxegke, megkamassegwomek sa' chá'a kéllegeykegkoho kélnaqtawáseykegkoho tén han ekmaso kélteméssesakxa.