Amós 3:12 - Biblia Enxet

¹² Aptáhak Wesse' egegkok se'e: “Sa' etnehek elxeganmok elwagkasakpok teyp israelitas apheykha nak Samaria m'a aptémakxal'a keláneykha nepkések elhaxyawássessekxak ánet apyay'ák nepkések essenhan naw'a apeykok awáxok ma'a méwa, cham'a énxet'ák apheykegko nak chá'a taháno élyawe éltaqmalma m'a tegma apwányam nak Damasco.”

Amós 3:12 ပူးပေါင်းရင်းမြစ်များ

1 Reyes 20:30

Keñe axta m'a sẽlpextétamo apkeleymomap apkenyahágko apkelmahágko m'a tegma apwányam Afec, kélhaxtegkesso tegma apwányam axta eyke han cháhapweykták ma'a veintisiete mil énxet'ák apkelxegányam axta. Apkenyegkek axta han ma'a Ben-hadad, apwokmek axta m'a tegma apwányam nak, apyaqmagkáseykegkek axta han chá'a pók tegma apwáxok apyexánegwayam chá'a.

1 Reyes 20:34

Tén axta Ben-hadad aptáha apcháneya s'e: —Almeyásekxak sa' tegma apkelyawe, apkelyementama axta exchep táta m'a apyáp axta exchep; keñe sa' xeyep keytek apkelyánmagkásamákpexa m'a Damasco, ekhawo ektémakxa nak ko'o táta ekyetnama apkelyánmagkásamákpexa m'a Samaria. —Hoy, wohok sa' etaqhohok xeyep —axta aptáhak apchátegmowágko m'a Ahab. Cháxa apheyásawókxa axta han mók apkelpaqhetchásamákpoho Ahab ma'a Ben-hadad, keñe axta apcha'awo aptaqhákxo.

1 Reyes 22:25

Apchátegmowágkek axta Micaías: —Sa' ey'ásegwók ma'a apyexánegwokmo enxoho chá'a kañe' tegma tén han pók tegma.

2 Reyes 16:9

tén axta aphaxnawo m'a aptáhakxa apcháneya, apkelánekxeyk axta aptáhakxa yaqwayam ektamagkok ma'a Damasco, keñe apma, xama axta apmà, apkelya'ássek axta Quir ma'a apheykha axta m'a, keñe apchaqha m'a Resín.

Ester 1:6

Kélchexnágkek axta nahan apáwa napwe'ék apkelexyawáyo apkelmope tén han apkelyápaqmate m'a neyáwa nak kélhaxta, kélnaqtete axta chá'a apxát'ák ma'a apáwa apkeláxñe hómáyok, kélatcheséyak axta m'a sawo élyaqye élmope éltaqmalma nak, kélnaqtete axta m'a meteymog élámha éltaqmalma élpaxqamáxche nak ektáxama élyápaqmate. Kélnegkenágkek axta nahan taháno élwenaqte sawo ekyátekto ekmomnáwa tén han ma'a sawo ekmope ekmomnáwa nak. Keñe m'a náxop nak kélnegkenágko meteymog élpayhe élexyawáyo, tén han ma'a ekhól'a yálqe' apwáxok élyenméyak, tén han ma'a meteymog élyennaqtél'a élyenma élmope tén han élpésyam.

Ester 7:8

Xama axta apkexyekmo makham wesse' apwányam apkenyékto m'a kélcheneykekxexa axta pánaqte exnók, aptaxnegwa'akteyk axta makham ma'a kañe' élánéxchexa axta ektámaxche ekyawe, apwetágwa'akteyk axta nahan Amán apkeltekxeya aptapnák nekha taháno ekwenaqte ekpayhókxa axta ekyetnakhámegkaxa ekyetno m'a Ester, tén axta aptáha apcháneya s'e: —¿Xénchek enxeykel'a nahan xép apwáxok etnéssessamhóxma wesse' ekwányam Ester nahaqtók ko'o s'e kañe' exagkok nak? Appenchesók axta aqsa apteme appeywa wesse' apwányam xa ektáha nak, yetlókok axta kélpathetma m'a Amán kélaqlássessek axta nápat. Tén axta xama xa énxet'ák nak apwesey axta Harboná, aptáha s'e: —Penchásexcheyk yámet élwenaqte veintidós metros ma'a Amán apxagkok yetlo ektegyésso néten, apkeltémo axta kóllanaksek yaqwayam kólmakhésha m'a Mardoqueo, cham'a énxet apkeltennasso axta exchep ekmáheyo emátog, wesse'. —¡Kólmakhésha sa' ma'a! — axta aptáhak apkeláneya m'a wesse' apwányam.

Salmos 132:3

“Mamyekxeyk sa' exagkok, meytek sa' nahan allókasek sekyampe,

Isaías 17:7

Elenmexekxohok sa' aphakxa ektáha nak apkelane énxet'ák xa ekhem nak, cham'a Dios Appagkanamap nak ma'a Israel.

Isaías 31:4

Aptáhak seyáneya Wesse' egegkok se'e: “Sa' etnehek éxyók Wesse' ekha nak apyennaqte epásegwaták énxet'ák apagkok apheykha nak Sión ma'a ektémól'a xama méwa eyaqhél'a xama nepkések, megkayél'a eyaqmaksek ma'a ektáha nak apkeláneykha, megkahaxanmal'a apxámokma yaqnekxak keláneykha nepkések eltamhok égwakkasek elwónchesek.

Isaías 8:4

Hakte peyk sa' agkok yepwának apteme appeywa sakcha'a s'e ‘Táta’, ‘méme’, kalmaxchek sa' aqsok ekxámokma ekhéyak nak ma'a Damasco tén han ma'a Samaria, kólsakxések sa' ekyókxoho aqsok apagkok élmomnáwa nak énxet'ák ma'a wesse' apwányam Asiria.”

Amós 6:4

Kélheykegkek aqsa m'a néten taháno éltaqmalma élánamáxche nak yánnapóxeg apma'ák kélnáxegkáseykha, kólhagkok chá'a m'a néten nak ekpayhakxa, neyseksa kéllánéyak kélessawássessamo; kóltawagkok chá'a m'a nepkések apketkók apnaqmele, tén han ma'a weyke étkók;

Amós 9:8

Apkelányók Wesse' egegkok se'e énxet'ák melya'assáxma nak, keñe aptáha s'e: “Amasséssessók sa' ko'o apheykha nélwanmeygkaxa xa, masawhók sa' eyke amasséssók ma'a Jacob apnámakkok. Ko'o sekxeyenma xa, sektáha nak Wesse' kélagkok.