Amós 2:4 - Biblia Enxet

⁴ Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Judá, megkatnehek sa' mallegassáseykegkoho; hakte aptaqnagkamchek ma'a nélxekmowásamáxche ahagkok, ko'o sektáha nak Wesse' apagkok, melyaheykekxak ma'a segánamakxa ahagkok nak, apkelpeykessamók aqsa chá'a m'a kéleykmássesso apkelpeykessamo axta chá'a m'a apyapmeyk nano'.

Amós 2:4 ပူးပေါင်းရင်းမြစ်များ

2 Reyes 17:19

Axta eyke han eláneykegkok apkeltémókxa axta etnahagkok Dios Wesse' apagkok ma'a énxet'ák Judá. Apkeláneykegkek axta aqsa m'a appekkenma axta énxet'ák Israel.

2 Crónicas 25:14

Xama axta apkexyekmo makham Amasías natámen apmenxenma m'a énxet'ák Edom, apkelsánteyk axta m'a aqsok kéláyókxa nak Seír, apkelmeyk axta yaqwayam etnehek apagkok, apkelpeykásawók axta, apkelwatnéssek axta m'a aqsok ekmátsa nak ekpaqneyam éten agkok.

2 Crónicas 30:7

Nágkólteme aptamheykegkaxa axta kélyapmeyk nano', tén han ma'a kélnámakkok, apkeltémo axta kólmasséssók Wesse' egegkok, Dios apagkok axta kélyapmeyk nano', eñama apkelyenseyam apkelyetleykha ekhawo kélwet'a nak kéxegke.

Nehemías 1:7

Asagkók agko' negko'o néltémakxa nápaqto' xép; manláneykegkok ma'a apkeltémókxa nak antéhek, segánamakxa, tén han ma'a apchánamakxa nak antéhek, segmésso axta eñama apchásenneykekxa m'a Moisés, apteme axta apchásenneykha.

Nehemías 9:26

“Axta eyke elyaheykekxohok xép ma'a, apkenmexeykekxeyk axta, apkelwanyeykha axta m'a segánamakxa apagkok nak. Apkelnapmeyk axta han ma'a xép apkeláneykha apkellegasso nak appeywa, megyésseykekxa axta apkelxéncháseykekxoho apkeltémakxa, apkeltémo axta elyo'ókxak makham xép; aplókassama apagko' axta exchep.

Isaías 28:15

Kéltáhak kélpaqmeta kéxegke s'e: “Nenlanak negko'o ekhémo mók nélpaqhetchásamáxkoho m'a nétsapma, nélpaqhetchásexkók negko'o m'a apkelmaheykegkaxa nak chá'a apkeletsapma, yaqwayam sa' mehegwatamók ma'a ekwa'a sa' aqsok ekmaso agko'; nélyexanmomchek negko'o m'a nélmowancha'a amya'a nak, néláhakkásamaxcheyk ma'a nélyexancháseykha nak egmók.”

Isaías 44:20

Máxa apteykegko enxoho táhap xa. Apchahayók élyexancháseykencha'a m'a ektémakxa nak élchetámeykha apkelwáxok megkamámnaqsoho. Mopwanchek elwagkasakpok teyp xa énxet'ák nak. Mopwanchek elyekpelkohok apkelmeykencha'a m'a ektémakxa nak apkelmopwancha'a amya'a.

Jeremías 16:11

Sa' etnehek yátegmowagkok xép se'e: ‘Aptáhak Wesse' egegkok se'e: temegkek kéxegke xa, eñama seyamasma ko'o m'a kélyapmeyk nano' axta kéxegke, apkelyetleykekxo m'a mók aqsok kéláyókxa, yaqwayam enxoho etnahagkok éláneykha tén han elpeykesho', keñe ko'o seyamasma, meláneykegkok ma'a séltémókxa axta etnahagkok sekmésso axta ko'o.

Jeremías 16:12

Kéxegke so eyesagchawo agkok aqsok kélláneyak, kélyeykhásseykmók ma'a kélyapmeyk nano' axta, kélyennaqtéssegkek aqsa chá'a kélwáxok kélxama kélyetleykekxo m'a ektémakxa nak chá'a élchetámeykha kélwáxok ekmaso, mehelyeheykekxohok nahan ko'o.

Jeremías 17:27

Sa' agkok kéxegke kólyahákxohok ma'a séltémókxa nak kóltéhek, mehelpagkanchessesa enxoho m'a ekhem sábado, kélántaxnéssákxo enxoho chá'a kélseykha atña'ák nak Jerusalén xa ekhem nak, alwatnek sa' ko'o m'a atña'ák nak tegma apwányam, táxa sa' kamasséssók ma'a tegma apkelyawe nak ma'a Jerusalén, méko sa' nahan kawának kaspanchesek.’”

Jeremías 6:19

Énxet'ák kélheykha nak keso náxop, kóleyxho: Wáphássesek sa' ko'o aqsok ekmaso s'e énxet'ák nak, ekyaqmageykekxa élxéneykha chá'a apkelwáxok elanagkok aqsok ekmaso; hakte melyaheykekxak ma'a sekpeywa nak, aptaqnagkamchek aqsa m'a segánamakxa ahagkok nak.

Jeremías 8:2

kólnegkenek sa' aqsa neyseksa mayáhat, tén han aptaqmelakxa pelten, tén han neyseksa apkelápogwátéyak ma'a apyókxoho yaw'a, apkelmopmenyého apagko' axta chá'a m'a, apkelánéssama axta chá'a aqsok, tén han apkelyetleykencha'a axta chá'a, apkelpaqhetchásamákpoho axta chá'a, tén han apkelpeykessamo axta chá'a. Méko sa' kalmekxak yaqwayam kalátawanyek. Kaxnagkokxak sa' aqsa náxop, ektémól'a weyke ekteyáseykha.

Jeremías 8:9

Elmegqágwakxak sa' eyke xa énxet'ák apkelmopwancha'a nak aqsok, elyelqakpok sa', ektémól'a aqsok nawha'ák élmál'a kelhanma. Apkelyetnakhássek agkok sekpeywa Méko katnehek apkelmopwancha'a aqsok.

Jeremías 9:14

Apkelyennaqtéssegkek aqsa apkelwáxok apkelyetleykekxo m'a ektémakxa nak chá'a élchetámeykha apkelwáxok, apkelpeykessamók ma'a aqsok kéláyókxa élmowancha'a amya'a nak, cham'a ektémakxa axta apkelxekmowáseyak ma'a apyapmeyk nano'.

Ezequiel 13:22

Kélyélaqtéssessegkek kéxegke apkelwáxok eñama kélyexancháseykha m'a énxet'ák meyke nak apkeltémakxa, cham'a mamámenyého nak ko'o alána', keñe kélwasqakkáseykekxoho kéltémo ellenxanmagkohok apkelánéyak apkeltémakxa ekmaso m'a énxet'ák élmasagcha'a nak apkeltémakxa, yaqwayam enxoho magkéshek ko'o élyennaqte apnegya'ák.

Ezequiel 20:13

Élmexeykekxeyk axta eyke ko'o m'a yókxexma meykexa nak énxet, axta elyaheykekxohok ma'a segánamakxa ahagkok; aptaqnagkamchek axta m'a séltémókxa axta chá'a etnahagkok sekmésso axta, yaqwayam axta kalyennaqtéssesek chá'a apnénya'ák ma'a apkelánegko enxoho chá'a, aptawáseykha axta ekyókxoho m'a ekhem ahagkok sábado. Tén axta ekxéna ewáxok ategkesek seklo nepyeseksa m'a tén han amasséssók apyókxoho m'a yókxexma meykexa nak énxet.

Ezequiel 20:16

hakte aptaqnagkamchek axta m'a séltémókxa axta chá'a etnahagkok, axta elyaheykekxohok ma'a segánamakxa ahagkok, aptawáseykha axta nahan ma'a ekhem ahagkok sábado, hakte aqsok kéleykmássesso apagkok axta aqsa kelxéneykha chá'a apkelwáxok.

Ezequiel 20:18

Tén axta apketchek séltamho melanagkehek chá'a m'a apkeltamhókxa enxoho chá'a elanagkok ma'a apyapmeyk, tén han metnahagkek chá'a m'a apkeltamhókxa enxoho chá'a etnahagkok, tén han melpeykesók chá'a m'a aqsok kéleykmássesso nak.

Ezequiel 20:24

hakte axta eláneykegkok ma'a séltémókxa nak chá'a etnahagkok, aptaqnagkamchek axta m'a segánamakxa ahagkok, aptawáseykha axta nahan ma'a ekhem ahagkok sábado, wánxa axta aqsa apkelenmexmo m'a ekheykegkaxa axta aqsok kéleykmássesso apagkok ma'a apyapmeyk.

Ezequiel 20:30

“Etne sa' elának énxet'ák Israel se'e: ‘Keso aptáhakxa exchek appeywa Wesse' egegkok se'e: ¿Yaqsa ektéma kélmámenyého nak kéxegkáxa kólpeysegkesaxchek ekhawo nak ma'a apkeltémakxa axta kélyapmeyk nano'? ¿Yaqsa ektéma sélyenseykmo nak sélyetleykha, kélpeykessamo m'a kéleykmássesso élmasagcha'a agko' nak?

Ezequiel 22:28

Apkelpóssegkek chá'a aqsok ekmámnaqsoho m'a apkellegasso nak chá'a amya'a, máxa m'a énxet apmópessól'a nápakhaw'ék tegma; elxének chá'a elwetak ma'a aqsok, keñe ellegaksek chá'a m'a aqsok ekwetamaxkoho nak chá'a megkatnaha ekmámnaqsoho. Elxének chá'a ellegaksek ma'a sekpeywa, makke ko'o alpaqhetchessók chá'a m'a.

Ezequiel 22:8

Megyáyók nahan chá'a m'a aqsok élpagkanamaxche ahagkok nak tén han ma'a ekhem ahagkok sábado.

Oseas 12:2

Apxénchásekxók aptémakxa Wesse' egegkok ma'a Israel, ellegássesagkohok sa' Jacob énxet'ák apagkok eñama apkeltémakxa; eyaqmagkásekxak sa' ma'a ektémakxa nak apkeláneyak aqsok.

Oseas 12:3

Axayók axta aptemessáseykekxak apepma Jacob ma'a sekxók axta apmáheyo etyamok, keñe axta aptéma apwányam, apkelnápomákpo han ma'a Dios.

Oseas 6:11

Keñe exchep Judá, ekpekkenchessek ekhem yaqwánxa añássesagkoho'. “Ekyókxoho sekmáheyo chá'a ayaqmagkassesek ektémakxa apheykha m'a Israel,

Amós 1:3

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Damasco, megkatnehek sa' mallegassáseykegkoho; hakte nápakha'a apketkók aptemessáseykegkok ma'a apheykha nak Galaad máxa aptemessessók ma'a hótáhap apaktek kélchexakkassól'a apyempe'ék, kélmeykhal'a m'a aqsok éxakkassól'a apyempe'ék élánamáxchel'a sawo.

Amós 3:2

“Kéxegke axta kélwánxa kélagkok sélyéseykencha'a ko'o nepyeseksa m'a apyókxoho énxet'ák nak keso náxop. Cháxa keñamak peya nak ko'o ayaqmagkásekxak ma'a ekyókxoho aqsok élmasagcha'a nak kélláneyák.”

Miqueas 6:12

Apyókxoho kelwesse'e apheykha nak se'e tegma apwányam apnaqtawáseykegkoho m'a apmopyóseka nak; apkelmopwancha'a amya'a nahan apyókxoho apheykha nak ma'a, tén han apkelyexancháseykha chá'a pók.

Habacuc 2:18

¿Yaqsa aqsok egwanchek anteméssesek kéleykmássesso ekpenchásexko enxoho? ¿yaqsa aqsok egwanchek anteméssesek kéleykmássesso sẽlyexancháseykha nak chá'a? Yawanchek kalpaqmétek ma'a aqsok kéleykmássesso, ¡kaqhok yáwhok ma'a énxet ektáha nak chá'a apkelane!

Jueces 10:6

Apkeláneykegkokxeyk axta makham apkeltémakxa ekmaso israelitas nápaqtók Wesse' egegkok, apkelpeykessamók axta m'a mók ektémakxa nak kéleykmássesso Baal tén han Astarté, tén han ma'a aqsok kéláyókxa nak Siria, tén han Sidón, Moab, Amón keñe han ma'a filisteos. Apyamasmeyk axta Wesse' egegkok, massegkek axta apkelpeykessamo.