Abdías 1:21 - Biblia Enxet

²¹ Elmeyekxak sa' egkexe Sión natámen apkelmallane kempakhakma yaqwayam elxének yaqwánxa kólteméssesek ma'a apheykha nak egkexe élekhahéyak Esaú, Wesse' egegkok sa' eyke etnehek wesse' apwányam apagkok.

Abdías 1:21 ပူးပေါင်းရင်းမြစ်များ

Génesis 25:23

Aptáhak axta apchátegmowágko s'e: “Ánet apchókxa pók aptémakxa énxet'ák hágkok kañe' awáxok. Apqánet énxet apkelnápékpok amonye' appalleyam. Xama sa' etnehek apyennaqte apagko', mexók sa' ma'a pók nak, apchásenneykha sa' etnehek átnaha apketkok ma'a apsexyo nak.”

2 Reyes 13:5

Tén axta Wesse' egegkok apmésa xama énxet apkelwagkasso teyp ma'a Israel, apkelwagkassek axta han teyp israelitas neyseksa apmáheyo elmok ma'a wesse' apwányam nak Siria, keñe axta ektaqmelákxo makham apheykha m'a apxanák nak, ekhawo ektémakxa axta sekxók apheykha.

Nehemías 9:27

Cháxa keñamak apchahayo axta apkelmoma m'a apkelenmexma, cham'a apnaqtawáseykegkoho axta. Keñe axta natámen apkeltémo epasmok xép apkelweteya ektémakxa ekyentaxno apheykha, apháxenmok axta han xép ma'a aphakxa nak néten, eñama ekyawe agko' apkelásekhayo; apkelméssegkek axta énxet'ák yaqwayam elyementemekxak ma'a ektáha axta apnaqtawáseykegkoho.

Salmos 102:15

Apyókxoho énxet'ák sa' etnehek apcháyo apwesey m'a Wesse' egegkok, apyókxoho apkelwesse'e apkelwányam apheykha nak keso náxop sa' etnehek apcháyo m'a apcheymákpoho,

Salmos 22:28

Hakte Wesse' egegkok apteme Wesse' Apwányam, cha'a apkeláneykha chá'a apyókxoho pók aptémakxa énxet'ák ma'a.

Salmos 22:29

Kólháxahák kélyókxoho kélteme nak kelwesse'e, kólpeykesho chá'a wánxa m'a, tén han kélyókxoho peya nak kóltemekxak makham xapop, hakte háwe kélagkok kéxegke kélyennaqte.

Salmos 47:7

¡Kólmeneykmásses negmeneykmasso ektaqmalma m'a Dios, hakte cha'a apteme Wesse' apwányam ma'a ekyókxoho keso náxop!

Salmos 67:4

Elwónchesek sa' elátsaha m'a apyókxoho pók aptémakxa nak énxet'ák, hakte apkelyekpelchémok chá'a exchep énxet'ák yetlo ekpéwomo aptémakxa; ¡apkeláneykha exchep ma'a pók aptémakxa nak énxet'ák keso náxop!

Isaías 19:20

Katnehek sa' aqsok magkenatchesso, yaqwayam sa' kaxénwakxohok chá'a kélwáxok Wesse' ekha nak apyennaqte m'a apchókxa Egipto. Apkelwóneyha sa' agkok chá'a Wesse' egegkok yának epasmok eñama apkelápagqánamap ma'a ektáha nak chá'a apnaqtawáseykegkoho, yáphássesek sa' chá'a xama appasmo, yaqwayam sa' elmeyók chá'a tén han elwagkasek chá'a teyp.

Isaías 24:23

Aptemék sa' agkok Wesse' apwányam egkexe Sión ma'a Wesse' ekha nak apyennaqte, cham'a Jerusalén nak, kapeysemekxak sa' ekhem tén han ma'a pelten, keñe sa' ma'a apkelámha apmonye'e nak énxet'ák apagkok elwetak sa' Wesse' egegkok apcheymákpoho.

Daniel 12:3

Máxa aqsok élápogwátéyak néten sa' etnahagkok elápogwátek ma'a apkelyekpelchémo nak aqsok, apnaqlo axta chá'a ámay ekpéwomo m'a apxámokma énxet; ¡elápogwátek sa' meyke néxa, aptémól'a yaw'a!

Daniel 2:35

Ánek agko' axta tamhákxak ma'a sawo ekyentaxno, yelpa', sawo ekyexwase, sawo ekmope tén han ma'a sawo ekyátekto ekmomnáwa nak, ektémól'a kataxchek ma'a ekmexanmakxal'a exma, kélchexakkassamakxal'a chá'a apyempe'ék ma'a hótáhap apaktek, kelsókek axta éxchahayam meyke eyeymomáxche'. Keñe m'a meteymog ektégweykta axta m'a kéleykmássesso, ektamhákxo m'a meteymog émha ekyawe, eksawheykekxoho axta ekyókxoho xapop.

Daniel 2:44

Epekkenek sa' xama apchókxa megkólmowána nak kólmasséssók ma'a Dios apha nak néten, neyseksa aptamhéyak apkelwesse'e apkelwányam xa apkelwesse'e nak, memek sa' xama enxoho m'a pók wesse', kamasséssók sa' ekyókxoho mók apkelókxa nak, megkamassegwomek sa'.

Daniel 7:14

Kélméssek axta apmopwána, apcheymákpoho tén han aptémakxa wesse' apwányam. Apyókxoho énxet'ák apheykha nak ekyókxoho apkelókxa tén han mók ektémakxa nak chá'a apkelpeywa axta aptamhágkok chá'a apkeltamhókxa axta etnahagkok. Megkamassegwomek sa' ma'a ektémakxa nak apmopwána, megkólmasséssemek han ma'a aptémakxa nak wesse' apwányam.

Daniel 7:27

Kólmeyásekxak sa' Dios meyke nak ekhémo énxet'ák apagkok ma'a aptémakxa nak wesse' apwányam, ekha apmopwána ekha apcheymákpoho, ekyókxoho yókxexma keso náxop. Megkatnégwomek sa' néxa apteme wesse' apwányam, etnahagkok sa' chá'a apkeltamhókxa enxoho chá'a etnahagkok apyókxoho énxet'ák nak keso náxop, elyahakxohok sa'.’

Joel 2:32

Apyókxoho énxet ektáha nak sewóneykha, ko'o sektáha nak Wesse', ewagkasakpok sa' teyp ma'a nétsapmakxa nak, hakte keytek sa' nélwagkásamáxche teyp ma'a egkexe Sión, Jerusalén nak, apkeltennassamakxa axta katnehek ma'a Wesse' egegkok. Meletsepek sa' ma'a ektáha nak apkelyéseykha.

Zacarías 14:9

Cháxa ekhem yaqwánxa sa' etnehek Wesse' apwányam Wesse' egegkok ekyókxoho keso náxop. Wánxa sa' nahan xama etnehek ma'a Wesse' egegkok, xama sa' nahan katnehek ma'a apwesey.

Jueces 2:16

apkeltémok axta eyke han elántépok apkelámha apmonye'e apkelyennaqte, yaqwayam elmeyók nepyeseksa m'a apkelyementaméyak axta aqsok apagkok.

Jueces 3:9

ekwokmoho apwóneykencha'a m'a Wesse' egegkok, keñe axta apkeltémo etyapok xama yaqwayam elwagkasek teyp. Otoniel axta m'a yaqwayam elwagkasek teyp, Quenaz axta apketche, apyáxeg apsexyók axta m'a Caleb: