2 Samuel 21:10 - Biblia Enxet

¹⁰ Keñe axta Rispá, Aiá axta apketche, élántaxneykxo apáwa sẽlwáxaqxamól'a magkenatchesso élapwokmo, keñe axta ekyetnakmo m'a néten nak meteymog. Hakmek axta m'a, eyeynamo m'a sekxók apnakxamap apho nak hótáhap, ekweykmoho ekwa'akto makham ekmámeye, axta kahayók xama enxoho kay'áwak náta ekhem ma'a kélhapák, axta han kahayók kay'áwak xama enxoho aqsok nawha'ák éllo m'a axta'a.

2 Samuel 21:10 ပူးပေါင်းရင်းမြစ်များ

Génesis 40:19

wokmek sa' agkok ántánxo ekhem, kaxének sa' apwáxok xép ma'a faraón, yának sa' kólmakhésha néten yámet, keñe sa' máma etwok aphápetek.

2 Samuel 21:11

Xama axta kéltennáseyncha'a David ektémakxa m'a Rispá, kelán'a apmeykha naqsa axta m'a Saúl,

2 Samuel 3:7

Yetneyk axta han xama kelán'a apmeykha naqsa m'a Saúl axta, Rispá axta ekwesey, Aiá axta apketche, appatheteykegko axta han chá'a m'a Abner. Keñe axta Is-bóset aptáha apcháneya m'a Abner: —¿Yaqsa ektéma appatheteykegko chá'a táta axta apmeykha naqsa kelán'a?

1 Reyes 21:27

Xama axta apleg'a Ahab ekyókxoho xa amya'a nak, apkelyepteyk axta aptaxno, aptaxneykxeyk axta m'a apáwa sẽlwáxaqxamól'a keñe han metawa apto. Apténawok axta han xamo' xa apkelnaqta nak, yaqhápeyha axta apwáxok apweynchámeyncha'a.

Jeremías 14:22

¿Yetnéya neyseksa xama aqsok kéleykmássesso m'a ekmowána nak kamámeyaksek? ¿Awancheya káphaksohok agkok ekmámeye m'a yaphope? ¡Ma', Dios Wesse' egegkok! Xép chá'a apcháphasso m'a, xép chá'a apkelane xa ekyókxoho aqsok nak; ¡cháxa keñamak nélhaxanma nak negko'o exchep!

Ezequiel 39:4

Keñe sa' xép yetsapok ma'a néten meteymog élekhahéyak nak Israel yetlo m'a sẽlpextétamo apagkok tén han ma'a énxet'ák apkelxegexma'a nak. Sa' agkések ko'o kéxegke yaqwayam katawagkok ekyókxoho mók ektémakxa nak chá'a náta élyawe ektómo nak chá'a mók ma'a tén han ma'a aqsok nawha'ák éllo nak.

Oseas 6:3

¡Ólwasqápekxohok hana agya'ásegwók Wesse' egegkok! Hegyo'ótak sa' negko'o Wesse' egegkok, ektémól'a katyapok ekhem, ektémól'a kamme' kayássesek xapop, ekmáxaqxamakxal'a exma, tén han élyapweykxal'a yenta'a.

Joel 1:18

¡Kelpáwaha kélnaqtósso! Chaqhók ektegyágko pa'at weyke; apkeletsekkek ma'a nepkések.

Joel 2:23

¡Kalpayhekxa kélwáxok, kéxegke kélheykha nak Sión, kalpayhekxa kélwáxok eñama m'a Dios Wesse' kélagkok! Apméssek kéxegke ekmámeye ekweyktamxal'a chá'a, cham'a ekmámeye ekweyktámhol'a chá'a apmopsamágekxa nak, tén han ma'a élyapweykxal'a, aptémakxa axta chá'a m'a nanók axta.

Zacarías 10:1

Kólmaxna Wesse' egegkok ekmámeye ekweyktámhol'a chá'a élyapweykxa yámet, keñe sa' yáphássesek ekyawe agko' ma'a Wesse' egegkok aptekkessamól'a chá'a apkelyenmayam, elmésagkok sa' ektaqmalma pa'at ma'a yókxexma.

Deuteronomio 11:14

yáphássesek sa' chá'a ekmámeye ekwokmo enxoho ekhem agkok, ektéyeykemxal'a áwa' yenta'a, tén han élyapweykegkaxal'a pánaqte exnók, yaqwayam enxoho kólnakxek kéxegke m'a hótáhap apaktek kélagkok tén han kaxek ma'a vino, tén han ma'a pexmok égmenek kélagkok.

Deuteronomio 21:13

yának sa' kólhexyawássesek ma'a élnaqta élántaxneykekxa axta m'a sekxók axta ekmáxko, keñe sa' kaxnamok nahan ma'a apxagkok nak, kalapwomok sa' kalchetmok chána ekweykmoho xama pelten eñama életsapma. Keñe sa' natámen xa, apwanchek kaxwók épetchak ma'a israelitas nak, atáwa' sa' katnehek ma'a, keñe sa' ma'a etnehek aptáwa'.

Deuteronomio 21:22

“Apmatñekxeyk agkok xama énxet kólmakhésha néten yámet ekyawe eñama apkelane xama aqsok ekmaso agko',

Deuteronomio 21:23

megkólmakhésha sa' aqsa nahan aphápak yókxoho axta'a m'a néten nak; yohok sa' chá'a kólátawanyek xa ekhem nak, hakte Dios chá'a aptaqnagko énxet apketsapma nak chá'a kélmakheyáseykha m'a néten yámet ekyawe, megkeymexchek kéxegke kólenyetseksek ma'a xapop apmáheyókxa nak egkések yaqwayam kóltéhek kélagkok kélagko' ma'a Dios Wesse' kélagkok.

1 Samuel 17:44

Axta aptáhak han apcháneya s'e: —¡Exegma', almésagkok sa' ko'o exchep aphápetek yaqwayam etawagkok ma'a máma, tén han ma'a aqsok nawha'ák éllo!

1 Samuel 17:46

Hegkések sa' ko'o exchep ma'a Wesse' egegkok, sakhem sa' ko'o waqhek xép, keñe sa' ma'a sẽlpextétamo nak filisteos aphopák, almésagkok yaqwayam etawagkok máma, tén han aqsok nawha'ák éllo. Keñe sa' ekyókxoho nélwanmeygkaxa kólya'asagkohok apha xama Dios ma'a Israel.