1 Samuel 15:33 - Biblia Enxet

³³ Axta aptáhak apcháneya Samuel se'e: —Sókwenaqte apagkok keñamak ekteméssesso meyke étchek ekxámokma agko' kelán'ák. Sa' han kólteméssesek ma'a egken nak xép, meyke étchek. Yetlókok axta han apkelyaqtennéyak Samuel apteméssesa nápakha'a apketkók ma'a ekpayho nak Guilgal, nápaqtók Wesse' egegkok.

1 Samuel 15:33 ပူးပေါင်းရင်းမြစ်များ

Génesis 9:6

“Apchaqhak sa' agkok pók énxet, énxet sa' nahan yaqhek ma'a, hakte apkelánamákpek axta énxet aphawo aptémakxa nak Dios.

1 Reyes 18:40

Keñe axta Elías aptáha apkeláneya s'e: —¡Kólma sa' Baal apkellegasso ekpeywa! ¡Nágkólho aqsa exyenmok xama enxoho! Apkelmeyk axta m'a énxet'ák, apnaqlókek axta Elías ma'a alwáta' nak Quisón, cha'a apkelnáhapwánxa axta han ma'a.

Éxodo 17:11

Xama axta apkelya'asa néten apaktegák ma'a Moisés, apnaqtawásegkók axta apkelenmexma m'a israelitas, maxta exnawo'; keñe axta apkelweykásento makham, ekpehewákxo apkelyennaqte m'a amalecitas.

Éxodo 21:24

Aplekkessek sa' agkok nahan aqtek, kóllekkesek sa' nahan apaqtek, apkelekkexchessek sa' agkok nahan am'ák, kólekkexchesek sa' nahan apma'ák, apyaqténchessek sa' agkok nahan aktog, kólyaqténchesek sa' nahan apaktog, apyaqténchessek sa' agkok nahan amnek, kólyaqténchesek sa' nahan apmenek,

Isaías 34:6

Kaltexneyxchek sa' éma m'a Wesse' egegkok sókwenaqte apagkok tén han pexmok, ektémól'a etekyók nepkések tén han yát'ay ma'a kélméssól'a yaqwayam etekyók. Elának sa' aqsok ektekyawa Wesse' egegkok ma'a Bosrá, nentekyawa ekyawe sa' elának ma'a tegma apwányam Edom.

Jeremías 18:21

¡Yána kaxwók eletsapok apketchek meyk élnapma, essenhan sókwenaqte kélyetxaqxo; tampe sa' katnahagkok ma'a apnaqteyegka'a nak, tén han meyke étchek! ¡Yána kalnápok negmasse m'a apkelennay'a nak énxet'ák apagkok, keñe sa' wokma'ák eletsapok kempakhakma!

Jeremías 48:10

(¡Aptaqnómap sa' etnehek énxet melane nak aptamheykha apmésso m'a Wesse' egegkok! ¡Aptaqnómap sa' etnehek énxet memáheyo nak yaqhek pók neyseksa kempakhakma!)

Oseas 6:5

Cháxa keñamak sekteméssesa nak kélnápakha'a kélketkók, eñama seyásenneykekxa m'a énxet'ák apkellegasso nak sekpeywa, sekpeywa keñamak sélnapma. Máxa élseyéxmal'a temék ekteyapma m'a ektémakxa nak ekpéwomo sektémakxa.

Números 14:45

Tén axta amalecitas, tén han cananeos apheykencha'a axta m'a yókxexma nak apkelanyexakmo, apmenxenchek axta israelitas ekweykekxoho m'a Hormá, apsawhawók axta anhan apkelnapa.

Jueces 1:7

Tén axta aptáha Adonisédec se'e: “Ko'o axta sekxók emonye' sélyaqténchesso apophék élyawe apmék ma'a setenta apkelwesse'e nak, tén han ma'a apophék élyawe apmagkok nak, éltémok axta chá'a ko'o eyekhamha sekto ekpalleykha m'a kóneg mésa ahagkok. Keñe kaxwo' setnéssesa ko'óxa Dios sekteméssessamakxa axta m'a énxet'ák nak.” Keñe axta kélyentamákxo m'a Jerusalén, cha'a apketsapweykekxexa axta han ma'a.

1 Samuel 10:8

Emyekxa sa' apmonye' m'a Guilgal, yaqwánxa sa' ólwetaxchekxak makham, yaqwayam agmések aqsok élwatnamáxche m'a, tén han aqsok ektekyawa ekyaqmageykekxa nak sẽlásekheykekxoho. Héleyx sa' ekweykmoho siete ekhem ma'a, ekwokmoho sekwákxo ko'o, keñe sa' altennaksek yaqwánxa elána'.

1 Samuel 15:32

Tén axta aptáha apcháneya Samuel se'e: —Héntegkásenta sa' Agag, wesse' apwányam nak Amalec. Axta han etnégwokmohok exma Agag apwokmo aphakxa Samuel, apkeneykek axta kamassegwokmok apmáheyo emátog.