1 Reyes 14:9 - Biblia Enxet

⁹ asagkók agko' exchep aptémakxa', megkaxnawok apkeltémakxa axta m'a apyókxoho apheykencha'a axta, metyapmakxa axta exchep; elókassegkek xép apkeláneya m'a mók aqsok kéláyókxa, tén han kéleykmássesso kélpeykáseykekxa nak sawo, ewanyémok han.

1 Reyes 14:9 ပူးပေါင်းရင်းမြစ်များ

1 Reyes 12:28

Yetlókok axta han apkeltémo kalanaxchek ánet weyke étkok kéleykmássesso sawo ekyátekto ekmomnáwa m'a wesse' apwányam, natámen ekteme élchetamso apwáxok xa ektáha nak, keñe aptáha apkeláneya énxet'ák se'e: “Israelitas, wánxa kólteme kélmeyeykekxa Jerusalén, hakte hágkaxwe kólmeyekxak ma'a. Keso aqsok kéláyókxa kélagkok se'e, ektáha axta élántekkesso m'a Egipto.”

1 Reyes 14:16

Ekxák sa' Wesse' egegkok ma'a énxet'ák Israel, eñama m'a aptémakxa axta apkelane mey'assáxma m'a Jeroboam, apkelánéseykegko axta melya'assáxma m'a israelitas.”

1 Reyes 14:22

Asagkek axta eyke aptémakxa Roboam nápaqtók Wesse' egegkok, lókassegkek axta, axta kaxnémok ektémakxa axta apkeláneyak melya'assáxma m'a apyapmeyk nano',

1 Reyes 15:29

Axta han kawenaqtémok apteme wesse' apwányam apkelnapma apyókxoho m'a Jeroboam apnámakkok. Apsawhomók axta Baasá m'a apyókxoho Jeroboam apnámakkok, méko axta apcháyam, ekhawo m'a aptémakxa axta apxeyenma Wesse' egegkok, apchásenneykekxo axta exének Ahías, apkeñama nak Siló.

1 Reyes 15:30

Jeroboam apkelane mey'assáxma keñamak ektéma xa, apkelánéseykegko axta melya'assáxma m'a israelitas, aplókassama m'a Wesse', Dios nak Israel.

1 Reyes 15:34

Asagkek axta eyke ektémakxa aqsok apkelane nápaqtók Wesse' egegkok ma'a Baasá, hakte hawók axta ektémakxa apkelane mey'assáxma m'a Jeroboam, apkelánéseykegko axta melya'assáxma m'a israelitas.

1 Reyes 16:25

Asagkek axta eyke aptémakxa Omrí nápaqtók Wesse' egegkok, asagkók agko' axta, axta kaxnémok ma'a apkeltémakxa axta m'a kelwesse'e apkelwányam apmonye'e axta,

1 Reyes 16:30

Asagkek axta aptémakxa nápaqtók Wesse' egegkok, asagkók agko' axta, axta kaxnémok ma'a apkeltémakxa axta m'a kelwesse'e apkelwányam apmonye'e axta,

1 Reyes 16:31

axta yeyék apkeláneya m'a ektémakxa axta apkeláneya mey'assáxma m'a Jeroboam, Nabat axta apketche. Weykmok axta han apma aptéma aptáwa' m'a Jezabel, Et-baal axta apketche, wesse' apwányam axta m'a Sidón, tén axta apkelpeykessamo m'a Baal,

1 Reyes 16:33

Apkeláneyak axta han xama kéleykmássesso Aserá, eklókassama axta m'a Wesse' egegkok, Dios nak Israel, axta kaxnémok chá'a aplókasso m'a apyókxoho kelwesse'e apkelwányam apmonye'e axta m'a Israel.

2 Reyes 21:3

apnaqxátekháseykegkokxeyk axta makham ma'a kélpeykessamókxa axta mók aqsok kéláyókxa', apmassésseyam axta m'a Ezequías, apyáp axta; apkelánegkek axta han kélwatnéssamakxa chá'a aqsok ma'a Baal, apkelanak axta han kéleykmássesso Aserá, ektémakxa axta apkeláneya m'a Ahab, wesse' apwányam axta Israel; apkelpeykessamók axta m'a ekyókxoho aqsok élápogwátéyak nak néten, apkeláyók axta han chá'a,

2 Reyes 23:26

Axta eyke kamassegweykmok aplo Wesse' egegkok, apkeltaqnaweykegkek axta makham ma'a énxet'ák Judá, eñama m'a ekyókxoho aqsok élmasagcha'a apkelane m'a Manasés, eklókassama axta m'a Wesse' egegkok.

2 Reyes 3:3

Hawók axta eyke ektémakxa axta apkelane mey'assáxma m'a Jeroboam, Nabat axta apketche, apkelánéseykegko axta melya'assáxma m'a énxet'ák nak Israel.

2 Crónicas 11:15

Apkelyéseykha axta han Jeroboam yaqwayam etnahagkok apkelmaxnéssesso aqsok kéláyókxa m'a kélpeykessamókxa nak, tén han kélpeykessamókxa m'a kelyekhama', keñe han ma'a weyke étkók kéleykmássesso apkeltémo axta kóllanaksek.

2 Crónicas 33:6

Apkelnapmeyk axta han apketchek apkelwatnama m'a ekyapwátegweykenxa nak xapop ma'a Ben-hinom, apkelwóneykha kélhagák axta aptemék, tén han apya'áseykegkoho aqsok ekpowásamaxche', tén han apkeltámésamap aptegye apmopwána, aptekkessegkek axta negásenneykekxa kélhagák, keñe han nenteme nak yohóxma. Asagkók agko' axta aqsok apkelane nápaqtók Wesse' egegkok, axta keñamak aplókassama Wesse' egegkok.

Nehemías 9:25

Apkelmomchek axta han ma'a tegma apkelyawe ekyennaqte nak kélhaxtegkesso nepyáwa', tén han ma'a xapop éltaqmalma nak, tén han tegma élláneykegkoho aqsok éltaqmela, yámelchet, tén han élámhakxa nak anmen yámet, tén han élámhakxa nak olivo yámet, tén han ma'a mók yámet ekha nak ekyexna; apteykegkek axta ekweykmoho apkelyaqkáneykmo, apnaqmelayak axta, tásek axta apheykha, eñama exchep apkelásekhayo.

Nehemías 9:26

“Axta eyke elyaheykekxohok xép ma'a, apkenmexeykekxeyk axta, apkelwanyeykha axta m'a segánamakxa apagkok nak. Apkelnapmeyk axta han ma'a xép apkeláneykha apkellegasso nak appeywa, megyésseykekxa axta apkelxéncháseykekxoho apkeltémakxa, apkeltémo axta elyo'ókxak makham xép; aplókassama apagko' axta exchep.

Salmos 106:29

Aplókáseykegkek axta Dios apkeláneykegko apkeltémakxa ekmaso, tén axta ekpayheykekxo nepyeseksa m'a negmasse ekmaso.

Salmos 50:17

megkalcha enxoho kélwáxok alxekmósagkok, tén han megkólámenyého enxoho m'a sekpeywa.

Salmos 78:40

¡Xámokmeyk axta melyaheykekxa m'a Dios, tén han apkelapwagkassesso apwáxok ma'a yókxexma meykexa nak énxet!

Salmos 78:56

Apkelyepkeynmeyk axta eyke chá'a m'a Dios Meyke nak Ekhémo, apkenmexeykekxo chá'a, axta elyeheykekxohok chá'a m'a apkeltémókxa axta etnahagkok;

Salmos 78:58

Aplókassegkek axta apkeláneykegko apkelwatnamakxa aqsok, apkelwatnéssamakxa chá'a aqsok ma'a mók aqsok kéláyókxa, tén han apkelpeykessamo m'a kéleykmássesso, aplókassegkek axta apkelmeyeykha.

Éxodo 34:17

“Nágkóleykmássesha agko' kéxegke aqsok kéláyókxa m'a sawo kélpeykeseykekxa nak kélhanma.

Jeremías 32:18

Apxekmóssegkek xép apkelásekhayo apxámokma apagko' énxet, ellegássesagkohok eyke han cha'a énxet'ák, eñama apkeláneyak melya'assáxma m'a apyapmeyk nak. Oh Dios apyennaqte tén han apteme apwányam apagko', Wesse' ekha apyennaqte exchep apwesey.

Jeremías 7:18

Yánchásekxak chá'a yántapák ma'a kélketchek, keñe apyapmeyk yáléwaksek chá'a táxa, tén kelán'ák kalyélaqtések chá'a hótáhap yaqwayam kalanagkok kelpasmaga pók aptémakxa, élmésso chá'a m'a aqsok kéláyókxa kelwána kéltéma nak ‘Wesse' Ekwányam eñama Néten’. Elókassegkek nahan chá'a ko'o apkelméssama vino m'a aqsok kéláyókxa éleñama nak mók nekha.

Jeremías 7:26

Makke kéxegke hélyeheykekxoho', mehélháxenmók nahan, kélyánchesseykmók aqsa élyennaqte kélwáxok, kélyeykhásseykmók ma'a kélyapmeyk nano' axta.

Ezequiel 23:35

“Cháxa keñamak sektáha nak ko'o sekpeywa s'e, sektáha nak Wesse': Payhawók xeye' kañegkohok eñama ekmámenyého katnegwomhoxma tén han ektémakxa megkamasexta, hakte megkaxeyenmak ko'o exche' awáxok, massegkek sélányo.”

Ezequiel 8:17

Tén axta aptáha seyáneya Wesse' egegkok se'e: “¿Apwet'aya? ¡Megkalleklámeykegkok apkelánegweykta chá'a énxet'ák Judá aqsok ekmaso agko' se'e kañe' nak, apsawheyáseykekxók apchókxa m'a negyennaqteyáseykha nak egyempehek! Megkamassegweykmok selókáséyak, etekhanchessegkek chá'a m'a apkeltémakxa ekmanyása.

Ezequiel 8:3

Apya'asakmek axta énxet ekho kélmek, apkelmeyk axta éwa'. Tén axta Dios apmopwána sey'ásekxo néten, éntamákxeyk axta Jerusalén ma'a aqsok sexekmóssamo axta Dios, exnessákxeyk axta m'a nentaxnamakxa nak átog étkok apwáxok ma'a tegma apwányam, ekpayho nak nexcheyha, ekyetnamakxa axta m'a aqsok kéleykmássesso eklókassamól'a m'a Wesse' egegkok.

Levítico 19:4

“Nágkólyo'ókxa aqsa chá'a m'a aqsok kéleykmássesso, nágkóllána han aqsok kéláyókxa m'a sawo ekmope kélpeykáseykekxohol'a. Ko'o sekteme Dios Wesse' kélagkok.

Deuteronomio 32:21

Elókassegkek ma'a xama aqsok kéláyókxa megkatnaha nak Dios, elókassegkek ma'a aqsok apcháyókxa élmowancha'a amya'a nak; ¡Wának sa' eyke nahan ko'o kólnathak kéxegke m'a pók énxet'ák melya'áseyak nak Dios, wának sa' kóltaqnaweygkok ko'o kéxegke m'a énxet'ák megkalmopmenyého nak elya'asagkohok aqsok!

Deuteronomio 9:24

¡Nanók axta kéltémakxa kéxegke kélenmexeykekxa chá'a Wesse' egegkok, eyeynamo m'a sekxók axta sélweteya ko'o!

Jueces 5:8

“Yetneyk axta chá'a apkelyéseykha kaxwe aqsok apcháyókxa, neyseksa émpakhamaxche m'a nekha atña'ák nak tegma apwányam, méko axta eyke xama enxoho apmeykha apcháhakkásamap tén han sawhéwa nepyeseksa m'a cuarenta mil israelitas.