1 Reyes 10:10 - Biblia Enxet

¹⁰ Tén axta élmésa wesse' apwányam tres mil novecientos sesenta kilos ma'a sawo élyátekto élmomnáwa, tén han ekxámokma agko' ma'a sokmátsa, tén han meteymog élyenma éltaqmalma. Axta kaweykmok ekxámokma Israel ma'a ekwánxa axta ekxámokma sokmátsa, élmésa wesse' ekwányam eñama nak Sabá m'a wesse' apwányam Salomón.

1 Reyes 10:10 ပူးပေါင်းရင်းမြစ်များ

Génesis 43:11

Keñe axta apyáp aptáha apchátegmowágko s'e: —Kólteme sa' se'e ektáha nak, méko antéhek: kólxatmák sa' yágkentamáhak kélagkok aqsok yaqwayam kólmések aqsa m'a énxet nak. Kólsow sa' ma'a éltaqmalma élánamáxche negókxa, cham'a élmátsessamo nak ekpaqneyam aqsok, tén han yányawhéna' apyegmenek, tén han sokmátsa, tén han ma'a yámet ánek ekmátsa nak ekpaqneyam, tén han ma'a mokwa, tén han ma'a pók aptémakxa nak mokwa.

1 Reyes 9:14

Tres mil novecientos sesenta kilos axta weykmok sawo ekyátekto ekmomnáwa, apkeláphássesso axta Hiram ma'a wesse' apwányam Salomón.

Salmos 68:29

Keñe m'a tegma appagkanamap apagkok netno' nak, cham'a Jerusalén, apkelseykekxéssamakxa nak chá'a apkelmésso naqsa aqsok ma'a kelwesse'e apkelwányam,

Salmos 72:10

¡Elsókásegmak sa' apkelmésso naqsa aqsok, tén han apcháncheseykekxa m'a kelwesse'e nak Tarsis, tén han ma'a egkexe étkók nak, tén han ma'a kelwesse'e apkelwányam nak Sabá, tén han ma'a Sebá!

Salmos 72:15

¡Memassegwomek sa' chá'a wesse' apwányam! ¡Kólmések sa' sawo ekyátekto ekmomnáwa éleñama nak Sabá! ¡Kólmaxnéssesek sa' chá'a Dios ma'a! ¡Megkamassegwomek sa' chá'a appasmo Dios!

Éxodo 30:34

Aptáhak axta Wesse' egegkok apcháneya Moisés se'e: “Exnésho sa' nahan ekwánxa exchek aptegye aqsok élmátsa nak élpaqneyam se'e mók aqsok élmátsa nak élpaqneyam: yámet agye', aqsok aphék ekmátsa nak ekpaqneyam, tén han ma'a aqsok ekmátsa nak ekpaqneyam éten agkok, tén han ma'a yámet gálbano agye' ekmátsa nak ekpaqneyam.

Proverbios 20:15

Tásók agko' appeywa m'a énxet appaqmeyesmo nak chá'a yetlo apya'áseykegkoho, yeykhásseykmók ma'a sawo ekyátekto ekmomnáwa, tén han ma'a aqsok élyenméyak ekhágko nak se'e ekyókxoho nélwanmeygkaxa nak.

Eclesiastés 2:8

Ekxámassegkek axta sawo ekyátekto élmomnáwa, tén han ma'a sawo ekmope élmomnáwa nak, tén han ma'a aqsok élmomnáwa nak, cham'a apkelmeykencha'a axta m'a pók apkelwesse'e nak, tén han ma'a éleñama axta mók yókxexma. Yetneyk axta apkelmeneykmasso ahagkok, tén han élmeneykmasso, tén han ma'a aqsok apyespagko nak chá'a énxet; xámok axta han kelán'a sélmeykha naqsa.