JOEL 2:17 - Edisana ñwed Abasi Ibom

¹⁷ Yak mme oku, mme anam-ŋkpɔ Jehovah, etua eyet ke ufɔt etehe ye itie-uwa; yak mmɔ enyuŋ edɔhɔ ŋko, ete, O Jehovah tua ikɔt fo mbɔm, kunyuŋ uda udeme fo usin ke ŋkpɔ but, man mme idut ekara mmɔ: mmɔ ekpenam didie edɔhɔ ke otu mme idut, ete, Enye Abasi mmɔ?

JOEL 2:17 ပူးပေါင်းရင်းမြစ်များ

1 NDIDEM 6:3

Ndien uniɔŋ etehe emi odude ke iso temple ufɔk edi ibio idomo-okuk edip, ekem ye ubom ufɔk; ubom esie onyuŋ edi ibio idomo-okuk duop ke iso ufɔk.

1 NDIDEM 9:7

ndien nyesibe Israel mfep ke iso isɔŋ emi ŋkɔnɔde mmɔ; ndien ama edi ufɔk emi ŋkonimde nnɔ enyiŋ mi, nyemen enye ke iso mi mfep nduɔk; ndien Israel eyedi ŋkpɔ ikwɔ ye ufiet ke otu kpukpru owo;

2 CHRONICLES 7:20

ndien nyedibere mmɔ mfep ke isɔŋ emi ŋkɔnɔde mmɔ; nyenyuŋ mmen ufɔk emi nnamde nnɔ enyiŋ mi, ke iso mi mfep nduɔk, nnyuŋ nnam enye akabare edi ikwɔ ye ufiet ke otu kpukpru mme idut.

2 CHRONICLES 8:12

Ndien Solomon awa edifɔp uwa ɔnɔ Jehovah ke enyɔŋ itie-uwa Jehovah oro enye ɔkɔdiɔkde ke iso etehe,

NEHEMIAH 9:36

Sese, nnyin idi ifin mfin emi, ndien ama edi isɔŋ emi afo ɔkɔnɔde mme ete nnyin, ete edia mfri esie, ye mfɔn esie, sese, nnyin idi ifin ke esit:

ŊWED MME PSALM 115:2

Mme idut ekpedɔhɔ didie, ete, Enye Abasi mmɔ, ndien?

ŊWED MME PSALM 42:10

Nte ŋkpɔ eke enuakde mi ɔkpɔ, kpa ntre ke mme asua mi esuene mi: ke mmɔ edɔhɔde mi ofuri usen, ete, Enye Abasi fo?

ŊWED MME PSALM 42:11

O ukpɔŋ mi, nsinam afo ɔfuhɔde? Nsinyuŋ inam afo etimerede mi ke idem? Dori enyin ye Abasi: koro nyesuk ntoro enye, kpa erinyaŋa iso mi, ye Abasi mi.

ŊWED MME PSALM 42:3

Mmɔŋeyet mi edi udia mi ke uwemeyo ye ke okoneyo, ke mmɔ esuk edɔhɔde mi, ke ofuri usen, ete, Enye Abasi fo?

ŊWED MME PSALM 42:4

Nyeti ŋkpɔ emi, nnyuŋ ŋŋwaŋa ukpɔŋ mi ke idem mi, ke ini ndisaŋade ke akwa otu owo, ntiene mmɔ ŋka ke ufɔk Abasi, ke mkpo idara ye ekɔm, ke otu akwa udim eke enimde ederi.

ŊWED MME PSALM 74:10

O Abasi adaŋa didie ke usua edisuŋi? Nte owo utɔk edisuene enyiŋ fo ke nsinsi?

ŊWED MME PSALM 79:10

Mme idut enam didie edɔhɔ ete, Enye Abasi mmɔ? Nam mme idut ke iso nnyin efiɔk usiene iyip ikɔt fo emi eduɔkde.

ŊWED MME PSALM 79:4

Nnyin imakabare idi se mbɔhiduŋ nnyin esuenede, ye se mmɔ emi ekande nnyin ekuk, esakde, enyuŋ esede ke ndek.

ŊWED MME PSALM 89:41

Kpukpru mmɔ eke esaŋade ke usuŋ ebe ebume enye: enye edi se mbɔhiduŋ esie esuenede.

ŊWED MME PSALM 89:51

emi mme asua fo edade esuene, O Jehovah; emi mmɔ edade esuene ikpat ukot Messiah fo.

EXODUS 34:9

Enye onyuŋ ɔdɔhɔ ete, Mbɔk, edieke afo enende iso ye ami, O Ɔbɔŋ, mbɔk, yak Ɔbɔŋ mi asaŋa ke otu nnyin; koro mmɔ edide mbon nsɔŋibuot; nyuŋ fen ukwaŋ-ŋkpɔ nnyin, ye idiɔk ido nnyin, nyuŋ da nnyin nim ke udeme fo.

ISAIAH 22:12

Ndien ke usen oro Ɔbɔŋ Jehovah mme udim okot eyet, ye eseme, ye ibɔ, ye ukune ɔfɔŋ-ikpo.

ISAIAH 37:20

Mbɔk, ndien, O Jehovah Abasi nnyin, nyaŋa nnyin sio ke ubɔk esie, ndien kpukpru mme idut ererimbot eyefiɔk ete ke afo ikpɔŋ-ikpɔŋ edi Jehovah.

EZEKIEL 20:9

Ndien ŋkanam ntre mbaŋa enyiŋ mi, man ekusabare mi ke enyin mme idut emi mmɔ edude ke otu mmɔ, emi ŋwutde mmɔ idem mi ke iso mmɔ, man nsio mmɔ ke isɔŋ Egypt mfep.

EZEKIEL 8:16

Ndien enye ada mi oduk ke esit esa okure ufɔk Jehovah, ndien, sese, ubɔk owo edip ye ition ke enyin-usuŋ temple Jehovah eda ke ufɔt etehe ye itie-uwa, ekpa edem enɔ temple Jehovah, iso mmɔ enyuŋ ese edem usiaha-utin: ndien mmɔ etuak ibuot enɔ utin ese edem usiaha-utin.

HOSEA 14:2

Mbufo emen ikɔ mbufo efiak etiene Jehovah: edɔhɔ enye, ete, Men kpukpru idiɔk-ŋkpɔ fep, nyuŋ da eti: ndien nnyin iyenɔ fi uwa mkpɔk-inua nnyin.

JOEL 1:13

Mbufo mme oku ebɔbɔ mbɔbɔ, enyuŋ etuaŋa: mbufo mme anam-ŋkpɔ itie-uwa eseme: mbufo mme anam-ŋkpɔ Abasi mi edi edina ke ɔfɔŋ-ikpo ke ofuri okoneyo: koro ebɔde ufɔk Abasi mbufo inuak-udia ye uwa ediŋwɔŋ-ŋkpɔ efep.

JOEL 1:9

Emesibe inuak-udia ye uwa ediŋwɔŋ-ŋkpɔ ke ufɔk Jehovah efep; mme oku, mme anam-ŋkpɔ Jehovah, eseme.

AMOS 7:2

Ndien edikem adaŋemi mmɔ ema eketa ofuri mbiet isɔŋ ema, ami ndɔhɔ, nte, Mbɔk, Ɔbɔŋ Jehovah, dahado: Jacob edinam didie adaha ada? koro enye emekpri.

AMOS 7:5

Ndien ndɔhɔ, nte, Ɔbɔŋ Jehovah, mbɔk, tre: Jacob edinam didie adaha ada? koro enye emekpri.

MICAH 7:10

Ndien usua mi eyekut, ndien but eyefuk enye emi ɔkɔdɔhɔde mi, ete, Jehovah Abasi fo odu mmɔŋ? Enyin mi eyekut enye: ke emi enye eyedi se edigide nte mbat aŋwa.

MALACHI 1:9

Ke emi, mbɔk, mbufo ekpe Abasi ubɔk, ete, enye atua nnyin mbɔm: ŋkpɔ emi oto mbufo ke ubɔk: nte enye edikpono mbufo iso? Jehovah mme udim ɔdɔhɔ.

NUMBERS 25:6

Ndien, sese, owo Israel kiet ada ŋwan a Midian kiet etiene nditɔ ete esie ke iso Moses, ye ke iso ofuri esop nditɔ Israel, emi etuaŋade eyet ke enyin-usuŋ efe esop.

MATTHEW 23:35

man ofuri edinen iyip emi eduɔkde ke isɔŋ ɔkpɔkɔbɔ mbufo, ɔtɔŋɔde ke iyip edinen Abel, tutu osim iyip Zachariah, eyen Barachiah, emi mbufo ekowotde ke ufaŋ emi odude ke ufɔt temple ye itie-uwa.

MATTHEW 27:43

Enye ɔbuɔt idem ye Abasi: yak Abasi anyaŋa Enye idaha emi, edieke oyomde Enye. Koro Enye ɔkɔdɔhɔ ete, Ndi Eyen Abasi.

DEUTERONOMY 28:37

Ndien afo eyedi ŋkpɔ mkpa-idem, ye ikwɔ, ye ufiet ke otu kpukpru mme idut eke Jehovah adade fi aka do.

DEUTERONOMY 32:27

ke mmeŋkpefeheke iyaresit mbon usua, mbak mme andikɔbɔ mmɔ ekpedue, mbak mmɔ ekpedɔhɔ ete, Ubɔk nnyin okokoŋ, inyuŋ idige Jehovah akanam kpukpru ŋkpɔ emi.

JOSHUA 7:9

Mme Canaanite ye kpukpru mme andiduŋ isɔŋ emi, eyenyuŋ ekop, enyuŋ ekan nnyin ekuk, enyuŋ esibe enyiŋ nnyin ke isɔŋ efep: ndien afo edinam didie ye akwa enyiŋ fo?