JOEL 2:12 - Edisana ñwed Abasi Ibom

¹² Jehovah onyuŋ ɔdɔhɔ ke emi ŋko, ete, Mbufo efiak etiene mi ke ofuri esit mbufo, ye ke utre-udia, ye ke ntua-eyet, ye ke eseme:

JOEL 2:12 ပူးပေါင်းရင်းမြစ်များ

2 SAMUEL 24:10

Ekem esit ɔtɔ David, ke enye ama akabat mbio-obio ntre. David onyuŋ ɔdɔhɔ Jehovah, ete, Mmanam idiɔk eti-eti ke se ŋkanamde: edi, mbɔk Jehovah, kam dahado ke idiɔk ido owo fo; koro mmanam ndisime ido eti-eti.

2 CHRONICLES 30:6

Ndien mbon-itɔk ebɔ edidem ye ikpɔ owo esie ŋwed, esaŋa ke ofuri Israel ye Judah, ndien mmɔ edɔhɔ kpa nte edidem eketemede, ete, Mbufo nditɔ Israel, efiak edem etiene Jehovah Abasi Abraham, ye Isaac, ye Israel, ndien enye eyefiak etiene mbufo emi esuhɔde, emi ebɔhɔde ndidem Assyria ke ubɔk.

2 CHRONICLES 6:27

tie ndien ke enyɔŋ kop, nyuŋ dahado ke mme idiɔk ido ifin fo, ye eke ikɔt fo Israel, adaŋemi afo etemede mmɔ eti usuŋ, emi mmɔ ekpesaŋade ke esit; nyuŋ nam edim edep ke isɔŋ fo emi afo ɔkɔnɔde ikɔt fo ke udeme.

ESTHER 4:16

Ka kobon kpukpru mme Jew emi edude ke Shushan, mbufo enyuŋ etre udia ebaŋa mi, ekunyuŋ edia ŋkpɔ, ekunyuŋ eŋwɔŋ ke usen ita, ke okoneyo, ye ke uwemeyo, ami ye nditɔ-iban mi ŋko iyetre udia kpa ntre; ndien ntem ke ndiduk ke ɔtɔ edidem, eke misaŋake ke ewuhɔ; ndien mma ŋkpa yak ŋkpa.

EXODUS 33:5

Koro Jehovah ɔkɔdɔhɔde Moses, ete, Dɔhɔ nditɔ Israel, ete, Mbufo edi mbon nsɔŋibuot; ŋkpasaŋa ke otu mbufo ini esisit, ŋkposobo mbufo; esioŋo ndien ŋkpɔ mbana mbufo ke idem efep, man mfiɔk se ndinamde mbufo.

ISAIAH 22:12

Ndien ke usen oro Ɔbɔŋ Jehovah mme udim okot eyet, ye eseme, ye ibɔ, ye ukune ɔfɔŋ-ikpo.

ISAIAH 58:4

Sese, mbufo etre udia ke utɔk ye eŋwan, man enyuŋ etop ita idiɔk-ŋkpɔ: mbufo ekutre udia kpa nte ke mfin emi, ke enam ekop uyo mbufo ke enyɔŋ.

JEREMIAH 3:22

Mbufo nditɔ mfiakedem efiak edi, ndien ami nyekɔk mfiakedem mbufo. “Sese, nnyin itiene fi, koro afo edide Jehovah Abasi nnyin.

JEREMIAH 36:7

Mme mmɔ eyesuhɔre idem mmɔ eseme ke iso Jehovah, kpukpru mmɔ enyuŋ efiak edem ekpɔŋ idiɔk usuŋ mmɔ: koro iyaresit ye ifuresit emi Jehovah ɔkɔdɔhɔde abaŋa mbio-obio emi ekponde.

JEREMIAH 4:1

JEHOVAH ɔdɔhɔ ete, O Israel, afo ama afiak edi, fiak tiene mi: ama onyuŋ emen ŋkpɔ mbubiam fo ke iso mi efep, afo udusehekede.

JEREMIAH 4:2

Afo onyuŋ ɔŋwɔŋɔ ete, Ma Jehovah, ke akpanikɔ ye ke ikpe ye ke edinen ido; ndien mme idut eyeda Enye ediɔŋ idem-mmɔ, enyuŋ ebure mbure ke Enye.

EZEKIEL 33:11

Dɔhɔ mmɔ, ete, Ɔbɔŋ Jehovah ɔdɔhɔ, ete, Ma uwem mi, mkpa idiɔk owo inemke mi esit, edi idiɔk owo akam akabare ɔkpɔŋ usuŋ esie, ndien odu uwem: mbufo, O ufɔk Israel, ekabare, ekabare; koro nsinam mbufo ekpekpaŋa?

DANIEL 9:3

Ndien ŋwuk iso mi nse Ɔbɔŋ Abasi, nnyuŋ nyom mkpe-ubɔk, ye eseme, ye utre-udia, ye ɔfɔŋ-ikpo, ye ntɔŋ:

HOSEA 12:6

Afo ndien fiak tiene Abasi fo: nim ima ye ikpe, nyuŋ dori enyin ye Abasi fo kpukpru ini.

HOSEA 12:7

Owo urua! nsu-nsu udomo ŋkpɔ edu enye ke ubɔk: enye amama owo ndituk.

HOSEA 14:1

O ISRAEL, fiak tiene Jehovah Abasi fo: koro afo ɔmɔduɔ ke idiɔk ido fo.

HOSEA 6:1

MBUFO edi, nnyin inyɔŋ itiene Jehovah: koro edi enye akawai, ndien enye eyekɔk nnyin: edi enye okoyibi, ndien enye eyebɔp nnyin.

JOEL 1:13

Mbufo mme oku ebɔbɔ mbɔbɔ, enyuŋ etuaŋa: mbufo mme anam-ŋkpɔ itie-uwa eseme: mbufo mme anam-ŋkpɔ Abasi mi edi edina ke ɔfɔŋ-ikpo ke ofuri okoneyo: koro ebɔde ufɔk Abasi mbufo inuak-udia ye uwa ediŋwɔŋ-ŋkpɔ efep.

ZECHARIAH 7:3

enyuŋ edɔhɔ mme oku emi edude ke ufɔk Jehovah mme udim, ye mme prophet ŋko, ete, Nte nyesuk ntua eyet ke ɔyɔhɔ ɔfiɔŋ ition, nnyuŋ ndianare idem mi mfep, nte ŋkanamde ediwak isua emi?

ZECHARIAH 7:5

Dɔhɔ ofuri mbon isɔŋ ye mme oku, ete, Ke ini mbufo etrede udia, enyuŋ etuade ke ɔyɔhɔ ɔfiɔŋ ition, ye ke ɔyɔhɔ ɔfiɔŋ itiaba, ke ofuri isua ata ye duop emi, nte mbufo eketre udia enɔ mi, kpa mi?

MALACHI 1:9

Ke emi, mbɔk, mbufo ekpe Abasi ubɔk, ete, enye atua nnyin mbɔm: ŋkpɔ emi oto mbufo ke ubɔk: nte enye edikpono mbufo iso? Jehovah mme udim ɔdɔhɔ.

UTOM MME APOSTLE 26:20

edi mbem kaŋa iso ŋkwɔrɔ nnɔ mbon Damascus, ye mbon Jerusalem, ye ofuri isɔŋ Judaea, ye mme Gentile nde, nte mmɔ ekabare esit ewɔŋɔre etiene Abasi, enyuŋ enam utom eke odotde erikabare esit.

JUDGES 2:4

Edikem, ke ini angel Jehovah eketiŋde ikɔ emi ɔnɔ kpukpru nditɔ Israel, kpukpru owo emenere uyo mmɔ etua eyet.

JUDGES 20:26

Ndien kpukpru nditɔ Israel ye kpukpru owo edɔk eka Beth-el eketua eyet, enyuŋ etie do ke iso Jehovah, enyuŋ etre udia ke usen oro, tutu osim mbubreyo: mmɔ enyuŋ ewa edifɔp uwa ye uwa emem ke iso Jehovah.

1 SAMUEL 7:3

Ndien Samuel ɔdɔhɔ ofuri ufɔk Israel, ete, Edieke mbufo ekabarede etiene Jehovah ke ofuri esit mbufo, esioŋe ndien isen abasi mme Ashtaroth ke otu mbufo efep, enyuŋ ewuk esit mbufo etiene Jehovah, enyuŋ enam ŋkpɔ enɔ enye ikpɔŋ-ikpɔŋ: ndien enye eyenyaŋa mbufo osio mme Philistine ke ubɔk.

1 SAMUEL 7:6

Ndien mmɔ eka ekesop idem ke Mizpah, enyuŋ ekoi mmɔŋ, eŋwaŋa ke iso Jehovah, enyuŋ etre udia ke usen oro, enyuŋ edɔhɔ do, ete, Nnyin imedue Jehovah. Ndien Samuel ekpe ikpe nditɔ Israel ke Mizpah.