13 Koro Jehovah ɔdɔhɔde, ete, Mmotomo idem mi, nte ke Bozrah eyekabare edi ŋwure, ye esuene, ye nsobo, ye isuŋi: kpukpru mme obio esie eyenyuŋ edi nsinsi nsobo.
Jehovah emenyene ofut, enye ɔmɔyuhɔ iyip, emeyere aran ikpɔŋ-unam, ke iyip nditɔ-erɔŋ ye eke okpo ebot, ke aran ekput okukim: koro Jehovah enyenede uwa ke Bozarah, ye akamba eriwot ke isɔŋ Edom.
ANIE edi emi otode ke Edom edi? Esine ediyibe ɔfɔŋ-idem oto ke Bozrah? Enye emi esinede ɔfɔŋ-idem ubɔŋ, ke asaŋa ke uwak odudu esie? Edi ami, emi ndɔhɔde nte enende, nsɔŋɔ ke erinyaŋa.
Ɔbɔŋ Jehovah otomo idem esie, ete, Ntem ke Jehovah Abasi mme udim ɔdɔhɔ, ete, Ami nse iseri Jacob ke mbubiam, nnyuŋ nsua ikpɔ ufɔk esie: ndien nyeda obio ye se iyɔhɔde ke esit nyak nnɔ.
Ndien ufɔk Jacob eyedi ikaŋ, ufɔk Joseph eyenyuŋ edi edeme-ikaŋ, ufɔk Esau eyenyuŋ edi mbio, ndien mmɔ eyesak ke esit, enyuŋ eta mmɔ; ndien baba ŋkpɔ kiet idisuhɔke inɔ ufɔk Esau; koro Jehovah ɔdɔhɔ.