AMOS 9:14 - Edisana ñwed Abasi Ibom

¹⁴ Ndien nyeda ikɔt mi Israel emi eketaŋde efep nnyɔŋ ndi: ndien mmɔ eyebɔp mme obio emi enade ikpikpu, ndien eduŋ (ke esit); mmɔ eyenyuŋ etɔ iŋwaŋ-vine, enyuŋ eŋwɔŋ wine mmɔ: enyuŋ enam iŋwaŋ, ndien edia mfri mmɔ.

AMOS 9:14 ပူးပေါင်းရင်းမြစ်များ

ŊWED MME PSALM 107:37

Enyuŋ esuan mkpasip ke iŋwaŋ, enyuŋ etɔ iŋwaŋ-vine, ndien mmɔ esioŋo mbuŋwum ŋkpɔ.

ŊWED MME PSALM 53:6

Erinyaŋa Israel akpakam oto ke Zion! Ke adaŋemi Abasi adade ikɔt esie emi eketaŋde efep afiak edi, Jacob eyebre, Israel eyedara.

ISAIAH 60:4

Menere enyin fo kabare kuk, nyuŋ se; kpukpru mmɔ ebono edi ke ɔtɔ fo: nditɔ-iren fo eyeto ke anyan ebiet edi, eyenyuŋ ebiom nditɔ fo iban ke ŋkaŋ.

ISAIAH 61:4

Ndien mmɔ eyebɔp ŋwure ebiet eset, eneŋere akani nsobo, eyenyuŋ ediɔŋ mme obio eke ebiarade, mme nsobo ediwak emana.

ISAIAH 65:21

Ndien mmɔ eyebɔp ufɔk enyuŋ eduŋ ke esit: eyenyuŋ etɔ iŋwaŋ-vine, enyuŋ edia mfri mmɔ.

JEREMIAH 12:15

Ndien ama ekem ke adaŋemi ndiberede mmɔ mma, nyetɔŋɔ ntak ntua mmɔ mbɔm, nnyuŋ nda mmɔ mfiak kiet kiet ke udeme mmɔ, ye kiet kiet ke obio mmɔ.

JEREMIAH 16:15

Edi, “ma uwem Jehovah emi akadade nditɔ Israel ke edem edere, ye ke kpukpru mme idut eke enye ekebinde mmɔ, ɔdɔk”: ndien nyeda mmɔ mfiak ke isɔŋ mmɔ emi ŋkɔnɔde mme ete mmɔ.

JEREMIAH 23:8

edi eyedɔhɔ ete, Ma uwem Jehovah emi okosiode ubon ufɔk Israel efep ke isɔŋ edere, ye ke kpukpru mme idut eke ŋkebinde mmɔ nsin do, ada ɔdɔk; ndien mmɔ eyeduŋ ke isɔŋ mmɔ.

JEREMIAH 24:6

Nyenyuŋ ŋwuk enyin nse mmɔ ke mfɔn, nnyuŋ nda mmɔ mfiak ke isɔŋ emi: nnyuŋ mbɔp mmɔ, ndien ŋwurike, nnyuŋ ntɔ mmɔ ke isɔŋ, ndien ndibekede.

JEREMIAH 29:14

Jehovah ɔdɔhɔ, ete, Mbufo eyenyuŋ ekut mi; ndien ami nyeyak mbufo eto ke itie mbuot-ekɔŋ enyɔŋ edi, nnyuŋ ntaŋ mbufo ke kpukpru mme idut, ye ke kpukpru ebiet eke mbinde mbufo nsin do, ndibon, Jehovah ɔdɔhɔ; nyenyuŋ nda mbufo mfiak ndi ke ebiet eke ŋkayakde mmɔ etaŋ mbufo ke esit efep.

JEREMIAH 30:18

Ntem ke Jehovah ɔdɔhɔ, ete, Sese, ami nyeda mme tent Jacob emi eketaŋde efep mfiak ndi, nnyuŋ ntua iduŋ esie mbɔm; eyenyuŋ ebɔp obio ke obot esiemɔ, ndien ufɔk edidem eyetie nte enye akam esitiede.

JEREMIAH 30:3

Koro, sese, ini ke edi, Jehovah ɔdɔhɔ, ndien nyeda ikɔt mi Israel ye Judah emi eketaŋde efep mfiak ndi, Jehovah ɔdɔhɔ: nyenyuŋ nda mmɔ nnyɔŋ ndi ke isɔŋ emi ŋkɔnɔde mme ete mmɔ, ndien mmɔ eyeda enye enyene.

JEREMIAH 31:23

Ntem ke Jehovah mme udim Abasi Israel ɔdɔhɔ, ete, Mmɔ eyesuk edɔhɔ ikɔ emi ke isɔŋ Judah, ye ke mme obio esie, ke ini ndidade mmɔ ke itie-mbuot-ekɔŋ mfiak ndi, ete, Jehovah osuk ɔdiɔŋ fi, O iduŋ eti ido, O edisana obot.

JEREMIAH 31:28

Jehovah onyuŋ ɔdɔhɔ, ete, Ama ekem, kpa nte ŋkpemede mbaŋa mmɔ, man ndibere, nnyuŋ ŋwuri nnyuŋ nsobo, nnyuŋ mbiat, nnyuŋ ntuk: kpasuk ntre ke ndikpeme mbaŋa mmɔ, man mbɔp nnyuŋ ntɔ.

JEREMIAH 31:5

Afo eyetɔŋɔ ntak ɔtɔ iŋwaŋ-vine ke ikpɔ obot Samaria: mme anditɔ eyetɔ, enyuŋ edia mfri:

JEREMIAH 32:15

Koro ntem ke Jehovah mme udim Abasi Israel ɔdɔhɔ ete, Eyetɔŋɔ ntak edep ufɔk ye iŋwaŋ ye iŋwaŋ-vine ke isɔŋ emi.

JEREMIAH 32:37

sese, ami nyetaŋ mmɔ ke kpukpru mme idut emi ŋkebinde mmɔ nsin do, ke iyaresit mi, ye ke ifuresit mi, ye ke akwa ikpahesit, mbon; ndien nda mmɔ mfiak ke ɔtɔ emi, nnyuŋ nyak mmɔ eduŋ ke ifure.

JEREMIAH 33:11

ke eyekop uyom idara, ye uyom mbre, ye uyo ɔdɔ ŋwan, ye uyo ŋwan ndɔ, ye uyo mmɔ eke edɔhɔde, ete, “Mbufo etoro Jehovah mme udim: koro Jehovah ɔfɔnde; koro ima esie ebigide ke nsinsi”: ye eke mmɔ emi edade ekɔm edi ke ufɔk Jehovah. Koro ami nyeda nditɔ isɔŋ emi eketaŋde efep mfiak ndi, kpa nte akpa; ke edi Jehovah ɔdɔhɔ.

JEREMIAH 33:7

Nyenyuŋ nda nditɔ Judah ye nditɔ Israel emi eketaŋde efep mfiak ndi, nnyuŋ mbɔp mmɔ kpa nte akpa.

EZEKIEL 16:53

Ndien ami nyeyak mbon ntaŋ-mfep mmɔ efiak, kpa mbon ntaŋ-mfep Sodom ye nditɔ-iban esie, ye mbon ntaŋ-mfep Samaria, ye nditɔ-iban esie, ye ntaŋ-mfep ke otu mbon ntaŋ-mfep fo ke otu mmɔ ŋko:

EZEKIEL 28:26

Ndien mmɔ eyeduŋ ke esit ke ifure, enyuŋ ebɔp ufɔk, enyuŋ etɔ iŋwaŋ-vine, enyuŋ eduŋ ke ifure, ke ini ndinamde ikpe ye kpukpru mmɔ eke etode ke ŋkan-ŋkuk ese mmɔ ke ndek; ndien mmɔ eyefiɔk ete ke ami ndi Jehovah Abasi mmɔ.

EZEKIEL 37:21

Ndien dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nda nditɔ Israel mfep ke otu mme idut emi mmɔ esaŋade do, nnyuŋ ntaŋ mmɔ ke ŋkanŋkuk mbon, nnyuŋ nda mmɔ ndi ke isɔŋ mmɔ;

EZEKIEL 39:25

Mmɔdo ntem ke Ɔbɔŋ Jehovah ɔdɔhɔ ete, Ke emi ke ndida nditɔ Jacob emi eketaŋde efep, mfiak ndi, nnyuŋ ntua ofuri ufɔk Israel mbɔm, nnyuŋ mfibe ufup mbaŋa edisana enyiŋ mi;

AMOS 5:11

Mmɔdo, koro mbufo edigide mbon unana, enyuŋ ebɔde mmɔ utomo ibokpot: mbufo ebɔp ufɔk ke ndisɔi itiat, edi ididuŋke ke esit; enyuŋ etɔ edifɔn iŋwaŋ-vine, edi idiŋwɔŋke wine mmɔ.

ZEPHANIAH 1:13

Ndien inyene mmɔ eyeka-bare edi se ebumede, mme ufɔk mmɔ eyenyuŋ ewure: ndien mmɔ eyebɔp ufɔk, edi ididuŋke; eyenyuŋ etɔ iŋwaŋ-vine, ndien idiŋwɔŋke wine mmɔ.

ZEPHANIAH 2:7

Mben inyaŋ eyenyuŋ enyene ufɔk Judah eke ɔsuhɔde; mmɔ eyedia ŋkpɔ ke esit: ke ufɔk Ashkelon mmɔ eyesuhɔre ena ke mbubreyo: koro Jehovah Abasi mmɔ eyenɔ mmɔ ufen; ndien enye eyeda mbuot ekɔŋ mmɔ afiak edi.