เห่ขุทวาลู่ 12:7 - ลีเทส่อพ๊าอาเซ เร๊อ เห่ขุทวาลู๊

⁷ เบ๊อะเนอเค, จอแปแหร่ ตูจูเพร โอ่โลแถ่ เป่ คูอับราม เร๊อ อา เฮ๊ ลู เน๊อ, “เก่ เออเต๊เก่ หม่า แว เก่ เด๊อะ เน๊อ เนพู๊เนเลอ ปา,” โทเร๊อ คูอับราม ต่าแถ่ หนิเป่ จอแปแหร่ ตูจูเพร เด๊อ อา โอ่โลแถ่ เป่ ลู เนอเตเพร อาเง เตหลู่แตเหร่ เต๊เหร่ เน๊อหล่อ.

เห่ขุทวาลู่ 12:7 ပူးပေါင်းရင်းမြစ်များ

ꤊꤢ꤬ꤜꤢ꤬ꤒꤤ 3:16

ฮู๊เนอเฮ๊อ จอแปแหร่ เด๊อะตา อา เตอ๊อแล เน๊อ เพ อับราฮัม เร๊อ อากลุยอาลุ๊ย อาเกล เตเพร แพ๊. “เด๊อ อากลุยอาลุ๊ย เต๊เห่,” จอแปแหร่ เฮ๊ ฮู๊เนอ หม่าโต่. อาโหง่แลช๊า หม่า แกแย โอ่ เอ๊ หม่าโต่. อา เฮ๊ ดื่อเน๊อ, “เด๊อ เนกลุยเนลุ๊ย อาเกลเตเพร,” อา เฮ๊ ฮู๊เนอ ขว่าคยา, อาโหง่แลช๊า หม่า อา เฮ๊โล แพ๊ ตื๊อ เตเพร แพ๊. อา ซิหยื่อ เฮ๊ เออเนอหมา ครี๊ เออเนอ เฮ๊อ.

เห่ขุทวาลู่ 17:8

คานาอันเก่ เต๊เก๋ ลอ เด๊อ เน โอ่ เกอเร๊อ อา แซ่เน๊อ เทอโรเก่กลอพู๊ เตเพร กู๊แหน่เออ เนอ, แว เก่ เด๊อะลา เน๊อ เน เน๊อ เนกลุยเนแล ตากาแล เด๊อ คยา เต๊เห่ ตูจูเพร ปา เร๊อ แว เก่ ทวา เหย่ซีจอแปแหร่ ปา,”

เห่ขุทวาลู่ 17:1

เบ๊อะ เพอับราม หน่า โอ่ เฮ๊อ ลุยซว๊า เตอเชอ เน๊อ ลุยซว๊า ต๊าหน่า เฮ๊อ เบ๊อะเนอ, จอแปแหร่ ตูจูเพร โอ่โลแถ่ เป่ ลู เร๊อ อา เฮ๊ ลู เน๊อ, “แว หม่า จอแปแหร่ เด๊อ อาโพรฉว่าชอ เตเพร. หนิดา แวโหง่ เร๊อ โอ่เซอเพร เมโตเมเบ่ แวซิปล่อ ปว๋า โตโพ๊ นี๋.

เห่ขุทวาลู่ 18:1

เตอเนอเค เพอับราฮัม โอ่ เด๊อ คูเมหม่าเร อาส่อเหมาะดุบูโพ๊ แก่ช๊า เนอ โต๊โผะ เร๊อ เบ๊อะ เหมาะโถ่เก่กู่ เบ๊อะเนอ, อา โอ่แนโอ่ เบ๊อะ อาเหล่สื่อ กู่ดากูทือ เร๊อ จอแปแหร่ ตูจูเพร แฮโอ่โลแถ่ เป่ ลู.

เห่ขุทวาลู่ 13:15

เร๊อ เห่ขุ เด๊อ ล๋อ เน แม๊เถอะ กู๊แหน่ เออเต๊เห่เนอ, แว เก่ เด๊อะ เป่ เน๊อ เน เน๊อ เนพู๊เนเลอ เต๊เห่ อาเง ตูจู๋ เพร ปา.

เห่ขุทวาลู่ 13:4

เร๊อ อาเหล่โอ่ เออโต๊โผะ หม่า เบ๊อะ อาเหล่ ต่าแถ่ เกอเร๊อ เตหลู่แตเหร่ เนอ โต๊โผะเฮ๊อ. เร๊อ อา จ๊อเบแถ่ จอแปแหร่ ตูจูเพร เบ๊อะเนอ.

เห่ขุทวาลู่ 13:18

ฮู๊เนออาขว่าอาคยา, คูอับราม ย๊าโพร๊จว๊า อาเหล่สื่อเหล่แบ่ เต๊เห่ เร๊อ อา จว๊า ช๊อโอ่ผื่อ เด๊อ คูมัมเร อาส่อเหมาะดุเจ๊แร๊ เหล่โอ่ เบ๊อะ วีเฮโบรน เนอโต๊โผะ, เร๊อ อา ต่าแถ่แตแถ่ หนิ เป่ เด๊อ จอแปแหร่ ตูจูเพร อาเง เตหลู่แตเหร่ เน๊อหล่อ เบ๊อะเนอ เต๊เหร่.

เห่ขุทวาลู่ 32:30

ฮู๊เนอเร๊อ เพยาโคบ เอ๊ เหล่โอ่ เนอโต๊โผะ อามุย เน๊อ เปนีเอล, เร๊อ อา เฮ๊ เน๊อ, “เมเตเฮ๊เร๊อ แว แม๊เถอะ ต๊อต่อเจ๊อ เฮ๊อ จอแปแหร่ดุ เน๊อ แวเหน่ เร๊อดื่อ เจ๊อ ตื๊อดื่อเร๊อ อา ปลวา โอ่เซอ เพร ปา แว แพ๊.” (เปนีเอล อาโหง่แลช๊า หม่า แม๊เถอะฉื่อ ต๊อต่อ เน๊อ จอแปแหร่ดุ.)

เห่ขุทวาลู่ 26:25

โทเร๊อ เพอิสอัค ต่าแถ่ เตหลู่แตเหร่ เต๊เหร่ เน๊อหล่อ เบ๊อะเนอ โต๊โผะ เร๊อ จ๊อบู่จ๊อเบแถ่ จอแปแหร่ ตูจูเพร. เร๊อ อา ช๊อแถ่ หนิ อาเหล่สื่อหล่อป่า เบ๊อะเนอ เร๊อ อาหลู่ เต๊เห่ เว แลแค เทอกลื่อ เบ๊อะเนอ ตื๊อกลื่อ.

เห่ขุทวาลู่ 12:8

โทเร๊อ อา จว๊ากาแล ติ เด๊อ วีเบธเอล เบ๊เถ่ โฉ่เกล เนอตากยา, เร๊อ อา จว๊าช๊อโอ่ แลแค อาเหล่สื่อเหล่แบ่ เบ๊อะ วีเบธเอล เน๊อ วีอัย อาเปล่กู เนอ. วีเบธเอล เร๊อ อา โอ่ เด๊อ อาเบ๊โน, วีอัย เร๊อ อา โอ่ เด๊อ เบ๊เถ่ ตากยา. เร๊อ อาต่าแถ่ เป่ จอแปแหร่ ตูจูเพร อาเง เตหลู่แตเหร่ เน๊อหล่อ เบ๊อะเนอ เต๊เหร่ เร๊อ อา จ๊อเบ แถ่เร๊อ จอแปแหร่ ตูจูเพร เบ๊อะเนอ.

ꤟꤤꤙꤚꤢꤨ 11:13

ล๋อ แกแย เด๊อ จอแปแหร่ อ๊อแล เด๊อ อา เก่ เด๊อะ ลู เออเต๊เห่เนอ อา หยื่อเอ่ ตื๊อดื่อหนิ จอแปแหร่ โต่ เจ๊อ เบ๊อะอา เซอ แลแค เนอเตอเนอ เจ๊อ. เต เด๊อ จอแปแหร่ อ๊อแลแก ลู เด๊อ อา เก่ เด๊อะ เหย่ซี เออเต๊เห่เนอ, อา พย๊าหนิ ล๋ายโต่, หม่าแน๊เรอ เหย่ซี แม๊เถอะ หนื่ออื่อ เหร่อ งย๋า ลาเฮ๊อ เร๊อ อา ซิครือ พย๊าฉื่อ หนื่ออื่อ เหร่อเฮ๊อ เตอ๊อแล เออเต๊เห่ เฮ๊อ. เหย่ซี อ๊อแล แลแค เร๊อ เหย่ซี หม่า อา จว๊า ทวา ซิเผระ เด๊อ อูเทออูเก่ แพ๊, เร๊อ เหย่ซี แฮ โอ่โก๊ล๊าเกอ เบ๊อะเห่ขุเออ แตแปล๊เตอเปลอฮู๊ แพ๊, อา เฮ๊ แลแค ฮู๊เนอ.

ꤚꤥꤗꤢꤩ꤬ 9:8

อา ซิหยื่อ เฮ๊ อาโหง่แลซ๊า ฮู๊เต เฮ๊เรอ, แกแย พู๊โอ่ เร๊อ อากลุยแล กาแล แฮเง เด๊อ เพอับราฮัม สุ่ย หย่าเทอ เต๊เห่เนอหม่า, จอแปแหร่ อาพู๊อาเลอ ลอ ปว๋า เตเพร หม่าโต่. แกแย เด๊อ อา โอ่เป๊เจ่แล ฮู๊ จอแปแหร่ อา เตอ๊อแลนอแลแก เนอเต๊เห่หม่า ตื๊อ อู เก่ แด่ เหย่ซี ฮู๊ เพอับราฮัม อากลุยอาแล แพ๊.

เห่ขุทวาลู่ 22:9

เบ๊อะ เหย่ซี จว๊าโต่ เฮ๊อ เด๊อ จอแปแหร่ดุ เฮ๊ ลู เหล่โอ่ เนอโต๊โผะ เบ๊อะเนอ, เพอับราฮัม ต่าแถ่ เตหลู่แตเหร่ เบ๊อะเนอ, โทเร๊อ อา แด่แถ่ ขรุ เด๊อ เตหลู่แตเหร่ลู. โทเร๊อ อา จอกลอหม่า เกอเร๊อ อาพู๊ คูอิสอัค เร๊อ อา แด่แถ่ ลู เด๊อ เตหลู่แตเหร่ขุ เด๊อ ขรุขุ เนอ.

เห่ขุทวาลู่ 17:3

ฮู๊เนอเร๊อ เพอับราม แด๊งือ งอแล เร๊อ จอแปแหร่ เฮ๊ ลู เน๊อ,

เห่ขุทวาลู่ 15:18

เบ๊อะเนอ เตอเนอเร๊อ จอแปแหร่ ตูจูเพร อ๊อแล อาโหง่ เน๊อ คูอับราม เร๊อ อา เฮ๊ ลู เน๊อ, “เป๊อแถ่ เด๊อ อียิปต์เก่กือ แลโหมะ เนอเร๊อ อา โต่ เด๊อ ยูเฟรติส เทอแลโหมะดุ เนอ, แว อ๊อแลนอแล เฮ๊อ เน๊อ เก่เออ แว เด๊อะ เน๊อ เนกลุยเนลุ๊ย ตากาแล เต๊เห่ เฮ๊อ.

ꤊꤢ꤬ꤜꤢ꤬ꤒꤤ 4:28

โป่แหว่ ซี๋, กู๊แหน่เออ ซี แซ่เน๊อ คูอิสอัค เนอเฮ๊อ. อา เออเนอ อา โอ่เป๊เจ่แล เน๊อ จอแปแหร่ อา เตอ๊อแล. จอแปแหร่ อา เตอ๊อแล อาขว่าอาคยา, อา แด่ เฮ๊อ ซี ฮู๊ เพ อับราฮัม อาพู๊เหมาะพู๊คู เต๊เห่เนอ เฮ๊อ.

เห่ขุทวาลู่ 33:20

เร๊อ อา ต่าแถ่ เตหลู่แตเหร่ เบ๊อะเนอ โต๊โผะ เร๊อ อา เอ๊ เกอเร๊อ ลูมุย เน๊อ เอลเอโลเฮอิสราเอล. (อาโหง่แลช๊า หม่า อิสราเอลพู๊ อาจอแปแหร่ดุ เออหม่า จอแปแหร่.)

เห่ขุทวาลู่ 28:13

เร๊อ จอแปแหร่ ตูจูเพร ก๊อถ่อ โอ่ เด๊อ กู่โบเคอ เร๊อ อา เฮ๊ เน๊อ, “แว หม่า จอแปแหร่ ตูจูเพร เด๊อ อา หม่าเฮ๊อ เนโพ เพอับราฮัม อาจอแปแหร่ดุ เน๊อ เนเพ เพอิสอัค อาจอแปแหร่ดุ เตเพรเฮ๊อ. เก่ เด๊อ เน โอ่เมอ เกอเร๊อ อา กู๊แหน่เออ เต๊เก่เนอ, แว เก่ เด๊อะ เน๊อ เน เน๊อ เนกลุยเนลุ๊ย เต๊เห่ ปา.

เห่ขุทวาลู่ 26:3

โอ่เกอ โก๊เหร่อ เบ๊อะ เก่ เนอเต๊เก่ อากู นี๋. แว เก่ โอ่ เกอเน๊อ เน เร๊อ แว เก่ เด๊อะบุ๊ยเด๊อะเตอเรอ เน ปา, เมเตเฮ๊เร๊อ เตอ๊อแล เด๊อ แว ออแล หนื่ออื่อ โทเฮ๊อ เน๊อ เนเพอับราฮัม เนอ แว เก่ เมเล๊อเมบาแถ่ ดื่อ ปา เร๊อ ล๋อ เห่ขุ เหล่โอ่ เบ๊อะเออ เต๊เห่เนอ, แว เก่ เด๊อะ ลอดื่อ เน๊อ เน เน๊อ เนกลุยเนลุ๊ย เต๊เห่ ปา.

เห่ขุทวาลู่ 8:20

โทเร๊อ เพโนอาห์ ต่าแถ่ เตหลู่แตเหร่ เด๊อ จอแปแหร่ ตูจูเพร อาเง เตเม, โทเร๊อ อาพย๊า เตมีเตดอ เน๊อ ถู่ เด๊อ อาโพ๊แปละ เร๊อ อาโต หลู่แต แถ่เน๊อ จอแปแหร่ดุ เนอเต๊เห่, เร๊อ อา แด่แถ่ เด๊อ เตหลู่แตเหร่ขุ เร๊อ อา ชื๊ออือ หลู่แตแถ่ เน๊อ จอแปแหร่.

เพรโด่แนพู๊ เต๊เห่ 7:5

เร๊อ จอแปแหร่ เด๊อะตา แต่ล๋าย เพอับราฮับ เห่ขุโต่, เบ๊อะเตอกยาฮู๊ แพ๊เน๋อ อา เด๊อ เจ๊อ แล๋ ลู โต่, ตื๊อดื่อเรอ จอแปแหร่ อ๊อแล ลู เร๊อ อา เก่ เด๊อ ลู เก่เต๊เก่ ปา, เร๊อ เก่เออเนอ, อา เก่ ทวา เพอับราฮับ เร๊อ อากลุยอาแล แกแล แฮเง เออเต๊เห่ อาเทออาเก่ ปา. เบ๊อะจอแปแหร่ อ๊อแล ลู โหง่เออ เบ๊อะเนอ, เพอับราฮับ อาพู๊ โอ่ แล๋ เตเพร่ว โต่.

ꤟꤤꤙꤚꤢꤨ 11:8

เบ๊อะจอแปแหร่ เอ๊ เพอับราฮัม เร๊อ อา นอเถ่จว๊า ลู เด๊อ เก่เต๊เก่ เด๊อ อา เก่ เด๊อะ เร๊อ ลู ปา เบ๊อะเนอ, อา โต เถ่จว๊า โต เบ๊อะโต๊โผ่เนอ อา ซิเง โต่ หม่าแน๊เรอ เด๊อ อาเตหยื่อ อาขว่าอาคยา, อา หนิดา เร๊อ อา เถ่จว๊า.

เห่ขุทวาลู่ 24:7

จอแปแหร่ ตูจูเพร หม่าเฮ๊อ จอแปแหร่ดุ เด๊ออาเป๊อหนิ ม๊อขุ, อา เอ๊เถ่ แว เด๊อ แวเพ อากลุยอาแล เน๊อ อู เหล่ปลือตา แวดีโบ เหล่โอ่ เนอเตเพรเฮ๊อ. เร๊อ อา แบ อาโหง่ เร๊อ อา อ๊อแล โทเฮ๊อ, ‘แว เก่ เด๊อะ เนกลุยเนแล เน๊อ เทอเก่ เออ ปา.’ ฮู๊เนอเร๊อ แซ่ฮู๊ เน เก่ แม๊เถอะ เอ๊กาหนิ เป่ แวพู๊เพรคู อาเม เบ๊อะเนอ เต๊เก่ อาเงเนอ, จอแปแหร่ เก่ นอแฮ เหร่อ เป่ดื่อ เน อาเตเน่วม๊อขุพู๊ ปา.

เห่ขุทวาลู่ 13:17

จว๊ามอ, จว๊าเล ตาวาลอ มอ เด๊อ เก่กู เออ, แว เก่ เด๊อะ เฮ๊อ เน๊อ เน ปา.”

เห่ขุทวาลู่ 28:4

แซ่ฮู๊ เน เก่ พย๊าหนิ เทอเก่ เด๊อ จอแปแหร่ดุ เด๊อะ เน๊อ เนเพ เพอับราฮัม เด๊อ เน โอ่ เกอเร๊อ อา ฮู๊ ซิเผระ เออเต๊เก่ อาเงเนอ, เด๊อะบุ๊ยเด๊อะเตอเรอ เด๊อ จอแปแหร่ดุ เด๊อะ เพอับราฮัม เนอ อา เด๊อะ เกอดื่อ เน เน๊อ เนกลุยเนแล เออเต๊เห่ นี๋.”

เห่ขุทวาลู่ 35:7

เร๊อ อา จว๊าต่าแถ่ ม๊าแก เน๊อ เตหลู่แตเหร่ เบ๊อะเนอ เร๊อ อา เอ๊ เหล่โอ่ เออโต๊โผะ อามุย เน๊อ เบธเอล อาจอแปแหร่ดุ, เมเตเฮ๊เร๊อ เบ๊อะ เพยาโคบ เถ่แกล่ แก อาแหม่ เพเอซาว เหล่ เบ๊อะเนอ, จอแปแหร่ดุ เด๊อะโล ลู เน๊อ อาเหน่ เบ๊อะเนอ โต๊โผะ.

เห่ขุทวาลู่ 35:12

เห่ขุ เด๊อ แว เด๊อะ เน๊อ เพอับราฮัม เน๊อ เพอิสอัค เออเนอ แว เด๊อะ เกอ เน๊อ เน เฮ๊อ. เร๊อ เห่ขุเออ แว เก่ เด๊อะตา แฮเง เกอโป่ เน๊อ เนกลุยเนลุ๊ย ตากาแล เด๊อ เนคยา เนอเต๊เห่ ปาปา.”

เห่ขุทวาลู่ 50:24

โทเร๊อ อา เฮ๊ อาโป่แหม่ เต๊เห่ เน๊อ, “แว โอ่เซอเพร งยา ปาโต่ เฮ๊อ. จอแปแหร่ดุ เก่ แฮแล เมจว่า หม่าแหน่ เจ๊อ ซี ปา, เร๊อ อา เก่ เอ๊เถ่แก ซี เน๊อ เก่ เบ๊อะเออ เต๊เก่ ปา, เร๊อ อา เก่ ซูกา ซี เก่ เด๊อ อา แบแลโทเฮ๊อ อาโหง่ เน๊อ โพอับราฮัม, โพอิสอัค, เพยาโคบ เนอเต๊เก่ ปา.”