Zefanya 3:20 - Eipomek20 Aning-aning nirya winipnirye, anggun Israel yala nang nirya, tuba tamubuka teleb kilinamsin talak ara, anggun yuk-yuk mutuku noutam dabinuka, talye unamlum nang nirya ara, kalikuka bopsinirye, bulubuka anggun mutuku koproba, tamubuka boyanamsine. Aning akunum winipnyopura, adeice arye, tukwak mutuku sirya, im sirya unyak nang nirya arye, anggun Israel yala nang ati eibikirye, ‘Se, sik Israel yala nang nirya ara, dipkoprob mambul nang unyake. Sikda pia telebe,’ nyabuka, anggun si erena ati, kanye pia deipsikirye, si erebuka kinamsiake. Winibikcopura, tukwak nang nirya arye, kekebikirye, anggun Israel nang si biknamake. Narye anggunti, melipsinirye, minop talak anggun taleamlum ning, kum dayuk ning nirya ara, tamubuka pia teleb kipdeipnyopura, anggunti arepsiniba, anggun asing arye eipnamlume. Nara, anggun ni Allah Yahweh, pia mikip weiknye birye, nyapsina ati, aning nirya dipkoprob nong upnamle, nyapsine. Na Allah Yahweh arye, akunum nyapdeipsine. Allah arye nyabuk. အခန်းကိုကြည့်ပါ။ |
Zefanya 3:20
32 ပူးပေါင်းရင်းမြစ်များ
Sikce aning nirya akunum winibikcopura, nara, Yerusalem mutuku noutam bukni, na si eren aik pum tam arye, ‘Sik si ap, sikce winilamik ning ap ara, ninye nirya tuba teninamakʼ tenen, lak bikilin ning ton deipnamne. Yuk nang nirya ara, aning eibikirye, bikikcopura, ‘Se, sik asi sekeiamuk nang ara, dipkoprob mambul teleb weik nang ulamik. Allah el mapu koproba babye, mitik mambul unyak bukni, dipkoprob anang ara, pia teleb mambul weik nang ulamik,’ tenenamake. Tonda ‘Teleb ning ara, nunce mapu ap, kilmapu ap, deiptibyeba, nun si pia tuba aupnamsil bukni, dipkoprob weik mambul ning ara, Allah arye anang, sik lak kilin ning deibuka ati, sik si pia tuba tenenamabe,’ tenebuka nyanamake. Na Allah arye, sik anang si dobuka, na aik pum tam deipniba, anggun si aupmasilyopura, tuba bikinamsine. Winibuka anggun si akunum deipnyopura, narye anggunti, kum bataknamsine, Pia ati, aupnamsile, nyapsine.
Aning ati ara, na Allah Yahweh arye, aning-aning nirya talibuka, deice tam erebuka, Pia Mikip Weiknye ununa ati, aning nirya tenepnye touk wininuna ati, dipkoprob aning nyapmasin touk, kunupnamlarya! Na Allah ara, Israel yala nang, sik mutuku koproba noutam arye bobuka, yuk pera mutuku bobinuka deiamikbuk, narye tamubuka dopnirye, asukumuk boyanamne. Ton ninye ara, akunum dobuka, asukumuk tamubuka delilyase. Bukni, aninye bobuka yanirye, na dam deipnirye, sirya daknyopura, yuk ninye babye bulubukapnirye, tonok kentinip deipnye sukumuk deipnamnarya! Ara, sik min talak akunum boyase ninye ap, aminyan talak boyanamne ninye ap ara, ansinibuka tonok kipdeipnyeba, teleb ubuka neika unamake. Aning nirya ara, Allah arye sik Israel ninye ati, laka nyabuk.
Minop talak ara, anggun malye winilamlum ning wenena ati, narye batakamsisirye, lo arepsiba, yuk pera mutuku ninye arye, obuka sirya daksikba, yuk ninye nirya arye, ‘Anang ara nun like,’ nyabuka yep-yep alamsikba, yuk mutuku ninye arye anggun dam kum yangalamik. Bukni, wini talak ara, anggunti teleb kipdeipsiniba, pia telebuk unamlume. Narye ila tamubuka teleb kipdeipsinyeura, yuk yala ninye arye anggun Yerusalem unamlum ninye atibuk, tuba-tuba kanye deipsikirye, pia anggunti si erenamsiyake.
‘Pia unamle,’ nyalin yupu nyapsinyopura, anggun Israel ninye arye deipmunyeba, dadeipdanin banamak ninye nirya ati, yuk pera mutuku nang nirya arye, kel kibikirye, winilinamake. Narye anggunti,teleb kipdeipsinyopura, yuk ninye mutuku-mutuku nirya eipsikirye, ‘Se, Israel ninye ara, Allah Yahweh arye dipkoprob teleb kililule,’ nyanamsiyake.” Allah arye Israel ninye ati nyapdeibukba, nabi Yesaya birye sekdeibuk.
Na Allah arye nyapsine. Yerusalem mutuku tamubuka yanamak nang ara, narye winiryuk si arepniba, anang mutuku sirya, im sirya nirya ara, sik si ati nyanamake. “Allah arye akunum Lyepdobuk Nang, ‘Sikda ‘Naʼ tenen, nang unamakʼ tenen, akunum wipdeibuka ati, sikda, ‘Pia Lek Nang,’ nyabuka, si sinamsiake. Tonda, ‘Allah Yahweh arye, ikin noutam arye, Lobukabukce Lyepdobuk Nang,’ nyabuka, si kum sinamsiake. Dipkoprob, anggun Yudea tam nang ati nyapsine. Ninye mutuku sirya, im sirya nirya ara, anggun winiryuk si ati, ‘Anggunda, Allah arye pia epsukce, Eibuka Lyepdopsuk Nang,’ nyabuka, si kum sinamsiake. Tonda, Yerusalem mutuku ati ara, ninye nirya ara, amutuku ati, Allah arye, ‘Min batakuk mutuku,’ nyabuka, si sinamake. Allah arye, anggun Yudea tam Israel yala nang ati, aminyan winipnamuk ning ati, nyabuk.
Na Allah arye, Yerusalem mutuku ap, sik Israel nang ap, kanam tamubuka dopnirye, mikip kum arepsinye talak ara, yuk mutuku nang, mutuku sirya, im sirya nirya ara, kum kel biksikirye, ‘Se, Yerusalem mutuku ara, dipkoprob pia mambul weik mutuku ulule,’ min kum nyapnamsiyak talak ara, sik akalikina deiyok nang arye, na Allah ati, anggun yupu talye tunim nyabuka, kum unamlume. Mangkau kina kumce, anggunce nati, yupu nyabuka, pia moronauk unamnulume.
Dipkoprob nyapsine. Narye winiryuk im kwepdeipnamne ning ap, tonda, winiryuk tukwak mutuku kwepdeipnamne ning ap, aning kwepdeipniba, pia aupnamle touk, ‘Naʼ tenen, nang, sik Israel nang, sik ap, sik si ap, anggunce deipmunba dadeipdanin binamak nang ap, nirya ara, na dam pia aunamlume. Anggunda, min kum kum danamlume! Na Allah Yahweh arye, ayupu nyapmasina anya arye, aning ara dipkoprob winipnyopda, nong upnamlarya!
Narye anggun deiyok-deiyok nang nirya, akunum wenepsinyopura, naryuk na mapu yuk pera mutuku-mutuku nirya, daunyaka noutamak arye dobuka, na dam tamubuka boyanamsine. Ara, sik malye weik winilamikba, sik wenena ati, lo arepsiba, yu mutuku ninye arye bisibuka, tapu koubuka bobinamikce, dabobinuka bataklobikba, yuk-yuk mutuku daunyake. Sik Israel ninye nirya tamubuka, sik mince ulamik mutuku uk, bulubuka boyaniba, amutuku unamake. Winipnyopura, amutuku uk yanuka ukirye, sik mapu deibikirye, dadeipdanin bakiba, ninye pia weik upnin banamake. Na Allah aryuk, aninye bulubuka deipnamne.
Dipkoprob nyapsine. Dipkoprob epnumunyopura, narye anggunti, lo arepsinyeba, na unye ning eibuka biknamlume. Tonda, wini talak ara, anggun ikin weik ululum bukni, aminyan talak ara, narye anggun tamubuka pia teleb kipdeipnamsine. Tonda, wini talak ara, anggun malye winilamlum ning wenena ati, akunum bataksisirye, donoksiseba, yuk-yuk mutuku, dana-dana tam ulamikce nang yuk-yuk yala nang kan-kan, dabinuka winilamunya babye, aminyan talak, narye anggun boyanuka, anggun mutuku koproba, tonap tamubuka boyanuka deipnamsine. Ayupu ara, na Allah Yahweh arye akunum nyapmasina ati, aning ara dipkoprob kunupnamle!
Aning nyapmakina deiyok ara ani. Ara, dipkoprob doyanamle talak ara, na mapu koproba Israel nang ap, Yehuda yala nang ap ara, narye sikti, tuba tamubuka teleb kipdeipnamne. Ara, wini talak sikda, yuk pera mutuku noutam unyak bukni, narye sik apu yapu nang ati areamse mutuku uk, sik wini talak kam unyak nang babye, tamubuka boyanirye, amutuku noutamuk deipnamsine. Boyaniba, sikce amutuku tuku uk talibuka unamake. Ayupu ara, na Allah Yahweh arye akunum nyapdeipsine.” Allah arye nyabuk.
Teleb kipdeipsinyopura, amutuku weik asik dolamlum ning, Yerusalem mutuku ati, narye ‘Pia telebe,’ tenepnirye kanye deipnamsine. Winipnyopura, amutuku ap, amutuku unamlum nang ara, sik yuk-yuk mutuku im sirya, mutuku sirya nirya unamak nang arye eibikirye, ‘Seʼ tenen, ilil upliba, sik nong sirim talipnamake. Tonda, na Allah ati, sikce si erenamniake. Deiyok ara, aminyan talak, sik Yerusalem mutuku unamak nang ati, narye teleb kipdeipnirye, sik amutuku noutam unamak nang ati, tuba tamubuka, pia teleb kipdeipnyopura, sikce talibuka wininamak ning ara, pia telebuk unamle.
Nara Allah, na si Yahweh arye nyapsine. Nara, aning-aning nirya talibuka, deice tam erebuka, Pia Mikip Weik Deiyoknye ununa anya arye, narye nyapsine. Minop talak, narye Israel nang, yuk-yuk mutuku donoksiba, sik mal olan nang arye, tapu koubuka bobinamik bukni, narye sik biyik nang bulubuka, sik mutuku uk boyanuka, tuba asukumuk deipnirye, na pia teleb lek ning ap, telebuk kunuknak ap, sik talima pum noutam deipniba, telebuk ubicopura, yuk-yuk yala nang, dana-dana tam nirya arye, eibicopura, bikinamake. Na mikip ara, sik dam akunum pil dopnamna deice arye, biknamake. Tonda, winipyopura, na si erebuka, na amu tam pil donanye Yakub biti, ‘Amutuku dobuka arepnamkine,’ nyabuka, nyalin yupu deice elti, arepse mutuku uk, elce deiamukba, dadeipdanin yangalamika ani, wini talak unyak Israel nang ati, amutuku nirya arepnyopura, tuba tamubuka, sik mutuku uk, yanuka unamake.
Atalak ara, dabinuka wangapdayik domba basam nirya ara, elbinamne. Tonda, ‘Seʼ tenen, kanye teniplirye, daulye ning babye, boyanamne. Tonda, suse dilamle ning ara, boyanirye, kitibuka kwetepnamne. Uk dilamlye ning babye, boyanirye, kwetepnamne. Bukni, meta teleb domba basam ap, mikip weik domba basam ap nirya ara, oplopnirye, kum kilinamne. ‘Winipnamne,’ tenyamse ning ara, naryuk, adomba basam weina deiyoknye unirye, pia teleb kibuka weinamnarya!
Winibuka nyanyaka ati, narye nyapnukin yupu dobuka, ‘Naʼ tenen, ninye, sik Israel ninye ati, laka nyapnalyame. Ayupu nyapnalyame. “Na Allah Yahweh, aning nirya talibuka, deice tam Weik Erenanye unirye, ‘Winipnamne,’ tenepnye touk wininuna anya arye, anggun diplamlumba, tuku palibuka weilamsika nirya ara, bublan kukuka, kam bukeipnamsine. Na Allah arye, ‘Naʼ tenen, ninye ati, aunyak noutamak arye dobuka, anggunti areamsise mutuku noutamak, tuba tamubuka bobisinirye, deipnamsine. Amutuku tuba tamubuka arepsiniba, anggun amutuku noutamuk unamlume.”
Allah el si Yahweh arye, aning nirya talibuka, deice tam Weik Erenanye birye nyasulule. Na mapu Israel ninye yala nirya ara, yuk-yuk mutuku ninye noutamak biyikce, dabinuka ulamica ani, aninye nirya tonokak, bulubuka deipnirye, anggunti areamsise mutuku tamubuka delilyanamsine. Tonok mutuku noutamuk unamlume.
Israel mutuku noutam unyak nang nirya arye, yanuka melibikiba, aoplomik nang, sik nong nirya ara, dobuka weipnamake. Aweipnamaka ati, aminyan talak narye tenyamse talakuk, anggunti deken ning ara, dobuka arepnyeura, yuk nang nirya arye anggunti, Deiyok, sik apil domika ara, pia telebe, sikda teleb nang unyake,’ nyabuka Israel nang nirya ati, si erenamake. Ara, na pia teleb ap, mikip weik ap, mambul weik ununa ap ara, ‘Ninye nirya eibikirye biknamakʼ tenen, narye aning nirya melibuka peterepnamne. Tonda, nara Allah Yahweh, aning-aning nirya talibuka, eitam erebuka, mikip weik ununye birye, ‘Aning ara winipnamneʼ tenen, akunum nyapsine ati, aning dipkoprob nong upnamlarya!
Winipnyopura, na mapu sik Israel nang arye, ‘Se, Allah Yahweh ara, aning-aning talibuka, deice tam erebuka, pia mikip weiknye ululeʼ tenen, biknamniake. Atalak ara, na siuk erenamniake. Aning deiyok ara, narye sik dobuka, yuk pera mutuku nang ulamika kan-kan donoknamse. Bukni wini talak ara, narye sik anang tamubuka, sik mutuku uk boyanuka deipnamne. Sik anang ara, tonoknye babye, yuk mutuku nang kan-kan, bataknyeba, kum unamake.
Tonda, narye Israel ninye ati, teleb kipdeipnirye, tuba tamubuka erepdeipniba, pia telebuk unamake. Winipnyopura, sik ulamik mutuku nirya, tuba tamubuka talibikirye, sik asik nirya punubuka dobikirye, unamake. Winibikirye, anggur wa wibuka koubikiba, anggur tapu duk teleb ubuka moupmaliba, dakikirye, anggur duk purubuka, mek kwebuka tuba dinamake. Tonda wa wibikirye, kounamak ning ayala-yala nirya, wa wibikiba, duk ap, nong ap, teleb ubuka moupmaliba, libuka weik dinamake.
Allah Yahweh arye, ayupu tonap dukdongobuka nyabuk. Se, na mapu koproba Israel ninye, anggunda weika arye wenebuka opsiniba, ninye weika arye dipnamlum bukni, anggun kan-kan ara, ninye mitik tonunuk batakdongopsiniba, kam tuba unamlum ninye ara, narye lyepsinirye, bulubuka tonok mutuku noutam deipnamsine. Winipmanto ara, domba basam weina deiyok nang arye, sik domba basam dobuka, tonokak bulubuka deibikirye, poka pum tam dobuka dongolamak touk, narye anggunti, aning atonun winipnamsine. Winipsinyopura, winipmanto ning ara, domba basam ara, teleb maning palamlyak binuka deibikiba, kanye deibikirye, maning dilamak touk, narye lyepdopsinyopura, teleb kipdeipsiniba, unamlume. Aminyan talak ara, anggun unamlum mutuku tam ara, ninye yala weik kipdeipsiniba, yupa pia weik upra banamake. Yupa weik ubikirye, amutuku noutamuk, kanye deibuka, pin-pin asa arye unamake.
Na mapu koprop ara, yuk mutuku ninye arye obuka dopropsikce, sik mutuku koproba bobiyikba, pera mutuku noutam binuka daulamika ani, wini tuba daunyakce, wini talak ara, mikip pia kumce, mitang asa unyak bukni, daulamik ninye nirya ara, mitik tonun dem tuba daunyak bukni, narye ila tamubuka weik kipdeipsiniba, anggunce deipmunyeba, dadeipdanin banamak nang nirya ara, pia weik upra banamake. Winipsinye talak ara, mikip weik ninye unamlume. Winipnamsen talak ara, na anggun ni koproba Allah ara, Sion mutuku deice unirye, anggun talinamsine. Narye anggunti, “Winibuka unamlume,” nyasiniba, pia aunamlume. Tonap tuba pia kum bataknamsine.
Yehuda yala nang, mitik tonun tuba kam unamak nang ara, na Allah arye lyepropnirye, teleb kipdeipnamne nang ara, sik Pilistin nang minop talak ulamik mutuku, weik laut mekwen kup-kup dam uamuk mutuku nirya ara, sik Yehuda nang dopropsikirye, sikda amutuku noutamuk, yanuka unamake. Tonda, Yehuda yala nang aryuk, sik Pilistin nang taleamik mutuku noutam, mutmuta papnamlak ara, sik domba basam weinamake. Lukunyan kiplyeba, sik domba basam weina deiyok nang mana ati ara, Askelon nang, sik domik aik batakamice, aik wekuka manamake. Aning nirya ara, dipkoprob nong upnamla deiyok ara, ani. Ara, Yehuda yala nang nirya ara, anggun ni Allah Yahweh arye anggunti, ‘Anang melipnirye, tamubuka teleb kipdeipnamsinʼ tenen, erepdeiplyopura, sikda minop talak telebuk ulamik touk, tuba tamubuka, telebuk unamake,” Allah arye, ayupu nyapdeibukba, nabi Sefanya birye, lak nyabuk.
Tonda, moubuka dilinamlulume! Doyanamle talak ara, yu nang arye, anggun Israel yala nang ati, ikin ning, anggun nong deice delilamsik ning ap, ikin pil aruk lamsik ning ap ara, anggunti olyangalamsik nang ap, naryuk amalye nang ati, obuka kum kipdeipnirye, malye kibuka bataknamne. Tonda, winipmanto yupu deice arye, nyapnusine. Ara, domba basam wein nang arye, yan bir yok cepmalye domba basam ara, bisik binmanto kum upliba, adeiyoknye birye, adomba basam iribuka bobalamak touk, anggun babye, winipnamsene. Ara, anggun Israel nang babye, nong mitang upsilye talak ara, anggunce, ‘Se, yata wiriptibye do? Yata ubuka bitibye do?’ tenen, walwal kipdanin balamluma nang nirya babye, na Allah aryuk lyepropsinirye, teleb kipdeipnamsine. Tonda, yuk pera mutuku nang arye anggunti, obuka malye kipsikirye, si mutuku bobinamsiakopura, narye anggunti, lopdeipsinirye, dobuka tuba tamubuka, anggun mutuku koproba boyanamsene. Tonda, malye nang arye, anggun mutuku noutam arye yaksikcopura, narye anggun dam yanuka, kaliksinirye, anggun bulubuka, anggun mutuku koproba tamubuka boyasinirye, teleb kilinamsine. Winipnamne deice arye, anggun Israel nang ati, malye yupu nyapnarye, nalibuka akutulamsikba, alye weik ulamsuk ning ara, kum daneipnamne. Narye anggunti, tamubuka teleb kipdeipsiniba, yuk tam nang eipsikirye, ‘Se, wini talak ara, sik Israel nang ara, pia telebuk unyake,’ tenepsikirye, anggunti si erenamsiake. Tonda, sik yuk-yuk mutuku daunyak nang arye, anggun Israel nang ati, ‘Se, sik aninye nirya ara, dipkoproba mambul weik nang unyake,’ nyabuka, kanye pia deipsikirye, si erebuka kinamsiake. Anggun ti, pia teleb yupu nyabicopura, mutuku sirya, im sirya unyak nang nirya, ayupu kekebikirye, anggun si bikinamsiake.
Dipkoprob nyapsine. Na Allah arye, anggun Yehuda mutuku ululum nang ap, Israel mutuku noutam ululum nang ap ara, anggun wenena ati, pia kanye imun ning areamsisiba, ikin weik ulamlume. Winibuka ulamluma ati, yuk mutuku nang nirya arye, sik elilamsikce, yuk nang ati, sulana ati nyalalamik. “Se, sik Yehuda nang ap, Israel yala nang ap ati, Allah arye subukba, kanye imun weik ning, yangalamukba, ikin weik ulamik ning ara, anggun deice ton, pia ikin ning yanamsile!” nyabuka, sulanauk ulamik. Bukni, atalak arye dipdongobuka, dounamle talak ara, na Allah arye, anggun amutuku ululum nang ati, pia teleb kibuka lyepnamsine. Winipsiniba, pia telebuk unamluma ati, sik dana-dana tam unyak yuk mutuku ninye asik nang arye, sik kayapu nang ati nyapnamake. Ara, “Se, sik Yehuda tam nang ap, Israel nang ap ati, Allah arye lyebukabukce, tuba pia teleb kipdeibukba, pia teleb wininyak touk, ‘Anggun babye teleb kipdeipsutuba, telebuk wininamlumʼ tenen, Allah moronamsiyabe,” nyabuka, teleb yupu nyapdanamake. Ati ara, na Allah arye, anggun amutuku ululum nang ati, nyapsine. Anggunda, adiparyuk talima mikip kipdopmunce, ilil kum unamlume. Kanye deipmunce, telebuk unamlume, nyapsine.
Winipsiniba, anggun unamlum mutuku nirya, ulul ning nirya pia teleb upnamle. Tonda, anggun unamlum mutuku noutamak babye, tuku teleb arepnamsine. Winipnyopura, yuk pera mutuku unyak ninye mutuku-mutuku nirya eipsikirye, ‘Se, sikda teleb kanye bobuka, pin-pin asa arye unyake,’ nyanamsiyake. Na Allah Yahweh, aning-aning nirya ap, im deice yin talin malaikat nirya ap ara, sik weik deiyoknye birye nyapsina ati, dipkoprob winipnamle.
Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.
Anggunce el nyapdeiamsuk yupu moubuka kekepmunce, pia winipmunyopura, anggun Israel ninye ati ereipsiliba, ninye nirya arye, ‘Se, anang ara, sik mambul weike. Allah elda pia telebe,’ nyabuka, Allah el si erenamake. Allah arye, ninye ayala-yala nirya, weika arye kwepdeibuk bukni, yuk yala ninye im sirya, mutuku sirya nirya ara, mitik mambul unyak bukni, anggun Israel ninye ara, Allah arye ereipsiliba, weik mambul ninye unamlume. Wininamla ara, talye ati kume. Ara, ‘Israel ninye, ‘Naʼ tenena ninye unamaka ati, sikti, wipdeipnamne. Sik ti konop nang nyanamake. ‘Sik ti, yuk mutuku nang arye si dopnamake’ tenen, Allah el si Yahweh arye wiamsuke. Aning nirya ara, Allah arye, anggun apu yapu ati kunum, “Wininamne,” nyabuka, nyapdeiamuk touk, winipnamsile. Musa birye Israel ninye ati laka nyabuk.
ကြော်ငြာတွေ