Zefanya 3:17 - Eipomek17 Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk. အခန်းကိုကြည့်ပါ။ |
Zefanya 3:17
30 ပူးပေါင်းရင်းမြစ်များ
Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame.
Asipdeyukce, ayupu ton nyabuk. “Yata deiyok ning do nirya, yata mambul weik ning winiptuba, Allah el si Yahweh arye tenelye touk, bisipturye malye kum uptu do? Aning ara, ikin kum upnutue. Aning ara, kum winipmanto. Arup nyapmakin touk, orketeng tamun noutam, awala atonun tamubuka yanyopura, an kil Sarah arye, sal mi deipnamkile,” nyabuk.
Aning nirya ati, kanye kum delilule bukni, Allah Yahweh, elce kanye delilul ning ara ani. Ara, yata nang do nirya ara, Allah arye, “Aning wininamlume, aning ara, pia kum wininamlulume,” nyapdeiamsuk yupu moubuka kekebikirye, el tonok ilil uplyeba, diksukumuk wininyak nang ati, Allah arye, kanye deililule. Anang ara, Allah arye, “Weik bico tenesinirye, pia teleb kilinamsine,” nyabuka, nyalin yupu deice arye nyadeipyamsuk yupu nirya, moubuka kekebikirye, Allah elcuk lyelonamsile,’ tenenyak nang ati, Allah arye kanye delilule. Yuk nang ap, yuk ning ap ati, kume.
Deiyok ara, Yahweh arye wipdeiamsuk nang, el ‘Naʼ tenen nang ara, kanye deibuka unyabe. Tonda, yata nang do nirya, sikce sik bidamang kanye erelana kumce, sik talima namin asa ukirye, ‘Allah aryuk melipsutue,’ tenenyak nang ati, Allah arye teleb kilisululce, nun ikin usulul noutam ara, lobuka lyelosulule.
Ikin ning pia weik, Israel nang deice yangalamukak, imun kanye bobuka ulamik bukni, atalak ara, Allah ara aning-aning nirya talelirye, mikip pia weiknye, tonap bukukce, ‘Israel nang lyepnamne’ tenen, kintinibuka yayuk. Winipmanto ara, ninye arye kanye wangalamak mek weik tonun dibikiba, kanye bona kumce mapmakca ani, aminyan talak tamubuka bukikirye, talye yupu weik arye minop nyalamaka atonun, Allah arye, sik Israel nang dam yanuka minopce lyeprobuk.
Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.
Anggun Sion mutuku ululum nango, kanye lopsiliba, weik yupu ara, weika arye nyapmunce, Allah si eren mot senamlume. Wininamluma ara, talye ati kum bukni, deiyok ara, Israel nang anggun ni koproba Allah, malye winin ning tonok babye kum winilirye, Pia Diksukum Leknye ulule. Tonda, elda pia weik si erenanye, anggun kan-kan ulamlibuk, anggun ap neika ansinibuka unamlume.
Allah Yahweh arye na Yesaya dam yanuka nyapdeipnuke. “Na unak im deice arye, narye aning nirya biknamne. Winipmanto ara, pia weik keting tin unmalya ani, kumanya ton minop balamle touk winipnamne. Nara Allah Yahweh tunim abuka unamne. Winipmanto ara, wa wibuka kouamikca ani, lin talak li kiplyeba, mok purye tuku deice saklyeba, keting tin arye dua tunim abuka welelamle touk winipnamne. Ara, amutuku nang winipnamak ning eipnye babye, narye tamubuka aning-aning ton kum winipnamne. Diplopnamne.
Weik asik domikce ulamikak, tonoknye birye kalikuka dinmokba, yanganmoknye biti Yesaya birye nyabuk. Edom tam noutam bukni, Bosra mutuku arye yanganmoknye bira, el ongopmok baju deice ara ining bi bol pipmokba, ining bi upmoke. Anye bira, pia teleb baju ongopmokce, mikip arye yanganmokak, ninye aik kalikmoknye eibukce, asipdeyuk. “Anda yatanye yanganmalam do?” nyabuka asipdeyuk. Nyabuka asipdeyukbuk, ayanganmoknye birye tamubuka nyabuk. “Nara diksukum yupu nyananye yanmane. Nara mikip weiknye ununa anya arye, Allah el ‘Naʼ tenen, ninye nirya ati, sik Lyena Deiyoknye unune. Na mikip weik ununa anya arye, anggun nirya ati lyepsitinye,” nyabuk.
Allah Yahweh, el mikip weik deice arye, Musa meliamukba, weik mekwen dam yanuka tikukce “Melipsilyame,” nyabuka morobukba, aweik mekwen deiamuka, adiparyuk noutam bokuka, dana-dana kiprobukba, anoutam bisik mikukura, nun apu yapu arye yanibuka abisik biyik. Allah arye amambul pil ninye arye dopmanto kum pil dobuk ning ati, ninye mutuku-mutuku nirya kekelamikce, el si erelamik. Israel ninye arye, “Apil dolamuk Allah ara, wini talak dan mutuku ulul do?” nyabuka asilalamik.
Na babye, Yerusalem mutuku winiryuk kwepdeipnamne ning ati, kanye weik delinamne. Aning atonun, na Allah arye Yerusalem mutuku unamlum ninye ati, kanye delinamsine. Wininamsina ati, Yerusalem winiryuk ning, kwepdeipnamne mutuku noutam unamlum talak nirya ara, ikin ning upsiliba, weik tonun, ‘Melipsilyame,’ nyabuka, ngalukuka engemunce, nati kum moronamnulume. Tonda, imun kanye bobuka, ngalukuka kum engenamlume. Kanye deibuka telebuk unamlume.
Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.
Aminyan talak nirya ara, narye sikti, kanye deipnirye, teleb kipdeipnamne. Tonda, narye sikti, batakna pia kumce, ‘Amutuku noutamuk, pia teleb unamakʼ tenen, kintinip deipyeba, telebuk wininamake. Aning akunum nyapdeipsina ati, aning ara, pia kum bataknamne. Na nyasinye touk, dipkoprob pia wininamsinarya! Na kanye tenen ning ap, na talima ap deice arye, nyalin yupu arye nyapsine. Aning nirya ara, dipkoprob winipnamsine!
Allah arye Israel ninye ati nyabuk. Narye anggun Israel ninye nirya ati, tuba tenesenuna anya arye, tuba tamubuka dopdopsenirye, teleb ulinamsine. Anggun tuba-tuba malye winimun bukni, na kanye aryuk bico tenepsinirye, anggunti pia melinamsine. Anggun malye winin ning ara, kum kipdeipnirye, aninye ati bico tenenuna anya arye, tuba tonap, teleb kipdeipnamsine. Min talak ara, narye anggunti, yu weik uamnuk bukni, aminyan talak ara, anggunti tuba ton tamubuka, wanabuka kum opnamsine.
Aning ara, talye ati kum bukni, deiyok ara, ani. Ara, Allah Yahweh arye, anggun malye winin ning nirya ati, anggun wenena ning ap, anggun malye winin ning ati, menenga ning arena ap ara, tonap kum arenamsile. Aning kum bukni, Allah arye namin kilinauk, wininamsila atia. Tonda, Allah elce anggunti, yu upliba, osenyak nang nirya ati, ‘Kume, daupmalye! Israel yala nang ton, kum olbinamlume,’ nyabuka, anggun mal olan nang ara, yaknamle atia. Wini talak ara, anggun weik deiyoknye, Allah Yahweh ara, anggun Israel yala nang nirya ati, pia kaliknauk unamsile. Ara, nara Allah ap, anggun unamlum noutamuk, pia neika unamabe. Ati ara, Allah Yahweh elcuk anggunti, pia kalikinamsile. Ati, wini talak arye, dipdongobuka, dounamlum talak nirya ara, anggunce, ‘Se, yata kanye mun ning nun dam yasiliba, ikin weik unamsil do?’ tenen, anggun ilil winin ning ton, kum unamsile.
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.
Ayupu nirya laka nyapmasina deiyok ara, ‘Sikda, pia teleb kanye bobuka pin-pin aryuk unamake. Tonok ning atibuk ikin kanye kum bonamake’ tenen, ayupu nirya akunum laka nyapsine. Pin-pin arye, una deiyok ning arilul deiyoknye bira, na ununa ati, na nyapmasin touk winipmunyopura, kanye deibuka unamlume.
Ninye tonoknye ton, el aik melibuka, pil dona ati uang arye, yuknye dekukaplirye, yanuka deiamliba, el aik pil dolamlya ani, lik upliba, ‘Na likʼ tenen, batakuka bilyopura, anye birye, sik yuk nang dam yaliba, sikce, “Na melipnutum do?” nyaplirye, yanuka moropsilyopura, anggunce anye biti, ‘Na dam yangana kume. An deiyoknye damuk, tamubuka binamlyame,’ kum nyapnamlume. Anggun adiparyuk, anye biti melinamlume.
Aning akunum winipmunyopura, anggun ni koproba Allah, el si Yahweh arye, melipsiliba aning-aning nirya telebuk upnamsile. Ara, anggun pil donamlum ning nirya, nong upra banamsile. Tonda anggun mapu delinamlum ning ap, wein ning weinamlum ning ap, tonda wa wibuka kounamlum ning ap nirya ara, Allah arye teleb kideipsiliba, weik upnamsile. Ara, Allah arye kanye deipsilirye, teleb kibuka deipsilyopura, aning-aning nirya, nong weika arye unamsile. Anggun apu yapu nang ati, minop talak, kanye deiamukce, weika arye areamuk touk, aminyan talak, anggun babye atonun, teleb ning ayala-yala nirya, weika arye arenamsile.
Yesus ara, pia kam unamla anya arye, ‘Allah ap talima dukdongobuka unamap’ tenen, Yesus ati diba tenebuka, el deiceuk Allah el dam yanamak ninye nirya ara, Yesus arye pia lyebuka sirya dakasulule. Ninye lyena pil ara, etekdop asa ubuka don pil dosulule. Tonok ning babye kum batakalule. Winisilya deiyok ara, ani. Ara, pia kam ulirye, elti, diba tenenyak ninye ara, ‘Allah arye, elti, diba tenepce ninye melinamle’ tenen, Allah dam bilirye, yupu pia melibuka nyalule. Nun melina ati, Allah ati tuba morosulule.
ကြော်ငြာတွေ