Zefanya 3:15 - Eipomek15 Aning ara, talye ati kum bukni, deiyok ara, ani. Ara, Allah Yahweh arye, anggun malye winin ning nirya ati, anggun wenena ning ap, anggun malye winin ning ati, menenga ning arena ap ara, tonap kum arenamsile. Aning kum bukni, Allah arye namin kilinauk, wininamsila atia. Tonda, Allah elce anggunti, yu upliba, osenyak nang nirya ati, ‘Kume, daupmalye! Israel yala nang ton, kum olbinamlume,’ nyabuka, anggun mal olan nang ara, yaknamle atia. Wini talak ara, anggun weik deiyoknye, Allah Yahweh ara, anggun Israel yala nang nirya ati, pia kaliknauk unamsile. Ara, nara Allah ap, anggun unamlum noutamuk, pia neika unamabe. Ati ara, Allah Yahweh elcuk anggunti, pia kalikinamsile. Ati, wini talak arye, dipdongobuka, dounamlum talak nirya ara, anggunce, ‘Se, yata kanye mun ning nun dam yasiliba, ikin weik unamsil do?’ tenen, anggun ilil winin ning ton, kum unamsile. အခန်းကိုကြည့်ပါ။ |
Zefanya 3:15
48 ပူးပေါင်းရင်းမြစ်များ
Nun Israel nang yuk-yuk nang nirya ara, Allah arye kwepdeiamsuka deiyoknye bira, aulirye talisulula ati, kil-kil kanye bobibirye, Allah el siuk erenamabe. Ara, Sion mutuku noutam unyap nang nirya ara, nun ninye deiyoknye, Allah arye nun talisulula ati, nun deiyoknye Raja usulule. Tonda, Allah ap, neika unyaba ati, kanye deibuka unamabe.
Ninye arye, nun ni Allah Yahweh ati, ‘Elda weik mambulnye’ tenen, ilil usilye ning ara, pia weik teleb ulule. Aning ara, pia ati aunamsile. Allah Yahweh arye, “Wininamlulume. Aning ara, pia kum wininamlulume,” nyapdeiamsuk yupu nirya ara, diksukum yupu uk ulule. Ayupu noutamak ara, malye winin ning, tonok babye kum ulule. Allah Yahweh arye nyasilye touk, dipkoprob nong winipnamle.
Anggun Sion mutuku ululum nango, kanye lopsiliba, weik yupu ara, weika arye nyapmunce, Allah si eren mot senamlume. Wininamluma ara, talye ati kum bukni, deiyok ara, Israel nang anggun ni koproba Allah, malye winin ning tonok babye kum winilirye, Pia Diksukum Leknye ulule. Tonda, elda pia weik si erenanye, anggun kan-kan ulamlibuk, anggun ap neika ansinibuka unamlume.
Dibina deiyok ning akunum kum kipdeiplyopura, Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Ati, el mikip deice arye ninye mutuku sirya im sirya nirya ara engenyaka deiyok ning nirya ara, kum kipdeiplirye sirya daknamle. Tonda Allah arye, ‘Na tenen nang unamakʼ tenen, minop talak wibuka akwamsuk nang ara, tuba tonap teleb kipdeipnamle. Ara, yuk-yuk mutuku nang arye, el ‘Naʼ tenen, nang ati, sik nong deice ikin ning weik delilamikba, alye dakuka ulamik ning deiyok nirya ara, Allah arye aning dobuka pia pere sukum donoknamle. Ura, aning nirya ara, Allah Yahweh aning-aning deice tam mikip weik ululnye birye, el bidamnye akunum nyapdeipsuka ati, aning nirya ara, dipkoprob nong upnamle.
Winibuka unamake ati, Allah Yahweh el tenelamukce, lyepdeiamuk ninyeuk, abisik bakirye, Sion mutuku tamubuka binamake. Sikce, ‘Yerusalem mutuku weknamap’ tenen, abisik banyak talak ara, sik nirya teleb aryuk kanye deibuka, Allah el si erena ati, mot nyanamake. Ikin kanye bona pia kum diparyuk, pin-pin kanye bobuka, pia unamake. Allah arye sikti, kanye bona deiyok ning arepliba, sik kanye talima pum tam arye, ‘Pia dipkoprob akunum upmasile’ tenen, kanye deibikirye, tonok kanyeuk bobuka unamake. ‘Se,’ tenen, teniltona ap, ikin kanye bona ap, ton pia kum unamake. Allah arye, aning-aning nirya kum kipdeipnamle. Nabi Yesaya birye nyabuk.
Anggunce si erelulumnye Allah, nara, aning-aning deice tam erebuka mikip weik arye, aning-aning nirya talibuka unune. Nara Allah Yahweh, anggunda ‘Naʼ tenen, nang ululama anya arye, anggun si erelulum Allah arye, ayupu nyapsine. Anggun tam kibuka melisununye birye, anggun melibuka kalikina ati, ayupu nyapsine. Ara, anggun malye winilamlum ning ati, na yu weik upnukba, anggun deice arye, weik ikin ning deipsiseba, kanye imun usulul ning ara, anggun dam arye tamubuka dopropnirye, kum deipnamne. Winipmanto ara, ninye arye, kanye wangalamak yu mek dibikiba, kanye walwal uplyopura, tukwak sakuka poulbalamak touk ulamlum bukni, wini talak ara, aning ton ap, kum arenamsine. Narye anggunti, yu tenelamsise ning ara, akunum kum kipdeipnyopura, winipniba, anggun deice ikin ning ton yaliba, kum dolonamlume.”
Ati, Babel mutuku nang arye Yerusalem mutuku aik daklomikba, oldem uamukak arye, kanye deibuka unamlume. Ara, anggun Israel ninye batakamsikba tuba ululum ninye ap, tuba tamubuka yanganamlum ninye ap arye kanye deibuka unamlume. Aning deiyok ara, Allah Yahweh arye el ‘Naʼ tenen, ninye Israel ninye ati, melibuka lyepsiliba kanye delinamake. Babel mutuku ninye arye anggun Yerusalem mutuku umunye Israel ninye talipsik noutam arye lopdeipsiliba talye kanye bobuka telebuk unamlume. Yerusalem mutuku tamubuka arepnamsila atia.
Tonda, anggun unamlum mutuku noutam arye, malye yupu nyapdakirye, olana uk kum unamake. Aning atonun, anggun unamlum mutuku ati, yuk pera mutuku yu nang arye, ‘E, Yerusalem mutuku ara, daklobibiba, kum datu’ tenen, ‘Aninye olbibirye, sik mutuku asik olonga uk kipdeipnamap’ tenen, kum unamake. Talye kanye bobuka unamlume. Amalye yupu ton nyabikiba, kum kekenamlume. Tonda, anggun mutuku Yerusalem asik antanabuka dopnamlum cang keil poka noutam ulamuk ning ara, ‘E wini talak ara, nun dana-dana tam apoka ulul touk, nun ni koproba Allah arye pia kalikuka lyesulule,’ nyabuka kanye delinamlulume. Tonda, anggun poka noutam potokolulum bublan wekenamak ninye nirya arye, ‘Se, Allah pia teleb ulule,’ nyabuka el si erebikirye, sik anyaik dam anyuk wekelyanganamake.
Na babye, Yerusalem mutuku winiryuk kwepdeipnamne ning ati, kanye weik delinamne. Aning atonun, na Allah arye Yerusalem mutuku unamlum ninye ati, kanye delinamsine. Wininamsina ati, Yerusalem winiryuk ning, kwepdeipnamne mutuku noutam unamlum talak nirya ara, ikin ning upsiliba, weik tonun, ‘Melipsilyame,’ nyabuka, ngalukuka engemunce, nati kum moronamnulume. Tonda, imun kanye bobuka, ngalukuka kum engenamlume. Kanye deibuka telebuk unamlume.
Anggun amutuku noutam ululum nang nirya ara, kekeplulume! Amutuku noutam nirya ara, dam arye do, pera arye do, dana-dana tam arye, na mutuku nang arye, malye nyabuka ngalukuka, engenyaka deice arye, sik asing mek sakalule. Sik weik arye engenmaka ara, nun nirya kekenyabe. Ati, anggunce, “Se, se, Yerusalem mutuku noutam ara, nun ni koproba Allah Yahweh, akunum bindobukce, asukum tuba kum ulul do? “Wini talak amutuku ara, ninye deiyoknye Raja kibuka talepsuknye, Allah ara, akunum batakuka bindopsuk do, kum do?” nyabuka asinyake. Nyaceba, ninye deiyoknye Allah arye, tamubuka nyapsile. “Se, yata deiyok ati, ‘Naʼ tenen, nang, sik Israel nang arye, talye ning, pia nong kum ning ati, ninye urasin atonun puturubuka deiamice, isa siuk erelamik ning ara, tuba erenyak do? Yata deiyok ati, yuk karin ninye asik nang arye, talye ning ati, si erenyak ning dobuka, yana deibikba, ‘Naʼ tenen, nang arye, aisa ati, ‘Nun ni ani,’ nyabuka, si erelamik ning ara, tuba wininyak do? Wininyaka ati ara, na yu weik upnukba, na talima uk pia dinulule,” Allah arye nyabuk.
Sik yu nang arye, Israel tam ap, Yudea tam ap, obuka sirya daknin balamik talak ara, anggun Edom mutuku noutam ululum nang arye, nyaplume. ‘Kume, atam bitinye ara, sik Israel yala nang ap, Yehuda yala nang ap, sik unyak mutuku ara, yuk mutuku yu nang arye, akunum obuka sirya dakika ati, nuncuk amutuku tuku nirya, alubuka dopropnamabe. Ati, nun omutuku binuka unamabe,’ tenebuka nyaplume. Nyalamlum bukni, anggunce kum tenilamlum ning ara, anggunce, ‘Amutuku bitinye, talibuka unamap,’ tenelamlum mutuku ara, nara Allah Yahweh, amutuku noutam tuba ulamsirye, ‘Amutuku ara, na ning,’ tenyamse bukni, anggunce nati, kum tenelamnulume.
Wini talak arye, dipdongobuka doryanamle talak noutamak nirya ara, sik yuk mutuku nang arye, amutuku unamlum ninye ati, akutubuka kum yep-yep anamsiyake. Yuk mutuku ninye arye, ‘Se, sik Israel ninye ap, sik unyak mutuku ap ara, talye mutuku uk ulule,’ nyabuka kum nalinamsiyake. Atonun yupu tuba nyapsikiba, kum kekenamlume. Amutuku noutamak unamle ning deice arye, Israel ninye ati, malye kum ulinamsile. Tonda, melipsiniba, malye unyak nang arye amutuku noutamak unamlum ninye ati, ton yanuka kum onamsiake. Ayupu nirya ara, na Allah Yahweh, aning-aning nirya deice tam, talibuka Weik Erena Deiyok ununye, narye tenenye touk dipkoprob wininune. Aning ara, dipkoprob nong upnamle ati, nyapsine.
Aning winipnamne talak arye, dipdongobuka, dounamle talak nirya ara, narye sik Israel yala nang ara, pia kum bataknamne. Aning kum bukni, na dam unulul Pia Teleb, Lek Dip Kanye ara, sik Israel nang deice dopdeipniba, elce sikti, tuba melinauk unamle. Tonda elce kum bataknamle. Aning nirya ara, na Allah Yahweh, aning-aning nirya talibuka, deice tam erebuka, pia mikip weik ununye birye, akunum nyapsine. Ati, aning nirya nong upnamlarya! Allah arye Yehezkiel dam yanuka nyabuk.
Akat keil arye, cang poka dopnamlum ning ara, kota Yerusalem antanap dongobuka dana-dana tam nirya nukmunyopura, el cang nirya ara, 9 kilometer deice kiklibuka dopnamlume. Tonda, kota Yerusalem dona ati, anggun deiyok koupnamlum talak arye dipdongobuka, keting tamun oyanamle talak nirya ara, akota si ton si sinamak nang ara, ani. Akota el si ara, ‘Allah Yahweh, amutuku noutam tuba aulule,’ nyabuka, kota si ati sisinamlume.
Allah arye nyabuk. “Se, anggun Israel ninye ara, anggunce atalak ara. na wininamne ning nirya, lakak eipnamluma ati, anggunda moubuka kel biknamlume. Ara, nara, anggun ni koproba Allah Yahweh unune. Nara Sion mutuku deice uk unune. Aununa ati amutuku ara, narye wibuka deiamsa ati, amutuku noutam, na dirina pia weika arye unamle. Tonda, Yerusalem mutuku noutam babye, ‘Naʼ tenen, mutuku ulula ati, narye teleb kipdeipniba, malye un ning tonok babye, amutuku noutamak ara, tonap pia kum unamle. Diksukum ninguk unamle. Ati, amutuku noutam ara, yuk ninye ayala-ayala nirya, narye wibuka kum deiamse ninye ara, ninye asik nang atonun ninye anya arye, amutuku noutam ton, pia kum weknamake.
Winipmanto ara, ninye arye koulamak ning tonok, wa noutam kouamikibuk, tup-tupa bongolamle touk, na Allah arye, na mapu ati, sik minop talak areamse mutuku uk, tamubuka arepneba, pia aunamake. Winipnye talak ara, tonap tamubuka, kum dopropnamne. Tonda, yuk mutuku ninye arye, na mapu Israel nang ati obikirye, amutuku noutam arye, pia kum bobinamake. Narye sikti, areamse mutuku noutamuk, pia unamake. Dipkoprop nara, anggun deiyoknye, na Allah si Yahweh arye nyapsine.” Allah arye nyabuk.
Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.
Amalye winilulum ning arye, sik Libanon mutuku ninye weik arye, obuka sirya daklalume. Bukni, aning winilamlum touk, narye wenepsiniba, anggun weik arye dipnamlume. Tonda, anggun Kasdim mutuku ninye weimunye kam ning, aning-aning nirya, pia weik arye opneba, dibicopura, anggunda ilil weik upsiliba, ikin kanye bobuka, ‘Se yata wirinamap do?’ tenebuka, unamlume. Winipsinyeura, ninye yuk nang arye, eibuka nalinamsiyake. Aning ara, urdem ati kum wenepnamsine. Deiyok ara, anggunce yuk mutuku ninye, pia weik arye, obuka sirya dakamlume. Winilalum deice arye, ninye ining pia weik arye balamuk. Tonda, anggunce yuk mutuku ninye arye dolamik asik ap, sik talilamik mutuku ap, sik amutuku ulamik ninye ap, weik arye obuka, sirya dakamlume. Aning nirya ati, na Allah Yahweh arye, anggun Kasdim mutuku ninye ati, weik arye wenepsinirye, dekna arepnamsine. Winipsinyeura, yuk mutuku nang arye anggunti, yep-yep nyanamsiyake.
Minop talak, anggun Kasdim mutuku ninye arye, yuk mutuku ninye ati, olamlumce, sik ning nirya, ubula dololamlume. Tukwak mutuku noutam nirya arye, anggunce yuk ninye mitik asik arum ap, weik kota mutuku ap, uluplopna arye, sik ning ubula dololamlume. Amutuku ulamik ninye weik arye, obuka sirya dakmanto ulamlume. Bukni, wini talak ara, yuk mutuku nang oplumce, mitik anun batakalum ninye arye, anggun dam yanuka bisibuka malye kipsikirye, adiparyuk, obuka sirya daknamsiyake.
Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Bukni, atalak akunum dam uplyopura, Yerusalem mutuku nang ara, ‘Yuk mutuku nang arye amutuku nang obuka sice buklobikcakʼ tenen, narye kalikinamne. Winipyeura, yuk mutuku nang arye, ‘Yerusalem mutuku nang opnuyab,’ tenepnamaka babye, kum winipmanto upnamake. Winipmanto ara, ninye arye, weik ikin keil awamlye buk, sikce, ‘Akeil nun babye mikip aryuk erebuka yukak bobinamap,’ tenebikirye, tomoptinga babye, akeil kum tomopmanto unyake. Aning atonun, narye Yerusalem mutuku kaliklyeura, yuk mutuku nang arye, anang obuka kum sice bukloptinge. ‘Opnuyab,’ teneptinga babye, sikda olana uk upnamake. Bukni, ‘Yerusalem mutuku nirya, sice buklopnamabʼ tenen, mutuku sirya, im nirya daunyak nang nirya arye, Yerusalem mutuku dam yakirye, warikilyanamake.
Minop talak ara, Yerusalem asik domik ning obuka, sice buklobik bukni, Allah Yahweh tamubuka yanamle talak ara, Israel nang arye tamubuka amutuku yanuka unamake. Amutuku noutam unamak nang nirya ara, pia namin asa arye yanuka unamake. Ara, atalak arye dipdongobuka, doupnamle talak nirya ara, ninye arye amutuku yanuka, kum kilina ati nirya babye, sik anang dam ton pia kum unamake. Atalak arye dipdongobuka dounamle talak nirya, Yerusalem mutuku ara, pia telebuk unamle.
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Na Yesus ara, na tenepnye touk tonok pil babye, na yuk kum donune. Na ni koprop arye nyanilye touk, kekepnirye yupu bokolisunune. Na aryuk kanye delinun ninguk tenebuka, pil kum donune. Aning kum bukni, na dopdeipnuknye, el kanye delilul ning uk, el tenelul touk wininune. Aninguk wininuna anya arye, yupu bokolisununa nirya ara, dipkoprop teleb kibuka diksukumuk yupu bokolisunune.” Yesus arye nyabuk.
Isa Mutuku Dongonye ap, el malaikat ap, tukwak mutuku dopkwetebikura, im deice tam tonoknye birye ayupu weik arye nyabukba, kekepse. “Wini talak ara akunuma. Diba tenenlamikba, nun weit yapu atonun unyak ninye ati, Isa Mutuku Dongonye arye, ‘Anggunda malye,’ nyabuka, malye yupu anggun nong deice delisilirye, lululisululnye bira, akunum malye kibake. Isa Mutuku Dongonye arye, diba tenen nang nirya ati, keting noutam babye, lukunyan babye nirya ara, asum-asum nirya, Allah kekelulak tiklirye, “Anggunda malye,” ululume, nyabuka lululisulule. Bukni, elda akunuma. Tukwak mutuku akunum dopkwetepmake. Ati akunuma. Nun Ni kopropa Allah arye, el mapu nirya ati lyepnule. Wini talak aryuk Allah el weik mikip deice arye, aning-aning nirya deice tam ulirye, talipliba, aning nirya el amutamuk unamle. Tonda, Allah arye, ‘Ninye nirya lyepnamle’ tenen, dopdeipsuknye Kristus ap, el Allah ap arye aning-aning nirya talibuka unamdake.”
Ati ara, amalaikat arye ayupu ton nyabuk. “Allah arye, Babel mutuku ulamik ninye sik wenena ati, akunum oplopmala ati ara, anggun im deice tam ululum ninye nirya arye, kanye deibuka pin-pin asa arye unamlume. Tonda, Allah arye wiamsukba, elti, diba tenebuka ululum nang ap, el yupu dobuka peterelbana ati, deiyok kouna nang, dopkwetepsuk Rasul nang ap, el yupu laka nyalamlum nabi-nabi nang ap, anggun nirya babye kanye deibuka pin-pin asa arye unamlume. Deiyok ara, sik Babel mutuku ulamik ninye arye, anggun nong deice ikin ning weika arye delilamsika ati ara, Allah arye sik Babel mutuku unyak ninye ati, akunum wenebuka oplopmala atia. Ati anggun nirya arye kanye deibuka unamlulume.”
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
ကြော်ငြာတွေ