Allah elce malye unyak nang ati, yupu bokeiplirye, pia malye unyak nang ati, pia wenebuka opnamle talak ara, yata deiyok ati, elce, “Asum ara ani, atalak ara ani,” nyabuka, kum laka nyasulul do? Aning atonun, Allah arye, nyasulul yupu, moubuka talinyakce, diksukumuk teleb unyak nang mutuku-mutuku nirya babye, Allah arye, pia malye nang ati, yupu bokeiplirye, anang ati wenebuka opnamle talak ara, ‘Asum anyeʼ tenen, kum biktinge. Sikce atalak kum dinyaka ara, yata ati do?
Zefanya 1:7 - Eipomek7 Nabi Sefanya arye, ayupu nyabuk. Allah Yahweh aning-aning nirya talilirye, weik tonun erebuka, Pia Mikip Weik Deiyoknye ulule. Elce, ‘Tukwak mutuku unyak nang nirya ati, sik wininyak ning ara, teleb do, malye do?’ tenen, dipdesilirye, wenepnamsil talak, akunum dam upmala ati, anggun tukwak nang nirya arye, kekeplulume! Ara, Allah Yahweh, el dam yamunce, yupu nyana pia kumce, pia tunim abuka unamlume. El Allah arye, tukwak nang nirya, yupu bokeipnamle sum, akunum dam upmala ati, elce tenyamukce, akunum wiamuk nang nirya ati, akunum kintinip deipmale. Ara, winipmanto ara, ninye arye, ‘Allah ati, si erenamap’ tenen, sikce talye kam un ning, domba basam do, kambing basam do, obikirye, uku dongolamak touk, Allah arye anggun Israel yala ninye ati, atonun winipnamsile. Allah arye, ‘Anang ara, ‘Naʼ tenen, nang unyaka ati, na si erena ati, wenebuka opnirye, sirya daknamne,’ akunum tenebuka ati, aning ara, adiparyuk winipnamsil ati, anggunda, Allah el dam yamunce, tunim abuka unamlume. Ara, sik malye-malye weik wininyak nang ara, Allah arye sikti, weneplirye, opnamla ati, akunum kintinipmale. အခန်းကိုကြည့်ပါ။ |
Zefanya 1:7
39 ပူးပေါင်းရင်းမြစ်များ
Ninye yu deice arye, mal olalamaka ara, Allah arye, ‘Akunuma,’ teneplye talak ara, yupu sekelule. Tonda ninye sik olan yin ap, mal ap nirya lakuka, batakalule. Tonda ninye ona ati, ketelinyak yo tace nirya, kau kibuka celtakalule. Tonda, ‘Mal dobikiba, na nong deice yanuka biknilyak’ tenen, lelilongon ting aning babye, dobuka uku dongolule. Allah ara, Pia Mikip Weiknye ulula atia.
Na Allah aryuk, narye wipdeipse nang ati, ‘Sikce na tenepse pil dopnamniakʼ tenen, ‘Anggunda winipnamlume,’ nyabuka, sik deice akunum nyapdeipse. Tonda, na yu weik upnuk ati, narye wipdeipse nang, sik mikip yin talin nang ati, “Anggunda yanuka buluplulume,” nyapdeipse. Bulubikceura, narye, ‘Na yu weik upnilyak ati, na tenepse nang ara, anggunce anang deice ikin ning deibuka, wenepmunce, opnamlume,’ nyapnyeura, ayin talin nang arye, anang olalbinamake. Ayin nang ara, kwalinyak bukni, “Aninye olbilulume,” nyapdeipnyeura, sik ayin nang ara, ‘Yo, nunce koupnuyapʼ tenen, kanye deibuka kintinipnamake.
Sik wenepnamne mutuku noutam ululum nang ara, imun kanye bopmunyakarye, weik arye engenamlume. Ara, na Yahweh arye anggunti, ‘Wenebuka opnamsineʼ tenepse talak ara, akunum dam upmala atia. Atalak ara, na Allah arye, aning-aning nirya talibuka, deice tam erebuka, mikip weik ununye birye, na tenepse nang nirya ara, obuka kum kipdeipnamsin atia.
Aning ara, talye ati kum nyapsine. Allah arye akunum tenyamuk touk, asum akunum uplyeura, Allah Yahweh aning-aning nirya eitam erebuka, im deice yin talin malaikat nirya, sik weik deiyoknye ulula ati, sik kanye erebuka, kwalibuka unyak nang nirya ara, amu tam kipdeipnamle. Tonda, tukwak nang mutuku sirya, im sirya nirya arye, ‘Se aning ara, weik mambul, aning tonok ara, pia telebeʼ tenen, dipdakirye, kwalibuka talima erenyak nang nirya ara, Allah arye aning nirya yaniplirye, pia amu tam kipdeipnamle. Tonok ning babye, kum bataknamle.
Dipkoprop, anggunce na si erena ati pil donauk umumnya babye, na Allah arye sik wenena ati, kanye imun ning dopdeipnyeba, anggun mutuku asik dobuka umumnya noutam ara, ikin ning yanamsile. Winipnyopura, anggun amutuku noutam ululum nang nirya arye, kanye imun kanye bobuka, ‘Se’ tenen, malye nyabuka engenamlume. Tonda, anggun mutuku weik asik ara, mesba deice ining barilamle touk, anggun wenen ning arepsinyopura, anggun anyasik noutam nirya ara, ining weik aupnamle.
Winipmanto ara, ninye arye mek weik tonun dibikiba, mitika nun ton kum dipmanto upliba bataklamaka touk, Allah babye, el ninye on ya ara, im noutam ap, im deice ap, wamlye ning akunum obuka, sirya daklyopura, aminyan talak Edom mutuku ton yanuka, amutuku unyak nang ton, obuka sirya daknamle. ‘Edom mutuku nang wenebuka opnirye, kum kipdeipnamneʼ tenen, Allah minop talak akunum kintinip deiamuk ning ara, atalak sik deice uk yaliba dopropnamke.
Allah el ninye on parang ya arye, ninye weik akunum oplyopura, aya deice ara, Edom mutuku nang, sik ining ap, meta apuk, weik palipnamle. Winipmanto ara, Allah arena ati, ninye arye kam ulamle ning, domba basam mi ap, kambing basam ap, uniryuk yim domba basam talima ap, obuka sekmakiba, aning arye ining ap, meta ap, sik ya deice palilamle touk, Allah el ya babye, atonun kibuka akunum winipnamle. Deiyok ara, Allah arye, sik Edom tam unyak nang obukce, sik mikip deiyok mutuku, Bosra mutuku nang babye, akunum obuka sirya dakuk. Dipkoprop, Edom tam mutuku unyak nang babye pia weik tonun akunum oplobuke.
Winibukba narye nyapse. ‘Se, bicoe. Nara daopnutuba, diptinye. Aning ara, talye ati kum nyapne. Deiyok ara, pia mambul ning eipman bukni, nara malye yupu nyananye unune. Tonda, na unye mutuku noutam neika unyap ninye nirya babye, malye yupu uk nyapdabirye, malyeuk unyabe. Wininyap bukni, na malinye birye, na asing arye pia mambulnye elinmane. Na malye ning aunilye bukni, aning-aning deice tam ulirye, ninye deiyok talibuka ululnye, Weik Raja akunum eipmane. Ara, aning-aning nirya talilirye, im deice yin talin malaikat nirya, sik weik deiyoknye ulirye, weik erena ap, mikip weik ap ululnye, Allah el si Yahweh akunum eipmana ati, na dipnamne,’ nyapse.
Winipnamalum bukni, na Allah Yahweh arye, anggun nirya ati nyapsine. Nara Allah, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ayanamle talak ara, ‘Na Allah ati, ‘Nun lik,’ teneninyak nang nirya ara, wenepnirye, obuka sirya daknamne’ tenen, na akunum tenyamse talak, mambul weik talak akunum dam uple. Atalak noutam ara, mutuku sirya, im sirya nirya unyak nang arye, ‘Allah ara, nun lik’ tenen, na yupu yaninyak nang nirya ati, na yu weik upnuka deice arye, anang nirya wenebuka opnamna ati, sik nirya ati, kwang daknamnarya! Nara Allah, na ninye on ya arye dobuka, anang wenena ati, onmanya ani, sik ining pia weik banamle. Na ya arye sik ining dinmalya ani, akunum winiplirye boupnamle. Winipnamla deiyok ara, ani. Awinipmanto ara, nati akunum diba tenebuka bikamnik nang arye, ining ning obikirye, na si erena ati, aning boyanuka, uku dongolbalamak touk, anang olan talak ara, na Allah ati, ‘Nun lik,’ tenenyak nang nirya, akunum opnyopura, na Allah arye, ‘E, akunuma, na kanye deipne,’ tenepnamnarya! Ati atalak noutam ara, nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ati, na Allah ati, ‘Nun lik,’ teneninyak nang ara, utam dabu tam binamuk mek, el si ara Efrat mek dam, amutuku noutam, yin talin nang yupa pia weik tonun opnamaka ati, narye, ‘E, akunuma, na kanye deipne,’ nyapnamnarya!
Anggunda bita dilulume! Anggun ti wenepnusin sum ara, akunum yala! Wini talak ara, ikin pia weik ning, anggun Israel nang dam deipnamsin ning ara, akunum dam yanusile! Anggun Israel nang arye, mandipna kanye bobuka, malye weik winilulum ning nirya ati ara, mitang kipnamsine! Ninye arye koulamak ning palamlirye, keit ning ap, duk ap minop palamle touk, anggun Israel nang ara, weik erepdanuka kwalimunce, kimilalulum ning nirya ara, weik kipnin balule. Awiniluluma deice arye, anggun wenen ning, akunum dam upmasile.
Anggun Israel yala nang dam arye, aning yala-yala nirya ara, akunum kum danamle talak ap, anggun kanye imun weik unamlum talak ap ara, akunum dam yanmasile! Ati se, anggun amutuku noutam ululum nang ara, pia mambule. Dipkoprop kanye imun weik ning, anggun nong deice akunum upnamasile! Ati wini talak ara, anggunce amutuku-amutuku deice tam ululum nang nirya ara, kanye pin-pin una asa una kumce, kanye imun tenena ap, ilil una ap, talima dakalsakana apuk, unamlume.
Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.
Tonda, yuk asik ara, ninye weik arye akunum dibicopura, anggun tamnye ton yalirye, sik adipmace nang weina ati, sik nong bobalye talak ara, winipnamle. ‘Anyasik pum tam, ninye tonok ton tuba kam unmal do, kum do?’ tenen, anye el balye tam arye nyabuka asipdenamle. “Anyaik pum tam ara, tonoknye ton kam unmalamce, dungnupmalam do?” nyabuka asipdenamle. Asipdelibuk, tonoknye birye, “Na tonok kam unmane,” nyaplyopura, dipmace nang weina deiyoknye birye, nyapnamle. “Yuk ninye ton, an kam unmalama atonun unmak do? An tonok do?” nyabuka asipdenamle. Ayupu nyapliba, anyaik kam unmalinye birye kekeplirye, “Kume, na tonoka. Tonda, Allah Yahweh, el si ton pia kum nyanalyame. Yupu mitik tonun arye nyapminba, Allah arye kekepkilyopura, tuba tamubuka yalirye, nun babye opsilyake. Ati tunim abuka unalyame,” nyapnamle.
Aning winipnamle talak nirya ara, ninye deiyok talibuka, pia teleb aik ukirye, kanye teleb mot senyak nang ara, tuba tamubuka imun kanye bobuka, engenauk unamake. Allah Yahweh aning-aning nirya talibuka, deice tam Pia Mikip Weik Deiyoknye birye nyapne. Tonda, aninye obuka, sirya daknyopura, sik dipnamak nang, sik nong nirya ara, dan sukum do nirya, aunauk upnamle. Ara, ninye weik arye dibikiba, yuk nang arye, dana-dana tam nirya binuka donoknamake. Winipnamle dam ubuk ati, anggun nirya tunim aplulume nyapsine,” Allah arye nyabuk.
Bukni, nara Allah Yahweh, nara Weik Erenanye unune. Tonda, nara, Kam Una Deiyoknye unune. Na Pia Teleb Lek Aik, na si eren aik pum tam unune. Aning ati ara, tukwak mutuku im sirya, mutuku sirya unyak ninye nirya ara, na dam yamunce, yupu nyana kumce, ilil upsiliba, tunim abuka unamlume. Nati, yupu nyana kumce, kekenauk unamlume.” Allah arye, nabi Habakuk biti nyabuk.
Allah Yahweh elce, ‘Tukwak mutuku unyak nang nirya ati, sik unyak ning ara, teleb do, malye do?’ tenen, dipdelirye, wenepnamle talak, akunum dam upmale. Asum ara, dipkoprob minop yanuka winipnamsile. Asum deice arye, Allah Yahweh arye, tukwak nang unyak ning nirya ati, dipdelirye, sik nirya arye, malye ning winilamika ati, wenebuka opnamle. Asum ara, dipkoprob minopce yanamle. Asum ara, kanye imun weik ning yanamla ati, pia weik tonun engenamlume. Tonda, sik mandipna kanye bobuka, mal olana kel weik bikamik nang babye, ‘Se, yata ati, aning winipmasil do? Wini talak yata wiriptibye do?’ tenen, ikin kanye bobuka, sik babye engenamake.
Allah Yahweh, elce tukwak nang, im sirya mutuku nirya, anggun wenen sum akunum dam uple. Ati ara, minop talak, sik mal olan nang arye, anggun Yerusalem mutuku ululum nang obikce, anggun talilamlum bona nirya alubuka dopromik ning ara, narye dopropnirye, anggun Yerusalem mutuku nang ati, ila tamubuka arepnamsine. Aning-aning nirya ara, narye anggun nirya ati, bokuka yuk-yuk arepnamsine. Aning nirya ara, anggun asing arye eipnamlume. Bukni, doupnamle talak arye winipnamne.
Aning nirya ara, anggun tukwak mutuku, im sirya, mutuku sirya, noutam ululum nang nirya ara, pia dakeiam asa arye, tunim abuka, Allah el dam tamupmunce, yanuka unamlume. Yupu nyana ara, kume. Deiyok ara, Allah Yahweh el dam ara, wininamlume! Allah Yahweh, el pia teleb, lek diamuk ulamukak, im deice akunum buklirye, yanuka lyepropnamsila ati, anggun nirya ara, yupu nyana kumce, tunim abuka unamlume! Na Zakaria birye nyapsine.
Allah Yahweh aning-aning nirya talibuka, im deice yin talin malaikat nirya, sik weik deiyoknye birye nyabuk. Dipkoprop, na tenepse sum, akunum uplyopura, malye unyak ninye ap, talima erelan deice arye, erepdanuka kwalinyak ninye ap nirya, narye wenebuka oplopnamne. Winipmanto ara, koluplirye, kel-kel alamle ning, uku dinibikiba, minopce uku buk paplirye, dilamle touk, sik amalye wininyak ninye nirya wenepnirye, obuka sirya daknamne. Atalak ara, sik amalye unyak ninye ara tonok ton kum bataknamle. Weik uku dinmalirye, yo deiyok ap, taruk ap, yating nirya ap, dibuka kum danalamle touk, sik amalye wininyak ninye nirya wenepnirye, obuka sirya daknamne. Atalak ara, sik amalye wininyak ninye ara, sirya ton kum bataknamne. Wimipnamne talak ara, sik yala ninye nirya babye, pia kum upnamake. Ati, doryanamle talak ara, amalye unyak ninye, sik yala nang arye, mapu ton deibuka kum punupnamake. Sik yala nirya kum danamake.
El min arye nyapdeiamuk nang batakik bukni, adeiyoknye birye, el melin nang ati yukubukba, yayikopura, nyalbinmek nanguk ila tamubuka, tonap ananguk nyalbana ati, ayupu nyapdeibuk. “Na weik sapi basam teleb ubuka nemuk ning akunum opsirye, kwalibuka deipse. Tonda, aning-aning nirya, teleb ninguk akunum kwalibuka deipsa ati, na mi kil dopnula ati, ‘Kwalina kintinibuka deipsisa dilyalulume,’ nyalbinululume,” nyapdeibuk.
Ura, nun nirya akunum kel kiyamupe. Allah arye el mem yupu nyabuka areamukba, Yahudi yala ninye doprobikce, ayupu uk talibuka, ayupu amu tam unyake. Ayupu noutamak nyasilye ning nirya ara, anggunti nyasulula anya arye, anggun kan-kan noutamak arye, tonoknye babye, “Nara, malye kum unune,” kum nyaptue. Yahudi yala ninyeuk kum bukni, ninye mutuku-mutuku nirya atonun, malye nanguk unyaba anya arye, Allah arye yupu lepsisikuka bokeipsilirye, wenepnamsila ati, nunce elti, yupu ton tamubuka kum nyaptibye. Allah ati tamubuka yupu nyana kumce unamabe.
Aning asipdenutum bukni, anggunti tamubuka nyapsine. “Kume, anggunda talye tukwak ninye ululuma anya arye, Allah ati yata wiribuka, asipdetumce, elti, wenena yupu nyaptum do?” Nabi Yesaya birye sekeiamuk touk, ayupu dobuka, anggunti nyapsine. Elce sekuk yupu ara ani. ‘Allah arye kwepdeibukba, talye aulul ning aning-aning nirya arye, aning-aning nirya kwepdeiamuka deiyoknye Allah ati, “Anda yata ati, na unye touk kwepdeiamnulm do?” nyabuka, weneptu do? Kume, aning ara kum winipmantoe.’ (Yesaya 29:16)
Tonda, weik arye kanye pia deibuka, pin-pin asa arye, nun ni Allah ati, ‘Teleb, nyanamak’ tenen, Allah morosinyame. Nun ni Allah ati, tuba-tuba, ‘Telebe,’ nyanamlulume. Nyanamluma deiyok ara, ani. Ara, Allah arye, ‘Na mapu nirya akunum teleb kipdeipnirye, im deice dekna weik ning arenamne’ tenen, kintiniamsuk ning ara, ‘Sik Kolose ninye im deice ukirye, sik babye teleb ning dopropnamak’ tenen, akunum teleb kipdeipsuke. ‘Im deice dekna ning dopropnamak’ tenen, teleb keipdeipsuka ati, nun ni Allah ati, ‘Telebe’ nyabuka, weik arye kanye delinamlulume. Nun ni Allah arye, aning-aning nirya talilirye, im deice weik dirina noutamak pia unamlak ara, nun ap, anggun ap, dib tenen ninye nirya ap, neika unamabe. Anggun Kolose ninye ap, ‘Im deice unamlum’ tenen, Allah arye akunum teleb kipdeipsuke.
Nyabikbuk, Samuel birye, tamubuka nyabuk. “Diba. Narye, anggun teleb ulina ati yanmane. Tonda, na kam tuba ulamle ning dobuka, Allah el si erena ati arepnune. Ati, anggun malye ning nirya batakuka, anggun kanye talima kintinipmunce, mek kekmunce, teleb baju akunum ongopmunyopura, anggun ap, na ap, neika Allah ati kam ning obuka, elti, arebibirye, el si erenamabe,” nyabuk. Nyabukce, Samuel birye, Isai ap, el mapu ap, ‘Allah ati kam ning arepting’ tenen, teleb kipdeibukba, sik kanye talima noutamak ara, teleb tenen kintinibikce, sik yuk-yuk kintinibikopura, anang ati nyabuk. “Ura, anggun ap, na ap bulubukap, Allah el si erena ati, ining ulamle ning obuka, neika arepnuyabe,” nyabuk.
Saul birye, aning eibukce, asum ara yupu kum nyabuk. Elce utenebuk, ‘Kume, Daud kum yanmal deiyok ara, Allah arye, ‘Aning ara, talina meme,’ nyapdeiamsuk ning, malye ning mangkau arye, bol pibuka anya arye, elce ‘Na malye unmana ati, anang ap neika kum diptinye,’ tenepmala anya arye, kum yanmale.’ Saul birye, aninguk tenebuk.
ကြော်ငြာတွေ