Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.
Zakaria 8:3 - Eipomek3 Nara, Allah Yahweh arye nyapsine. Nara, tuba tamubuka, Sion mutuku uk, yanamne. Ara, nara weik asik domikak, Yerusalem mutuku noutamuk unamnarya! Ninye nirya arye, amutuku ati, ‘Se, sik Yerusalem mutuku unyak nang arye, Allah ati, pia diba tenebikirye, el tibuk talibuka ukirye, el siuk erenyake,’ nyanamake. Tonda, na Allah Yahweh, im deice yin talen malaikat nirya ara, sik weik deiyoknye unune. Na mutuku koproba ara, Sion mutuku ati, ninye nirya arye, ‘E, amutuku ara, dipkoprob pia teleb lek mutuku ulule,’ nyanamake. Nara Allah Yahweh, amutuku noutam yanirye, amutuku pia unamne. အခန်းကိုကြည့်ပါ။ |
Zakaria 8:3
39 ပူးပေါင်းရင်းမြစ်များ
Minop talak Yerusalem mutuku ulamlum ninye nirya ara, ‘Na ka,’ tenebuka tonok kanye bobuka, nati kanye talima dukdongobuka ulamnulum bukni, wini talak ara, na bataknulumce, talye-talye yolalamak kilapu atonun ululume. Minop talak ara, diksukumuk ulamlumce, pia telebuk ulamlume. Ninye ati yupu lipsisikuka bokolilamlumce, teleb yupu uk nyalamlum bukni, wini talak ara, olan ninye uk ululume.
Ati, minop talak teleb deiyok nang arelamsisa atonun, wini talak ara, narye ila tamubuka teleb kibuka, yupu lipsisikuka bokolina nang ap, ‘Winibuka unamlulume,’ nyabuka, yupu lipsisikuka nyan nang ap, wipdeipnamsine. Winipnyopura, yuk mutuku ninye nirya arye, anggun Yerusalem mutuku ululum ninye ati, ‘Amutuku unyak ninye ara, pia teleb ninye unyake,’ nyanamsiyake. Tonda, ‘Yerusalem mutuku ninye ara, Allah el tibuk, batakna kumce, pia talibuka dobolbanyak ninye unyake,’ nyanamsiyake.
Allah arye talinamle mutuku nirya ap, ‘Pia Telebak upnamle’ tenen, wipdeiamuk mutuku, Sion mutuku deice ap ara, pia kum olanamake. Amutuku nirya ara, malye winin ning ap, talima pum tam arye, ‘Malyeʼ tenen ning ap ara, pia kum unamle. Telebuk unamaka deiyok ara, ani. Ara, mutuku-mutuku nirya ara, Allah Yahweh el nong ap, el winin ning ap ati, moubuka kel bikikirye, pia telebuk unamake. Winipmanto ara, weik laut mekwen deibuka langdibukba, yuk ning nirya, kum ulul touk, sirya daknamle talak ara, mutuku-mutuku nirya, Allah Yahweh el winilul ninguk weik upliba, yuk ning ton pia kum upnamle.
Anggun Sion mutuku ululum nango, kanye lopsiliba, weik yupu ara, weika arye nyapmunce, Allah si eren mot senamlume. Wininamluma ara, talye ati kum bukni, deiyok ara, Israel nang anggun ni koproba Allah, malye winin ning tonok babye kum winilirye, Pia Diksukum Leknye ulule. Tonda, elda pia weik si erenanye, anggun kan-kan ulamlibuk, anggun ap neika ansinibuka unamlume.
Allah arye anggun mutuku ila tuba tamubuka teleb kipdeipsilyopura, minop talak mek pia kum mutuku kiamicak ara, ninye arye yupu diksukum kibuka lipsisikuka bokolinamake. Tonda, tuku teleb upliba, wa wibuka koubikiba, paplirye, duk moun ning aning-aning nirya papnamle mutuku ara, ninye nirya arye malye winin ning batakuka, diksukumuk unamake.
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Yerusalem mutuku winiryuk ning kwepdeipnye talak ara, domba mi ap, weik kuse atonun yu ning el si singa kus ap, sik neika maning bok dinamdake. Tonda sapi basam maning bok dilamle touk, pia yu weik kuse el si singa kus babye, yuk kam ning obuka kum dinamle bukni, el babye maning wa bun mutmuta dinamle. Ton ning ara, ninye opliba, kulanyak kwatima nirya ara, tukwak mutuku aubuk kel-kel an tuku uk dinamake. Abal nirya ati, mikip ara mitang kipniba, yu kum unamake. Ara, na Allah Yahweh mikip weiknye unamne mutuku deice nirya ara, na dam arye yu ulamle ning ayala-yala nirya ap, ninye ati malye ulul ning nirya ara, mitanguk kipdeipnamne. Pia malye ning ton, tonok babye, kum unamla anya arye, pia teleb ninguk unamle,” Allah arye nyabuk.
Narye wibuka deipnamne nang arye, amutuku nirya peterepra banamaka noutam arye, anggun kayapu nang, Israel yala nang ton, amutuku-amutuku noutam arye dobuka, Yerusalem mutuku tamubuka boyanamake. Ara, ninye arye, Allah el si erena ati, deken ning boyanuka arelamaka atonun, sik yuk-yuk mutuku nang boyakirye, na Allah Yahweh ati, arelyanganamniyake. Tonda, anang ara, bobukabikirye, na wibuka deiamse mutuku dup, Yerusalem pia teleb lek mutuku boyanamake. Boyanamak ning ara, kuda basam balye deice buna ap, keledai basam balye deice buna ap, unta basam deice ap, kuda basam arye libuka bobanyak kereta perang deice ap, anang libuka boyanganamake. Sik amutuku nang boyakirye, na dam boyanamake. Aning ara, winipmanto ara, anggun Israel nang arye, na Allah ati, na si erena ati, gandum ning bulubuka kintinibikirye, teleb lun ning, mek loknopura, aning deipnirye, na si eren aik dam boyangalamik touk wininamake. Ara, gandum duk libuka, teleb ning deice arelyangalamika atonun, sik yuk-yuk mutuku nang boyakirye, na dam boyanganamake.
Yesaya birye nyabuk. Na ap, Allah Yahweh arye arelamnukba, deipse mapu ap ati, Allah Yahweh elce weik mambul si akunum arepsuke. Asi moubuka tenebibya deice arye, Allah Yahweh arye, wininamsil ning nirya ara, moubuka kel biktibye. Tonda, Allah Yahweh arye aning-aning nirya talibuka, deice tam ulirye, im deice yin talin malaikat, sik weik deiyoknye ulule. El si ap, mikip ap ara, Sion mutuku deice arepsukba, ulule.
Tonda, nun ni anda yata deiyok ati, kanye bokoltoliba, ‘Yata uptibye do?’ tenen, pia walwal ulamak nang atonun upnamsilam do? Tonda, nun ni Allah, ance mal oldana deiyoknye, mikip weik weiknye birye, el mapu ati, ‘Melipnamne’ tenelul bukni, pia yukak uptopura, el mapu kum melipmanto ulamle touk, upnamsilam do? Aning nyapman bukni, winina ara pia kume, na nio. Dipkoprop, anda nun ni Allah, Yahweh nun kan-kan tuba unamsilame. Tonda, yuk ninye nirya arye, nunti, ‘Sik Israel ninye ara, Allah Yahweh, el mapu koprop unyake,’ nyabuka, sisibuka nyasinyaka anya arye, ‘Ance kum bataknamsilam’ tenen, moropkine na nio. Yeremia birye nyabuk.
Minop talak, Yehuda yala ninye ati, ninye deiyoknye kibuka taleamsuknye, el si ara Hizkia, elce taleamsuk talak noutamak ara, Allah yupu nyapdeipliba, laka nyananye, el si Mika, mutuku si Moresyet mutukunye birye, nyabuk. Atalak ara, nabi Mika birye, amutuku ulamik ninye ati, nyamuk. “Allah Yahweh, aning-aning nirya deice tam, weik erebuka ululnye birye, el yupu nyapdeipnukba, yanuka nyapsine. Allah Yahweh ara, aning-aning nirya talilule. Im deice yin talin malaikat nirya, sik weik deiyoknye ulule. Allah arye nyapdeipnuk yupu ara, ani. ‘Sion mutuku ara, wa win dam atonun upnamake. Tonda Yerusalem mutuku asik dobik ning ara, yu nang arye yanuka, uluplobikiba, asik oldemuk upnamle. Tonda, Allah el si erena ati domik aik, uluplobikiba, dauamlya ani, aminyan talak ara, amutuku dupak, talye palamle yo noutamak tiknamle. Anyasik uluplobikiba, talye aikuk upnamle atia.’ Allah arye nyapdeipnuk yupu nyapsine,” nabi Mika birye, nyabuk.
Israel ninye, anggun ni koprop Allah Yahweh, aning-aning nirya talilulce, im deice yin talin malaikat nirya, sik weik deiyoknye kibuka ululnye birye, ayupu nyabuk. “Nara, Israel ninye ati, pia kalikuka melilamsise. Na mapu Israel ninye minop talak taleamse atonun ubuka talipnamne. Winipnyopura, Yehuda yala ninye unyak mutuku noutamak bukni, Yehuda mutuku asik dobuka, unyak ninye nirya ara, tuba tonap tamubuka nyanamake. ‘Se, Allah el si Yahweh arye, teleb kipdeipsiliba, nun winin ning nirya ara, pia telebuk winilinamsile. Yerusalem mutuku ara, malye winin ning ton kum ulule. Pia diksukum winin ninguk winilule.’ Amutuku ara, Allah arye, ‘Na tenen mutuku ani’ tenebukce, wipdeiamuk anya arye, ‘Amutuku ara, pia telebe,’ nyanamake.
Atalak noutam ara, Yehuda mutuku noutam unyak nang, anggun mal olan nang oplopniba, anang ap, tonda, Yerusalem mutuku weik asik noutam unyak nang ara, lyepropniba, sik anang nirya ara, teleb kanye deibuka unamake. Sikce, ‘Se, nun mal olan nang arye olyasicakʼ tenen, tuba kum teninamake. Atalak ara, amutuku nang arye, Yerusalem mutuku weik asik ati, “Amutuku el si ati ara, ‘Allah Yahweh nunti lyepsilirye, pia melibuka kalikinamsile,’ “nyabuka, si erenamake.
Akat keil arye, cang poka dopnamlum ning ara, kota Yerusalem antanap dongobuka dana-dana tam nirya nukmunyopura, el cang nirya ara, 9 kilometer deice kiklibuka dopnamlume. Tonda, kota Yerusalem dona ati, anggun deiyok koupnamlum talak arye dipdongobuka, keting tamun oyanamle talak nirya ara, akota si ton si sinamak nang ara, ani. Akota el si ara, ‘Allah Yahweh, amutuku noutam tuba aulule,’ nyabuka, kota si ati sisinamlume.
Se nun ni koproba Allah, ance aning-aning nirya talebuka, pia deice tam erebuka, pia mikip weik deiyoknye ulyame. Bukni, nunda malye weik winilamupu bukni, Allah ance minop talak arye dipdongobuka, wini talak babye, tuba diksukum piluk dolyame. Diksukumuk winiminya ati ara, telebuk ulamlum touk, na ni Allah, an yu upmakilye babye, bataklyame. Ara, wini talak babye, dotalak babye, weik kanye imun ning, nun Yerusalem mutuku ninye deice delinamsilam ning ara, bataksutumce, ila tuba tonap, kum arenamsilyame. Yerusalem mutuku ara, ance wipdeipluma anya arye, an mutuku koproba atonun ulule. Yerusalem mutuku kon deice ara, pia teleb kipdeiplumba, pia teleb lek mutuku atonun ulule. Ati, ‘Amutuku wenen ning ton, kum arenamsilyame’ tenen, moropkine na nio. Se, nun ni Allah, Yerusalem mutuku ara, ance wiplum mutuku bukni, nun ap, nun apu yapu ap, nun nirya arye, malye wininyaba deice, sik yuk mutuku kili sal nirya arye, Yerusalem mutuku ati, malye yupu nyanyake. Nun unyaba dana-dana unyak ninye nirya arye, an mapu Yerusalem mutuku unyak nang ap, Yerusalem mutuku ap ati, malye nyanyakce, ‘Sikda malye wininyake,’ nyabuka, yep-yep asinyake,” Daniel birye, Allah ati nyabuka morobuk.
Allah arye nyabuk. “Se, anggun Israel ninye ara, anggunce atalak ara. na wininamne ning nirya, lakak eipnamluma ati, anggunda moubuka kel biknamlume. Ara, nara, anggun ni koproba Allah Yahweh unune. Nara Sion mutuku deice uk unune. Aununa ati amutuku ara, narye wibuka deiamsa ati, amutuku noutam, na dirina pia weika arye unamle. Tonda, Yerusalem mutuku noutam babye, ‘Naʼ tenen, mutuku ulula ati, narye teleb kipdeipniba, malye un ning tonok babye, amutuku noutamak ara, tonap pia kum unamle. Diksukum ninguk unamle. Ati, amutuku noutam ara, yuk ninye ayala-ayala nirya, narye wibuka kum deiamse ninye ara, ninye asik nang atonun ninye anya arye, amutuku noutam ton, pia kum weknamake.
Yehuda mutuku ulamik ninye ap, Yerusalem mutuku ulamik ninye ap olamikba, sik ining saklamuk ning dekna ati, na Allah Yahweh arye, ‘Sik aolamik ninye ati, kwang daknirye opnamne,’ tenepse ning ara, kum bataknamne. Sik malye winilamik ninye nirya ara, wenebuka opnamne. Na Allah Yahweh ara, Sion mutuku noutamakuk, kanye lamapdongobuka, apia unamne,” Allah arye nyapdeibukba, nabi Yoel birye sekuk.
Aminyan doryanamle talak winipnamle ning ara, ani. Allah Yahweh el si eren aik domik mutuku ati, ninye mutuku-mutuku nirya arye, ‘Se, yuk mutuku ara, mitik mambul bukni, amutuku ara, weik mambul mutuku ulule,’ tenenamake. Allah el si eren aik domik mutuku erepdeipliba, yuk mutuku nirya ara, amutuku amu tam atonun unamle. Winipliba, im sirya, mutuku sirya nirya, daunyak ninye arye, amutuku uk, yanganamake. Amutuku yacopura, Allah el siuk erenamake.
Tukwak mutuku sirya, im sirya nirya noutam, malye un ninguk talibuka, wininyak nang ati, yu weik arye wenebuka opnirye, sirya daknamne. Bukni, anggun tuba kam unamlum Israel nang ara, mitik tonun tuba aunmace nang ara, tonap tamubuka, malye un ning, kum wininamlume. Yata nang do, sik aninye arye, tonap tilila yupu nyana kumce, malye kum kilinamake. Tonda, sikce talye yupu nyana ap, tenepce nyan yupu ap, kwinisa don yupu ap ara, sikce pia kum nyanamake. Sik teleb unamak Israel nang ara, yuk nang ap kanye deibuka, neika teleb aryuk, tunim abuka unamake. Wini talak arye dipdongobuka, doyanamle talak nirya ara, sikda yuk nang ati ton, ilil pia kum unamle.
Ati ara, na Allah Yahweh arye nyapsine. Wini talak ara, na adiparyuk tamubuka, Yerusalem mutuku binuka unamne. Sik amutuku unyak nang ati, bico tenepnirye, pia melinamne. Winipnyopura, narye lo arepnyeba, na si erena ati ara, sik mutuku, Yerusalem mutuku noutamuk boyanuka deipnamake. Winipnamak talak ara, sik aik dona kel weik nang arye, anyasik-anyasik lipsisikuka dona ati, ‘Amutuku pala ara, yata wiribuka ulul do? El cang ara, yata barye ubuk do?’ tenen, cang tapu arye, kiklipdenamake. Winipnamne talak ara, Yerusalem mutuku nirya ara, tamubuka tuba teleb kipdeipnamne.” Allah arye nyabuk.
Yuk mutuku yu nang arye, ‘Yerusalem mutuku yanuka olbinuyap,’ tenepnamak talak ara, sik Yehuda noutam unyak yala nang nirya ara, mikip weik arepnamne. Ara, winipmanto ning ara, uku sekna ati, asing tilibikceura, ‘Uku seknamakʼ tenen, yo bobuka, uku sekikceba, uku minopce dilamle atonun, sik Yehuda tam nang babye, sik dam winibuka deipnamne. Winipmanto ning ton, ninye arye upna ubikirye, gandum kouamikca eipnukca ati, uku minopce balamak touk, Yudea tam nang ati, winipdeipnamne. Winipnamne talak ara, sik Yudea tam nang nirya arye, sik dana-dana mutuku sirya, im sirya nirya daunyak nang ara, ‘Opnamabʼ tenen, yakceura, Yudea tam nang arye anang nirya obuka, kum kipdeipnamake. Ara, sirik tam bisik yanamak nang babye, kwanim tam bisik yanamak nang babye, sik nirya obuka, sirya daknamake. Bukni, sik Yerusalem mutuku arye weik asik domika nirya, yu nang arye obikceba, asik oldem upnamle bukni, atalak ara, sik Yehuda yala nang ara, tamubuka tonap, amutuku noutamuk unamake. Asukumuk sikda namin arye dakeiam asa, teleb deice aryuk unamake.
Wini talak ara, amutuku noutam arye, mutuku kon ap, lu mutuku ap ansinibuka aubuk bukni, aminyan talak ara, amutuku nirya weik lu kipdeipnamle. Ara Geba mutuku noutam bukni, dabu tam, utara mutuku asukum dipdongobuka, Rimon mutuku iknapye dam, eitam mutuku nirya ara, weik pala lu mutuku uk kipdeipnamle. Winibuka deipnamle bukni, Yerusalem weik asik upnamlak ara, mutuku kon deice uk pia aupnamle. Ara, Allah arye amutuku weik erebuka deiplyeba, tonok mutuku kon deice uk tuba aupnamle. Amutuku noutam el pala ara, ani. Ara, Yerusalem weik asik dana-dana antanap dongobuka, domik keil poka noutam bukni, wekelyangan bisik botopdeiamik bublan, el si ara, Benyamin yala nang wekelban ati bublan bisik, weik pala bisik bublan dam arye dipdongobuka binamlya ani, minop talak botopdeiamik weik pala bisik bublan, asukum dipdongobuka binamlya ani, akeil poka domikak ara, el si ‘Minop Wekelban Bisik Bublanʼ, asukum dipdongobuka binamlya ani, minop talak domik cang keil aik el si ara, Menara Hananel, anoutam arye dipdongobuka binamlya ani, Israel nang taleamuknye, ninye deiyoknye Raja arye, el anggur duk mek kintinip deiamukce, anggur duk purulamukak binuka dipnamle. Ati, weik pala lu mutuku kwepdeipnamle ning ara, pala weik upnamle.
Tuba tonap telebuk kipdeipnamsina ati ara, wini talak arye dipdongobuka, dounamle talak ara, ‘Anggunce aning ara, wininamlume. Aning ara, pia kum wininamlume,’ nyapdeipsin yupu ani. Ara, anggunce anggun kwitcapu ati, dipkoprob diksukum yupu dem nyalanamlume. Winipmunce, anggunce ninye yupu, bokolin talak ara, anggun weik asik wekna ati, bisik bublan dam bulubuka, wekenamlum talak nirya ara, diksukum yupu dem, nyalanamlume. Aning ara, akunuma,’ nyabuka, yupu sirya nyapnalum ning ara, pia dipkoprob ninguk nyalanamlume. Tonda, ‘Nun ap, nun kayapu nang ap, tonok kanye tenebuka, dukdongobuka, teleb kibuka, neika unamapʼ tenyamupu nyapmunce, ninye yupu bokolinamlume. Talya yupu walana, pia meme.
Ayupu ara ani. Anggun Yehuda tam ululum nang ap, Yerusalem mutuku ululum nang nirya ara, pia bico tenelalulumce, ‘Nun ap, nun kwitcapu ap, olana kumce, kanye deibibirye, namin arye teleb asa neika unamabe,’ tenelanamlume. Tonda, pia bico tenepdamunce, talye yupu walana kumce, diksukum yupu dem, nyalanamlume. Winipnamluma ati ara, na si erena ati, din dina kumce, din si tebuka unamlum talak ara, anggun kanye deipdamunce, pin-pin kanye bobuka unamlume. Ara, wala dumbarye ap, wala pamubarye ap, wala tekbarye ap, wala takubarye ap, asum-asum nirya deice arye, din si tebuka, nati moropnumunce, na siuk erenamnulume. Ati, nati din si tebuka, unamlum talak nirya ara, anggun Yehuda mutuku nang ap, Yerusalem mutuku nang ap, anggun nirya teleb kanye tenipmunce, pin-pin asa uk, unamlume. Ati ara, anggunce dipkoprob nyan yupu ap, pia bico tenepdamunce, namin aryuk, teleb kibuka epdanuka neika unamlume, nyapsine.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.
Tonda, Allah el si erena ati, weik mambul aik ap, talye ning isa si erenyak aik ap, neika atonun ning do? Kume. Nun kanye talima ap, nong ap ara, Allah el wekna aik atonun unyabe. Allah arye nyabuk. ‘Na ap, anggun ap neika ubirye, anggun ap neika banamnyabe. Nara, sik Ni Koprop Allah unamne. Sikda na mapu unamniyake.’ (Imamat 26:12) Allah arye nyabuk yupu nyapsine. Tonda, Allah yupu noutamak sekik yupu ton ani.
Allah El Dib Kanye talipnuka deice arye, amalaikat dobuka bobinukce, weik mutuku dup deipnuk. Weik mutuku dup deipnukba, Allah im deice tam arye dopkwetebukba, koluka yanganmok ara weik asik Yerusalem Winiryuk ning eipse. Anyasik noutamak nirya ara, malye ning tonok babye kum uamuk. Pia telebuk uamukak eipse.
Atalak nirya ara, malye ning tonok babye, Yerusalem Winiryuk mutuku noutamak pia kum boyanamake. Tonda, malye wininyak ninye ap, tilila ning wininyak ninye ap anyasik noutamak pia kum wekelyanamake. Amutuku noutamak ara, sik malye winin ninye kum yanmanto bukni, Domba Mi Atonye birye talilye buku, Kam Pia Unamak Ninye Si Sekna Buku, abuku noutamak sik si akunum sekiamuk ninyeuk ara, sikda Yerusalem Winiryuk mutuku wekelyakirye, anyasik noutamak pia unamake. Na Yohanes arye nyapne.
Eipsiba, Allah el weik bun ning dam, tonoknye birye ayupu nyabuk. “Wini talak ara, Allah el pia unamlak ara, el ap, ninye ap neika pia unamake. Kam tuba unyak ninye nirya ara, Allah el mapu kopropa unamake. Allah arye aninye nirya ati talipliba, sikce, ‘Nun Ni’ tenen, Allah el siuk pia erenamake. Allah elda, sik ap neika unamake.
ကြော်ငြာတွေ