Zakaria 11:3 - Eipomek3 Ati ara, sik deiyok talibuka unyak nang ap, sik domba basam weinyaka deiyok nang arye engenmaka ara, anggunce kekenamlume. Deiyok ara, sik deiyok nang arye kwalina deice arye, pia teleb ning talibuka ulamik ning nirya ara pia kum daliba engenamake. Atonun, sik domba basam weina deiyok nang ara, sik domba basam nirya kum dayuka ati, sik bidamnye engena uk unmake! Aning atonun, bai tam Yordan mek kup-kup yo kan-kan noutam ulamle kam ning, el si ara yu singa kus arye, weik yupu deice arye malye nyanamle ning ara, kekenamlume. Deiyok ara, sik unak nirya ara, ninye arye weltakanyak atia. Ara, Yordan mek kup-kup tam tiklamuk yo kan-kan nirya ara weltakana uk upnamake. အခန်းကိုကြည့်ပါ။ |
Zakaria 11:3
34 ပူးပေါင်းရင်းမြစ်များ
Sik pera mutuku arye yanamak yin talin nang ara, sik yupu weik arye, nyapnamaka ara, yu gus atonun ning, singa kus, el dina oplirye, yupu weik kamulamle touk, yupu weik nyapnamake. Sik aninye arye, ninye tomopnamak ning ara, singa kus arye, el dina obuka dipnulye ning, oplirye weik yupu nyalamle atonun ubuka, anang arye Israel nang bobikirye, sikce abatakikce nang, adiparyuk bobuka bindopnamake. Winipnamak talak ara, yuk mutukunye tonoknye babye, sik Israel yala nang ati, yanuka kum lyepnamle. Ayu nang arye, tonoknye ton kum batakuka binamak. Sik nirya bobuka binamak.
“Narye, ‘Aninye ara na mapu koproba’ tenen, wipdeiamsiba, na si tuba ereninyak nang arye, anggun malye ululum ninye ati, dipdongobuka anggun si malye nyanamsiyake. Tonda, na Allah Yahweh arye aning-aning nirya talinirye, ‘Winipnamne’ tenenye touk, ninye winipmanto kum pil donanye birye nyapsine. Nara, Weik Erena Deiyoknye aryuk, anggun malye-malye ululum ninye ati, obuka sirya dakanamsine. Bukni, na amu tam unyakce, na si erenyak ninye ati, winiryuk si pia teleb ning arepnamne.
Israel ninye sik oldan nang arye sikti, weik yu ning, el si singa kus yalirye, bai tam kam ulul ning obuka dilamle touk, unyake. Ara, yuk pera mutuku ninye, yu ninye arye yanuka, sik olonyaka ati nyapne. Tonda, Israel ninye unyak mutuku ara, yuk nang arye, uluplobikirye, malye kilinyake. Tonda, sik asik dobuka unyak mutuku nirya ara, uku dongobikiba, uku arye dibuka sirya dakliba, amutuku noutamak ara, Israel ninye ton pia kum unyake. Lo uk ulule.
Anggun ap, anggunce delilalum mapu ap ati, ‘Na yupu kekepnamak’ tenen, anggun wenena ati, anggun dam ikin deilisilye ning ara, anggun kel kum bikilulume. Ati, anggun wenesinye ning ara, talye atibuk wenelamsise do? Anggunce, ‘Se, nun malye unyaba ati, wenepmasile,’ kum tenelulume. Ara, winipmanto ara, bai tam ulamle yu kus, el si singa kus, weik yu kus arye, yu nguru-nguru alamlirye, talye daulamle kam ning obuka, dilamle touk ululume. Ara, na yupu nyaipneba, laka nyana deiyok nang nabi-nabi nang dopdeipsiseba, anggunce anabi nang nirya oltakalulume.
Anggunda, Allah el yupu kum kekepmunce, pia mandipna uk winipmunyopura, Allah weik arye wenepnamsile. Ara, minop talak Silo mutuku ulamik ninye, wenebuka oplomse touk, anggun atalak ululum Israel yala ninye nirya babye, anggun malye winimunya dekna ati, opnamsine. Tonda, anggunce anyasik-anyasik nirya, Yerusalem mutuku domlum aik nirya ara, anggun wenena ati, malye kipdeipniba, yuk mutuku ninye mutuku-mutuku unyak ninye nirya arye, “Se, Yerusalem mutuku ara, malyeuk winilamikba, Allah arye malye nyabuka, supdongobuk mutuku ani,” nyanamsiyake. “Allah arye nyaipmanil yupu akunum nyapsine,” nyabuka, laka nyapnalyame. Allah arye Yeremia biti, nyabuk.
Tonda, Yordan mek biyuka, lilun tam, bai tam arye, weik yu singa arye ubuka, domba basam sik maning dilamakak, tikilyakirye olamle touk, na babye, talye karin arye, Edom mutuku yanamne. Winibuka tikilyanirye, sik Edom nang ati, sik mutuku noutam unamakak arye, yakuka dopkwetepniba, sik bikbik abuka bindopnamake. Akunum bindobikcopura, na Allah arye, ‘Anye wibuka deipnamne,’ tenenye touk, amutuku noutam talibuka ulirye, ninye deiyok kibuka, yupu nyanamlanye biti, wipdeipnamne. Aning ara, talye ati kum nyapsine. Na mikip weik unye touk, yatanye ton aulul do? Tonda, yatanye do, ilil tenena kumce, mikip kanye bobuka ululnye birye, na tenepman ning ati, ‘Kume aning ara, kum kiptume,’ nyabuka, yupu seknutu do? Aning atonun, yata ninye deiyoknye ton, na yupu yanipnuturye, malye kipnutu do? Kume, tonoknye babye, pia ton kum ulule. Nara, na tenenye touk wininune.
Ura, na Allah Yahweh arye nyapsine. Winipmanto ara, talye bai tam, akam ulamle singa kus atonun, weik Yordan mek lilun mutuku tam, bai arye kutuka, tikilyalirye, domba basam maning mutmuta dilamlyakuk yanuka, tiklirye dilamle touk upnamle. Ara, aning atonun nara, Allah Yahweh arye, aminyan talak, talye karin arye, bikbik abuka yanamne. Winipnyeba, sik Babel mutuku nang, ilil upliba, sik mutuku batakuka, yuk-yuk mutuku dabindopnamake. Winipnamne talak ara, sik amutuku noutam yupu talibuka unamak ninye deiyok nang ara, naryuk yuk nang wipdeipnamne. Sik ninye deiyok nang wibuka deipnamna ara, tenipdelulume! Yata mutukunye ton, na unya atonunye ton ulul do? Kume, ninye deiyok nang wipdeipmantonye bira, na uka. Tonda, yata tonye birye, nati, ‘Anda adiparyuk yanulyame,’ nyapnutuba, yanamne do? Tonda, yata tonye birye, aning-aning nirya ilil tenena kumce, na unye touk uptu do? Yatanye birye, nati yanipnuturye, obuka malye kipnutu do? Kume, ninye arye aning nirya ara, pia kum winiptinge.
Tonda anggunce, ‘Teleb kanye uk bobuka telebuk wininamap’ tenen, anggunce anggun bidamnye atibuk, nyaldalulum yupu ara, ‘Akunuma,’ tenena kume. Anggunce nyaldalulum yupu ara ani. ‘Kume, anyaik ara, Allah Yahweh el si eren aik anya arye, nunda anyaik wekenyapa anya arye, malye ning ton, nun dam yanuka ikin kum upnamsile,’ nyaldalulum bukni, tilila yupu uk nyalulume. Anyaik wekmunya babye, malyeuk winipmunyopura, Allah arye wenepnamsile ati, nyapsine.
Ara, amot deice arye, amot deice arye nyapnamlume. Se winipmanto ara, anggun Israel nango, anggun capu kil, elda, pia teleb ulamuk. Yuk kilapu nirya ara, mitik teleb bukni, anggun capu kil ara, pia teleb kil ulamuk. Winipmanto ara, bai kam ulamle yu pus, el si singa kus, el mapu teleb kibuka kaleklamle touk, ulamuk. Tonda, asinga kus kil ara, yuk singa kus weike mapmana noutam malamuk. Tonda, elce deiamuk mitik mapu singa kus ara, pia mitik bukni, yuk singa atonun mapu unmana kan-kan noutam arye, el mapu kaleklamukba, teleb kibuka nelamikce, nong weik ubik.
Tonda, sik Israel yala nang bukni, Samaria mutuku noutam unyak nang ara, isa si erena ati, mutuku si Bet-Awen mutuku noutam arye, isa si erena ati, sapi basam urasin atonun ning memepdeiamikce, asukumuk aning si erenyake. Aisa mer si erebikirye, ‘Se, nun ni koproba aniʼ tenen, yok sirim talinauk unyake. Aisa nirya ati, sikce ilil upliba, yok sirim taliplirye, yupu weik tonun ngaluka engenyake. Ara, minop talak ara, ‘Nun isa si eren ning, sapi basam urasin atonun memebuka deiamupu ning ara, pia teleb ulamuk bukni, wini talak ara, malye upmasile. Se, yata ati do?’ tenen, weik tonun engenamake. Ara, sik amutuku noutam unyak nang ap, sik malye winin ning talibuka, imam pil donyak nang ap, weik tonun engenamake. Imam nang ara, Allah ati batakuka, isa si eren piluk donyaka ati, sikda sal arye, sik domice kilapu batakuka, talye yolan kilapu dolonyak nang atonun unyake. Engenamaka deiyok ara, ani. Sikce, ‘Se, minop talak ara, nun isa si erena ati memebuka deibupu ning ara, ‘Urasin pia telebe, aning ara mambule,’ tenelamupu bukni, wini talak ara, asapi basam atonun memebuka deibupu ning ara, urasin malyeuk ulule. Aning nirya kum kipdeipnamle ati, bico upliba, engenauk unamake.
Nabi Yoel birye nyabuk. Se, Allah Yahweh el si eren aik koproba noutam talibuka, Allah si erena ati, kam ning obuka, uku dongolalum nang, imam-imam nang nirya arye, malye kanye bobuka engepnamlume. Anggun Allah si eren aik noutam, ongobuka pil dolulum baju kwiribuka batakmunce, malye baju arye, kisok kwatibuka malye yupu nyapmunce, engenamlulume. Ara, lukunyan noutam nirya ngalukuka, malye yupu nyabuka engenamlume. Deiyok ara, sul kwising arye, anggun wa kouamunye ning nirya, dibuka sirya dakanmaka ati, Allah arin ning ati, gandum ap, anggur mek ap, kum arelyanganamaka ati, malye yupu nyabuka, engenamlulume.
Anggunda, pia malye weik ululuma ati, amutuku-amutuku noutam unyak ninye nirya, kekebikirye, ‘Se’ tenen, mambul kanye bobikirye, ilil upliba, sirim talinamake. Tonda, anggun malye winilulum ning ati, yuk nang nirya kekebikirye, ‘Se’ tenen, malye kanye bobuka, engenamake. Amutuku-amutuku nirya, sirim taliplirye, birbir anamle. Tonda, Mesir mutuku noutam balamle weik mek, el si ara Nil mek, oplirye, kait bukuka weleplirye, weik arye balamlirye, mekwen nirya obina yana kilirye, lontik alyanmalya ani, tuba tamubuka weleplirye, mitik danin balamle touk, anggun mutuku babye winipnamle. Ara, amutuku nirya ara, weik arye loknamle.” Allah arye nyabuk.
Na Allah Yahweh arye nyapsine. Anang nirya, wenebuka opnamne sum, akunum uplyeura, sik malye wininyak nang wenepnyeura, anang weika arye, imun kanye bobikirye, ngalukuka, lelim weik nyabicopura, ninye weika arye kekepnamake. Yerusalem mutuku weik asik antanap dongobuka, domik keil poka noutam bukni, “Ikan bublan (Gerbang Ikan) tam nyabuka, botopdeibik sukum, weik bisik bublan tam arye, ngalukna lelim nyanamake. Tonda, Yerusalem mutuku noutam bukni, asik winiryuk talak donmace tam arye, engena lelim nyabikceba, kekepnamake. Tonda, Yerusalem mutuku kon deice, aik domik ning nirya, yu nang arye uluplobice talak ara, engena lelimuk nyaplyeba, yuk tam nang nirya arye, kekepnamake.
Atalak noutam ara, se, na mapu nirya arye, aning akunum winipnamlum talak ara, min talak anggunce, na dam malye winilamnulum ning ati, ton alye kum dakdanamlume. Deiyok ara, aning ati ara, tuba kum wenemnamsina atia. Tonda, anggunce talima erebuka, kwalilamlum talak, narye nyapdeiamsise yupu, yaniplobuka, nati batakamnulumce, malye winin ninguk winilamlum ning ati, alye kum dakalanamlume. Deiyok ara, ani. Ara, anggun unamluma dam arye, anggun talima erepdakirye, pia kwalinauk unyak nang nirya ara, anggun kan-kan arye akunum yaknamne. Winipnyeura, anggun tuba asukumuk unamlum nang ara, na pia teleb lek mutuku dup deice dam ulamluma ara, talima erebuka kum kwalinamlume. Ati, na dam ara, malye winin ning ara, ton ap pia kum wininamluma tia.
Amutuku noutam weik asik talibuka unyak ninye deiyok nang ara, yu singa kus arye, weik yupu weik tonun nyaplirye, yuk kam ning obuka, dilamle touk, sik adeiyok nang arye, weik yupu nyabikirye, ‘Nunda yata ning ton, ubula doproptibye do?’ tenen, malye weik wininyake. Tonda, amutuku unyak nang malye winipdakiba, amutuku deiyok nang arye, ‘Sik malye winipdanmace ning ati, yupu bokeipnamabeʼ tenen, bulubikirye, yupu bokolina ati, deiyok nang ara, winipmanto unyake. Ara, bai tam yu ulamle kam, dina weik tonun pataplirye, aupmalye ning obuka diplirye, sirya daklamle touk, unyake. Tonda, ayu kam winiplirye, ‘Adin ara, kwal deipmanya ani, beren tam talak ton, tamubuka yanirye, dipnamne,’ pia kum tenelamle touk, amutuku yupu bokolina deiyok nang babye, adiparyuk yuk nang talinyak ning, alubuka dolonyake.
Se, ati winipnamle talak ara, yo si daru yo ati, pia tenibuka engena uk unamlume. Deiyok ara, amutuku noutam atikamuk cemara yo nirya ara, urasin pia teleb uamuk bukni, ninye nirya arye, ‘Se, aning ara, pia mambule,’ nyalamik bukni, wini talak ara akunum kum danmale. Tonda atonun, anggun mutuku noutam ara, mambul weik yo yala nirya ara, kum danamla atia. Aning atonun, se anggun Basan mutuku noutam ululum nang ara, kat weik yo, el si sanobar tikamuka nirya ara, ninye arye webikirye, kum danin balamlya ati, anggunda, ‘Seʼ tenen, engena uk unamlume. Deiyok ara, amutuku noutam uamuk aras yo ap, sanobar yo nirya ara, webuka pia kum kilinyake.
Ati sik domba weina ati deiyok nang winilye nang arye nati, ‘Nun like,’ tenelamnik. Winibuka tenelamnikba, narye sikti, ‘Se, sik anang ara dan talak arye teleb pil donamak do? Pia sikcuk ukirye, teleb ubuka pil kum donyake,’ tenepse ati, ‘Aning ara na pia like,’ tenepsirye, ‘Akunuma sikda dauplye,’ tenepse. Winibuka tenepse ati, tonok wala deice aryuk, sik adeiyok nang winilye ati, wenepsirye, yakuka dopkwetepsirye, obuka sice buklopse.
Ati, na mapu anggunti nyapsine. Anggunce sik Farisi nang ati, tenena kume, sik dauplye. Sik Farisi nang ara, bisik peterena deiyok nang atonun unyak bukni, dipkoprop ara asing kun nang atonun unyake. Tonok asing kunanye birye, yuk asing kunanye biti, ‘Narye an taruk talibuka teleb bisik bobinukine,’ nyaplirye, bobuka banmaliba, bisik noutamak weik pum wamlyak barikirye, sik bitinye nang kote sakarurake. Sik Farisi nang ara, na mapu koprop kum unyake. Sik Farisi nang ara, asing kun nang atonun unyak nang ati, dauplye, nyapsine,” Yesus arye el mapu 12 nang ati nyabuk.
Allah el yupu laka nyalamik nang, nabi-nabi nang ulamik talak ara, anggun apu yapu arye tonok babye ton, sik nong deice ikin ning kum delilamik do? Kume nabi-nabi nang ati ara, ikin weik ning sik nong deice delilamlume. Tonda, Allah el yupu laka nyalamik nang arye, “Diksukum ululnye yanamle,” nyabuka, laka nyalilamik nang ababye, anggun apu yapu arye onauk ulamik. Ara, wini talak ara, anye binyuk Diksukumuk Ululnye Yesus ati, minyuma akunum oplume.
ကြော်ငြာတွေ