Yosua 8:33 - Eipomek

³³ Yosua birye, ayupu sekdeibuk talak ara, Israel nang nirya ap, yuk mutuku ninye bukni, Israel nang ap, ansinibuka neika ulamik ninye ap, Israel ninye, sik deiyok-deiyok nang ap, sik yin talen nang, sik deiyok nang ap, yupu bokolina deiyok nang ap, wenena aik talibuka, pil dolamik nang, sik deiyok nang ap, bulubukabikce, mening dam tikik. Ara, Allah Yahweh arye nyapdeiamuk mem yupu, sekdeiamik marikna yo dobuka, deyamikak dana-dana tam tikik. Aninye noutam buk bokuka, atouk yuk-yuk dipdobikce, ayo marikna amu tam asukum binuka tikmikce, urasin tamubuka, sik Lewi yala nang, imam-imam nang ara, Yahweh arye nyapdeiamuk mem yupu sekuka, bopmekce, marikna yo dam tikmek. Lewi yala nang arye, Israel nang sik bisik balamik tam ara, Allah arye nyapdeiamuk yupu dobuka deiamik marikna yo, bobuka bisik balamik nanguk ulamik. Aning sik urasin tam ara, Israel nang tikik. Tonda, ton tam Israel nang ap, sik Lewi nang ap, sik urasin ara, Gerisim mutuku tamuk dinmik. Ton tam nang ara, Lewi yala nang ap ara, Ebal mutuku tamuk, sik urasin ara, deipmikce dinmik. Ara, talye ati kume. Aning ara, Musa bira, Allah Yahweh el pil melibuka dolamuknye birye, akunum nyapdeiamuk touk, sikce winibik. Winibuka atikmik deiyok ara, sik Lewi yala nang arye, Israel yala nang nirya teleb una ati ara, ‘Teleb yupu nyapdeipnamakʼ tenen, asukumuk tikik. Ara, sik Lewi nang ara, ‘Allah arye, sik Israel yala nang nirya ati, teleb un ninguk winipdeipnamsilʼ tenen, ‘Moronyabe, nyapnamakʼ tenen, nyapdeiamuk.

Yosua 8:33 ပူးပေါင်းရင်းမြစ်များ

Keluaran 12:49

Ara, ‘Na ti kibuka si erena ati, sal nirya ara, anggun den bol mouse ning sekenamlume nyapdeiamsise yupu ara, anggun Israel yala ninye koprop ati, nyapdeiamsise ning atonun, anggun Israel ninye kan-kan unamak ninye asik nang babye, aning atonun wininamake. Anggun Israel ninye koprop ap, anggun dam unyak ninye ap nirya arye, ayupu uk talibuka unamlume.

Imamat 24:22

Narye yupu deiyok tonok, anggunti arepsince, “Wininamlume,” nyapdeipsise ning ara, pia moubuka talipmunyakarye, unamlume. Ara, anggun Israel yala nang koproba ap, tonda anggun ap neika unamlum ninye asik nang nirya ap ati, “Aning wininamlume,” nyapsine. Nara, Allah, Yahweh arye nyapsine. Anggun ni koproba Allah unune. Allah arye Musa biti nyabuk.

Bilangan 15:15

Na Allah arye, “Aning wininamlume. Aning ara, pia kum wininamlume,” nyabuka, nyapdeipsin yupu nirya ara, anggun Israel ninye koproba babye, yuk mutuku arye yanuka, anggun ap neika ululum ninye asik nang babye, anggun nirya anyapdeipmasin yupu uk, talibuka unamlume. ‘Nun yuk, sik ninye asik nang yuk unamak,’ tenena meme. Ara, na Allah arye, anggun nirya ati, ‘Na mapu unamake,’ tenesunune. Ati, na si erena ati arenamnulum ning ara, anggun nirya ara, narye nyapdeipsise yupu atonunuk, talibuka pia ati unamlume.

Bilangan 15:29

Na Allah arye, “Aning wininamlume. Aning ara, pia kum wininamlume,” nyapdeipsin yupu nirya ara, anggun Israel ninye koproba babye, yuk mutuku arye yanuka, anggun ap neika ululum ninye tikilyanamikce nang babye, anggun nirya anyapdeipmasin yupu uk, moubuka talepmunce unamlume. ‘Nun malye un ning kilina ati, nun yuk, sik ninye asik nang, yuk pil donamake,’ tenena kume. Ati, anggun malye un ning kilina ati, arenamnulum ning ara, anggun nirya ara, narye nyapdeipsise yupu atonun, aninguk talibuka pia, apiluk dopnamlume.

Yohanes 4:20

Minop talak, nun Samaria tam ninye, nun ni yapu arye, aunmap mutuku deice Allah si erelamik bukni, anggun Yahudi yala nang arye, ‘Kume, Allah el si erena ati teleb ak ara, Yerusalem mutuku uka,’ nyasululume,” nyabuk.

Ulangan 11:29

“Anggun ni koproba, Allah Yahweh arye, anggunti, ‘Amutuku arepnamsine,’ nyapdeiamsuk mutuku, akunum bobisiliba, amutuku noutam umunye talak ara, anggunce amutuku nirya ara, alubuka dopropnamlum talak ara, winipnamlume. Ara, Gerisim mutuku deice welepmunce, ‘Nun ni Allah arye, teleb updeipnamsilʼ tenen, moropnamlume. Tonda, aning atonun, malye yupu nyabuka, suna ati ara, Ebal mutuku dupuk welebuka bimunce, ‘Nunda malye winibipyopura, nun ni Allah arye, wenebuka supnamsile,’ nyabuka, eitam mutuku binuka moropnamlume.

Ulangan 31:12

Anda, winipnamlyame. An arye nyapmunba, Israel ninye anggun sal ap, kilapu ap, mapu ap, tonda yuk mutuku arye tikilyangan nang, anggun mutuku yanuka unyak ninye nirya babye bulupnamake. ‘Anggunce yalulume,’ nyapmunyeba yacopura, anggun dam, Allah el mem yupu yinipmunyeba, aning kekebikirye, Allah el si Yahweh ati, ilil upliba, elce, ‘Aning ara wininamlulume. Aning ara, pia kum wininamlulume,’ nyalamuk ninguk kekebikirye, dukdongobuka pia moubuka unamake.

Ulangan 31:25

Akunum sirya dakuka sekukopura, Lewi yala nang bukni, sikda Allah el si Yahweh arye, ‘Winipnamsine, anggun ton wininamlulume,’ nyabuk yupu dobuka, libik yo marikna, el si ara Peti Perjanjian bobuka balamik nang ati, Musa birye anang ati nyabuk.

Ulangan 31:9

Allah arye, “Aning wininamlulume. Aning ara, kum wininamlulume,” nyapdeibuk yupu nirya ara, Musa birye ayupu akunum sekukopura, Allah el si eren aik pum tam pil dona deiyok nang, sik Allah ap, ninye ap, ansinilina deiyok nang ati, ayupu nyabuk. Ura, anang ara, Allah el si erena deiyok nang ara, Lewi yala nang arye delilamikba, Lewi yala nang ulamik. Tonda, anang ara, Allah el si Yahweh arye, “Wininamsine,” nyabuka, Israel ninye ati nyalilamuk yupu libuka, bobalamik yo marikna, el si ton bobalamik. Tonda, Israel ninye sik wisi-wisi nang, yupu lipsisikuka bokolina deiyok nang ati arebuk.

Yosua 23:2

Wisi dayuk talak ara, elce Israel yala nang dana-dana tam, aulamik nang nirya ap, Israel nang, sik deiyok nang ap, sik yupu bokolina deiyok nang ap, yin talena deiyok nang ap, sik nirya ati, “Wini talak ara, anggun nirya bulubuka yalulume,” nyapdeibukba, sik nirya el dam yayikopura, nyabuk.

Yosua 24:1

Ura, aminyan talak ara, Yosua birye nyapdeibukba, sik Israel ninye, ayala-yala nirya, Sikem mutuku bulubuka yayik. Sikem mutuku unmek talak ara, Yosua birye, Israel ninye ayala-yala nirya bulupdeibuk. Tonda, elce yukubukba, sik yayik nang ara, sikce, ‘Winipnuyabe’ nyana ati wisi nang ap, Israel ninye sik ninye deiyok nang ap, sik yupu bokolin nang ap, sik weik nang, mambul pil dolamik nang ap, nirya yukubukba yayik. Yayikopura, sik nirya bulubikce, ‘Nun ni Allah, el si Yahweh arye, yupu nyapnusil’ tenen, el dam yanuka tikik.

Yosua 3:14

Nyabuka ati, Israel nang, sik doltakne tenda aik dam ara biyikce, Yordan mek koupnamek talak ara, Allah el si eren aik pum tam pil don nang arye, Allah el nyamuk yupu liamik marikna bobukabikce, menekuka banmek bukni, sik Israel nang nirya, sik aminyan tam melibuka biyik.

Yosua 3:3

Sikce Israel ninye nirya ati nyabik. Allah el si Yahweh arye, ‘Narye winipnamsine, anggunce ton wininamlulume,’ nyapdeipsuk yupu dobuka, deibupu kwemdina ara, ‘Aning, el si Peti Perjanjian’ bobuka bobanmak do, kum do?’ tenen, moubuka dilinamlulume. Allah el aik pil don nang, sik Lewi yala nang arye, akwemdina bobikirye, menekuka bakibuk, eipmunyopura, anggun babye, adiparyuk doltakna aik dam arye batakuka, anggun babye melipmunyopura, neika binamlulume. Lewi yala nang bukni, Allah ap, ninye ap, ansinilina deiyok nang arye, menekuka bakibuk, anggun aminyan binamlulume.

Yosua 3:6

Nyabukura, mapmeka berekukopura, Yosua birye, Allah el si eren aik pil don nang, Allah ap, ninye ap, ansinilina deiyok nang ati, “Anggun menekuka, otam binamlume,” nyapdeibukba kekebikce, Allah arye, ‘Wininamlume. Aning winipmunyopura, narye winibuka melinamsine,’ nyabuka, el yupu nyapdeiamukba, liamik marikna, el si ara, Peti Perjanjian dobuka minopce biyik. Sik yuk Israel nang kum binmek talak arye, bobuka banmekba, sik aminyan tam Israel ninye nirya melibuka biyik. Aning ara, Yosua birye nyapmok touk winibik.

Yosua 4:10

Israel ninye, Yordan mek koubuka, otam banmek talak ara, Allah el aik pum tam pil don nang arye, Allah nyapdeiamuk yupu, liamik marikna, Peti Perjanjian bobuka, Yordan mek duk-duk noutamak tuba tikmek. Atalak ara, Allah el si Yahweh arye, Yosua biti, ‘Winipnamlum,’ nyamuk yupu nirya, Israel ninye arye, aning atonun winipmek. Tonda, Musa birye Yosua biti, ‘Winipnamlyame,’ nyapdeiamuk touk, Yosua birye wininmokba, Israel nang nirya ara, minopce Yordan mek koubuka, otam bindobik.

Yosua 4:18

Nyabukopura, sik anang ara, Yordan mek duk-duk noutam tikmeka koubuka, Allah el si Yahweh arye, nyamuk yupu liamik Peti Perjanjian bopmekce, tuku kata tam biyikce yanibikopura, adiparyuk Yordan mek ara, minop arye balamuk touk, winibukabukice, biyuk.

Yosua 6:6

Allah arye nyabukba, Nun el mi Yosua birye, sik Allah ap yupu talana deiyok nang yukubukba, yayikopura, adumbarye nang ati nyabuk. “Allah el si Yahweh arye, el nyalin yupu dongamik marikna, Peti Perjanjian bobuka banamlulume. Aning bobuka bimunce, sik imam nang ton, tekbarye (7) nukuka, yim domba yang arye, pong-pongan ning dobuka, menekuka banamake. Anggun yuk nang ara, aminyan tam yanganamlume,” nyabuk.