Yosua 7:20 - Eipomek

²⁰ Nyabukopura, Akan birye tamubuka nyabuk. Se na nie, diba. Nun Israel nang ati, pia melibuka kalikisululnye, nun ni Allah Yahweh, narye elti, akunum pia malye kipdeipse. Na malye winipse ning ara, ani.

Yosua 7:20 ပူးပေါင်းရင်းမြစ်များ

Kejadian 42:21

Ura, atalak noutamak ara, Yusup el du yapu nirya arye nyapdanmek. “Se, ikin ning weik, nun nong deice upmasila ara, talye ati kum upmasile. Deiyok oubuk. Ara, minop ara, nun weit koproba Yusup biti, malye wamupu atia. Nun weit koproba dobuka, tuku pum bisik dongamupu talak ara, elce imun kanye bobuka engebukce, weika arye moropsuk bukni, nun nirya arye elti, bico tenen, kekana kum wamupe. Winibupu ati, winira ikin ning weik nun nong deice upnamsile,” nyabuka nyalanmek.

Ayub 33:27

Allah arye anye akunum ila tamubuka teleb kipdeiplyeura, anang nirya wekuka kekenmacak aryuk, el anye birye nyapnamle. “Narye teleb ning ara, malye kilamsirye, malye ning ara, ‘Aning telebe,’ nyabuka, talye yupu nyalamsirye, pia malye ulamse. Bukni, Allah elce nati kum wenebuka opnuke. Bico tenepnukce, na malye ulamse ning nirya ara, biknukce winipnuke,” nyabuka, laka nyanamle.

Ayub 7:20

Tonda, se anda nati Kalikna Deiyoknye ulyama ati, na dipkoprob malye upnyopura, adeice arye, narye anti malye kibuka delikunun do? An deice malye ning delikunun do? Anda tukwak mutuku noutam unyak nang nirya ara, sik wininyak ning ati, dinauk ulyame. Ninye mutuku sirya, im sirya nirya elilyama ati, yata deiyok ati, ance na tonok ati, ‘Malye winipnamal do, kum do?’ tenen, moubuka elinilyam do? Yata deiyok ati, an mal ara dobuka, na deice delinilyama do? Narye ikin ning dobuka, an deice delikunun ning ara, pia ikin ukulula ati, ‘Anye bira na like,’ tenenilyam do?

Mazmur 38:18

Se na ni Allah. Narye pia malye winin ning talibuka, malye weik winilamse ning ati, laksukum arye nyapnarye, aning batakne. Tonda, na akunum malye winilamse ning ati, pia malye kanye bonune. Na malye winilamse ning ati, na talima noutam nirya ara, nakina talinulule.

Keluaran 10:16

Winibukba, Mesir mutuku weiknye Firaun birye, minopce Musa ap, Harun ap, ila tamubuka yukubukce nyabuk. “Se, na pia malye upmane. Ara anggun ap, anggunce el si erelulum Allah ara, el si Yahweh biti, malye wininune,” nyabuk.

Keluaran 9:27

Winibukba, Firaun birye Musa ap, Harun ap ati, yukubuk. Sik yarikura, Firaun birye nyabuk. “Wini talak ara, narye malye upmane. Allah arye ikin ning, na deice deipmanil ning ara, dipkoprob telebuk upmanile. Bukni na ap, na amu tam unyak ninye ap arye, malye wininyabe.

Bilangan 22:34

Yahweh arye dopreipmok malaikat arye nyabukura, Bileam birye, tamubuka nyabuk. “Se, na pia malye upmane. Na nio, anda na ban bisik noutamak tikmomce, dana-dana nirya, sekdongobuka wininmanumu ara, ‘Awininmanila deiyok ara, na malye winipmana ati unmanile’ tenen, moubuka kum kel bikmanue. Na mangkau kanye uk, bobuka unmanurye, malye upmane. Bukni, wini talak ara ance, ‘El malye upmanile,’ tenepmanila ara, akunum kel kipmana anya arye, noutam ban bisikuk, na tamubuka binamane,” Bileam birye, nyabuk.

Matius 26:9

Anintong teleb mek dobuka, yuk nang ati dekmatipyopura, yo bok weik dopropmatibirye, ninye bona utotoa talina kum ninye ati melibuka arepmatibye,” nyapdayik. Sik nyapdayikce, akil ati, yu ubukba wenebuka derebik.

Matius 27:4

Sik anang dam biyukce ayupu nyabuk. “Se, na ni yapu, ‘Anye bira opnamlum’ tenen, yupu nyalyanmasinye bira, dipkoprop malye ning tonok babye kum winilule. Ati minina yupu nyapsirye, na dipkoprop malye winipse,” nyabuk. Nyabukura, sik anang arye tamubuka nyabik, “Anyapmasilam ning ara, nyana kume, dawaplye. Nun kum tenepnuyabe. Amalye winiplum ning ara, deiyok ara an uka,” nyabik.

Yosua 7:19

Winibuk ati, Yosua birye Akan binyak yabuk, “Se, na mi anda, moubuka tenipdeminyak arye, Allah Yahweh nun dam ulirye, kekenmasila ati, asukum arye adiparyuk, laka nyapnunilyame. Ara, anggun ni Allah si Yahweh, Israel nang ati, pia moubuka kalikisulule Allah ati, el si erepnulyame. Tonda, ance malye kiyamlum ning nirya, asukum arye laka nyapnunilyame. Nati, nyapdeipnunilyame. Tonda, aning ara, ‘Naʼ tenen pia dungnulongona kume. Asukum aryuk laka nyapnunilyame,” Yosua birye, Akan biti nyabuk.

Yosua 7:21

Nunce nun mal olan nang akunum olanmabu talak ara, sikce batakmek bona, aning-aning nirya ara, ninye deiyok nang nong deice ongolamak cang jaket ap, tonda kain sarong cang ning atouk, urasin teleb ning tonok eipse. Aning ara, mutuku si Babilon, tonda Sinear nyanyak mutukunye birye, wiamuk ning ara, ubula dopropse. Tonda, aning ara dekna weik ning, perak ton, nukuka ikin ara, bitinye kilo gram eipsirye, dopropse. Tonda, dekna weik ning, emas ton, el ikin ara, tonok kilo gram bukni, noutamuk wilibuka deiamik ning, aning ton aupmokba, eipsirye, ubula dopropse. Aeipse ning nirya ati, na patapnukura, na ton dopropse. Aning nirya ara, dopropsirye, na cang baju arye pakubuka deipse ara, na tenda aik pum tam bukni, tuku palibukapsirye, atuku pum tam dongopse. Ara, na tenda aik pum tam tuku pum tam uk dungnubuka deipsirye, siknipdongopse. Akunuma kat weik ning emas ara, alip tam deipse bukni, perak ap, emas ap ara amu tamak moubuka deipseba, atuba ubuke. Akan birye, Yosua biti laka nyabuk.

1 Samuel 15:24

Nyabukura, Saul birye tamubuka nyabuk. “Kume, ance dipkoprob yupu nyapmanilame. Nara, malye upse. Allah arye, ‘Wininamlyame,’ nyapnuk yupu yanipse. Aning atonun, ance nyapnulum yupu babye yanipse. Winipse ning deiyok ara, na amu tam unyak ninye ati, ilil upnukce, sik nyapnik yupu kekepse. Adeice arye, malye upse.

1 Samuel 15:30

Nyabukura, Saul birye, tamubuka nyabuk. “Diba, na malye winipmase ati, ance melipniminba, tamubuka binimirye, narye talipse ninye ap, sik deiyok talibuka unyak wisi nang ap, dinmasicak arye, si sipnamnilyame. Ara, an ap, na ap neika, Allah el si erepnaname. ‘Winipnimnyopura, na mutuku nang arye, teleb tenepnamniyak’ tenen, moropkine,” Saul birye, nyabuka morobuk.