Bikeibuk ati, atalak ara, anabi arye, Raja Ahab biti nyabuk, “Allah Yahweh arye, nyapdeipmakil ning ara ani. ‘Narye anti, Raja Benhadad bira opnalame,’ nyapdeipmakunun nye bira, kum opmomce, batakmumba, urdem mangkau kanye bobuka binmaue. Awinipmalam ati, anye el pununa ati ara, an dipnamalame. Tonda, an olan ninye, sik deiyoknye, Raja ona kumce, batakmalama deice arye, an tam nang ara, nirya dipnamake. Ara, Raja Benhadad, el tam ninye opmatumba, dipmating bukni, ance na nyapdeipkise yupu yaniplumce, Siria mutuku taleamuka deiyoknye, kum opmalama anya arye, wini talak ara, anye el tam ninye pununa ati, an tam ninye dadipnamakca,” nyabuka, nabinye birye, Raja Ahab biti nyabuk.
Yosua 6:21 - Eipomek21 Binuka wekikopura, sik parang ya doprobikce, amutuku kam ulamik nang nirya ara, wisi ninye babye, mitik mapu babye, sal babye, kilapu babye, tonda aninye arye weilamik ning, domba basam do, sapi basam do, ayala-yala nirya babye, obuka seklobik. Winibik ning deiyok ara, Yeriko mutuku ap, anyaik-anyaik pum tam ulamuk ning nirya ap, amutuku noutamak uamuk ning nirya ara, ‘Nun ni koprop Allah, el si Yahweh ara, aning nirya ara, el ning uka anya arye, elti, arepnamabe,’ tenena ati winibik. အခန်းကိုကြည့်ပါ။ |
Yosua 6:21
20 ပူးပေါင်းရင်းမြစ်များ
Tonda, anggun Dibon mutuku noutam ululum nango, anggun pia telebak ululum mutuku arye, koulukuka yanululume. Koulukuka yamunyopura, alye dakdamunce talye tuku deice ap, butbuta deiceuk yanuka buknamlume. Minop talak ara, ninye nirya arye anggunti, ‘Se, sik babye pil teleb donyake,’ tenelamsik bukni, wini talak ara, kume. Deiyok ara ani. Moab mutuku noutam uamuk ning nirya ati, yanuka akunum kum kipdeiamuka deiyoknye bira, anggun dam ton akunum yanganamle. Akunum yalyopura, anggunce kat ning arye, weik asik dolulum ning, el si benteng nirya ara, ulubuka dakloplirye, sice buklopnamsile.
Amutuku noutam asik dobuka, ulamice nang, sik taleamice ning nirya ara, adiparyuk bulubuka, ninye nirya dinmacebuk, yanuka lak kibuka, bululinamlume. Aning nirya yamunce, bulubuka, tonok sukum deipmunyopura, sik amutuku asik dobuka, ulamice nang ap, sik talibuka ulamice ning nirya ap, anggun adiparyuk dobuka, Allah el si eren ati, aning nirya ara, uku dongopmunyeba, uku arye dibuka sirya daknamlule. Tonda, anyasik dolamicak ara, asik tamubuka kum donamlume. Batakmunyeura, asik oldemuk upnamlule.
Onmapu talak aryuk, anang ulamik mutuku nirya ara, alubuka doprobupe. Doprobuburye, amutuku noutam ulamik nang nirya babye, obuka sirya dakamupue. Ara, sal ap, kilapu nirya ap, tonda mapu nirya ap, obuka, sirya dakupe. Tonoknye babye, kum batakupu. Sik nirya obuka, sirya dakamuburye, tonoknye babye, kum batakububa, kam kum ulamik. Nirya ara, obuka sirya dakupuba, sik nirya dibike.
Musa birye, Israel ninye ati ayupu ton nyabuk. Ura, Allah arye anggunti, el mikip anggun deice deipsiliba, anggun binuka unamlum mutuku, yuk mutuku nang olbinumunyopura, aninye nirya obukapmunce, sirya daknamlulume. Amutuku ninye ati, bico tenebuka, batakna kume. Tonda, sik Isa Mutuku Dongonye si erenyak ning nirya ara, ilil tenena meme. Aning si kum erenamlulume. Winipmunyopura, wena tapu youlamle touk youpnamsila atia.
Ati ara, asum noutam arye, Yosua birye, Makade mutuku nirya warikuka onmeka ani, obuka sirya dakukce, atam tuku nirya ap, amutuku uamuk ning nirya ap, doprobuk. Amutuku ulamik nang nirya ap, sik amutuku nang taleamukce, ninye deiyok kibuka, Raja ulamuknye ap ara, obuka kum danaibuk. Yosua birye nyapdeibukba, el tam nang arye, amutuku nang nirya, yu parang arye, obik. Makeda mutuku taleamuk, sik deiyoknye Raja babye, Yosua birye Yeriko mutuku taleamuk ninye deiyoknye biti, min arye oplomuk touk, Makeda Raja babye, awinyamuk touk, winibuka obuk.
Amutuku nang ap, sik ninye deiyok nang ap, amutuku uamuk ning nirya ap, amutuku arye taleamikba, ulamik mutuku nang nirya ara, parang ya arye obuka, sirya dakik. Yosua birye, Debir mutuku ulamik nang nirya ap, amutuku nang nirya ap, obuka ara, Hebron mutuku ap, Libna mutuku ap, Libna mutuku ninye deiyoknye ap, sik nirya obuka sirya dakmek touk, Debir mutuku ulamik nang ap, sik ninye deiyoknye ap ati, atouk winibik.
Amutuku ton obuka sirya dakukce, akunum doprobuk. Winibuka akunum doprobukopura, Hasor mutuku noutam ulamik ninye deiyok Raja nang ap, amutuku ulamik ninye nirya ara, obikce sirya dakik. Tonoknye babye, ton batakikba, kam ton kum ubik. Winibikopura, Hasor mutuku noutam weik asik dolamik ning ara, uku dongobukba, uku arye dibuk.
Ura, amutuku-amutuku nirya aulamik noutam nirya ara, aulamik nang ara, parang ya arye obuka, sirya dakik. Tonoknye babye, pia ton kum batakik. Bukni, sikce, ‘Aninye batakmek bona ara, na ning koprobaʼ tenen, sik bona yala-yala nirya ap, Kanaan mutuku ulamik nang arye, weilamik domba basam ato ning ap nirya ara, Israel nang arye dobuka, sik ninguk kipdobike.
Ai mutuku ap, amutuku unyak nang ap, amutuku ninye deiyok kibuka, talibuka ulul Rajanye ap ara, min talak ance Yeriko mutuku winyamlum touk, winipnamalyame. Ara, Yeriko mutuku nang obisiplumce, aning-aning sirya dakuka uluplomlum touk, Ai mutuku babye binuka atouk winipnamlume. Bukni, wini talak Ai mutuku bataknamak bona ap, sikce weilamak kam ning ap, sikce talilamik bona nirya ap ara, akunum arepnamsine ati, anggun Israel ninye arye, talye luparabuka dopropmomce, anggun ning kipdopnamlulume. Ati wini talak ara, anggun adiparyuk minopce, sik amutuku noutam unyak nang olbana ati, sik kum bikmakce talak aryuk, kintinipnululume. Anyasik amu tamuk binuka, duknubuka kaliknamalulume.
Ati, Yosua ap, el yin nang ap, tonda, Ai mutuku dam duknupmek yin nang ap ara, yayikce, sik ap neika ansibikce, Ai mutuku ninye nirya olbiyik. Winibik talak ara, sik Ai mutuku nang nirya ara, warikuka antanap dongobikba, Ai mutuku yin talen nang ara, pola bikbik abuka bindopmanto kum ubik. Ninye ton sik dam arye tonoknye babye ton, sakuka kum bindobuk. Aninye nirya ara, sik Israel ninye arye, Ai mutuku nang obuka, sirya dakikba nirya dibik.
Sikce amutuku-amutuku ulamik nang arye, ansinipdobikce, kintinibik bukni, sik ayupu kekebik nang ton, sik yuk yala nang, Gibeon mutuku ulamik nang ara, sik yuk winibik. Ara, yuk nang arye, “Yeriko mutuku ap, Ai mutuku ap ati, Yosua birye nyapdeibukba, Israel yala yin talin nang arye, abitinye mutuku dam binuka, obuka sirya dakikce, amutuku ulamik nang ap, sik talilamik bona ap, sirya dakmake,” nyabuka, lake nyabik Gibeon mutuku ulamik nang nirya kekebik.
Anye birye ayupu nyabukba, na Yohanes arye kekepse. Kekepse talak ara, adiparyuk yuknye, mikip weik malaikat arye winipmanto ning una ati, tonok mutuku yangan keil, ikin weik keil dobuka ereptalibukce, laut mekwen noutamak donokukce, ayupu nyabuk. “Aweik keil dobuka, mikip arye laut mekwen noutam donokmal touk, Allah arye Babel mutuku tam ulamak ninye nirya weneplirye, mikip arye oplopmale. Wini talak arye dipdongobuka, aminyan doyanamle talak noutamak nirya ara, tuba tonap amutuku aik ap, ninye ap kum unamake.”
Ati wini talak ara, anggun nirya bimunce, ‘Bico,’ tenena kum diparyuk, Amalek ninye nirya opnamlulume. Tonda, sik talibik ning nirya ara, tonok ning babye, ton kum bataknamlulume. Aning nirya obuka, sirya daknamlulume. Sal ap, kilapu ap mapu ap, kilmapu ap, moum din mapu, aling pum lin mapu ap opnamlulume. Tonda, Amalek nang, sik sapi ap, domba ap, unta basam ap, keledai basam ap, nirya obuka, sirya daknamalulume,’ Allah arye nyapmakile,” Samuel birye nyabuk.
ကြော်ငြာတွေ