Yosua 3:5 - Eipomek

⁵ Yosua birye, Israel nang ati nyabuk. “Anggun malye ning nirya, lobuka batakmunce, anggun kanye talima ap, nong ap nirya, anggun ni Allah ati, arepnamlume. Deiyok ara, ambusum, Allah el si Yahweh arye, ninye winipman kum ning, mikip weik ning, nun dam winipnamala atia,” nyabuk.

Yosua 3:5 ပူးပေါင်းရင်းမြစ်များ

Ayub 1:5

Akunum kwalibuka dipdopneura, Ayub mapmana beren tam arye bukdopna arye, el mapu sik yuk-yuk ati nukuka, domba basam opnarye, Allah morona ati memepdeiamukak, bobuka uku dalbalamuk. Winilamukce, sik ni Ayub birye tenelamuk ning ara, ‘Na mapu sik mangkau arye malye upmak do? Tonda sik kanye talima noutamak arye, ‘Allah ati mambul kume,’ tenepmak do?’ tenen, amalye winipmanto ning, ‘Winipmak do?’ tenen, aning pununa ati, kam ning obuka, Allah ati arelamuk. Aning ati ara, ‘Narye Allah moropneba, sik Allah dam malye wininyak ning nirya lyepnamle’ tenen, winilamuk.

Mazmur 77:15

Ninye pia kum winipmanto ning pil dosilyam Allah ara, an tonoka. Tukwak mutuku sirya, im sirya nirya unyak nang, sik dinyakak kan-kan arye, an mikip weik deice arye, ninye kum winipmanto ning, mikip weik pil akunum dolamlumba, ninye nirya arye, akunum elilamik.

Mazmur 86:10

An siuk erenamkiaka deiyok ara, ani. Ara, ance pia teleb pil, weik tonun ninye dopman kum pil dominye talak nirya ara, ninye nirya arye, ‘Se, aweik mikip pil ara, ouku weikto uptu do?’ tenen, ilil weik upliba, sik kanye deibikirye, pin-pin asa unyake. Dipkoprop, Allah an tonok ulyame, yuknye ton kum ulule.

Yoel 2:16

Israel ninye, anggun nirya bulubuka umunce, Allah el siuk erepmunce, telebuk ubuka unamlulume. Unamlum talak ara, anggunce yukupmunba, pia wisi nang nirya ap, mapu ap, mitik mapu ap, kwaknamne mapu ap, bulubuka yanamake. Tonda, ‘Sal taruk murupnamap’ tenen, kweirya dopmakirye, aik unmakce kilapu ap, sal ap nirya, bulubuka yanunyake. Aninye bulubuka yanamak talak ara, sik unyak mutuku ap, sik unyak aik ap, nirya batakuka, Allah ati morolyanganamake.

Imamat 10:3

Winibuka ati, Musa birye, Harun biti nyabuk. Atonun ning ara, ‘Anggun dam ikin weik yasilyakʼ tenen, min talak Allah Yahweh arye, akunum nyapdeiamsuk. Allah arye nyabuk yupu ara, ani. “Na si eren aik pum tam pil donamak nang nirya ara, ‘Se, Allah ara, dipkoprob pia weik etekdopnye. Malye una ning pia kum ulula ati, Allah elda, pia teleb etekdopnye, leknye ulule, tenebuka, kel biknamakeʼ tenen, na wininye ning lake kibuka, eipnamake. Nara, malye ning tonok babye, kum unulula ati, nara weik leknye unun ati, sik babye biknamake. Na weik mikip lake kipdeipniba, adeice arye, sik Israel ninye nirya babye, eibikirye, sikce, ‘Se, Allah elda, dipkoprob pia teleb, weik leknye ululeʼ tenen, kel biknamniyake. Na mikip weik tukwak winipdenyeba, adeice arye, sik Israel nang nirya babye, eibikirye, ‘Se, Allah elda, dipkoprob pia teleb, weik etekdopnye ululeʼ tenen, biknamniyake.” Allah arye nyabuk yupu ara, Musa birye Harun ati, nyabuk. Musa birye Harun ati, “Allah arye, ayupu nyapdeiamsuk,” nyabuk bukni, Harun birye tamubuka, yupu ton kum nyabuk. Tunim anauk ubuke.

Imamat 20:7

Nara, anggun ni koproba Allah Yahweh arye nyapsine. Anggunda, malye un ning nirya batakmunce, moubuka kaledamunce, pia telebuk wininamlume. Wininamluma deiyok ara, na anggun ni koproba Allah Yahweh ununa ati, nyapne.

Bilangan 11:8

Aning ara, lukunyan dekne duk-duka purwu mok celamle atonun, kibuka saklamuk. Winipmanak, Israel ninye beren tam koproba arye binuka, dobuka yanopura, kat ning deice arye, ateikne ning arye, teikinmana ani, mitik kibuka, sice buknopura, makau bisik yulamik. Winipmana ani, akunum opnopura, doropnarye, roti kwaning kipnura, bum teleb uka dilamik. Mana kwaning el to ara, mitik anun, zaitun duk teiknarye, aminyak goreng atonun ap, yubuka dilamak touk, ubukba dilamik.

Yohanes 17:19

Wininuna deiyok ara, ‘Na mapu nirya ara, pia telebuk utingce, na ni Allah, an na tenen ninyeuk unamak’ tenen, wininune, na ni Allah. Naio, na Yesus arye na bidamnye ati, ‘An na tenenanye unamne’ tenen, na kanye talima nirya ara, an deiceuk delikunune. ‘An amu tam unirye, an piluk pia donamne’ tenen, nyapne. Yesus arye nyabuka Allah ati morobuk.

Yosua 3:13

Nyabukce, ayupu ton nyabuk. “Mutuku-mutuku nirya talilul Allah, el si Yahweh, el si eren aik pum tam pil donyak nang, Yahweh el yupu liyamik marikna bopmace nang arye, sik yan Yordan mek yanibicopura, atalak aniryuk, mek noutamak sekuka, eitam kilon, outam kilon kipnamle,” Yosua birye nyabuk.

Yosua 3:15

Atalak ara, ninye koun ning li talak anya arye, Yordan mek ara, pia weik onmokce banmok. Pia weik onmokce banmok bukni, Allah el aik pum pil don nang, el yupu liamik marikna bobanmek nang, Yordan mekin biyikce, mek yoka diamuk yanibik talak ara, adiparyuk Yordan mek noutam sekdakuka, itam kilon, utam kilon kibukba, anoutam ara, tuku mikuka bisik laka kibuk.

Yosua 3:4

Anggun nirya ara, abisik min kum binamluma anya arye, Lewi yala nang arye, menekuka bakibuk, anggun aminyan tam yamunyeura, ‘Winibuka banamabe’ tenen, binamlulume. Adeice arye, aminyan talak ara, anggun binamlum bisik, kel biknamlume. Bukni, Allah arye, el yupu nyapdeibukba, dopdeibik kwemdina bopmace nang dam, bana kume. Lo karen akuk, 900 meter atonun menekuka bakibuk, anggun aminyan tamuk banamlulume. Sik bobanamak kwemdina yo dam ara, bana meme. Israel ninye, sik deiyok-deiyok nang arye, aninye nirya ati nyabuka, yupu moupdeibik.

Yosua 3:6

Nyabukura, mapmeka berekukopura, Yosua birye, Allah el si eren aik pil don nang, Allah ap, ninye ap, ansinilina deiyok nang ati, “Anggun menekuka, otam binamlume,” nyapdeibukba kekebikce, Allah arye, ‘Wininamlume. Aning winipmunyopura, narye winibuka melinamsine,’ nyabuka, el yupu nyapdeiamukba, liamik marikna, el si ara, Peti Perjanjian dobuka minopce biyik. Sik yuk Israel nang kum binmek talak arye, bobuka banmekba, sik aminyan tam Israel ninye nirya melibuka biyik. Aning ara, Yosua birye nyapmok touk winibik.

Yosua 7:13

Nyabukce, ton dukdongobuka nyabuk. “Wini talak ara, Yosua, an adiparyuk bukminyakarye, ‘Naʼ tenen, nang Israel nang ara, na ap teleb kibuka, neika unamap ati, malye una kum kipdeipminyak arye, kanye arye pia teleb kipdeipnilyame. Tonda, sik aninye ati nyapminyeura, adiparyuk kintinibikirye, na dam yakceura, epdanamaba ati, sik damnye, teleb kilana ati, kintipnamake. Sik aninye ati nyapminyeura, teleb kibuka kintipmakirye, ambusum ara epdanamabe. Ati, Israel nang, sik deiyoknye, na Allah Yahweh arye, anggunti melibuka kalikisununye birye nyapsine. Se, nun tenen nang anggun Israel mutuku noutam ululum nang nirya ati, narye, ‘Aning-aning nirya ara, anggun ton kum dopropnamlume,’ nyabuka, nyapdeiamse ning buk, akunum upula dopromlumce, anggun tenen ning kibuka dungnubuka deiprolume. Ati, aning-aning nirya ara, anggunce obuka, sirya daknamlume. Amem ning, min kum dopropmamuncuk, obuka sirya kum dakmamunyeura, anggun mal olan nang ati, pia oplopmunyakarye, kum talinamlume. Anggun mal olan nang ara, sik nong obuka, pia yanilongona uk unamsiake.

1 Samuel 16:5

Nyabikbuk, Samuel birye, tamubuka nyabuk. “Diba. Narye, anggun teleb ulina ati yanmane. Tonda, na kam tuba ulamle ning dobuka, Allah el si erena ati arepnune. Ati, anggun malye ning nirya batakuka, anggun kanye talima kintinipmunce, mek kekmunce, teleb baju akunum ongopmunyopura, anggun ap, na ap, neika Allah ati kam ning obuka, elti, arebibirye, el si erenamabe,” nyabuk. Nyabukce, Samuel birye, Isai ap, el mapu ap, ‘Allah ati kam ning arepting’ tenen, teleb kipdeibukba, sik kanye talima noutamak ara, teleb tenen kintinibikce, sik yuk-yuk kintinibikopura, anang ati nyabuk. “Ura, anggun ap, na ap bulubukap, Allah el si erena ati, ining ulamle ning obuka, neika arepnuyabe,” nyabuk.