Yosua 24:25 - Eipomek25 Atalak noutam ara, Yosua birye Sikem mutuku unmek talak, Allah arye Israel ninye ati, ‘Wininamlum, wininamlum,’ nyapdeiamuk yupu ton, sekuka arebuk. Ayupu deiyok ara, ‘Sik ap, Allah ap, pia teleb kibuka niktoto unamak’ tenen, ayupu sekdeibuk. Ara, ‘Allah el yupu nirya nimalye arye, kekebuka unamak’ tenen, winibuk. အခန်းကိုကြည့်ပါ။ |
Yosua 24:25
17 ပူးပေါင်းရင်းမြစ်များ
Imam Yoyada birye, nyalin yupu winiryuk ning ati, “Wininamabe,” nyapdeibuk. Ara, elce ninye deiyoknye Raja Yoas ap, tonda amutuku noutam ulamik ninye ap nirya, Allah Yahweh ap biti, “Nun nirya tonok kanye bobuka, nun ni Allah Yahweh ap, pia teleb ubuka neika unamabe. Elce, ‘Naʼ tenen, ninye dem ubibirye, el yupu uk, pia moubuka talibuka, dobolbanamnyabe. Tonda, ‘Allah Yahweh, el mapu koproba kipdeipnamsile,’ nyabuka, nyalin yupu arye nyabuk. Imam Yoyada birye, ayupu nyabukopura, sik awekmek ninye nirya arye, “Yo diba, nun babye aninguk patasulula anya arye, aninguk winamabe,” nyabik. Tonda, aning atonun, Yoyada elce, sik amutuku noutam ulamik ninye ap, ninye deiyoknye Raja Yoas ap ara, “Nun nirya tonok kanye bobuka, teleb ubuka neika unamabe. El Yoas birye tikuka, yupu nyapsiliba, el yupu uk kekenamabe,” nyapdeibukba, sik awekmek ninye nirya arye, “Yo diba, aninguk wininamabe,” nyalin yupu deice arye nyabik.
Arelyayikce, Allah Yahweh ati nyabik. Ara, “Nun kanye tenen ning nirya ap, nun talima nirya ap, nun nong ap nirya ara, nun ni koprop Allah Yahweh anti arepkiyabe. Nun kanye talima an deice uk delinamkiyabe. Ance, ‘Wininamake,’ tenesiminye touk, aning talebuka unamabe. Ara, nun apu yapu arye, an si erelamkikba, ance sikti, melilamlumnye, Allah Yahweh antibuk tenenmabe. Ansiuk erenamkiyabe nyabuka, nyalin yupu deice arye nyapdeibik.
Sik Yehuda mutuku ulamik nang nirya arye, pia kanye deibik. Ara, sik aninye arye, “Kume anyalin yupu nyapam ara, talye nyaltakna kum bukni, nun kanye talima nirya arye, pia dipkoprob nyababe. Aninguk wininamabe,” nyabuka, pin-pin kanye deibik. Sik anang ara kanye deibuka, Allah Yahweh ati si erelamik. El si erelamikba, Allah Yahweh el babye kanye pia deibuka sikti, doprobuk. Elce sikti, amutuku noutam pia namin arye kanye lamapdongobuka un ning arebuk. Ati, sik ap, sik dana-dana tam ulamik nang ap, mal olana kumce, teleb kanye bobuka, namin arye lamapdongobuka, neika ulamik.
Ura, aning nirya akunum winibikura, imam Yoyada birye, nyalin yupu deice nyapdeibuk. Ara, elce, “Na ap, nun winiryuk Raja Yoas ap, amutuku unyap ninye nirya ap, nunda Allah Yahweh el mapu unamabe. El tibuk si erenamabe. El yupu uk kekebuka wininamabe,” nyabuka, nyalin yupu deice nyapbukba, sik aninye nirya kekebikce, ‘'Yo, aninguk wininamabe,” nyabik.
Aning nyabikopura, ayupu ton dukdongobuka nyabik. “Aning nirya ara, nun ni Allah, nun Israel ninye nirya arye, nyalin yupu nyapnuyabe. Ara, nun Lewi yala deiyok nang ap, Israel ninye yupu bokolina deiyok nang ap, ninye deiyok talinyak nang ap, Allah an si eren aik pum tam pil dona deiyok nang ap nirya arye, ayupu nyabibirye, surat deice sekeipnuyabe. Sekeibibyopura, adeiyok nang nirya arye, sik lak kilin ning ton, asurat deice deipnamabe. Deiyok ara, ‘Ayupu nirya nun dib tenenyaba anya arye, aninguk wininamabe,’ tenena ati, sik si asurat deice seknamabe. Ayupu ara, wini talak aryuk nyapmabe. Nun nirya arye, an nyapdeiamsulum yupu, Mem Yupu moubuka kekebibirye, ayupu talibuka dobolbanamabe. Nyapdeibape.” Sik Lewi yala deiyok nang ap, sik Israel yala nang ap nirya arye, neika nyabikce, ayupu sekdeibik.
Malye nyanmekopura, Musa birye ikin kanye bobuka, engebukce Allah el si Yahweh ati morobukba, Yahweh arye Musa biti, yo kama tonok lake kipdeibukce, arebuk. Ayo arebukce nyabuk. “An boplum yo, mekwen pum bisik dongobuka dopropminyopura, amek ara teleb upnule.” Nyabukura, Musa ayo dobuka, amek noutamak dongobukba, amek ara pia teleb kibuk. Winibukba, sik nirya amek dibik. Dibikura, atalak ara Allah el si Yahweh arye sik winipra banamik ning ati, ikin yupu nyapdeibuk. Ara, ‘Winipnamlume’ nyapdeibuk yupu atia. Tonda, Yahweh arye aninye ati asilen yupu ton arebuk.
Musa tamubuka biyukce, Israel nang ati Allah el si Yahweh arye, ‘Wininamake’ tenen, nyapdeipmok yupu, mem yupu nirya laka nyabukba, sik Israel ninye nirya kekebikce, neik sum arye nyabik. “Telebe, nun koproba Allah, el si Yahweh arye nyapmasil ning nirya ara, aninguk wininamabe,” nyabuka, tonoknye nyalul touk, neikto touk, nyabik.
Allah el si Yahweh arye, Musa dam nyalin yupu nyapdeibuk yupu ara, ani. Ara, sik Israel ninye, Moab mutuku binuka unmek talak arye, yanuka nyapdeibuk. Anyapdeibuk yupu ara, sik Israel ninye, Sinai mutuku unmek talak, Allah arye nyalin yupu yanuka nyapdeiamuk yupu atonunuk, Moab mutuku unmek talak babye, tonap tabakuka, ayupu uk yanuka nyabuk.
Ura, aminyan talak ara, Yosua birye nyapdeibukba, sik Israel ninye, ayala-yala nirya, Sikem mutuku bulubuka yayik. Sikem mutuku unmek talak ara, Yosua birye, Israel ninye ayala-yala nirya bulupdeibuk. Tonda, elce yukubukba, sik yayik nang ara, sikce, ‘Winipnuyabe’ nyana ati wisi nang ap, Israel ninye sik ninye deiyok nang ap, sik yupu bokolin nang ap, sik weik nang, mambul pil dolamik nang ap, nirya yukubukba yayik. Yayikopura, sik nirya bulubikce, ‘Nun ni Allah, el si Yahweh arye, yupu nyapnusil’ tenen, el dam yanuka tikik.
Yosua bira, Allah arye, ‘Wininamlume, aning ara, kum wininamlume,’ nyapdeiamuk yupu ara, Mem Yupu Buku noutamak sekdeibuk. Ara, ayupu nirya sekuka, Allah nyalin yupu buku noutamak dongobuk. Winibukopura, Yosua pia weik keil pala dobukabukce, asukumuk ikuka erepdeibuk. Ara, ‘Allah el si Yahweh, elda pia diksukum ubuka, telebuk ululnye birye, asukum yupu nyapsukak ati, amutuku ara, weik mambul ak,’ tenebuka, amutuku weik yo tikamukak binuka, ayo deiyok dam weik keil ikdeibuk.
ကြော်ငြာတွေ