Yosua 2:9 - Eipomek9 Biyukce, anang ati nyabuk. “Na kele, amutuku ara, Allah el si Yahweh arye, anggun Israel ninye ati, ‘Arepnamsine,’ akunum tenyamsuka anya arye, amutuku nang nirya ara, anggunti, ilil pia weik ulule. Yata nang do nirya, nun mutuku noutamak unyak ninye nirya ara, anggun Israel nang ati, ilil pia weik usilibuk, nun kanye talima daksaksuke ati, nun mikip kum upsile,” nyabuk. အခန်းကိုကြည့်ပါ။ |
Yosua 2:9
39 ပူးပေါင်းရင်းမြစ်များ
Aning nyabikiba, an tam yin talin nang, ilil pia kum unyak nang babye, ayupu kekepnamakopura, pia malye kanye bobuka, teniltonauk unamake. Ilil weik uplyopura, ninye ton mikip weik arye, itam kibuka unanye babye, singa bai tam, kam ilil pia kum ulamle tonye bira, adiparyuk ilil upliba, talima mitanguk unamake. Ara, urdem ati kume. Israel nang nirya, kel bikamik ning ara, ‘Absalom el li koproba Daud, mikip weik ninye olananye ulule. Tonda, el ap unyak yin talin nang babye, lik tenebuka unyake’ tenen, akunum kel bikamik.
Aning akunum winibukopura, el melin nang ap, sik nirya tamubuka Elisa dam yayik. Naaman bira Elisa dam tikukce nyabuk. “Atalak ara, na akunum kel bikmane. Mutuku-mutuku nirya ara, Allah yuknye ton kum ulule. Allah ara, Israel mutuku noutamakuk ulule. El tonoka. Ati ara, dekna weik ning narye anti, dekena kum bukni, talye arepnukine,” Naaman birye nyabuk.
Ninye kum unmeka deiyok ara, ani. Allah el si Yahweh arye, Aram nang ati, kanye walwal ning arepmok deice arye, weik lelim kekebikce, ilil weik ubuk. Ara, Allah arye, arebuk lelim ara, kuda kereta balamle touk lelim ap, kuda basam baceba, lelim lelamle atonun ning ap, tonda yin talin nang weik arye, lelim nyalamak touk nyabukba, kekebik. Sik aning lelim kekebikce, sik anang mamun asipdayikce nyabik. “Kume aning ara, Israel nang sik ninye deiyoknye Raja birye, yuk mutuku nang, sik Het mutuku talinanye ap, Mesir mutuku talinanye ap ati, nun ona ati yupu deipmalba, anang akunum olyasiyake,” nyapdayikba, ilil weik ubuk.
Akunum dobuka sirya dakupopura, sik amutuku noutam ulamikce, nunti, ‘Lik,’ tenebuka mal pilamsik nang nirya ara, aning kekebikce ilil ubukba, ‘Nunda sik ap urasin kum dildanamabe’ tenen, duknuprobik. Min yuma talak ara, malye tenebuka, mikip weik ubuka, ilil kum asa ulamik bukni, akeil poka dobuka sirya dakupu talak ara, ilil ubuka ati, talye kanye bobuka, nimalye asa ulamik. Ara, amutuku ninye arye tenebik ning ara, ‘Se, aweik cang keil poka nirya ara, sikcuk kum sirya daktinge. Allah el mikip deice arye melibukba, minop sirya dakmake’ tenen, sik ilil ubuk.
Tonda, dan mutuku do nirya ap, dan provinsi do nirya ap, weik mutuku kota ap, apala mutuku noutamak provinsi nirya ap, ninye deiyoknye Raja arye, “Winipnamlulume,” nyana yupu laka nyapdeibukba, asurat yinipmek Yahudi yala ninye nirya ara, kanye pia deibuka, weik arye si erenmik. Winibikce, kanye teleb ubukba, sik aninye kanye teleb deice arye, weik kwalya kwalibuka deiamikce, si erebik. Tonda, Allah ati, telebe nyana ati, ton talak ara din si tebuka, din ning kum dilamik. Ton talak ara, kwalya kwalibuka dilamik. Winilamik talak ara, yuk mutuku nang bukni, sik Yahudi yala ulamik nang nirya ati, sik ilil pia weik ulamuka anya arye, kanye deibikce sik talima teleb ubukba, ‘Yahudi yala ninye winilamak touk, nun babye wininamabe’ tenen, Yahudi yala ninye diba tenelamik ning talibuka ulamik. Aninye nirya, kwalya kwalibuka dinmikce, si erenmik.
Winibikceura, yuk nang arye, sik yuk nang, sik malye ninguk talibuka, malye-malyeuk wininyak nang arye, anang eibikceura, sikce, ‘Aning ara, nun pia like,’ tenekirye, yu weik unamle. Winipnamak bukni, sik malye winin ning wininyak nang arye, ‘Winipnamabe, winipnamabe’ tenen, sik patalamle ning nirya ara, nong kum upnamla ati, sikda yu weik uplyeba, malye yupu weik nyanamak bukni, aminyan talak ara, kum danamle. Winipmanto ning ara, keta mouamlya, kum kipnin balamle touk, sik amalye winin nang babye, kum danin banamake.
Yitro birye nyabukopura, ayupu ton nyabuk. “Wini talak ara, ance ayupu nyapmanilam deice arye, dipkoprob na akunum bikmane. Anggun ni koproba, Allah Yahweh ara, dipkoprob mikip weiknye ulule. Yuk ninye nirya arye, talye ning yala-yala nirya ati, “Nun ni koproba, nun kwepdeipsuknye,” nyabuka, si erenyak ning ara, talye atibuk si erebuka kinyake. Asi erenyak ning yala nirya ara, Allah Yahweh el amu tamuk unyake. Allah anggun nong deice ulule anya arye, el mikip weik ulul bukni, sik si erenyak allah ara, talye ati wininyake. Tonda aning ara, na akunum kel bikinune. Mesir mutuku ninye arye, ‘Nunda mikip weik nang unyabe,’ tenebuka, kwalilamikce, sik kanye erelan nang ulamik anye, Israel ninye ati, ikin weik ning sik nong deice delilamik bukni, Allah Yahweh arye, “Mesir mutuku nang ati nirya obuka dakuke. Aning nirya winibuka ati, ‘Elda, mikip pia weiknye ululeʼ tenen, akunum bikmane,” nyabuk.
Amutuku noutamak embanamlum talak ara, na mikip anggun deice deipsiniba, anggun binamlum mutuku unyak ninye nirya ara, ilil weik upnamle. Winipnamna deice arye, sik aninye ara, kanye walwal kepdeipniba, kwakdu-kwakdu apdanamake. Winibikiba, anggun ona ati yanamak nang nirya ara, ilil upliba, balye tamubikirye, bikbik abuka bindopnamake. Aning nirya ara, narye winipnamne.
Winibuka unyak bukni, narye kel bikse ning ara ani. Sik malye ning talibuka unyak nang kan-kan arye, tonoknye birye malye un ning nirya ulul ning ara, yupa pia weik seratus arye malye wililucuk, tuba kam ulule. Tonda el una ati lo ara, pia weik tonun upnamle. Bukni, na kele, aminyan sirya talak ara, ikin weik ning el nong deice yanuka upnamlarya! Bukni, yata nang do nirya, Allah arye, Aning ara wininamlume, aning ara pia kum wininamlume,’ nyapdeiamsuk yupu, moubuka talibikirye, dipkoprob telebuk ubikcopura, aminyan sirya talak ara, sikda tuba telebuk unamake. Sik anang arye Allah ati, Elda pia mambul weikʼ tenen, ilil unyaka ati, aminyan sirya talak ara, Allah arye sikti, teleb kipdeipliba, sikda tuba telebuk unamake.
Ayupu ara, Mesir mutuku unyak nang ati, Allah arye, na Yesaya dam yanuka ayupu nyapnuke. “Na Allah Yahweh ara, sike pia kum bukni, pola balamle dua deice welebuka buknirye, Mesir mutuku dam bikbik abuka yanamne. Mesir mutuku nang arye, isa urasin atonun kibuka memebuka deibikirye, isa si erenyak ning nirya ara, na Allah ati ilil weik uplyeba, sirim talipnamle. Tonda, sik Mesir mutuku unyak nang nirya ara, pia ilil weik uplyeba, sik talima dakalsakanamle.
Aning ati, aminyan talak ara, yuk nang arye, sik Mesir mutuku unyak nang ati, “Se, Allah arye akunum Tirus mutuku nang ara obukabukce, sik mutuku nirya dakuka sice buklobuke,’ nyabikceura, Mesir mutuku unyak nang nirya, tilila yupu kekepnamake. Kekebikceura, Mesir mutuku unyak nang nirya arye, Tirus mutuku nang ati, pia bico tenebikirye, ikin kanye bobuka, engena uk unamake.
“Yuknye kume. Na Allah aryuk, na mikip weik talibuka unye ning ap, tonda na mikip weik unilye taruk ap deice arye, tukwak mutuku ubuk ning nirya kwepdeiamse. Tonda, tukwak mutuku nirya unyak nang ap, tonda tukwak mutuku noutam kam ulye ning yala-yala nirya ap ara, naryuk kwepdeipse. Akwepdeipse ning nirya ara, na kanye aryuk, yatanye biti do, ‘Anye bira mikip weik deiyok ning arepkinun,’ tenepninye bira, narye atenepnye touk arenune.
Niniwe mutuku noutam nirya ara, sice bukuka bataknamake. Winibikirye, amutuku noutam uamuk ning nirya ara, pia kum kipdeibikiba, asik oldemuk upnamlarya! Amutuku nang domik ning nirya babye, pia sice buklobikirye, amutuku noutam nirya ara, malye kipdeipnamake. Winipnamak talak ara, sik amutuku unyak nang nirya, sik talima noutam arye asilana ap, teniltona ap, kanye talima dakalsakna ap, upnamake. Winipnamaka deiyok ara, sik ilil weik atia. Tonda, sik kutam nirya, mitang uplirye, yok sirim birbir apnamle. Sik amutuku nang nirya, sik urasin ara, uk weik dilamle nang, sik urasin malye delilamle touk, ubuka malye kanye bobikirye, unamake.
“Harun bira, amutuku dipnamale. Winipliba, el apu yapu dibikba weiamik touk, weipnamlulume. Israel ninye ati, ‘Amutuku arepnamsine,’ nyabuka, nyalilamse mutuku ara, Harun kum binamle. Deiyok ara, narye Musa an ap, Harun ap ati, ‘Aning ara, wininamlulume. Sik Israel ninye bulubuka, tonok keil dam deiprumunce, akeil dam, ‘Mek kutukuka panaplyame,’ nyabuka moroprumunyopura, panabuka yanamalule,’ nyapmasebuk, na nyapsise yupu kekena kumce, yanipnuruma ati, anggunce akeil kama arye deprume. Ara, na nyapmase touk, kum winyamruma ati, Harun bira, asukumuk dipnamle. Meriba mutuku mek kutuknuyuk talak ara, anggunce nati, malye kipdeipnurume.” Allah arye nyabuk.
Na arepmasin keil uang ara, na keil uang anya arye, na kanye tenepmanu touk ubuka, akunum arepmasine. Narye tenepnye touk winipsitinye. Bukni, narye ‘Pil weik donmangu nang babye, mitik anunuk pil donmangu nang babye, keil uang ansinibuka tonok arepnun’ tenen, talye mangkau arye arepmana ati ara, anggun yu upmasilba derepmanulum do? Pil weik dopmalum nang ap, pil mitika aryuk donmangu nang ap ati, dekna teleb ning neik touk arepmanu ati ara, yata ati derepnulum do? Awa deiyoknye birye el pil don nang ati nyabuk.” Yesus arye el mapu ati domon yupu deice arye ayupu nyabuk.
Tonda, amutuku unyak nang nirya ati ara, minop talak anggun ni koproba Allah Yahweh arye, anggunti, nyalin yupu deice arye nyapdeiamsuk touk upnamlarya. Ara, Allah arye, ‘Sik amutuku unyak nang ara, narye ilil ning arepniba, sikce tamubuka anggun Israel nang ati, ilil weik unamle. Ilil upliba, sik anang nirya arye, ‘Se, sik Israel nang arye yata wiripnamsiyak do, opsikirye, sirya daknamsiyak do?’ tenen, anggunti ilil weik upnamlarya.’ Allah arye ayupu nyapdeiamsuk atonun upliba, sik omutuku unyak nang arye, anggun Israel nang ati ilil unamle. Adeice arye, amutuku nang ara anggun wininamlum ning ati, ton kum yanuka sekelongonamsiyake. Sikce kum malye kipsitinge. Winipnamaka deiyok ara, Allah arye nunti, ‘Dipkoprop winibuka winipnamsine,’ nyalin yupu nyapdeiamsuka ati nyapsine.” Musa birye nyabuk.
Atalak aryuk, Allah Yahweh arye nyamsuke. Arup arye deiyok koubuka, narye anggunti arepsiniba, yuk-yuk mutuku nang, dana-dana mutuku nirya arye, biknamsiyake. Biksikirye, anggunti, ilil weik tonun unamle. Aning ara, dipkoprob winipnusine. Winipsiniba, aning eibikirye, yuk mutuku nang, dan tam mutuku unyak nang do nirya ara, anggun Israel nang ati, yupu lak nyabikce talak ara, sik tonok ilil pia weik unamle. Tonda, yuk mutuku nang arye, anggun ulamunya ati biksice nang arye, ‘Sikda Israel nang yanganmaka,’ nyabikiba, kekebikcopura, sirim taliplirye, ilil weik upnamale. Allah arye nyamsuke.
Winibuka umunyopura, yata mutuku nang do nirya, yuk-yuk mutuku, dana-dana tam unyak nang nirya arye, anggunti eibuka biksikirye, ‘Se, dipkoprob Israel nang, sikda Allah Yahweh, elce wipdeibuk nang unyake. El mapu koproba unyakce, el siuk erenyakʼ tenen, ilil unamle. Ati, anggun Israel nang ara, pia si bikinamsiake.
Israel ninye arye, Yeriko mutuku nang opnuyik talak ara, Israel ninye arye, ‘Yeriko ninye opnuyap’ tenen, ninye ton bitinye nang dopreibikba, maka meil birik. Sik maka meil birik talak ara, tonok kil el si ara, Rahab arye, ninye talye yoltan kil ulamuk bukni, el diba tenebuka deice arye, ‘Na mutuku nang arye amaka melyanmarak nang obicak’ tenen, amaka meil binmarik nang ati, “Telebe,” nyabuka, melibuka duknupdeibuka anya arye, weik keil poka lokukabukce, sik diba’ tenena kum ninye, Yeriko ninye obuk bukni, akil tonok Rahab bira kum obuk.
Ura, Yordan mek duman, keting kumulban tam ulamik ninye ara, Amori yala deiyok nang, Raja nang ap, tonda, Kanaan tam bukni, weik laut mekwen kup-kup, pantai dam ulamik ninye deiyok nang ap arye kekebik. “Allah el si Yahweh arye, Israel ninye amutuku yanamaka ati, Yordan mek cepromalaba, koubuka yanganmake,” nyabikura, kekebikopura, pia ilil weik ubuk. Ara, sik Israel ninye ati, sik yuk yala ninye pia ilil ubukce, sirim talibuk. Sik kanye talima daksakukba, ‘Israel ninye obuka sirya daknamap,’ tenelamik ning ara, batakik. Sik ilil weik ubuk atia.
Winilamik talak ara, Allah el si Yahweh arye, Yosua biti nyabuk. “Wini talak, na mikip an deice deipkine. Yeriko mutuku wekuka, malye kibuka ona ati, narye melipsinyeura, anggun Israel ninye arye, Yeriko mutuku ninye ap, sik ninye deiyoknye Raja ap, amutuku sik yin talin nang ap nirya ara, mikip arye yaribuka wekmunce, malye kibuka opyaknamlume,” Allah arye nyabuk.
“Tonda aning atouk, weik mambul ning awinilul ning ara, mutuku bitinye talibuka, ulamik ninye deiyok nang ton, atouk obukadakuk. Ara, Yordan mek koubuka, otam mutuku keting yangan tam ulamik nang, sik Amori yala nang talibuka, ulamik ninye deiyok nang, sik Raja nang si ara, ani. Hesyebon mutuku weik deiyoknye, Raja Sihon ap, tonda Basan mutuku ninye deiyoknye, Raja Og, elda Asitarot mutuku ulamuknye babye, sik ni Allah arye obukabukce, sirya dakuk. Aning nirya, yuk mutuku nang arye nyabikceura, nun akunum kekenyabe,” nyabik.
Nyabukura, anang arye tamubuka nyabik. “Nun awinibupu ning deiyok ara, ani. Nun kekelamupuba, nun ni koproba, an si erelyam Allah, el si Yahweh, elce el pil donanye, Musa biti nyapdeiamuk ning ara, ani. ‘Amutuku noutam nirya ara, anggun Israel nang ati arepnamsine. Winipsiniba, wekelbimunyopura, sik amutuku minop talak akunum aunyak ninye ara, obuka sirya dakmunce, alubuka dopropnamlume,’ nyapdeiamuk. Ati, ayupu kekebupurye, ‘Se, winibikirye, nun ton obuka kum kipdeipsikcakʼ tenen, nun ikin kanye bobuka, ilil upsukba, nunce tilila yupu nyapsupe. Dipkoprob aning deiyok ati, nunce winibupe.
Nyabukura, anang arye tamubuka nyabik. “Nunda, pera weik mutuku arye, anggun dam ayanmaba ara, talye ati kuma. ‘Anggun pil melibuka don nang unamapʼ tenen, nunda yanmabe. Tonda, nun pera mutuku arye yanmaba deiyok ara, anggunce talibuka si erelulum Allah Yahweh ara, yuk nang arye, ‘Sik ni Allah ara, dipkoprob weik kanye ikin ninguk ulule,’ nyabikceba, kekenyapa ati, nunda yanmabe. Tonda, nun ni yapu, yuk nang arye, ‘Sik ni Allah ara, Mesir mutuku arye, deiyok koubuka lopdeibukce, ninye arye kum winipmanto ning, pia weik pil dolamuka deice arye, Israel ninye ara, Mesir mutuku noutam arye, lopdeibukura, yanganmake,’ nyabikba, nunda aning kekebupa ati, anggun dam ayanmabe.”
Nyabukba, el kwit kekebukce nyabuk. “Se, amio, aning ara talye ati lengdar kum mapmalame. Alengdar deiyok ara, Yoas el mi Gideon, Israelnye winipnamsil ning ati, mapmalamce lengdar eipmalame. Aning ara, Allah arye mikip arepliba, Gideon birye Midian yala nang ap, nun yuk yala nang nirya ap, olyanamasila atia. El yalyopura, el parang ya arye, nun nirya opnamsile ati lengdar mapmalame.” Midianye birye el kwit biti nyabuk.
ကြော်ငြာတွေ