Nyapdikura, Abimelek birye nyabuk. “Winira, ance nyalin yupu nyapdeipnilyame. Allah arye dinmasilba, ‘Na Abraham birye, an ap, ance deiplum mapu ap, sikce dadeipdanin binamak ninye nirya ap ati, teleb ubuka diksukumuk wininamne. Tilila yupu nyana ap, malye winina ap nirya, pia kum wininamsine,’ nyabuka, nyalin yupu nyapdeipnulume. Tonda, narye an Abraham biti, teleb ubuka meliamkise touk, ance nati, tonda anda ninye asik nang atonun unamlam mutuku noutam unamak ninye ap ati, teleb ubuka melinalyame. Ance, ‘Dipkoprop anyapmalam touk wininamne,’ nyabuka, nyalin yupu nyapdeipnilyame.” Abimelek birye, Abraham biti nyabuk.
Yosua 2:12 - Eipomek12 Nyabukopura, ayupu ton nyabuk. “Ati ara, narye anggunti, ‘Bicoʼ tenen, melibuka, na aik dungnupmasin anya arye, na moropsine. Anggun ni Allah el si Yahweh, el si deice arye nyapnamnurume, ‘An ap, an aik ninye, an mapu silip nirya ara, bico tenebuka melipnamabe,’ nyapdeipnamnurume. Anggunce, na tam ninye ati, namin kipsumunce, kum opnamsulume. Narye, ‘Ura, sik dipkoprob namin kipsikirye, kum opnamsiyake, tenepnirye kel biknamne’ tenen, lak kin ninguk, kintinipnamnurume,” nyabuk. အခန်းကိုကြည့်ပါ။ |
Yosua 2:12
24 ပူးပေါင်းရင်းမြစ်များ
Nun ni koprop Allah, el si Yahweh ara, aning-aning nirya, im deice ap, tukwak mutuku nirya ap talilule. Allah el tonok ulirye, nun weik deiyoknye ulula anya arye, el si deice arye, nyalin yupu nyapnunilame. Ara, na mi Isak arye dopnamle kil ara, sik Kanaan tam ninye arye deiamice kilmapu noutamak arye, pia kum dopnalame.
Aning diamuk kum bukni, Raja Nebukadnesar birye nyapdeiamuk yupu babye yanibuk. Ara, Raja Nebukadnesar birye Zedekia ati, “Allah dam, ‘Na winibuka unamne,’ nyapmince, anda na nyapdeipkin yupu uk kekebuka unalyame,” nyabuk. Nyabuk bukni, Zedekia birye, “Yo, winipnamnarya,” nyaplokbukce, anyalin yupu deice arye nyabuk bukni, dipkoprob aning nirya kum winilamuk. Elce, ‘Aning nirya ara, na kum winipnamne,’ tenelamukce batakuk. Tonda, Israel nang arye, si erelamik Allah, el si Yahweh ati, Zedekia birye, ‘Kume, Allah Yahweh arye nyalul yupu nirya ara, na kum kekebuka unamneʼ tenen, kanye pum tam kat kibuka, mandipna weik ulamukce, ayupu yaniltaknauk ulamuk. Zedekia el malye ulamuk ning ati ara, ‘Bataknirye, Allah dam tamubuka binune,’ pia kum tenelamuk.
Ara, yata deiyok ati do, kume. Nara pia ikin kanye bopne. Persia mutuku ninye arye, na yala ninye, Yahudi ninye nirya obicopura, pia na ikin kanye bobuka unamne. Winibicopura, ikin kanye delina ap, engena ap, kanye talima sukununa ap deice arye, na babye dipnamnarya. Ati ara, na nio, ‘Anda yupu mikip arye nyapminba, Haman birye nyabuk yupu deice arye, Yahudi yala ninye nirya, opnamak ning ara, kum danamle’ tenen, moropkine,” nyabuka, Ester birye, Raja Ahasyweros biti morobuk.
Bukni, anggun Israel ninye ara, domba basam ining dobuka, anggun bublan deice ap, bublan itam ap, likdeipmunce, laka kilin ning deipmunyeba eipnamsine. Anggun aik eipnyopura, anggun aik ara kaplipsinirye, ilil kanye bon ning kum arepnamsine. Ara, anggun winiryuk mapu ara, kum opnamne. Bukni, sik aik bublan deice domba ining kum likmace ninye, Mesir mutuku ninye ara, sik winiryuk mapu ap, kam uning weik ning ap, nirya opnamne.
Winipnyopura, sik dana-dana tam unyak yuk-yuk yala nang, yuk mutuku unyak nang nirya, sik talima noutam arye, moubuka tenebikirye, na mapu koproba, sik Israel nang, sikce nati, si erenikirye, teleb kibuka unyakce, dipkoprob bisik balamak touk, bikikcopura, ayuk-yuk yala nang babye, teleb kipdeipnamne. Ara, na mapu koproba, ‘Naʼ tenen nang arye, ‘Nun ni koproba Allah Yahweh, el si deice aryuk wininamabe,’ nyalin yupu arye nyapne touk, sik yuk yala nang arye, aning bikikirye, talibuka winibikopura, narye anang babye melinamne. Tonda, sik yuk-yuk yala nang arye, minop talak, na mapu koproba, Israel nang ati, ‘Nun ni koproba isa Bahal, el si deice aryuk nyalin yupu nyanamlume. Eluk talibuka unamlume,’ nyabuka petelamik touk, sikce isa Bahal batakikirye, na siuk erepnikcopura, ayuk yala nang babye melinamnarya. Ara, sik nirya arye, “Allah Yahweh anda, kam una deiyoknye pia ulyame,” nyapnamniake. Nyapnikirye, na siuk erepnikcopura, narye sik anang babye, na mapu Israel nang kan-kan uk, boyanuka tabakdeipniba, neika unamake.
Amalye winin ninye arye teleb winin ning ati, moubuka beta tenipmanto kum ukirye, sik kanye bokoltonauk ulule. Sikce, “Dipkoprop winipnambe,” nyabuka, yuk nang ati nyalilamak yupu ara, talyauk nyaplobikirye, dipkoprop kum wininyake. Tilila yupu uk nyanyake. Sikce yuk ninye nirya ati, sik mining yala nang ap, sik mining mapu silip ap, yuk talye ninye nirya ap, anang nirya ati, kanye talima kum arepmanto upliba, ‘Nun like,’ tenenyake. Tonda, yuk ninye ikin ning uptua babye, sik malye wininyak ninye arye, bico tenebuka melipmanto ning kum unyakce, yuk ninye ati talye batakayake. Tonda, Allah ati pia dib kum tenenyake. Tonda, yuk ninye ati, bico tenena pia kum diparyuk, talye luparabuka onyake. Yuk ninye sik nong deice ikin ning weik delinyak talak ara, ‘Se, sikda pia bicoe,’ kum tenenyake.
Yatanye do nirya, weik ilil ning ara, el li koprop ap, el lin koprop ap, el kil ap, el mapu koprop ap, sikuk kum bukni, el yala nang ap, el aik neika ulamak nang ap, aninye nirya, sik pataplye ning ati, bico tenebuka kum meliplyeura, pia malye. Winiluluma ara, Allah yupu yaniltana ap, Yesus batakna ap, atonun ulule. Yesus dib kum tenenyak ninye ara, mitik malye wininyak bukni, atonye bira, pia weik malye ulule.
Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.
“Winiprumunya deice arye, na ni ap, na nin ap, tonda, na kwit capu silip ap, tonda, nun tam ninye nirya ap ara, ‘Anggun Israel nang arye, kum opnamsiyake,’ tenepnamne. Tonda, anggun melipsumunyeura, yuk nang arye, kum oplopnamsiyake. Utenena ati moropsine. Ati ara, na kel kipnirye, dib tenepnamna ati, lak kining tonok arepnamnurume,” nyabuk.
Bukni, anyapnunam ning ara, moubuka bikmince, dipkoprob winipnalame. Kumopura, nun atalak ara, ‘Winipnaname,’ nyapmanam yupu ara, batakmince, kum winipminyopura, talyeuk upnalame. Ara, amutuku ninye olyanupye talak ara, lak kina ati, ining bi tapu, jendela bisik kin-kin, nun dopkwetepmasilamak anyuk, kiriknamlyame. Tonda, atalak babye, an ni, an nin, an tam nang nirya bulubuka, an aikuk deipnamalyame. Atalak ara, sik yukak unmacopura, kum lyepnamsiyabe,” nyaprik.
“Tonda winipmanto, anyaik wekmace ninye ton, bai tam kubuka bikiba, Israel nang arye obicopura, anye bira, el babye malye winiplya deice arye, sikce elti, opnamak ning deiyok ara, el bidamnye arya. El opnamak ara, nun deiyok kuma ati, nun deice ikin kum upsutue. Anggunce ton, ‘Aobice ning adano?’ kum nyaptume. Bukni, an aik noutamak unyak nang nirya ara, yuk nang arye obicopura, nun bitinye ikin upnamsile,” nyaprik.
Atalak ara, Yosua birye ninye bitinye, amutuku dilbinamrik nang ati nyabuk. “Anggunce akil Rahab ati, ‘An ap, an aik ninye ap, kum opnamabe,’ nyabuka, minop talak nyapdeiamdum atonun, atalye-talye yonyak kil aik birumunce, akil ap, el ap unyak ninye ap, sik nirya dobuka, Yeriko asik noutamak arye, bai tam boyadurume. ‘Yuk nang arye, mangkau asa obicak’ tenen, winipdurume,” Yosua birye, abitinye nang ati nyabuk.
Tonda, Yosua birye, sik Gibeon mutuku arye yanganmek nang, sik Hewi nang ati, ‘E, sikda na kayapu,’ tenebukce, “Wini talak arye diprongobuka, dorunamap talak ara, olana kumce, teleb kibuka neika unamabe,” nyabuka, nyalin yupu ton nyapdeibikce, sik nirya nyapdayike. Winibuk deice arye, “Sik anang ara, kum opnabe,” nyabuk. Atonun, sik Israel nang ati, ninye deiyok talibuka, weik nang nirya arye, “Yo aninguk dipkoprob winipnamabe,” nyabuka, nyalin yupu ton nyapdeipdayik.
Anang amutuku dilbana ati, bisik banmek talak ara, tonoknye ton Betel mutuku noutam arye yangayukba, sik ap epdayik. Epdayikce, sik amaka meilbana ati banmek nang arye, el anye biti nyabik, “Ance nun melipsutumce, ‘Amutuku wekelban ati, teleb bisik ara ani,’ nyapsutumce, melipsutumopura, nunce aweik asik dobuka unyak mutuku wekibirye, aninye obipyopura, nunce anti melipkibirye, ‘Anda nun kwit koprobaʼ tenen, teleb kipdeipnamkiyabe,” nyabik.
Nyabukura, Daud birye tamubuka nyabuk. “Ance nun yala nang ati, obuka sirya dakik nang, unyak mutuku bana ati, melibuka bobisutum do?” nyabuka asibuk. Asibukba, Mesir mutukunye birye, tamubuka nyabuk. “Allah dinmasilak dam arye, el si nyabuka, nyalin yupu deice arye, nyapnutumopura, narye melipkitinye. Ara, ance nyapnunilyame. ‘Allah el si deice arye nyapkiabe. Anda kum opnamkiyabe. Tonda, an dobuka, an deiyoknye dam bobikibirye, anye biti tamubuka, kum arepnamkiyabe,’ nyapnutumopura, narye melipsinirye, na tam nang dam bobinamsine,” nyabuk.
ကြော်ငြာတွေ