Yosua 18:6 - Eipomek

⁶ Sik Israel tekbarye yala nang, talibuka unamak mutuku wilipa nirya ara, anggunce wilipmunce, na Yosua biti, yanuka arepnamnulume. Winipmunyeba, narye, Yata yala nang amutuku dopropnamaka do? Tonda, dan yala nang ton amutuku dopropnamaka do?’ tenen, narye lake bikilin ning, el si ara Undi, dopneba, Allah ati asipnyeura, Allah arye, ‘Sik ayala nang arye talibuka unamak mutuku ara ani,’ nyaplyopura eibibirye, ‘Sik unamak mutuku ara anyakaʼ tenen, biknamabe.

Yosua 18:6 ပူးပေါင်းရင်းမြစ်များ

Mazmur 105:11

Nyabuk ning ara, Allah arye sik Abraham ap, Isak ap, nun Israel ninye ap ati, “Kanaan mutuku arepsiniba, anggun mutuku atonun umunce, pia ati amutuku talibuka unamlume,” nyapdeibuke.

Amsal 16:33

Ton nang ara, ‘Aminyan unamap ning tenena ati ara, aning wininamap do, aning batakuka yuk ning wininamap do?’ tenen, lak kilin ning, el si ara, undi deice arye winildenyake. Bukni, dipkoprob upnamle ning nirya ara, Allah Yahweh elcuk, ‘Wininamake,’ tenebuka kintinip deiamuk ning tonok ara, dipkoprob unamle.

Amsal 18:18

Ninye arye, tenilamak talak ara, ‘Yatanye teleb ulul do? Yatanye malye ulul do?’ tenen, moubuka tenebikirye, anyapdanmace ning ati, lak kilin ning, el si undi deice arye, donmaca ani, ‘Anye el si laka uplinye binyuk, elti, yupu bokipnuyap’ tenen, wibuka dolonyake. Ninye tenilamak talak ara, burburumna el si undi wininyak ning ara telebe. Winibuka tenenyak bukni, sik yu tenepdanmace nang ara, sik neika mining damak pia kum unyake. Anang ara, sik kayapu nang koprop bukni, ‘Yata wiripnamap do?’ tenen, yupu talipmace talak ara, nyalanauk unyake. Winibuka unyak ninye ati ara, dekna dona ati, bikilamak ning, tonda win ning, el si ara undi donamlulume. Laka uplye ninguk wipdeipmunyopura, yupu tunim abuka unamake. Atonun, ninye bitinya nang arye, yu upliba, nyapdanmarice ning ati, ‘Minop adiparyuk, teleb kipdeiptibiba, tuba tamubuka tonap, kanye talima dukdongobuka, neika uptiring’ tenen, ninye deiyok nang arye, undi deice arye, sik abitinye nang ati, yupu lipsisikuka bokolinyake.

Bilangan 33:54

Tonda, anggunce amutuku bimunce, anggun Israel ninye yala yuk-yuk aululuma atonun kibuka, ‘Aning winipnuyap do, aning do?’ tenen, bikna ati deiyok laka kin ning bikilina ati, el si ara undi, pil dopmunyeura, ayala nang sik si lak uplyeura, atuku bokmunce, talibuka pia ati unamake. Ara, ton yala, ninye pia weik ulamikce nang ara, sikti, tuku weik tonun bokuka arepnulyame. Tonda ninye weik kum ulamikce yala ara, tuku mitik tonun aryuk bokuka arepnulyame. Aning dolona ati ara, bikilin ning undi deice aryuk pil dopmunce, ayala ton, ayala ton sik si lak uplyeura, adeice arye bokuka arepmunyeba, amutuku tuku dolonamake. Tonda, anggun ni yapu, anggun yala deiyok-deiyok nang ulamik touk, anggun atalak ululum nang babye, anang sik si deice dopropnamlume.

Bilangan 34:13

Allah Yahweh arye Israel nang ati nyapdeipmok yupu ara, Musa birye akunum nyapdeibukura, ayupu ton nyabuk. “Amutuku doropnumunyeura, anggunce, ‘Aning wipnuyap do, aning do?’ tenen, bikilina deiyok ning, el si ara undi, aning pil dopmunye deice, si tukwak upmalye touk, amutuku dopropnamlume. Ara, Allah arye nyapmasil touk, Israel yala nang noutam bukni, toupne barye (9) yala nang ap, tonda, Manasye yala nang bukni, sik noutam arye bokuka, Yordan mek koubuka, otam unamak nang ap ati, sik unamak mutuku ton, yuk wilibuka deipnamlulume,” nyapmasile.

Rasul 13:19

Kanaan mutuku noutamak ulamik ninye amutuku yala, amutuku yala ninye nirya tekbarye, Allah el pia meilyamuka deice arye, Israel ninye arye amutuku ninye obisibik. Obisibikura, amutuku-amutuku ninye nirya, sik talyamik mutuku nirya Allah arye Israel ninye ati aribuk.

Yosua 14:2

Amutuku tuku doprobik ning ara, Allah Yahweh arye, Musa biti, “Winibuka winipnamlume,” nyapdeibuk touk, bokuka arebik. Ara, ‘Dan tam nang arye dopropnamaka do?’ tenen, bikilin ning, el si undi arye, winipdeyik deice arye, “Atam tuku ara, ayala nang arye dopropnamake, otam tuku ara, ayala nang arye dopropnamake,” nyapdeipmuk touk, bokuka arebukba, doprobik. Yordan mek koubuka, otam keting kumulban tam mutuku ara, ninye yala toupne barye (9) yala nang ap, tonok yala ton, Manasye yala nang bukni, ton tam nang bokuka ulamikba, amutuku tuku bokuka arebikba, doprobik.

Yosua 18:10

Sik anang tamubuka, yayik talak ara, Yosua birye, ‘Yata yala nang arye, amutuku dopropnamaka do?’ tenen, Allah Yahweh dinmok sukum arye, bikilin ning el si undi deice arye, ayala-ayala nang nirya ati ara, Allah arye undi ning dobukba, adeice arye, ‘Dan tam nang arye, amutuku arepnyeura, dopropnamaka do?’ tenen, Yosua birye winibuk deice arye, tekbarye yala nang ati, Allah elce kintinibuka, arebuk mutuku ara bikik. Akunum bikik ning ara, Israel yala nang, sik talibuka una ati, tuku ton pia kum dopromik nang ara, Yosua birye amutuku bokuka arebuk.

Yosua 18:7

Bukni, sik Lewi yala nang ara, sik kayapu, yuk Israel yala nang mutuku dopropmak touk, sik Lewi yala nang ara, sik talibuka una ati, tuku ton kum dopropnamake. Deiyok ara, sik anang pil dona ara, Allah Yahweh el si eren aik pum tam, pil donyaka ati, sik dopropnamaka ara, aning uka. Imam-imam nang unamak yala ara, sik Lewi yala nang arye, tuku ton dolona kume. Tonda, Gad yala nang ap, Ruben yala nang ap, tonda Benyamin yala nang arye bokukabikce, sik talibuka, una ati tuku ara, min arye keting panalyangan tam, Yordan mek koubuka, otam uamuk mutuku uk, akunum doprobik. Ara, Allah el pil donanye, Musa birye amutuku ara, akunum bokuka areamukba, doprobik.

Yosua 18:8

Ayupu sirya nyabukura, Yosua birye, sik tekbarye (7) yala nang arye, yuk-yuk bukni, ninye winilye wipdeipmik nang ati, “Anggunda aning-aning nirya talibuka, omutuku tuku dina ati, pil dolbinululume,” nyapdeibuk yupu ara, ani. “Anggunda, amutuku urasin nirya, dipdebuka binamlume. Dipdebuka bimunyaka arye, amutuku tuku wilinak babye, bikmunce, sekdopnululume. Sekmunye ning ara, anggun tamubuka, na damuk yanuka, aseknamlum ning arepnamnulume. Winipmunyeba, Silo mutuku ara, ‘Yata nang arye amutuku dopropnamaka do?’ tenen, narye Allah ati asipniba, Allah arye, lake kipdeiplyeba, ‘Anggun ayala nang talibuka unamlum mutuku ara ani,’ nyapdeiplyeura, eibibirye biknamabe.” Yosua birye ayupu nyabukopura, sik awinilye nang wipdeibik nang aryuk, Yosua nyapdeibuk touk, sik anang arye, amutuku noutam urasin el lina ati dilbiyik.