Yosua 17:1 - Eipomek

¹ Yosua birye, Yordan mek koubuka, keting kumulban tam, otam bukamuk mutuku bokuka arepnuyuka ati, elce Manasye yala nang, sik mapu silip bukni, noutam arye bokdeibik nang, sikti, arebuk. Manasye bira, Yusuf elce min yubuka deiamuknye ulamuk. Ati ara, Manasye birye, min yubuka deiamuknye bira, el si Makhir biti, tuku ton bokuka arebuk. Makhir bira, el li koproba Gilead ulamuk ati, el ap, tonye yin talen deiyoknye el si ara, Basan ap, sik anang bitinye ati, Yosua birye sik tam nang, sik mapu silip nirya ati, mutuku bokuka arebuk. Ara, abitinye nang ap, sik mapu silip ap ati, Yordan mek koubuka, otam keting panalyangan tam mutuku ara, Gilead tam ap, Basan tam ap, bokuka arebuk.

Yosua 17:1 ပူးပေါင်းရင်းမြစ်များ

Kejadian 41:51

Yusup el min yuma talak deibuk mi, ‘El si ara, Manasye,’ nyabuka si dobuk. Ara, ami deibuk talak ara, Yusup el kanye deibukce, “Winira Allah arye akunum melipmanilba, minop talak na ikin ulamnuk ning ap, na ni koproba ap, el aik ninye nirya ap ati, ikin kanye bobuka tuba kum teninune,” nyabuk. Nyabukce ami si ara, ‘Manasye,’ nyabuk.

Kejadian 41:52

El sal mi bitinye deibuk talak ara, Yusup birye, “Amutuku noutamak ara, imun kanye bobuka, ikin weik ulamnuk bukni, winira Allah arye melipmanile deice arye, na mapu deibuka, telebuk unune,” nyabukce, “Ami el si ara, Efraim,” nyabuka si dobuk.

Kejadian 46:20

(Tonda Mesir mutuku noutam Yusup ap, el kil Asenat ap arye Deiprik mapu si ara Manasye ap, Epraim ap ulamrik. Asenat, ara On mutuku (tonda Heliopolis mutuku nyalamik) ninye arye isa si erena deiyoknye el si ara Potipera, elce deiamuk kilmu Yusup domuk.)

Kejadian 48:17

Israel birye el sirik taruk dobuka Epraim kisok deice deibuka talipmokba, Yusup eibukce, malye kanye bobuk. Malye kanye bobuka anya arye, ‘El sirik taruk dobuka Manasye el kisok deice deiptue’ tenen, Yusup birye el li taruk talibuka ‘Odeipnun’ tenen, pirinmok.

Kejadian 48:18

Pirinmok talak ara nyabuk. “Naie, an kanye walwalapmalame. Atam mi ara minop deipse mi anya arye, an sirik taruk ara, el kisok deice uk delina telebe. El kisok deice taliplyame,” nyabuk.

Kejadian 50:23

Atalak noutamak ara elce deiamuk mi Efraim bira kil dobukura, sikce Deiprik mapu ap tonda, anang ton sikce deibik mapu ap, amapu arye deibik mapu ap eibuk. Aning atonun, Yusup el mi Manasye birye deibuk mi el si ara Makhir, elce deibuk mapu ton eibuk. Ara, amapu deibik talak ara, ‘Yusup eipnul’ tenen, amapu bobuka Yusup el keil deice delilbalamikba, elilamuk.

2 Samuel 2:9

Amutuku binuka ulamdik ning ara, Abnar birye, Isboset biti, ‘Ninye deiyoknye Raja unamsilʼ tenen, elcuk Isboset biti, erepdeibuk. Winibukba, anye elce taleamuk mutuku ara, ani. Ara, Gilead tam nirya ap, Asyuri yala nang ulamik mutuku ap, Yisreel mutuku ap, Efraim yala ninye ulamik mutuku ap, tonda Benyamin yala ninye ulamik mutuku ap, yuk nang amutuku noutam ulamik ninye nirya apura, Israel ninye ap ati, Isyboset elce talibuka ulamuk.

1 Tawarikh 2:23

Bukni, Gezur mutuku taleamuknye ap, Aram mutuku taleamuknye ap, sik bitinye nang ap, sik yin talin nang ap, yayikce, Gilead mutuku noutam uamuk mutuku, Yair birye taleamuk mutuku noutamak ara, mitik-mitik asik dolamikak ara, enam puluh (60) kampung ton yanuka, malye kibukabikce, amutuku nirya dalubuka doprobik. Ara Hafot-Yair mutuku ap, tonda Kenat mutuku ap, tonda amutuku dam yuk-yuk mitik asik, 60 dolamik ning ap nirya ara, yana dalubuka doprobik. Sik amutuku asik dobuka ulamik nang ara, Gilead birye deiamuknye, Makhir elce deiamukba, dadeipdanin yangalamik nanguk, amutuku noutamak ulamik.

Yehezkiel 47:13

Ura, Allah Yahweh aning-aning nirya talebuka, deice tam erebuka, mikip weik ululnye birye, na Yeheskiel ati, nyapnuk yupu ara, ani. “Ura, sik Israel yala nang kan-kan nirya bukni, obarye nirya (12) nuka aupmalye yala nang ati, Israel nang sik unak ati ara, tuku wilibuka arenamlumak ara, ani. Minop ara, Yusuf el yala nang ati ara, tuku bitinye tam, bokuka arebibyeba, dopropnamake.

Yehezkiel 48:4

Naftali yala nang arye unamak mutuku wililonak dam, arye ubuka keting panalyangan tam arye dipdongobuka, keting kumulban tam mutuku ton, Manasye yala nang ati, tuku ton bokuka arepnalyame.

Bilangan 26:29

Sik Manasye yala nang arye deiamikba, dadeipdanin yangalamik nang ara, ani. Manasye yalanye birye deiamuknye bira, Makhir. Makhir birye deibukba, dadeipdanin balamik nang, sik Makhir yala nang ton ulamik. Tonda, Makir birye deiamuknye bira, Gilead. Gilead birye deibukba, dadeipdanin balamik nang, sik Gilead yala nang ton ulamik.

Bilangan 27:1

Zelafehat el kilmapu nirya ara, pamubarye deiamuk. Akilmapu sik si ara ani. Mahla ap, Noa ap, Hokla ap, Milka ap, tonda Tirza ap deiamuk. Zelafehat el li bira, Hefer. Hefer el li si ara, Gilead ulamuk. Tonda, Gilead el li si ara Makhir. Makhir el li bira, Manasye ulamuk. Tonda, Manasye el li bira, Yusuf ulamuk.

Bilangan 32:33

Nyabika ati, Musa birye amutuku nirya ara, sik Gad yala nang ap, Ruben yala nang ap, tonda Yusup birye deiamuknye Manasye, el yala nang bukni, noutam arye bokuka ulamik nang ap ati, mitik tonun arye amutuku ton bokuka arebuk. Anyarebuk mutuku tuku nirya ara, ani. Ara, Amori yala nang, sik weik deiyoknye, Raja Sihon birye taleamuk mutuku ap, tonda Basan mutuku ninye deiyoknye Raja Og birye, taleamuk mutuku ap, bokuka arebuk. Ara, amutuku nirya ap, amutuku noutam dolamik weik asik dolamikak nirya ap, anyasik dana-dana tam uamuk mutuku tuku ap ara, Musa birye dobuka arebukba, sik Gad yala nang ap, Ruben yala nang ap, Manasye, el yala nang bukni, noutam arye bokuka ulamik nang ap, sikce doprobik.

Ulangan 21:17

Ati ara, akilapu bitinye domuknye bira, el talilamle ning nirya bokukaplirye, bitinye-bitinye kintinip deiplirye, el dipkoprob min yuma deiamlye mi ati ara, arenamlule. Yata ning do nirya, el li birye talilamlye ning ara, bitinye-bitinye kibuka, dopropnamlule. Amapu bitinye ati ara, atonunuk ubuka, kum bokolinamlule. Ara, kanye deiamlye kil ap, kanye kum deiamlye kil ap, sikce min deipdik mapu ara, atonun bokuka, kum arenamlule. Dipkoprop min yuma miuk, el li koproba talilamlye ning ara, bitinye kibuka dopropnamlule. Aminyan deiamlye mi ara, tonok-tonok kibuka dopropnamlule. Ati, anyapmana atonun, ubuka arenamlule. Tonda, sik ni koproba talilamlye ning ara, ‘Na mapu, dipkoprob min yuma mi deipsinye bira, weik tonun ning, adiparyuk arepnamneʼ tenen, kintinilinamlule. Tonda, boklirye, amiuk arenamlule. Deiyok ara, anye el wel ulamuk talak ara, mikip ulamukce, ami min deibuka anya arye, ami ara dipkoprop, el min yuma deiamuk mi ulula anya arye, el li birye talilamle ning nirya, bitinye-bitinye kibuka dolona ara, elcuk doproptue.

Yosua 17:2

Tonda, Keting kumulban tam, Yordan mek duman ara, Manasye yala ninye bukni, bokikce, ton tam nang, sik mapu silip ati, bokuka arebuk. Amutuku ati, bokuka arebuk yala nang, sik yala nang ara, ani. Ara Abieser ap, Helek ap, Asriel ap, Sekem ap, Hefer ap, tonda Semida ap, sik ayala nang nirya ara, Yusuf birye deiamuknye, Manasye birye deiamuk nang ap, sik mapu silip ap, amutuku noutam ulamik. Sik ap, sik mapu silip yuk-yuk ap ati, deiyok kibuka, taleamik nang ulamikce, amutuku tuku dopromik.

Yosua 22:7

Ura, sik Manasye yala nang bukni, dana tam bokdomik nang ara, keting panalyangan tam aunamik nang ati, Musa birye, Bashan tam mutuku ton akunum dobuka areamuk. Bukni, sik Manasye yala nang bukni, dana tam bokdomik nang ara, keting kumulban tam mutuku arebukba, amutuku noutam ulamik. Ara, sik kayapu nang, yuk Israel yala nang mutuku dam areamukba, doprobikce, aulamik. Ati, ‘Aninye ton, sikce sik mutuku tamubuka binuyakʼ tenen, Yosua birye, anang ati, teleb yupu nyabuk. Ara, ‘Allah arye anang ati, melipliba, sikda pia telebuk unamakʼ tenen, teleb yupu, sik deice nyapdeibuk.

Hakim-Hakim 5:14

Ton nang ara, Efraim yala nang, sik mutuku ara Amalek ninye ulamik mutuku arye lyu mutuku panabuka yayik. Yayikopura, sik menekuka yayikba, Benyamin yala ninye ton, aminyan yanganmeka ani, epdayikce neika yayik. Epdayikce aminyan talak ara, Makir mutuku nang, sik yin talina deiyok nang ap, sik yin nang ap, ‘Olbinuyap’ tenen, yanuka bulubik. Atalak babye Zebulon yala nang bukni, yin talin nang, sik weik deiyok nang ap, sik yin talin nang ap, ‘Olbinuyap’ tenen, bulubuka yayik.