Yosua 14:4 - Eipomek

⁴ Ura, Yusuf birye deibukba, dadeipdanin yangalamik yala nang ara, sik si Manasye ap, Epraim ap, sik dem amutuku noutam nirya ara, arebukba doprobikce, asukum dem taleamik. Bukni, sik Lewi yala nang ara, tuku ton pia kum arebukba, kum doprobik. Sik Lewi yala nang ara, tuku ton kum bokuka arebuk bukni, sik unamikak ati, amutuku noutam uamuk asik ap, tonda Lewi yala nang arye, weilamik kam ning, domba basam ap, kambing basam ap, sapi basam ap ara, sik dina ati, maning palamuk mutuku ton, bokuka arebukba doprobik.

Yosua 14:4 ပူးပေါင်းရင်းမြစ်များ

Kejadian 41:51

Yusup el min yuma talak deibuk mi, ‘El si ara, Manasye,’ nyabuka si dobuk. Ara, ami deibuk talak ara, Yusup el kanye deibukce, “Winira Allah arye akunum melipmanilba, minop talak na ikin ulamnuk ning ap, na ni koproba ap, el aik ninye nirya ap ati, ikin kanye bobuka tuba kum teninune,” nyabuk. Nyabukce ami si ara, ‘Manasye,’ nyabuk.

Kejadian 41:52

El sal mi bitinye deibuk talak ara, Yusup birye, “Amutuku noutamak ara, imun kanye bobuka, ikin weik ulamnuk bukni, winira Allah arye melipmanile deice arye, na mapu deibuka, telebuk unune,” nyabukce, “Ami el si ara, Efraim,” nyabuka si dobuk.

Kejadian 46:20

(Tonda Mesir mutuku noutam Yusup ap, el kil Asenat ap arye Deiprik mapu si ara Manasye ap, Epraim ap ulamrik. Asenat, ara On mutuku (tonda Heliopolis mutuku nyalamik) ninye arye isa si erena deiyoknye el si ara Potipera, elce deiamuk kilmu Yusup domuk.)

Kejadian 48:1

Ura, sik nirya daulamika ani, aminyan talak ton nang arye Yusup biti, “An ni koprop uk weik dinmale,” nyabuka laka nyabikba, Yusup kekebukce elce deiamuk mapu bitinye ara, Manasye ap, Epraim ap bobuka el li dam biyik.

Kejadian 48:5

Nyabukce ayupu ton dukdongobuka nyabuk. “Winira Yusupo, nara an dam min kum yanamse talak ara, ance Mesir mutuku noutam deiplum mapu bitinye sik si ara, Manasye ap, Epraim ap ara, yuk ninye arye sikti, ara, na mapu atonun tenenamake. Ara, narye Ruben ap, Simeon ap deiamse touk, yuk nang arye an mapu bitinye ati ara, ‘Amapu ara, Yakub el mapu atonun urudake’ tenen, nyanamake.

Kejadian 48:6

Wini talak arye dipdongobuka oyanamla talak noutam ara, ance mapu tonap deipminyopura, sikda an mapu uk unamake. Aminyan talak sik ni yapu deibikcopura, anyapce sik tuku dopropnamaka ara, sik du yapu si deice arye dopropnamake.

2 Tawarikh 30:1

Kaplina Kwalya kwalilamik talak ara, keting tamun deiyok koun talak, wala tonoknye tiklye talak, tanggal 14 deice aryuk, sik Israel nang nirya arye, Kaplina Kwalina kwalilamik. Bukni, nabi Hizkia kuramu talak ara, ton kum kwalibik. Deiyok ara, apil dona deiyok nang ati, sik imam-imam nang ara, teleb kubuka kum kintinibik. Ara, imam nang ara, ‘Allah el si eren aik wekelbinamap ati, nun ap, anyaik ap ara, pia teleb upnamleʼ tenen, apil dona mitik tonunuk kum teleb kipdeibikce, kum kintinibika ati, Allah el si eren aik pil babye, akwalya kwalina pil babye nirya ara, sikce kum dopmanto kibik. Tonda, Israel nang nirya babye, Yerusalem mutuku min kum bulubuka yayika ati, akwalya kwalin pil dopmanto kum kibik. Ati, Raja Hizkia ap, el amu tam pil don nang ap, tonda Yerusalem mutuku ulamik nang ap, sik nirya bulubuka yupu talibikce, “Aketing tamun bukni, wala bitinye tiklye talakuk, Yerusalem mutuku yamunce, nun nirya arye, Kaplina Kwalya kwalibuka neika dipnamabe,” nyabik. Sik nyabik yupu ara, sik amutuku ulamik nang nirya kekebikce, kanye deibik. Winibika ati, Raja arye surat sekuka, elce taleamuk tam, Yehuda mutuku noutam ulamik nang ap, Israel nang ap, Efraim yala nang ap, Manasye yala nang ap, tonda Dan yala nang bukni, outam dabu tam arye dipdongobuka, binamika ani, arah selatan ulamik nang ap, iknapye tam ara, Bersyeba mutuku ulamik nang ap, tonda sik Israel yala nang nirya bukni, Allah el aik dam, Yerusalem mutuku yakceba, Kaplina Kwalya kwalibibirye, Israel nang arye, ‘Nun ni Allah, el si Yahweh, elti, kipnamapʼ tenen, sekuka deibik. Ara, Allah arye, Musa el deice, “Aning-aning nirya ara, wininamlume,” nyapdeiamuk touk, wininamak atia. Tonda, yata wiribuka keting tamun deice arye, atonun ning nirya ara, pia kum winilamika ati, ‘Aning nirya ara, wini talak winipnamapʼ tenen, ayupu nyabuk.

Bilangan 26:28

Yusuf yalanye birye deiamuk nang bitinye, sik si ara, ani. Manasye ap, Efraim ap deibuk.

Yosua 16:4

Tonda, amutuku ara, Yosua birye Manasye yala nang ap, Efraim yala nang ap, ati bokuka arebuk. Sik abitinye yala nang ara, Yusuf birye deiamuk nang ulamdik. Ati, ‘Sik ayala nang talibuka unamakʼ tenen, amutuku ara, bokuka arebukba, sik Manasye yala nang ap, Efraim yala nang ap arye doprobik.