Yohanes 9:39 - Eipomek

³⁹ Winibukura, Yesus domon yupu deice arye nyabuk. “Nara, ninye nirya sik yupu bokolina ati tukwak mutuku yase. Ara, asing kun nang atonun ninye lakak eipnamak bukni, ‘Nun akunum eibuka aning nirya akunum kel kinyabe,’ tenelanyak ninye ara, ‘Asing kun nang atonun unamak’ tenen, yupu bokolina ati yase,” Yesus arye nyabuk.

Yohanes 9:39 ပူးပေါင်းရင်းမြစ်များ

Yesaya 29:10

Aning nirya winipnamlum bukni, deiyok ara ani. Ara, Allah Yahweh arye, anggunti, wimana deiyok ning arepsilyeba, mapluknamlume. Tonda, sik asing kun nang atonun unyak nang, sik nabi-nabi nang nirya ara, Allah arye anggun asing akunum lelipdongopsuk. Tonda, aminyan winipnamle ning eibuka, lak nyan deiyok nang babye, Allah arye anggun asok deice akunum sekdongopsuka ati, sik anang nirya arye, kum melibuka lak nyapnamsinge.

Yesaya 44:18

Sik aninye ara, dipkoprob walwal nang atonun unyake. Sik asing lelilongona ap, talima bublan tirikina ap atonun ninye unyake. Wininyaka deice arye, moubuka bita kel kum kinyaka deice arye, talye ninguk si erenyake. Sikda bicoe, moubuka kum tenenyaka atia.

Yesaya 6:9

Nyapse ati, Allah arye nyapnuk. “Na nyapkin yupu bobuka, amutuku unyak ninye noutamak peterelbinamlyame. Peterelbinamlam yupu ara, ani. Anggun Israel yala ninye ara, na yupu pia kekenauk unamlum bukni, ‘Deiyok anye’ tenen, moubuka bita kel kum kinamlume. Narye mambul pil dobuka, wininamne ning ara, asing arye, pia elinamlum bukni, ‘Deiyok anye’ tenen, moubuka bita kel kum kinamlume. Ayupu nyapnamlyame,” nyapnuk. Allah arye nyapnukce, ayupu ton nyapnuk.

Yehezkiel 12:2

“Se Yeheskiel, anda ninye koproba aryuk, deipkiknye ulyame. Anda malye unyak nang kan-kan noutam arye ulyame. Ara, sik Israel nang arye, na Allah ati, moubuka kum teninyakce, na yupu tuba-tuba yaninyake. An ap, anang ap, neika ululume. Ati, sik Israel nang ara, asing aulul bukni, sik moubuka kum elinyake. Atonun, sik amul aulul bukni, pia moubuka kum kekenyake.

Matius 11:5

Ara, nyapnululume. ‘Asing kuamlye ninye perekeipliba, elinyake. Aik bukamikce nang kwetelilulba, banyake. Barye suse atonun suse dilamlye nang kwetelilulba korokolsakalule. Amol kunukamlye nang kukeipliba kekenyake. Akunum dipmakce nang kam bulilule. Tonda ninye lyena ati, Allah el lak teleb yupu talya kankan ninye kekena ati peterepliba, kekenyake,’

Matius 15:14

Ati, na mapu anggunti nyapsine. Anggunce sik Farisi nang ati, tenena kume, sik dauplye. Sik Farisi nang ara, bisik peterena deiyok nang atonun unyak bukni, dipkoprop ara asing kun nang atonun unyake. Tonok asing kunanye birye, yuk asing kunanye biti, ‘Narye an taruk talibuka teleb bisik bobinukine,’ nyaplirye, bobuka banmaliba, bisik noutamak weik pum wamlyak barikirye, sik bitinye nang kote sakarurake. Sik Farisi nang ara, na mapu koprop kum unyake. Sik Farisi nang ara, asing kun nang atonun unyak nang ati, dauplye, nyapsine,” Yesus arye el mapu 12 nang ati nyabuk.

Matius 6:23

Anggun asing noutamak dirina kum weksutopura, kunuknakuk bitume. Aning atonun, anggun kanye talima noutamak anggun bidamnye ning atibuk tenepmunce, malye ninguk tuba upmasilyopura, anggun pia malyeuk unamlulume. Anggun kanye talima ap, winimunye ning ap, pia kunuknak atonun unamlulume. Teleb winin ning ara, tonok ning ton kum wininamlume. Yesus arye nyabuk.

Lukas 1:79

Nun kuna ap, dipna ap noutamak unyap ninye dam yalyeura, dirina kipdeipsilirye, lyepnamsile. Nun Lyenanye dirina kipsilirye, nun ap, Allah ap, ‘Teleb kibuka neika unamak’ tenen, bisik peterenamsile. Na mi Yohanes an wininamlam ning ap, nun Lyenanye elce winipnamle ning ap ati, nyapne. Zakaria arye nyabuk.

Lukas 13:30

Tonda aning ton nyapsine. Wini talak ninye arye, ‘Anang ara mambul kum nang’ tenen, sikda bicoto ubuka amuak unyak nang ara, aminyan talak ara, Allah arye anang ereiplirye, pia sisin nang kipdeipnamle. Aning atonun, wini talak yuk nang arye, ‘Anang ara sisin nang’ tenen, erenang kipdeibiceba unyak nang ara, aminyan talak ara Allah arye amu tam kipdeipleba, sikda mambul kum nang unamyake. Yesus arye nyabuk.

Lukas 2:34

Simeon arye sik bitinye ati, “Allah arye teleb ulinamsile,” nyapdeibukce, Maria el yuk ati ayupu tonap nyabuk. “Allah arye, ami wibuka deibuka deiyok ara, el pil dolamlyeura, Israel ninye kan-kan arye, ton nang el nyalul yupu batakikcopura, Allah arye amu tam kipdeipnamle. Ton ninye arye, ‘Diba’ tenen, kekebuka doprobikce ninye ara, Allah arye aninye lyebuka ereipnamle. Ami Yesus pil dolamlya deice arye, Allah arye ninye weik lyeplirye, kanye talima talinamsil ning lak nyanamsile. Nyapsilyopura, ninye weika arye, el nyalul yupu ati, malye yupu nyanamake.

Lukas 4:18

Allah arye na laka teleb yupu dobuka, ‘Talya kankan ninye peterelbinamle’ tenen, akunum wipdeipnuka anya arye, Allah El Dib Kanye arye el mikip weik arepnukura, unune. ‘Tapu koubuka deiamik ninye lolongona yupu peterelbinamle’ tenen, dopkwetepnuke. Tonda, asing guna ninye asing lalina ap, yaniplobikirye ikin ning sik nong deice delilamak ninye, ‘Melibuka erelina ap, wininamle’ tenen, dopkwetepnuke.

Lukas 7:21

Akaren noutam aryuk, Yesus arye uk dilamuk ninye ap, ninye isa talilamuk ning ap, yakal kwetelamukce kwetelamuk. Tonda, asing kuamuk ninye weik asing lalilamukura, teleb ulamuk.

Yohanes 12:31

Wini talak ara, tukwak unyak ninye nirya ati, Allah arye yupu bokeipnamsile. Allah arye tukwak mutuku nirya talilya Deiyoknye, malinye Isa Mutuku Dongonye ati, malye kibukaplirye, bai tam atonun dopkwetepnamle.

Yohanes 12:46

Nara, dirina atonun upsirye, tukwak mutuku noutamak yase. Dirina atonun yanuka ununa ara, ‘Na ti diba tenenyak ninye nirya ara, kuna akuk, tuba kum unamak’ tenen, tukwak yasirye, unune.” Yesus arye nyabuk.

Yohanes 3:17

Aning ara talye ati kum nyapsine. Allah arye el Mi Koprop dobuka, tukwak ninye unyabak dokdeipsuka deiyok ara, ‘Elce tukwak ninye nirya ati, wenebuka oplopnamle’ tenen, kum dopdeipsuke. Aning kum bukni, Allah arye, ‘Na Mi dopdeipnibuk, ninye arye elti, diba tenebikca deice arye, ninye mutuku-mutuku noutamak, kili sal weik lyepnamne,’ tenyamukce el mi ara, tukwak ninye unyabak dopdeibukba, nun dam yayuke.

Yohanes 3:19

Allah arye tukwak ninye ati, yupu bokeipnamla deiyok ara nyapnusine. Ara, dirina deiyoknye birye, tukwak ninye dam akunum yayuk bukni, tukwak ninye ara, sik winilamak ning ara, pia malye ulula anya arye, sikda, ‘Dirina ara nun lik bukni, nunda kunuknak ning tonok kanye delinyabe,’ tenebuka unyake.

Yohanes 8:12

Aminyan talak ara, Yesus arye amutuku ninye ati nyabuk. “Nara, tukwak mutuku im sirya, mutuku sirya unyak ninye ati, dirina deiyoknye unune. Na nyasinye yupu kekeplirye, talibuka dobolbalinye bira, kunuknak pia kum unamle. Aning kum bukni, kam una deiyok dirina ara, el talima ak unamle.” Yesus arye nyabuk.

Yohanes 8:15

Anggunda talye ninye kanye tenebikca deice aryuk, nong bol deice ninguk tenebuka yupu bokolilulume. Narye ninye nirya ati, wenebuka yupu min kum bokolinune.

Yohanes 9:25

Nyabikba, asing kwetepdeibuknye birye sikti, tamubuka nyabuk. “Anye Yesus ara, malinye ulul do, kum do? Aning ara na walwal bukni, tonok ning dipkoprop kel bikmana ara, asing kuamnuk bukni, wini talak ara kweteipmanilba, teleb ubuka elinune,” nyabuk.

Rasul 26:18

Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.

2 Korintus 2:16

Aning ati ara, ton ninye ara, Yesus el yupu kekebikirye, ‘E, ayupu ara, pia teleb yupu ulula anya arye, aning kekebibyopura, Allah lyepsiliba, kam pia unamabe. Aninye ara, yun ning siltong teleb nyasilye touk wininyak,’ tenenyake. Bukni, ton ninye ara, dipnamaka anya arye, anang ara, Yesus el yupu kekebikirye, ‘E, ayupu ara nun like. “Allah arye wenepsiliba dipnamape,” nyanmasiyaka ara, nun like. Sik dib tenenyak ninye ara, akunuma oltakana ning lyulamle tong nyasilye touk wininyake. Anang ara, nun like,’ tenesinyake. Ati, Yesus yupu kekenyak ninye ara, sik kanye yuk-yuk ulula ati, yata ninye sik bidamang mikip deice aryuk, amambul pil dopting do? Kume, aning kum winiptibye.

Efesus 5:14

Yata ning do nirya, dirinarye aning deice deipliba, lak akuk ulule. Laka upliba, moubuka kel biktibirye, ‘Aning teleb ning, aning ara, malye ning’ tenen, bikinyabe. Aning ati ara, ayupu ton nyanyabe. “Amio, an diplumnye bira kam buklyame. Kristus el dirinarye, teleb kipdeipnamkile.”

2 Tesalonika 2:10

Tonda, Isa Mutuku Dongonye el pil ara, yata malye winin ning do, yala-yala nirya, tilila pil donmalye ani, sik Allah ati dib tenena kum ninye, aminyan dipmakibuk, tuba tamubuka tonap, kam pia kum unamak ninye ara, atilila ning nirya ati, dib tenenamake. Aninye ara, Allah el dipkoprop yupu ati, lik ubukura, “Nun lik, ayupu ara nun kanye kum deipnamabe,” nyabuka batakamika ati, Allah arye sikti, kum lyebuk. Aning ati ara, Allah arye anang ati, oplibuk pia dipnamake. Oplibuk dibicopura, uku dilamle mutuku pia donamake. Allah ap, neika pia kum unamake.

1 Peterus 2:9

Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.

1 Yohanes 2:11

Aning ato kum bukni, yata nang do nirya, sikce yuk nang ati, ‘Aning ara nun like,’ tenebuka, malye unyak ninye ara, kuna akuk tuba unyake. Ara dipkoprop winina ning kum kel kibika ati, walwal atouk wininyakce, aminyan unamle ning nirya kum tenenyake. Ara asing pun nang arye, bisik balamakak kum dikirye, yukak balamak touk, anang ara malye ubuka walwal wininyaka deice arye, sik ban bisik kum tenenyaka ati nyapne. Ara, sik kanye tenena kumce, asing kun nang winilamak touk unyake.