Yohanes 7:33 - Eipomek

³³ Sik banmek talak ara, Yesus arye asukumuk tuba wekmek nang ati ayupu nyabuk. “Nara, anggun dam tia yasirye, anggun ap unmap bukni, mitik ton unmanya ani, Allah tenepnuk talak akunum uplyopura, na dopdeipnuknye Allah dam binamne.

Yohanes 7:33 ပူးပေါင်းရင်းမြစ်များ

Markus 16:19

Nun ni Yesus arye ayupu nyabukopura, el mapu adinmek bukni, Allah arye Yesus el nong dobuka bobiyukura, im deice welebuk. Yesus welebukopura, ‘Allah ap, aning-aning nirya pia talinamnam’ tenen, Allah el taruk sirik tam bukukce im deice tuba ei ulule.

Yohanes 13:1

Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.

Yohanes 13:3

Yesus ara, akunum kel bikamuk. Ara, ‘Allah el ulyak arye yase touk, tuba tamubuka el dam welepnamne. Na ni koprop arye, aning-aning nirya na amu tam akunum deipmanilba, na mikip deice arye aning-aning nirya malye kibuka bisiptinye,’ akunum tenyamuk.

Yohanes 13:33

Nyabukce, ayupu ton nyabuk. “Na mapu, na ap, anggun ap, like mitik anunuk, neika unmabya ani, na yuk bindopnamne. Binyopura, anggunce epdenamnulum bukni, kum eipnamnulume. Narye Yahudi yala deiyok nang ati nyapse touk, anggun babye nyapsine. Ara, na benamne mutuku ara, anggun ap kum bitibye.

Yohanes 14:12

“Dipkoprop nyapsine. Yata ninye do nirya, nati diba teneninyak ninye arye, na pil dolamse touk pil donamake. Tonda, narye na Ni Koprop Allah, el un dam binamne anya arye, nati dib teneninyak ninye arye donamak pil ara, weik mambul weik pil donamake. Narye atalak dolamse ning ara, mitik mambuluk ulule.

Yohanes 14:19

Like mitik anun talak ton akunum uplyopura, dib tenena kum, talye tukwak ninye arye kum eipnamniyake. Bukni, anggunuk ara, eipnamnulume. Na pia kam unanye ununa ati, anggun babye kam unamlume.

Yohanes 14:28

Ayupu nyabukopura, ayupu ton nyabuk. “Wini talak ara, narye, ‘Na benamne bukni, tamubuka dolyanamsine,’ nyabuka nyanmanu yupu ara, anggun akunum kekepmanulume. Nara, mambulnye unun bukni, na Ni Koprop Allah ara, weik mambulnye ulula anya arye, anggun kanye talima na deice deibuka, nati talima dukdongopnutumtoura, na ni dam binamna ati ara, ‘Ara teleb’ tenen, kanye deipnamlulume.

Yohanes 16:10

Tukwak mutuku noutamak, diksukum unanye bira, na tonok ununa anya arye, na ni dam bindopnyopura, aminyan talak kum eipnamluluma ati, tukwak mutuku diksukum unanye tonok babye kum unamle. Ati, Allah El Dib Kanye arye, tukwak malye wininyak ninye ati, ‘Anggunda diksukumuk pia kum winilulume,’ nyabuka wenepnamle.

Yohanes 16:28

Na ni Allah arye dopdeipnukba, el dam im deice arye tukwak mutuku noutamak yase. Wini talak ara, tukwak mutuku batakuka, tuba tamubuka tonap na ni dam tamubuka im deice benamne.” Yesus arye el mapu ati nyabuk.

Yohanes 16:5

Yesus arye el mapu ati ayupu ton nyabuk. Na dopdeipnukce, tukwak mutuku dopdeipnuknye, Allah el dam benamne bukni, anggun kan-kan tonoknye birye, “Naie, dan tam bilam do?” nyabuka kum asipdenamnulume.

Yohanes 17:11

Na mapu ara, tukwak mutuku tuba unamak bukni, nara tukwak mutuku batakuka, an dam yanamne. Naio, anda pia malye ning ton winina kumnye ulyame ati, anda Pia Telebnye ulyame. An si weik mikip weik ukilya deice arye, ‘Na mapu ati kalikinamlam’ tenen, moropkine. An si ara, ance areamnulum si ati nyapkine. An areamnulum si mikip deice, pia kaliklaminye bukni, ‘Sik aminyan talak tonok kanye tenebuka, kanye talima dukdongobuka nong tonok atonun unamak’ tenen, moropkine. Tonda, na ni Allah, an ap, na ap, kanye talima dukdongobuka tonok unyam touk, ‘Sik babye atonun nong tonok atonun unamak’ tenen, moropkine.

Yohanes 17:13

Wini talak ara, Naio, an dam yanamne. Bukni, narye na mapu ati arenun ning, kanye pin-pin asa una deiyok ning, na ning dobuka sikti, arepnibuk, kanye pin-pin asa weik arye uptopura, ‘Kanye deibuka telebuk unamak’ tenen, wini talak tukwak mutuku tuba unye talak noutamak, ayupu nirya nyapmane.

Yohanes 20:17

Nyabukura, Yesus arye nyabuk. “Na ni Allah dam tamubuka min kum binmana anya arye, na nong kum talipnunilame. Ance tamubuka, na weit yapu nang nirya ati, ayupu laka nyalbinulyame. Ara, ‘Na Yesus ara, na ni dam, Allah el un dam tamubuka binirye unamne. Na ni bira, anggun ni uka. Na si erenun Allah ara, anggun si erelulum Allah uka. El tonoka,’ nyalbinulyame.” Yesus arye nyabuk.

Yohanes 9:4

Domon yupu arye nyapnusine. Ara keting noutam tuba uplye talak nirya ara, na dopdeipnuknye, el piluk adiparyuk donamabe. Iniplyopura, kuna yanamle talak ara, tonoknye babye pil kum dopmanto unamake.