Yohanes 6:51 - Eipomek

⁵¹ Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.

Yohanes 6:51 ပူးပေါင်းရင်းမြစ်များ

Matius 20:28

Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.

Lukas 22:19

Nena Kum Roti dipnuyik talak ara, Yesus arye aroti dobuka Allah ati, “Telebe,” nyabukopura aroti tobuka, el mapu ati bokuka arinmokce ayupu nyanmok. “Anggun lyena ati na nong arepnamne touk, aroti ara, na nong atonun ati arepsine. Dobuka diplulume. Anyaripmasin roti ara, ‘Na nong tenebuka dinamlum’ tenen, arepmasina ati, dobuka diplulume,” nyabuk.

Yohanes 1:14

Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.

Yohanes 1:29

Anang arye Yohanes ati asipdeyik sum bukni, mapmeka, anyuku sum ara, Yesus arye Yohanes el dam yanganmokba, Yohanes eibukce, nyabuk. “Ninye mutuku-mutuku nirya, sik malye winin ning kum kilina ap, ‘Sik kum dipnamak’ tenen, pununa ap deiyoknye, Allah arena ati Domba Mi Atonunye bira, ayanmal atia.

Yohanes 11:26

Yata ninye do nirya, nati dib tenebikirye, na ap talima dukdongobuka unyak ninye nirya ara, sik nong dibikce babye, pia kamuk unamake. Anyapmakin yupu ara, dib tenepmalam do?” Yesus arye Marta biti nyabuk.

Yohanes 3:13

Minop talak arye dipdongobuka wini talak babye, yuk ninye nirya im deice ton kum welebanyake. Tonoknye bira, Ninye Mi Koprop Atonunye, elda im deice ulamukce, tukwak yayuknye binya arye, el tonok ara, im deice weklamuk.

Yohanes 3:14

Minop talak mok ap, ninye ap, pia kum uamuk mutuku noutamak ara, ninye on kwatima arye ninye weik olamukba, Musa arye kat ning dobuka, kwatima urasin atonun puturubukce, cang yo deice kwatipdongobukce, ikuka erepdeibuk touk, nati ton atonun wininamake. Ara, Ninye Mi Koprop Atonunye dobuka, yo deice deibikirye, ikuka tikeipnamniake.

Yohanes 3:16

Allah arye diba tenen ninye nirya ati, kam pia bukeipnamsila deiyok ara nyapnusine. Ara, Allah arye ninye mutuku-mutuku nirya ati, bico tenenyamsukce, kanye weik arye areamsuka ati, el Mi Koprop tonokuk ulamuk bukni, tukwak ninye lyena ati arepsuke. Ara, ‘Yata ninye do nirya, el Mi Koprop ati, diba tenebicopura, pia kum dipnamak bukni, bol koplobuka kam una deiyok ning arepnibuk, pia kam unamak’ tenen, el mi tonok arepsuke.

Yohanes 3:36

Yata nang do nirya, Allah el Mi Koprop ati, diba tenebicopura, Allah arye kam una deiyok ning ariliba, pia kam unamake. Bukni, Allah el Mi Koprop ati, ‘Nun like’ tenen, batakice ninye nirya ara, Allah arye aninye ati, yu kiplirye, weik arye wenebuka opnamle ati, kam un ning kum dopdopnamake. Sik dibikibuk, tuba tamubuka tonap, kam pia kum unamake. Allah arye aninye wenena ati, el yu sik deice tuba delinamle. Yohanes arye ayupu nirya nyabuk.

Yohanes 5:24

Yesus arye ayupu nyabukce, ayupu dukdongobuka nyabuk. Na dipkoprop yupu nyapsine. Yata ninye do nirya, na yupu kekebikirye, na dopdeipnuknye Allah ati, dib tenebiceura, akunuma, adiparyuk kam pia una deiyok ning doprobikirye, kam pia unamake. Sirya talak ara, Allah arye aninye wenebuka kum opnamle. Ara, diba tenena ninye ara, sikce diamikce ninye tam batakuka, kam pia unamak ninye tam akunum kilonyaka ati nyapsine.

Yohanes 6:33

Anyapmasina ara, talye ati kume. Deiyok ara, Allah el im deice roti atonun ning ara yuk ning kume. Ara im deice arye tukwak mutuku yanuka ulamlirye, ninye mutuku-mutuku nirya ati, kam una deiyok ning arilya deiyoknye el uka. Elda roti kwaning atonun ululnye.” Yesus arye nyabuk.

Yohanes 6:35

Nyabikba, Yesus arye tamubuka adomon yupu nyabuk. Roti kwaning kam una deiyok ning ara, na uka. Yuknye ton kume. Yata ninye do nirya, nati moropnikirye, na dam yanamniyak ninye ara, wini talak arye dipdongobuka, doyanamle talak nirya ara, din pia kum patapnamle. Tonda, nati diba tenepnice ninye nirya ara, doyanamle talak nirya ara, mek pia kum patapnamle.

Yohanes 6:41

Nyabukopura, sik Yahudi yala nang arye, Yesus ati yu ubukba, malye kanye bobuka, yuprobikce malye nyanmek. Yesus arye, “Nara, im deice arye yayuk kwaning, kam un kwaning roti deiyok ara, na uka,” nyabuka ati, sik yuk anye bopmek.

Yohanes 6:47

Dipkoprop nyapsine. Na nyanye yupu ap, na ap ati, dib teneplinye bira, kam una deiyok ning akunum dololule.

Yohanes 6:48

Nara, talinye kume. Nara, roti kwaning kam una deiyoknye bira, na uka. Yesus arye nyabuk.

Yohanes 6:50

Bukni, na nyapmasina ara, im deice arye yayuk roti kwaning dobuka dilinye bira kum dipnamake. Pia kamuk unamle.

Yohanes 7:38

Yata ninye do nirya, nati dib tenebiceura, aminyan ara, mek pu mek weik arye langdibuka diniplirye, balamle atonun, aninye sik kanye talima noutamak arye, pia kam una deiyok ning ara, mek pu panaplirye, pia balamle atonun unamle,” Yesus arye nyabuk.

2 Korintus 5:19

Nun peterenyap yupu ara, ani. Allah ap, ninye ap insinibuka teleb una ati deiyok yupu ani. “Ara, Allah arye tukwak ninye nirya, sik malye wininyak ning ati, ‘Namin kibuka kum daneipnirye, ila tamubuka ton kum tenepnirye, sik malye ning ati kum wenebuka opnamne’ tenen, Kristus dopdeipsukba, Yesus arye el ninye lyena pil dopsuka deice arye, Allah arye ninye mutuku-mutuku nirya ap, el ap ansinibuka neika teleb ulisulule.” Ayupu nirya laka nyabuka laka peterelbana ati, Allah arye nun wibuka deipsukbuk, apil talibuka donyabe.

2 Korintus 5:21

Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.

Efesus 5:2

Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.

Efesus 5:25

Ara, anggun sal ati, ayupu nyapnusine. Ara, Kristus arye, elti, dib tenebupu ninye ati, pia bico tenebuka talima arepsukce, nunti lyepsuk atonun, anggun sal babye, anggun domunye kilapu ati kanye talima arepsilyopura, bico tenebuka pia telebuk unamlume.

Titus 2:14

Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.

Ibrani 10:20

Yesus el ining aribuka deice arye, winiryuk bisik, kam una bisik akunum yabdeipsuke. Ara, minop talak ara, ‘Talya nang arye, Pia Teleb Aik wekicak’ tenen, buplan bisik baju wililamikba, Allah arena deiyok nang arye, ining ning dobuka anyaik weklamik touk, Yesus arye el bidamang nong dobuka Allah ati, aribuka deice arye, teleb bisik yapdeipsukba, Allah el dam wekenyabe.

1 Peterus 2:4

Ara, winipmanto yupu nyapnusine. Ara, Yesus ara, aik don keil atonun ulul bukni, elda pia Kam Keil ulule. Ninye mutuku-mutuku nirya arye, ‘Keil talye keil’ tenen, bataklamik bukni, Allah arye Yesus ati, ‘Akeil ara, weik mambule,’ tenebuka wibuka deiamuk.

1 Yohanes 2:2

Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.

1 Yohanes 4:10

Dipkoprop bico tenena ning ara ani. Ara, nunce mankau ulamuburye, Allah ati kanye kum diamube. Winilamubu bukni, nun malye unyap ning nirya awamukbuk, ‘Sik pununa ati, Na Mi Koprop Yesus obikce deice arye, sik malye ning punupnamle’ tenen, Allah elce bico tenepsukce, el Mi Koprop arepsuke. Winipsuka ara, dipkoprop bico tenena ning ara ati, nyapne.

1 Yohanes 4:14

Tonda, nun ni Allah arye, ‘Na Mi Koprop ninye mutuku-mutuku nirya lyepnamle,’ tenebuk ning ap, utenebukce Yesus dokwetepsuke deice arye batakukbuk, eibupe ning ap, ayupu bitinye tuba laka nyanyabe.