Yohanes 6:32 - Eipomek

³² Nyabikba, Yesus arye aninye ati tamubuka nyabuk. “Na dipkoprop nyapsine. Musa arye im deice din ning roti, kwaning el si ara mana kwaning, dipkoprop ning ara kum areamsuke. Na Ni Koprop Allah arye im deice roti dipkoprop ning ara arisulule.

Yohanes 6:32 ပူးပေါင်းရင်းမြစ်များ

Mazmur 78:23

Israel nang arye, Allah ati, diba kum tenelamik bukni, Allah el yupu nyabuka deice arye, im deice bisik bublan ning kukeibukce, din ning weik tonun arebuk.

Keluaran 16:4

Nyabuka malye nyanmekba, Allah el si Yahweh arye Musa biti nyabuk. “Dipkoproba nyapne. Im deice din ning, el si ara manna kwaning, na im deice arye mok purwu atonun kibuka dopreipnamane. Winipniba, anggun Israel ninye nirya arye, tonok sum uk dinamak ning ati, bulubuka tonokak deibikirye, dinamalume. Winipnaman deice arye, asipdenamasine. Ara, ‘Israel ninye arye, na nyanye yupu kekebikirye, anyapman touk unamak do, kum do?’ tenen, dipdenirye asipdenamasine.

Keluaran 16:8

Anggunce Allah ati malye nyanmalum ning akunum kekepmasila ati, Allah arye sintam tup ning arepnamasil ning ap, beren tam talak im deice manna kwaning arepnamasil ning ap, eipmunyopura, ‘E diba, Allah el si Yahweh, elcuk aning arepsile’ tenen, kel kipmunce talima namin asa unamlulume. Anggunce na ap Harun ap ati, malye-malye nyabuka deresumunye ning ara, yata ati do? Nun bitinye ara mambul nang kume. Dipkoproba anggunce Yahweh ati malye nyanmalume, nunti kume. Musa birye Israel ninye ati nyabuk.

Yohanes 1:9

Ninye mutuku-mutuku nirya sik melina ati, dirina deiyok ning arena deiyoknye, Dib Koprop Dirina Deiyoknye yanamuka ati, Yohanes bira, kintinilina ap, laka lena ap ati yayuke.

Yohanes 15:1

Yesus arye el mapu ati, ayupu nirya nyabuk. Nara, anggur tapu deiyok atonun unune. Na ni koprop ara, anggur tapu koun wa tuku talina Deiyoknye ulula anya arye, elda parang ya talina deiyoknye ulule. Ara aya arye dobuka atapu sekliba kwa leklamle.

Yohanes 6:31

“Aning atonun ara, Allah yupu noutamak ara ayupu sekik. ‘Allah arye im deice din ning el si ara, mana kwaning dopkwetebukura, dibik.’ (Keluaran 16:4) Ayupu sekamik atonun, nun apu yapu arye, ninye kum ulamik mutuku ap, mok kum celamuk mutuku noutamak balamik talak ara, Allah im deice arye, arilamuk kwaning el si ara, mana kwaning arilamukba dilamik. Ati ara, anda yata ning arepsutum do?” nyabik.

Yohanes 6:33

Anyapmasina ara, talye ati kume. Deiyok ara, Allah el im deice roti atonun ning ara yuk ning kume. Ara im deice arye tukwak mutuku yanuka ulamlirye, ninye mutuku-mutuku nirya ati, kam una deiyok ning arilya deiyoknye el uka. Elda roti kwaning atonun ululnye.” Yesus arye nyabuk.

Yohanes 6:35

Nyabikba, Yesus arye tamubuka adomon yupu nyabuk. Roti kwaning kam una deiyok ning ara, na uka. Yuknye ton kume. Yata ninye do nirya, nati moropnikirye, na dam yanamniyak ninye ara, wini talak arye dipdongobuka, doyanamle talak nirya ara, din pia kum patapnamle. Tonda, nati diba tenepnice ninye nirya ara, doyanamle talak nirya ara, mek pia kum patapnamle.

Yohanes 6:41

Nyabukopura, sik Yahudi yala nang arye, Yesus ati yu ubukba, malye kanye bobuka, yuprobikce malye nyanmek. Yesus arye, “Nara, im deice arye yayuk kwaning, kam un kwaning roti deiyok ara, na uka,” nyabuka ati, sik yuk anye bopmek.

Yohanes 6:50

Bukni, na nyapmasina ara, im deice arye yayuk roti kwaning dobuka dilinye bira kum dipnamake. Pia kamuk unamle.

Yohanes 6:55

Aning ara, na nong ara, kwaning sirik atonun ulule. Na ining ara, mek sirik atonun ulula ati nyapsine.

Yohanes 6:58

“Adomon yupu nyapmasina deiyok ara, im deice arye yayuk kwaning, nati nyasunune. Nun apu yapu ara, Allah im deice arye dopdeiamuk ning, el si mana kwaning bulubuka dilamik bukni, aminyan diplamik. Bukni, na nyapsin roti dobuka dinyak ninye ara, kam pia unamake. Ara, nati dib tenepnikirye, melinamniak ninye ara, pia kam unamake.” Yesus arye ayupu nirya nyabuk.

Galatia 4:4

Isa Mutuku Dongonye ap, mer nirya ap, sik amu tam ulamuburye, tukwak mem ninguk talibuka ulamubu bukni, Allah arye, ‘Atalak ani,’ tenyamuk touk akunum winibukopura, Allah arye el Mi Kopropa dopdeipsuke. Allah el mi Yesus dopdeipsukba, Allah El Dib Kanye mikip deice arye tonok kil arye ami deibuk. Akil arye Allah el mi deibuk talak ara, nun Yahudi yala ninye nirya, Allah arye, “Aning ara wininamlulume, aning ara kum wininamlulume,” nyapdeibukba, Musa sekamuk yupu talibuka ulamuburye, amem yupu amu tam atonun ulamupe. Aning atonun, ami Yesus babye, Musa sekamuk yupu amu tam ulamuk. Musa sekamuk mem yupu amu tam bukuka ulamubu bukni, Allah arye el mi dopdeibukba, atalak yayuka deiyok ara ani. Ara, Allah arye nunti, ‘Musa sekamuk yupu, mem yupu amu tam unyak ninye ara, deknamne.’ Na Mi Kopropa arye aninye deklirye, mem ning amu tam unyakak arye lobuka lyepnirye, ‘Na mapu kopropa unamak’ tenen, diba tenenyak ninye ara, teleb kipdeipnamne. ‘Winipnyopura, narye sikti, kintinyamse ning nirya arepniba, sikce dopropnamak,’ tenyamsukce, el mi Yesus dobuka areamsuk.

1 Yohanes 5:20

Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.