Yohanes 5:26 - Eipomek

²⁶ Aning ara talye kum nyapsine. Deiyok ara, na ni koprop Allah kam una deiyok ning talibuka ulye touk, elce aribukba, el Mi Koprop babye atonun kam una deiyok ning talibuka ulule.

Yohanes 5:26 ပူးပေါင်းရင်းမြစ်များ

Mazmur 36:9

Na nio, an uminyak arye, sik din aning-aning nirya ara, ancuk, an dam unyak nang ati, pia weik arye melibuka arenamsilyame. Winipmanto ara, ninye arye, pia teleb balamle mek noutam arye, ‘Mek dipnuyap’ tenen, mek kwebuka dibikirye, kanye delilamak touk, ance teleb ning nirya melibuka aresiminya deice arye, nun kanye deibuka unamabe.

Mazmur 90:2

Tonda, mutuku-mutuku nirya, min kum kwepdeialum talak arye aulalume. Tukwak mutuku ap, mutuku-mutuku nirya ap, min kum kwepdeialum talak ara, anda akunum aulalume. Allah an Kam Una Deiyoknye anya arye, pia ati, aunauk unalame. Atalak arye diprongobuka, dounamle talak babye, kam pia ati unalame.

Keluaran 3:14

Nyabukura, Allah arye, “Nara, aunune. Tonda pia unamne. Ati, na si ara, Yahweh. Asi deiyok ara, Na aunune. Na unamne ning ara, pia unamne. Nara, Allah uka. Ati ara, ance Israel ninye ati, nyapnamlyame. ‘Kume, Allah el si ara, Yahweh, ‘Na aunune,’ nyalul Allah arye, dopreipnuk deice arye, anggun dam yane,’ nyapnamlyame.” Allah arye, Musa biti nyabuk.

Yeremia 10:10

Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.

Yohanes 1:4

Yupu, el ulamuk noutamak ara, kam una deiyok ning ulule. El noutamak kam una deiyok ning uamuk deice arye, tukwak ninye sik kuna noutamak ulamikbuk, Yupu arye ninye kanye pum tam dirina kipdeibuk. Kanye talima dirina arisululnye bira, el Yupu tonokuka.

Yohanes 10:18

Na kam ununa ara, ninye arye dalubuka kum dopropnitinge. Bukni, na kanye aryuk, na nong arepnibuk, opnamniake. Na kam una ara, ninye lyena ati, arepnamniak ap, tuba tamubuka tonap na kam una dopropnamna ap ara, naryuk unamne. Adeiyok ning talibuka unune. Na Ni Koprop Allah arye, adeiyok ning arepnukbuk, dopropse. Na dipna ap, na kam una ap deiyok mikip ara, nauk talinune. Ninye arye na kam una dalubuka kum dopropnitinge. Yesus arye nyabuk.

Yohanes 11:25

Nyabukopura, Yesus arye nyabuk. “Kam Bulina Deiyoknye ap, Kam Una Deiyoknye ap, na aunune. Yatanye do nirya, nati dib tenepnilinye bira, el nong dipmalya babye, kam pia unamle.

Yohanes 11:26

Yata ninye do nirya, nati dib tenebikirye, na ap talima dukdongobuka unyak ninye nirya ara, sik nong dibikce babye, pia kamuk unamake. Anyapmakin yupu ara, dib tenepmalam do?” Yesus arye Marta biti nyabuk.

Yohanes 14:19

Like mitik anun talak ton akunum uplyopura, dib tenena kum, talye tukwak ninye arye kum eipnamniyake. Bukni, anggunuk ara, eipnamnulume. Na pia kam unanye ununa ati, anggun babye kam unamlume.

Yohanes 14:6

Tomas arye nyabukba, Yesus arye tamubuka nyabuk. “Diksukum Bisik ara, nauk unune. Tonda, Dib Koprop Yupu Nyananye unune. Tonda, Kam Una Deiyoknye bira, na tonok unune. Yata nang do nirya, na Ni koprop el dam bana ati, na deice aryuk binamake. Yuk bisik ton pia kum ulule. Yata ninye do nirya, na deice kum yaicopura, na ni Allah un dam kum binamake.

Yohanes 4:10

Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk.

Yohanes 6:57

Ara, Kam Una Deiyoknye bira Allah pia aulule. Na ni Allah dopdeipnukce talinululba, kam tuba unye touk, aning atonun na unun ning ap, nyasinye yupu ap, dolonyak ninye ara, narye talisinibuk, na deiceuk pia kam unamake. Yesus arye nyabuk.

Yohanes 8:51

Tonda ayupu dipkopropuk nyapsine. Yata ninye do nirya, na nyasinye yupu diba tenebikirye, pia talibuka dobolbanyak ninye nirya ara, sik nong dibikce babye, pia kamuk unamake,” Yesus arye nyabuk.

Rasul 17:25

Kam una ap, isin una ap, yata ning do nirya, aubuk ning nirya, elcuk ninye tukwak ninye ati aresulule. Ati, aning-aning nirya kum patalye touk ninye arye donyak pil nirya babye, Allah el pia kum patalule.

1 Korintus 15:45

Ayupu nyapmasina ara, talye kum nyapsine. Kume, deiyok ara, ani. Allah yupu sekamik ning noutamak ara, ayupu ton aupmale. Ara, ‘Allah arye, minopce kwepdeibuknye bira Adam ara, sal kwepdeibukura, kam ulamuk.’ (Kejadian 2:7) Bukni, aminyan sirya talak Adam atonun bukni, bitinye ning dopdeipsuknye bira, kam una deiyok ning arisululnye Yesus ara, im deice anye ulule, talye tukwaknye kume.

1 Timotius 1:17

Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.

1 Timotius 6:16

El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

Ibrani 1:2

Winilamuk bukni, wini talak ara nun sirya talak unyaba noutamak ara, Allah arye nunti, el Mi Kopropa deice arye, nyasulule. Allah arye el Mi Kopropa ati, ‘Aning-aning nirya dobuka arepniba, weik ninye deiyoknye ulirye, aning nirya pia talinamle’ tenen, wibuka deibuk. Tonda, Allah arye im ap, tukwak mutuku ap, aning-aning nirya ap, elce nyapdeibukba, el Mi Kopropa pil dobuka deice arye kintinipdeiyamuk.

Wahyu 21:6

Allah arye nyapnuke yupu ara, ani. “Winira na tenyamse pil nirya ara, akunum sirya dakne. Aning-aning nirya min kum uamuk talak, na akunum ulamse ati, nara deiyok kouna deiyoknye ununa ati, na si ton Alpa nyaninyake. Tonda, aning-aning nirya kum danamle talak babye, nauk ara, pia kam unamna ati, na si ton Omega nyaninyake. Na si ton, Deiyok Kouna Deiyoknye ap, tonda, Sirya Dakna Deiyoknye ap nyaninyake. Yata ninye do nirya, mek pataplyopura, narye sikti, Pia Kam Una Mek kwebuka urdem arenamsine. Ara pia kam una deiyok mek pu arye, kam una mek kwebuka urdem arenamsine. Amek ara kum dekenamake.”

Wahyu 22:1

Aning nirya kel kipsirye, amalaikatnye birye kapdeipnukba, anyasik noutamak balamuk mek, Kam Una Deiyok Mek eipse. Amek ara, luma kum, pia mirin teleb mek ak balamuk ati ara, amek noutamak ara kuna kum dakamukak eipse. Amek pu ara, Allah ap, Domba Mi Atonye ap, sik weik ninye deiyok nang bun ning deice bururak sukum arye balule.

Wahyu 22:17

“Allah El Dib Kanye ap, tonda Domba Mi Atonye birye, el dopnamle kil ato nang, sik diba tenenyak ninye ap, sik nirya arye nati, ‘Yanamle,’ nyabuka moroninyake. Ayupu kekebikirye, diba tenenyak ninye nirya arye nati, ‘Yalyame,’ nyabuka moroninyake. Yata ninye do nirya, kam una deiyok mek ati patalul ninye nirya ara, na dam yangana telebe. Tonda, ‘Se, amek ara dobuka diptinye’ tenen, pia pataliba, kanye talima engelul nang nirya ati, narye kam una deiyok mek, dekna kum urdem arye kwebuka arenamsin ati, amek patalul ninye nirya arye kam una deiyok mek dolyangana telebuka.”

Wahyu 7:17

Aning ara talya ati kume. Deiyok ara, weik Ninye Deiyoknye bun ning noutamak bululnye, Domba Mi Atonye birye, sik deiyoknye pia unamle. Ara, domba wein nang arye, sik domba bico tenebuka, pia teleb kibuka weilamak touk, elce sikti, namin asa arye melibuka unamle. Elce minopce menekuka balibuk, sikda el aminyan tam dobolbaceura, Kam Una deiyok mek pu dam bobanamsile. Aninye sik mambul kanye bobuka, asing maka saknamle ning ara, Allah arye anang ati engena deiyok ning kum kipdeipnamsile. Kum kibuka deiplirye, asing maka cepdeipnamle ninye ara, tuba tonap pia kum engenamake.” Anye birye nyabuka laka nyapnuke. Na Yohanes arye nyapsine.