Yohanes 5:19 - Eipomek

¹⁹ Tonda, Yesus arye elti, yuk anye bopmek nang, sik Yahudi yala ninye sik deiyok nang ati, ayupu nyabuk. Pia dipkoprop yupu nyapsine. Nun ni koprop Allah arye winilul ning nirya ara, el Mi Koprop babye aninguk winilule. Ati, Allah el Mi Koprop, el bidamnang, pil tonok ning babye, el yuk kum doptue. EL Li Koprop Allah pil dolul ninguk eiplirye, apiluk dolula ati nyapsine.

Yohanes 5:19 ပူးပေါင်းရင်းမြစ်များ

Kejadian 1:1

Aning-aning nirya kum uamuk talak ara, Allah arye im ap, tuku ap kwepdeibuk.

Kejadian 1:26

Winibukopura, Allah arye, nyabuk. “Nun unyaba atonun ninye ton kwepdeinuyabe. Nun urasin atonun tukwak ninye kwepdeibibyeba, ninye arye, tukwak mutuku ning nirya ara, talibuka deiyok nang kibuka unamake. Ara, laut mekwen noutam ulye ning ap, mek pum bal ikan ap, tonda im deice lakuka balamle maka ayala-yala nirya ap, ninye arye weinamak ning yala nirya ap, tuku deice yanibuka banamle ning nirya ap, ara, tukwak mutuku im sirya, mutuku sirya unamle ning nirya ati, tukwak ninye talibikirye, deiyok nang kibuka unamake.” Allah arye nyabuk.

Mazmur 138:3

Se na ni Allah, narye anti moropse sum aryuk, ance na moropse yupu kekepnulumce, adiparyuk melipnulume. Melipnuluma ara, talye kume. Ara, ance nati, mikip weik tonun tabakuka arepnuluma deice arye, na talima nirya ara, mikip weik tonun ton upnukba, na mal olan nang ati, ilil una kumce, mikip asa unune.

Mazmur 27:14

Ati ara, narye Allah antibuk diba tenen, ‘Moubuka mikip arye talinamne. Ilil kum deice aniryuk ulamnirye, dilamnirye, Allah el si Yahweh arye, pia melinamnile,’ nyabuka, Daud birye nyabuk.

Mazmur 50:6

Im noutam ap, im deice ap, ulye ning nirya arye, Allah ati laka nyanyake. Ara, “Allah elcuk ninye tukwak nang nirya ati, ‘Teleb wininyak nang ara, ani. Malye wininyak nang ara, ani,’ nyabuka, yupu bokuka, delin deiyoknye bira, el tonoka,” nyabuka, laka nyanyake.

Keluaran 4:11

Nyabuk buk, Yahweh arye tamubuka nyabuk. “Yatanye birye ninye sitang ap, yupu nyana ap, arelul do? Yatanye birye, ninye amul kunukna ap, yupu kum nyapmanto kina ap arelul do? Yatanye birye, ninye asing el lina ap, asing kuna ap arelul do? Kume, aning-aning nirya ara, malye ulina ap, teleb ulina ap nirya ara, na dem aryuk arenune. Nara Yahweh, nara Allah. Na uk ununa ati ara, yatanye birye ton, aning winiptu do? Kume, kum winiptue.

Amsal 2:6

Anyapmasina ara, talye ati kume. Deiyok ara, pia weik kel bikna deiyok ning ara, Allah Yahweh elcuk aresulule. Winibuka arisilye ning ara, ‘Teleb una ani, malye winina ani’ tenen, moubuka kel bikna deiyok ning aresulule. Elce kel bikna deiyok ning ap, moubuka tenena deiyok ning ap, ninye nong deice arisiliba, dib tenebuka kel kinyabe.

Yesaya 44:24

Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.

Yesaya 45:24

“Na si erebikirye, nyanamniake. ‘Teleb kibuka diksukum winina ap, pia mikip arye winina ap nirya ara, Allah Yahweh elcuk ulule.’ Na Allah ara winibuka ununa ati, nati yu tenebuka, malye yupu nyaninyak nang nirya ara, aminyan talak ara na Allah ati eibikirye, alye upliba ilil unamake.

Yeremia 17:10

Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.

Matius 26:39

Nyabukopura, el mitikto karen kisikdakuka kanup donga biyukce, tukwak lumlumuk dongobuka pulbiyuk. Lumlumuk dongobuka pulbiyukce, ‘Opnikiba dipnaman ning ara, Allah arye lyepnutuopura kum diptinye’ tenen, ikin ubukba, Allah moronmok. Allah moronmok talak ara, ayupu nyanmok. “Na nio, na opnamaniyak talak ikin upniliba, donmanya dipnaman ning ara, ‘Ance lyepnutumba, aning kum winipnamniyak’ tenen, moronmakine. Bukni, na patanmanilba, tenepnarye moronmakina atonun kume. An min arye tenyamnulum atonun winipnunilyame,” Yesus arye nyabuka moronmok.

Lukas 21:15

Sik wenepnamsiak talak ara, narye weik kel yupu anggun kanye talima ak arepsinyeura, nyanamlum yupu ara, anang arye bisibuka yanipmanto kum winipnamsiake.

Yohanes 10:18

Na kam ununa ara, ninye arye dalubuka kum dopropnitinge. Bukni, na kanye aryuk, na nong arepnibuk, opnamniake. Na kam una ara, ninye lyena ati, arepnamniak ap, tuba tamubuka tonap na kam una dopropnamna ap ara, naryuk unamne. Adeiyok ning talibuka unune. Na Ni Koprop Allah arye, adeiyok ning arepnukbuk, dopropse. Na dipna ap, na kam una ap deiyok mikip ara, nauk talinune. Ninye arye na kam una dalubuka kum dopropnitinge. Yesus arye nyabuk.

Yohanes 12:49

Aning ara talye ati kum nyapsine. Narye nyasinye yupu nirya ara, na kanye tenen ning aryuk kum peteresunune. Aning kum bukni, na Ni Koprop Allah, na dopdeipnuknye birye, ‘Ance nyanamlam yupu ara ani. Yupu nyanamlam talak ara, winibuka, winibuka nyanamlyame,’ nyapdeipnuk touk, anyuk nyalamsirye, tuba nyasunune.

Yohanes 12:50

Na kele, Allah arye, ‘Wininamlulume,’ nyasilye yupu nirya kekebuka melipmunyopura, aminyan talak pia kam una deiyok ning arisilyopura, kam pia unamlume. Ati, na nyasinye yupu nirya ara, talye yupu uk kum ulule. Ayupu nirya, na Ni Koprop Allah arye, ‘Nyanamlyame,’ nyapnuk touk, anyuk nyasunune. Yesus arye nyabuk.

Yohanes 14:10

Na ap, na Ni ap talima dukdongobuka unyame. Nun neika unyama ara, diba kum tenepmasulum do? Na nyasinye yupu nirya ara, na kanye aryuk kum nyasunune. Aning kum bukni, na Ni Koprop Allah, na talima noutamak unilya deice arye, el pil donulule.

Yohanes 2:19

Nyabikba, Yesus arye nyabuk. “Anyaik ara, uluplopmunyopura, like winilye sum deice arye, na tamubuka tonap dopnirye, teleb kipdeipnamne,” nyabuk.

Yohanes 3:3

Nyabukura, Yesus arye domon yupu atonun yupu deice arye tamubuka nyabuk. “Na dipkoprop nyapkine. Yata nang do nirya, nun ni yapu arye winiryuk deipsikikba, winiryuk mapu ulamap touk, nun kanye talima noutamak ara, Allah arye ila tamubuka tonap winiryuk ninye atonun deipnamsile. Kanye talima winiryuk ninye atonun kum deipsilyopura, Allah lyepsilirye, nun kanye talima talinamsil ning nirya ara, aninye kum eibikirye kum dopropnamake,” nyabuk.

Yohanes 5:21

Ayupu ara talye ati kum nyapsine. Ara, Allah arye akunum diamikce ninye, kam bukuka delilamle touk, el Mi Koprop arye el kanye delilul ninye ati ara, elcuk tenelul touk, kam una deiyok ning ariliba, pia kam unamake.

Yohanes 6:38

Anyapmasin yupu deiyok ara, im deice arye tukwak mutuku yasirye, ‘Na dopdeipnuknye, Allah el tenenilye piluk donamne,’ tenepsirye yase. Nara, ‘Na kanye aryuk tenenun ninguk tenebuka wininamne’ tenen, kum yase.

Yohanes 8:28

Ati Yesus arye sikti, nyabuk. “Anggunce Ninye Mi Koprop Atonunye dobuka wanwanun yo deice erepdeipmunyopura, nati moubuka kel kipnamnulume. Tonda, narye anggunti, ‘Na kanye aryuk pil kum donune. Tonda, na ni koprop arye nyanilye yupu uk dobuka nyasunune.’ Ayupu nyasunun ning ara, aminyan kel kipnamnulume.

Yohanes 9:4

Domon yupu arye nyapnusine. Ara keting noutam tuba uplye talak nirya ara, na dopdeipnuknye, el piluk adiparyuk donamabe. Iniplyopura, kuna yanamle talak ara, tonoknye babye pil kum dopmanto unamake.

Rasul 2:24

Yesus dibuk bukni, Yesus dipnarye, el nong tup ara, lyupmanto kumnye binye arye, Yesus dibuk bukni, Allah arye tamubuka kam bukibuk.

Roma 6:4

Mek dongopsik deice arye, nunti Allah el kanye ara, nunti, ‘Aninye ara, Yesus dibukba tuku pali weibika atonun, winibake,’ tenesulule. ‘Tonda, sik Yesus ati diba tenenyak ninye nirya babye, akunum deamikba tuku lukamik ninye atonun unyake,’ tenesulule. Ati, ‘Winibuka unamak,’ tenesilya deiyok ara nyapnusine. Ara, Kristus dibukba, el Li Kopropa Allah, el weik mikip deice arye kam bukeibuk touk, ‘Sik babye minop talak malye winilamik ning nirya batakuka, winiryuk ninye atonun ubikirye, diksukumuk unamak’ tenen, Yesus dibuka deice arye, Yesus ap kanye talima dukdongopsukba, nun ap dibupu. Ara, Allah el kanye aniryuk utenesulul ning ati laka nyapsine.

Roma 8:11

Tonda, Yesus dibukba, elti, kam bukdeibuknye Allah, El Dib Kanye arye, anggun talima pum tam usilye ninye ara, aminyan talak anggun dipmunya babye, Allah arye kam bukeipnamsile. Ara, Yesus dibukba, kam bukeibuknye, Allah arye anggun diba tenelulum ninye babye, aminyan talak kam bukeipsilyeba, kam pia unamlume. Anggun kam bukeipnamsila ara, anggun talima pum tam usilinye, Allah El Dib Kanye melipsilya deice arye, kam bukeipnamsile.

1 Korintus 15:12

Ara, na kayapu. Nun nirya arye, ayupu uk peterenyabe, nyapmasina anya arye, ayupu deice arye, “Kristus dibukura, Allah arye kam bukeibuk,” nyabuka peterenyaba ati, anggun kan-kan bukni, ton nang ara, “Kume, diamik ninye ara, Allah arye, kam kum bukeipnamle. Ara kum winipnamle,” nyabuka peterenyaka ara, yata wiribuka kel bikamtingce, ayupu nyapting do? Anyanyak nang ara, sik yata deiyok ati nyanyak do? Sikda tililauk nyanyake, dipkoprop kum nyanyake.

2 Korintus 4:14

Nun kele, nun Deiyoknye Yesus Kristus dibukura, kam bukeibuknye, Allah arye nunti kam bukdeipnamsile. Winipsilirye, Kristus ap, nun ap, anggun Korintus mutuku ninye ap dobuka, Allah el ulyak neika deipnamsile. Aning dib tenenyaba anya arye, ayupu nyasinyabe.

2 Korintus 5:10

Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.

Efesus 2:5

Nunce el yupu yaniplobuka malye-malye ulamupa deice arye, akunum diplamak ninye atonun ulamubu bukni, Kristus ap, talima dukdongopsuka deice arye, kam bulina atonun, teleb kipdeipsukce, lyepsuke. Allah arye, lyepsuka ara, yuk deice arye, kume. El bico tenyamsukce, el kanye aryuk talye meilyamsuka deice arye, lyepsuke. Nun teleb winina ati kume.

Efesus 3:16

Na Paulus birye, anggunti, Allah morosunun ning ara, nyapnusine. Ara, ‘Nun ni Allah kopropa arye, aning-aning nirya talilulce, mambul weiknye ulye touk, el Dib Kanye arisiliba, melisilya deice arye, el mikip weik aresiliba, anggun kanye talima weik arye, melinamsile’ tenen, Allah morosunune.

Pilipi 3:21

Yata ning do nirya, Yesus el weik mikip deice arye, aning-aning nirya talibuka, el amutamak delilule. Atouk el mikip deice aniryuk, nun talye tukwak nong bataksilirye, nun dobuka urasin pia yuk ning kipsilirye, el pia teleb im deice nong ulye touk ubuka, kwepdeipnamsile. El pia teleb ulye touk, nun babye, teleb winipsiliba unamabe. Na Paulus arye, anggun Pilipi ninye ati, nyapsine.

Pilipi 4:13

Yata winin ning do nirya, Kristus ap, kanye dukdongobuka unirye, el mikip arinilya deice arye, aning-aning nirya winiptinye.

Kolose 1:11

Tonda, Allah el weik mikip weik ulamle touk, elce anggun Kolose ninye ati, mikip weik arisilibuk, kanye imun ning weik upsilya babye, ‘Batakana pia kum arye, pia pi dobuka pil domunce, kanye teniltona kum arye, telebuk unamlume. Tonda, ikin upsilya babye, yuk nang ati, minpola arye yu uplibuk, pil kum batakanamlum bukni, nimalye aryuk unamak’ tenen, nunce anggunti Allah morosinyame.

Kolose 1:16

Aning-aning deice tam ulirye, pia weik mambulnye ulula ati ara, lilibuka nyapnusiname. Yata ulye ning do yuk-yuk yala nirya ara, elcuk kwepdeiyamuk. Im deice ulul ning nirya ap, tukak mutuku noutamak ulul ning ap, ninye asing arye elinyak ning nirya ap, aupmal bukni, ninye asing arye kum eipmanto ning ap, aning-aning nirya ara, elcuk kwepdeiyamuk. Tonda yata mikip ulye ning do nirya, ninye weik nang deiyok nang, Sisinanye Raja nang nirya ap, deice tam weik nang unyak nang ap, sik amutamukirye, mitik pil talibuka donyak nang ap, talye nang bukni, yuk nang arye anang ati, ‘Nun ni yapu,’ tenebuka, deiyok yupu nyanyak nang ap, anang-anang nirya babye, Allah el Mi Koprop arye kwepdeiyamuk. Yata ulye ning do, yuk-yuk yala nirya ara, elcuk aning nirya kwepdeiamukce, ‘Aning talipnibuk, aning ap, aninye nirya ap, sikce na si erebuka kinamniyak’ tenen, kwepdeiyamuk.

1 Tesalonika 4:14

Nun dib tenenyap ning ara, ani. Ara, Yesus dibuk bukni, Allah ila tamubuka kam bukeibuka anya arye, Yesus dib tenelamik bukni, akunum diamik ninye ara, Yesus tamubuka yanamle talak ara, Allah arye aninye dobuka bobinamsile.

1 Peterus 3:18

‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.

Wahyu 2:23

Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.