Yohanes 4:48 - Eipomek

⁴⁸ Morobukba, Yesus arye anye biti nyabuk. “Anggunda, ninye kum winipmanto ning ap, winipman kum pil ap doliba, elimunye deice arye, ‘E, anye bira dipkoprop Allah ati pil dolule’ tenen, dib tenelulume. Aning kum eipmunyopura dib kum tenelulume,” Yesus arye nyabuk.

Yohanes 4:48 ပူးပေါင်းရင်းမြစ်များ

Daniel 4:2

Anyapnusin ning ara, aning-aning nirya deice tam, Pia Mikip Weiknye Allah arye, ‘Na dam, ninye pia kum kipmanto ning,’ nyapmanil ning ap, tonda lak pitin kilin ning ap, na dam upmanilba, eipman ning ara, anggun dam laka nyapnusine.”

Daniel 6:27

“Allah aniryuk lyepsilirye, melinamsile. Ikin upsilye ning lyebuka, kanam asa ulisulule. Tonda, ninye arye kum winipmanto ning ap, laka kilin ning ap, pil dosulule. Ara, im deice ap, tukwak mutuku ap nirya, elce ulisulule. Ara, dipkoprob Daniel, singa kuse ulamika pum tam, dobuka dopkwetepsiba, Allah arye melibukba, singa arye, el nong ton dila si kum tobikak, dila kum eipse. Aning ati nyapsine.”

Bilangan 14:11

Atalak ara, Allah el si Yahweh arye, Musa biti nyabuk. “Dan talak arye, sik akilisal arye nati, ‘Elda talye nyaltakasulule,’ nyabuka malye yupu nyaninyak do? Tonda, narye ninye winipmanto kum pil weik, sik dam dolamseba elilamik bukni, yata talak arye, nati dib tenepnamniak do?” Allah arye nyabuka asibuk.

Matius 16:1

Magadan mutuku binuka daunmek bukni, Farisi nang ap, Saduki nang ap, Yesus dam yayik. Yesus dam yayikce, ‘Yesus ara, Allah el mikip deice arye dipkoprop apil dolul do, kum do?’ tenen, Yesus asipdeyikce winibik. Sikce nyabik. “ ‘Allah arye dopdeibukba, el mikip deice arye pil dolule,’ tenepnukiyaba ati, ninye kum winipmanto ning ap, sirya dakna pil ap, dopsilyame. Aning dopminyeba eibipyeura, dib tenepkitibye,” nyabuka asibuka, Yesus ati piripdeyik.

Matius 27:42

Sik nyanmek yupu ara ani. “Yesus arye yuk nang ati melibuka lyelamuk bukni, elce el bidamnye ati kum lyepdatue. Elda Yahudi yala nang, nun weik ninye deiyoknye Raja Israel, ulamtu toura, wanwanun yo deice arye tukwak kouluktuba eiptibyeura, elti, diba teneptibye.

Markus 13:22

‘Anang ati, diba kum tenenamlulume,’ nyapmasina ara, urdem ati kum nyapmasine. Deiyok ara ani. Aminyak talak yanamak nang ton nang arye, ‘Nunda Kristus unyabe,’ nyanamake. Ton nang arye, ‘Kume, nunda Allah el yupu ap, aminyan winipnamle ning ap ati, lake nyana deiyok nang unyabe,’ tilila ati nyanameke. Aning ara, ‘Sik yuk nang arye, nun mambul pil eipsikirye, dib tenebuka melipnamsiak’ tenen, ninye arye winipmanto kum pil donamake. Aninye ara, isa mikip deice arye, ninye arye kum winipmanto pil donamake. Ton nang ara, ‘Apil dolamipyeba yuk nang eipsikirye, ‘E, anang ara, dipkoprop Allah el mikip deice aryuk apil donyake,’ tenepnamsiak’ tenen, mambul pil ton donamake. Apil-afil nirya dopnamak ning ara, Allah el min arye wipdeiamuk ninye ara, ‘Allah batakuka, nunuk melipnamsiak’ tenen, yanuka pil donamake. Sikti lila yupu nyan nang arye wininamak bukni, Allah wipdeiamuk ninye arye, atilila ning dib kum tenenamake. Aninye ara, Allah el ‘Na’ tenen, ninye unyaka anya arye, tilila ning ap, tilila yupu ap ati dib kum tenenamake.

Lukas 10:18

Nyapmekura, Yesus arye tamubuka anang, 70 nang ati nyabuk. “Anggunce aning elilamlumce, ‘Se aning ara weik mambule,’ tenelamlum bukni, nara im deice minop bebeya lingum alamle touk, mutuku-mutuku nirya balul Isa Mutuku Dongonye arye, minop im deice arye sakuka eiamse.

Lukas 16:31

Abona talinanye birye nyabuk bukni, Abraham arye tamubuka nyabuk. “Kume, Allah arye, ‘Wininamlume, aning ara kum wininamlume,’ nyabukba, Musa arye sekamuk yupu ap, Allah yupu laka nyalamik nang, nabi nang arye sekamik yupu ap, kum kekebikcopura, dipmatunye kam bukturye, sik dam binuka nyaptu babye, dib kum tenepnamting,” nyabuk. Ara Abraham arye abona talinanye ati nyabuk, nyapne. Yesus arye nyabuk.

Yohanes 12:37

Ura, Yesus arye ninye kum winipmanto ning, pil aning-aning nirya dolamukbuk, sik Yahudi yala deiyok nang ton elilamik bukni, sikce Yesus ati pia diba kum tenebik.

Yohanes 15:24

Na yasirye, sik kan-kan noutamak, yuk nang pia kum winilamik ning, ninye winipmanto kum ning, pil kum doptinyopura, kum elilamtingtoura, sik malye winin ning sik nong deiceuk tuba kum uptue. Bukni, wini talak akunuma. Narye ninye kum winipmanto ning, winipman kum pil weik arye domsiba, sik elilamik bukni, na ap, na Ni Koprop Allah ap ati, ‘Nun lik,’ tenesinyake.

Yohanes 2:18

Yesus arye, anang nirya yakuka bai tam dopkwetebukura, sik Yahudi yala deiyok nang arye, elti, nyabik. “Ara, ‘Allah arye, anye dopkwetebukura, pil dolule’ tenen, ‘Diba tenekitibye’ tenen, ninye kum winipmanto ning, yata pil dopnusilam do? Aninye bai tam dopkwetepmalama ara, yatanye birye deiyok ning aripkuka deice arye, wininmalam do?” nyabuka wenebik.

Yohanes 20:29

Nyabukura, Yesus arye Tomas ati nyabuk. “Ance eipmanilam deice arye dib tenepmalam bukni, yata ninye do, asing arye kum eipmaniyak nang ababye, dib tenepnikcopura, Allah arye aninye ati meliplibuk, telebuk unamake,” nyabuk.

Yohanes 4:49

Nyabukura, aninye deiyoknye birye, Yesus ati nyabuk. “Kume, naio, na mi min kum dipmalye talak na mutuku bitumce, na mi kweteipnutume,” nyabuka morobuk.

Rasul 14:3

Paulus ap, Barnabas ap, sik peterelamrik talak nirya ara, Yahudi yala nang arye, yuk yala nang ati yu kililamik bukni, abitinye nang ara, ilil kum asa arye mikip aryuk sik abitinye nang arye, Yesus yupu peterelamrik. Sikce, “Yesus elda ninye nirya ati bico tenesilirye, talye melisululnye,” nyabuka yupu peterelamrik. Peterelamrik talak ara, ‘Ayupu kekelamik nang dib tenepnamak’ tenen, Yesus arye el mikip Paulus ap, Barnabas ap, sik anang nong deiceuk deibukura, sikce ninye kum winipmanto pil dolamrik. Tonda, amambul pil dolamrikopura, aning elilamik nang arye, ‘Se, dipkorop anang deice arye, Allah arye pia mambul pil donmasile’ tenen, bikamik.

Rasul 15:12

Ura, Peterus nyabukura, Barnabas ap, Paulus ap arye, yupu tonap, nyaprik. Ara, sik Yahudi yala kum ninye ulamika noutamak arye Allah meilyamuk deice arye, Barnabas ap, Paulus ap arye, ninye kum winipmanto pil dolamrik. Apil dolamrikopura, sik elilamik nang arye, ‘E, dipkoprop Allah arye abitinye nang deice arye pil donmasile’ tenen, kel bikamik. Apil dolamrik ning nirya laka nyanmarik talak ara, sik awekmek nang nirya arye, ‘Se’ tenen, tunim abuka kekenauk unmek.

Rasul 2:19

‘Im deice tam noutamak, ninye pia kum dikirye, kel kum bikinyak ning, pia mikip weik ning deipnamne. Tonda, ‘Tuku ak tam arye, Allah arye mambul pil donmasile, tenepnamnyaka’ tenen, laka lelin ning deipnamne. Ara, ining ap, uku buk ap, weik tulum welelamle atonun tulum ap, deipnamne.

Rasul 2:22

Nyabukura, ton ayupu nyabuk. Na kayapu, ayupu kekeplulume. Allah arye Nasaretnye Yesus dipkoprop wipdeibuk ning ara, laka anyapsuke. Ara, Allah el mikip aryuk Yesus melyamukbuk, Yesus el mambul pil ap, ninye kum winipmanto pil ap, dolamuk ning ap, ‘Dipkoprop Allah arye pil donmasile, tenepnamnyaka’ tenen, laka nyan ning deibuk ning adeice arye, akunum bikamubu. Ara, ‘Allah arye Yesus dipkoprop wibuka dopdeipsuke’ tenen, kel kebupu. Allah arye el mikip Yesus deice aribukba, Yesus el winilamuk ning nirya deice arye, ‘Allah dipkoprop Yesus wipdeipsuka ara, sik dib tenepnamak’ tenen, Allah lak akarye, lak nyapsuke. Anirya, anggun babye akunum kel kilulume.

Rasul 2:43

Allah arye el mikip melilamuka arye, Yesus arye wibuka deiamuk Rasul nang ara, mambul pil ninye winipmanto kum pil ap, Allah arye mikip weik kildelilamukba, ninye kum winipmanto ning, pil dolamik ning ap, apil dolamikce awinilamik ati, aning nirya sik elilamikce, ‘Na ni,’ tenen, ‘Se dipkoprop, Allah arye mambul pil donmasile’ tenen, teleb tenebuka, kanye deipnarye ulamik. Ton ninye ara kanye deibuka ulamik. Ton ninye ara, mambul kanye bolamik.

Rasul 4:30

An mikip deice arye ninye kwetena ap, ninye kum winipmanto pil ap, mambul pil dobipyeba yuk ninye eibikirye, ‘Se, dipkoprop Allah aryuk apil donmasile,’ tenen, tenepmanto pil ap, ‘Ance donamsilyama’ tenen, moropkiyabe. Ara, an piluk dobuka, an Melinanye Yesus, el si deice aryuk, ‘Apil domasile’ tenen, moropkiyabe, nun ni Allah.” Ayupu nirya Yohanes ap, Peterus ap, Yesus ati dib tenelamik kili sal ap, arye nyabuka Allah ati moronmek.

Rasul 5:12

Yesus wipdeiamuk Rasul nang arye, amutuku ulamik ninye kan-kan arye, ninye kum winipmanto ning ap, winipmanto kum pil ap, tonda yuk ninye eibikirye, ‘E Allah arye dipkoprop pil donmasile, tenepnamak’ tenen, mambul pil ap dolamik. Tonda, Yesus el diba tenebik nang nirya arye, Allah yupu kekena ap, yupu sisikina ap ati weklamik atolong si ara, Salomo Atolonga bulubuka weklamik. (Sik yupu deice Salomo Kolonade nyalamik).

Rasul 6:8

Allah arye Stefanus ati, pia kanye deiamukce, weik melyamuk ning ap, el mikip weika arye Stefanus areamuk ning ap, adeice arye Stefanus ulamuk. Allah el mikip weik Stefanus areamuka ati, Stefanus arye ninye winipmanto kum pil ap, ‘Allah el mikip pia weik pil donmasile, tenepnamak’ tenen, laka len pil ara, ninye kum winipmanto pil dolamuk.

Rasul 7:36

Dopkwetebukura, Musa arye Mesir mutuku noutamak ninye winipmanto kum pil dolamuka deice arye, Israel ninye arye, ‘Se, dipkoprop Allah arye anye biti deice pil donmasile,’ tenebik. Musa birye aninye nirya lopdeibuka lyepdobukce, Mesir mutuku noutamak arye menekuka balamukura, dobolbalamik. Balamikce, tonda Ining Bi Laut Mekwen dam ap, mek kum ati ninye kum ulamik mutuku noutamak ap, keting tamun yupa weik 40 tahun deice arye, Musa birye ninye kum winipmanto ning, mambul pil dolamukce, Israel ninye Musa menekuka balamukba aminyan melibuka balamik.

Roma 15:19

Aning ara, na mikip deice arye kume. Allah El Dib Kanye mikip deice arye melyamnukba, amambul pil nirya dolamse. Ara, aninye nirya arye, ‘Allah elcuk apil dosulule,’ tenebuka, ‘Diba tenenamak’ tenen, etekdop ubuka don pil ap, ninye kum winipmanto pil ap, dolamsirye peterelamsiba, sik Yahudi yala kum ninye arye, Allah ati diba tenelamikce, el yupu kekebuka dobolbanyake. Winibuka apil dolamse ning ara, keting wekelban tam, weik asik dolamikak, Yerusalem mutuku arye dipdongobuka anyapce, keting panalyangan tam, mutuku si Ilirikum mutuku tam noutamak nirya ara, Kristus el laka teleb yupu, ninye lyena yupu bobuka peterelbalamse. El yupu ara tonok ning babye kum bataklamse.

1 Korintus 1:22

Yahudi yala ninye ara, ‘Ninye kum winipmanto ninguk, pil dosilyam ning ara, adeice aryuk, dib tenepnamabe,’ tenenyake. Sik Yunani ninye ara, ‘Kel weik bikne yupu deice aryuk nyapsumunba, kekebibirye, nun dib tenenyap touk, aning aublyopura, adeice aryuk dib teneptibye,’ tenenyake.

2 Korintus 12:12

Allah elce wibuka dopdeipsiliba, el yupu dobuka peterelbana ati, deiyok kouna deiyok nang, dipkoprop Rasul nang pil donyakba, mambul ning laka usulul ning ara, anggun kele. Ara, ninye kum winipmanto ning ap, weik mambul pil, winipsekmanto kum pil ap, dolamubu. Ara Allah arye, ‘Dipkoprop Allah el mikip deice aryuk pil donmake, tenepnamak’ tenen, mambul pil dosilye ap, anirya ara anggun dam peterelamsupu talak ara, awinilamukba elilamlume. Ikin ning aupsuk bukni, batakana kum, pia pi dobuka, apil-apil nirya dolamububa, amambul ning ulamsuk.

2 Tesalonika 2:9

Allah el winin ning nirya, Yanina Deiyoknye yanamle talak ara, talye ati kum yanamle. Kume, Isa Mutuku Dongonye el mikip weik ulye touk, amikip deice arye, yata mambul ning do nirya, pia teleb pil ap, ninye kum winipmanto ning ap, ‘Diba tenepnamniak’ tenen, weik mikip winin ning ap, pil weika arye dopnamle. Winipnamle bukni, anirya ara dipkoprop kume, ara Isa Mutuku Dongonye el tenepce arye winin ning, tilila ning pil dopnamle talak arye yanamle.

Ibrani 2:4

Tonda, Allah arye nunti, ‘Na yupu, ninye lyena ati kai teleb yupu ara, tukwak ninye diba tenepnamak’ tenen, sik peterelamsik talak ara, mambul pil weik dolamsuke. Ara, ‘Allah aryuk apil donmasile, tenepnamniting’ tenen, talye nang arye kum winipmanto ning ap, weik mambul pil ap, ninye kum winipmanto pil ap dolamsukba, ninye weika arye, ‘Se, aning ara dipkoprop Allah elca,’ tenelamubu. Tonda, elce tenelamsuk touk, Allah El Dib Kanye arye el mikip deice arye arisilye pil dona deiyok ning ton, bokuka areamsuke.