Yohanes 4:14 - Eipomek

¹⁴ Bukni, yata ninye do nirya, narye arebsinye mek dobuka dibikcopura, tuba tamubuka tonap mek kum patapnamle. Anggun mek patana kum bukni, na arebsinye mek dopropmunyopura, anggun kanye talima noutamak arye, mek pu atonun upsilyeura, mek pu doplirye, panabuka saklamle atonun winipnamsile. Winipnin balamlya ani, aminyan talak ara, pia kam unamlume,” Yesus arye nyabuk.

Yohanes 4:14 ပူးပေါင်းရင်းမြစ်များ

Yesaya 49:10

Sik aninye ara, din ap, mek ap, ton kum patapnamle. Tonda, mek kumak, pia pata mutuku unamak bukni, sik nong deice keting kum dinamle. Ara, narye sikti, bico tenebuka lyepromsinye, na Allah arye sikti, pia tuba kalikuka melinamne. Pata mutuku noutam unamak bukni, narye sik aninye bobukapnirye mek pu dam delilbanamne.

Yesaya 55:1

Allah el si Yahweh arye, ‘Israel ninye na dam yangakiba, narye teleb kibuka melinamne’ tenen, adomon yupu nyabuk. Anggun mek patasulu ninye nirya ara, narye kintineipse mek dekna kum, ur talye yanduka dobuka dina ati yalume. Anggun yo bok kum ninye ara, na dam yamunce, yo bok kum upmalibuk, anggun din ning ara, dekna kumce, urdem arye dopropmunce, dinamlume. Winipmanto ning ara, anggur tapu duk mek ap, sapi basam moum yung ap, akunum kintinipsise ning ara, dekna kum urdem arye yamunce dobuka dinamlume. Ati, na dam yanulume.

Yesaya 58:11

Na nyapsinye ning winipmunyopura, na Allah Yahweh arye, pia tuba talibuka bobasinirye, kalikisiniba, telebuk mikip arye unamlume. Tonda, anggun tuku ilimak ululuma babye, narye anggunti, pia tuba-tuba melibuka kalikisiniba, anggun din dipmunye babye bounamsile. Winipmanto ara, ninye arye koun ning koubikiba, mok weik cepliba, teleb kibuka palamle ning atonun, narye melipsiniba, teleb unamlume. Atonun, tonda mek pu ara, cena kumce, mek pia tuba balamle touk, pia melipsiniba, telebuk unamlume.

Yeremia 2:13

Aning ara, urdem ati kum nyapsine. Na mapu koprop Israel ninye arye, pia malye un ning bitinye talibikirye, malye weik unyake. Tonok ning ara, malye unyaka deice arye, sikda na bataknikirye, balye tam kilongoninyake. Nara ninye nirya ati, kam un mek pu atonunye unune. Bukni, sikce nati batakaninyake. Bitinye ning ara, mekwen lukamiki bukni, delilamlye ani, tuku dilikamlye bisik arye, mek weklamlya ani, amek nirya celdolamle. Aning atonun, sik bidamnye kanye aryuk tenebuka si erenyak ning ara, talye ninguk talibuka si erenyak bukni, aning arye sikti, kum meliptue. Yuk talye ning ati si erebikirye, nara bataknikirye, si kum ereninyake, Allah arye nyabuk.

Yeremia 31:25

Sik aninye noutamak, yata ninye do nirya, sikce, ‘Se, nun kum winiptibye,’ tenen, mikip kum mitang uple ninye nirya ara, narye mikip kilinamne. Tonda din patapliba, kisok biribiri alamle ninye ara, din ning arepneba, tuba tonap mikip unamake.” Allah arye nyapdeibukba, Yeremia kekebuk.

Yehezkiel 47:9

Amek ara, dan mutuku bin talak babye, pia mek telebuk, tuba banauk unamle. Wininamle mek noutam ara, ikan yala-yala nirya ara, kam ubikceba, ninye arye tomonamake. Atonun, talye bai tam kam ulamle ning babye, amekwen dam teleb kibuka unamake. Tonda, Laut Mati, garam weik uamuk mekwen babye, amitik mek outam balirye, amekwen deibukak weklyeura, tonap, amekwen pia teleb mekuk upnamlarya. Tonda, aminyan pia kum bataknamle. Dan mutuku do nirya ara, amek balamlye mutuku nirya ara, winilamlyeba, anoutam aryuk amutuku kam ning ap, palamle ning ap, ninye ap nirya, teleb kibuka unamake.

Imamat 11:36

Amalye mem ning saklirye, bol pipmalye ning yala nirya ara, malye kipdeipnamle bukni, mek pum deice sakmalye ning ap, tuku pum tam palibikceba, mek mekwen delilamle ning ap, aning bitinyeuk ara, malye mem ning deplirye, nong sakliba, nong sakuka, aning bitinyeuk piptua babye, malye kibuka kum delinamle. Tuba telebuk ulule.

Matius 25:46

Nyapnyopura, adiparyuk, sik malye unyak ninye ara, dopdeipniba, Allah arye wenebuka pia opnamle bukni, sik diksukum unyak ninye ara, telebukirye kam pia unamake. Yesus arye el mapu ati ayupu nirya nyabuk.

Matius 5:6

Sik kanye deibuka, telebuk winin nang ara, ani. Ara, Allah arye, “Diksukumuk wininamlulume,” nyasilye yupu ati, ‘Aninguk winiptibye’ tenen, pia patalul nang ara, sik kanye talima noutamak diksukum winin ning, pataplye ning nirya, Allah arye tuba melibuka arenamle. Ati ara, sik kanye deibuka, telebuk unyaka atonun, aminyan talak babye, apia unamake.

Yohanes 10:10

Ubula donanye arye, ubula dona ap, oltakana ap, domba basam kum danalina ap ati yanganyak bukni, nara adeiyok ati kum yase. Na domba nirya kam pia ubikirye, sik winin ning nirya ap, sik wininamak ning nirya ap, ‘Pia telebuk unamak’ tenen, yase.” Yesus arye nyabuk.

Yohanes 11:26

Yata ninye do nirya, nati dib tenebikirye, na ap talima dukdongobuka unyak ninye nirya ara, sik nong dibikce babye, pia kamuk unamake. Anyapmakin yupu ara, dib tenepmalam do?” Yesus arye Marta biti nyabuk.

Yohanes 4:10

Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk.

Yohanes 4:11

Nyabukura, akil ara moubuka bita kel kum kibukce, ayupu tamubuka nyabuk. “Naio, anda mekwen makau ap, tapu ap kum upmakile. Tonda, amek lokne pum bisik ara, kaurwe pia weik anya arye, kam una deiyok mek nyapnilam ning ara, dan tam arye kwebuka arepnutum do?

Yohanes 4:13

Nyabukura, Yesus arye akil ati tamubuka nyabuk. “Yata ninye do nirya, tuku lukamuk mekwen arye mek kwebuka dipting bukni, aminyan ara tuba tamubuka tonap mek patanuk unamle.

Yohanes 4:36

Dipkoprop kwaning yongobuka lin talak atonun talak ara akunuma. Wini talak ara kwaning lina deiyoknye birye, el dekna ning dekuka dololule. Winira, li talak akunum ulula anya arye, ‘Kwaning yala kouamuka deiyoknye ap, kwaning nong lina deiyoknye ap, neika kanye deipnamdak’ tenen, kwaning lina deiyoknye birye akunum lipnin banmale. El kwaning linmal ning nyapmasina ara, domon yupu nyapmasin bukni, ayupu nong ara, kam pia unamak ninye ati, nyapsine.

Yohanes 6:27

Narye nyapsine. Talye lyupmanto din ning ati, ‘Kanye deibuka dopropnamap’ tenen, pil dona meme. Aninguk tenena kum bukni, nara Ninye Mi Koprop Atonunye arye, din ning atonun ning arepsitinye aning ara, arepsiniba dopropmunyopura, aminyan pia kam unamlume. ‘Aninguk doproptibye’ tenen, pil donamlulume. Ninye Mi Koprop Atonunye ati ara, nun ni Allah arye elti, kanye akunum deibuke,” Yesus arye nyabuk.

Yohanes 6:35

Nyabikba, Yesus arye tamubuka adomon yupu nyabuk. Roti kwaning kam una deiyok ning ara, na uka. Yuknye ton kume. Yata ninye do nirya, nati moropnikirye, na dam yanamniyak ninye ara, wini talak arye dipdongobuka, doyanamle talak nirya ara, din pia kum patapnamle. Tonda, nati diba tenepnice ninye nirya ara, doyanamle talak nirya ara, mek pia kum patapnamle.

Yohanes 6:58

“Adomon yupu nyapmasina deiyok ara, im deice arye yayuk kwaning, nati nyasunune. Nun apu yapu ara, Allah im deice arye dopdeiamuk ning, el si mana kwaning bulubuka dilamik bukni, aminyan diplamik. Bukni, na nyapsin roti dobuka dinyak ninye ara, kam pia unamake. Ara, nati dib tenepnikirye, melinamniak ninye ara, pia kam unamake.” Yesus arye ayupu nirya nyabuk.

Yohanes 7:37

Atalak weik yuna yupra banmekba, sirya sum, ‘Asum ara weik mambul sum,’ tenelamik ning ara, Yesus tikukce yupu weik arye nyabuk. “Anggun kekepnuse. Yatanye do nirya, mek pataplyopura, na dam yalirye, mek dinamle.

Roma 5:21

Allah arye tukwak ninye ati, weika arye bico tenelamsuka deiyok ara, nyapnusine. Ninye im sirya, mutuku sirya nirya, malye winilamika deice arye dibinauk upra yangalamika ani, malye winina ap, dipna ap amu tam ulamik. Bukni, Allah bico tenenyamsukce, Allah el kanye aryuk, “Sikda diksukum un ninye,” nyabuka, teleb kibuka delisulule. Minop talak ara, malye winina ap, dibina ap mikip weik ulamuka anya arye, ninye nirya aning amu tam ulamik. Wini talak ara, Yesus pia diksukum ulamuka deice arye, kam una deiyok ning arisulul ati ara, Allah elcuk bico tenesilirye, talye melisulul ning amu tam unyabe. Nun Deiyoknye Yesus Kristus diksukum ulamukce, mambul pil dopsuka deice, Allah arye, “Sikda diksukum un ninye,” nyabuka, teleb kilisululba, pia kamuk unamabe.

Roma 6:23

Aning ara talye kum nyapsine. Deiyok ara nyapnusine. Ara, nunce dengna ning dolona ati, pil dobibiba, sik pil deiyok nang arye menenga ning, yo bok arisinyak touk, malye winin ninguk tenebuka, pia malyeuk winipra balamibyopura, sirya talak ara dipnamabe. Dibibyopura, Allah ap neika pia kum unamabe. Bukni, Allah bico tenesilirye, el kanye aryuk talye arisilye ning ara, nyapnusine. Ara, nun Deiyoknye Yesus Kristus ap, talima dukdongopsuk deice arye, sirya talak ara kam bukeipsilyeba, Allah ap pia kam unamabe.

2 Korintus 1:22

Winipmanto ning ara, basam amul sekikceba, yuk nang eibikirye, ‘E abasam ara, el ning’ tenen, kel biklamak touk, Allah arye nunti lakilin ning arepsuke. Ara, yuk ninye arye, nunti, ‘Anang ara, Allah el ning, tenepnamak’ tenen, Allah arye el lak kilin ning nun deice deipsuke. Winipsukce, ‘Aminyan talak ara, winipnamle ning, dipkoprop winipnamsile, tenepnamak’ tenen, kil taruk muruna atonun ning ati, minopce el Dib Kanye dobuka, nun talima ak dongopsuke. Ara, minopce areamsuk ning ati nyapsine.

Efesus 4:30

Tonda, anggun winimunye ning nirya ati, winibuka tenenamlulume. Winipniba, Allah El Dib Kanye arye, kekebuka eipnilirye, ‘Se, sik malye wininmake,’ tenepnilirye, ‘Malye kanye boplyak’ tenen, malye una kumce, pia diksukumuk unamlume. Allah El Dib Kanye ara, talye ati kum arepsuk bukni, basam amul seklamak atonun, Allah El Dib Kanye arepsuka deice arye, urasin kintinilina atonun winipsuke. Ati, adeice arye, nun kele. ‘Akunum lyepsukce, deksuka ati ara, daulamibya ani, sirya talak weik mambul sum ara, sirya memeproplirye, teleb kipdeipsilirye, el dam bobinamsil’ tenen, bikinyabe.

1 Peterus 1:22

Ara, Allah el dipkoprop yupu talibuka dobolbalamunya deice arye, malye un ning nirya akunum batakluma anya arye, yuk diba tenena ninye ati, dipkorop kanye deipdanuka, melilanauk ululume. Aning ati ara, pia dipkoprop anggun talima ap, kanye ap, arepdamunce, bico tenebuka, weik arye melinlanauk unamlulume.

1 Yohanes 5:20

Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.

Wahyu 7:16

Allah arye aninye ati, pia melilamlya ani, atalak arye dipdongobuka aminyan doryanamle talak nirya ara, din ap, mek ap, pia kum patanamle. Keting bupu din ning, sik nong deice pia kum teng-teng anamle. Aning atonun, yuk weik tin ning nirya arye, sikti, tin upliba, uk kum dinamle.

Wahyu 7:17

Aning ara talya ati kume. Deiyok ara, weik Ninye Deiyoknye bun ning noutamak bululnye, Domba Mi Atonye birye, sik deiyoknye pia unamle. Ara, domba wein nang arye, sik domba bico tenebuka, pia teleb kibuka weilamak touk, elce sikti, namin asa arye melibuka unamle. Elce minopce menekuka balibuk, sikda el aminyan tam dobolbaceura, Kam Una deiyok mek pu dam bobanamsile. Aninye sik mambul kanye bobuka, asing maka saknamle ning ara, Allah arye anang ati engena deiyok ning kum kipdeipnamsile. Kum kibuka deiplirye, asing maka cepdeipnamle ninye ara, tuba tonap pia kum engenamake.” Anye birye nyabuka laka nyapnuke. Na Yohanes arye nyapsine.