Yohanes 4:10 - Eipomek10 Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk. အခန်းကိုကြည့်ပါ။ |
Yohanes 4:10
49 ပူးပေါင်းရင်းမြစ်များ
Nyabukce, ayupu ton dukdongobuka nyabuk. “Ura, bisik banmaminya ani, mutuku si Horeb mutuku biminyopura, na Allah arye weik keil deice bukni, sik urasin tam tiknamane. Akeil dam yaminyopura, an boplum kama arye, weik keil kulapminyeba, akeil pum bisik noutamak arye mek pakuka saklibuk, Israel ninye arye dinamake,” Allah arye nyabuk. Aning nirya nyabuk touk, Musa arye Israel deiyok nang dinmekak, el kama arye weik keil mikip arye kulaplobukba, mek kutukuka yayukba dinmek.
Kum binmanto wamliba, tonokak uk bulamikce ninye ara, kanye deibukabikirye rusa basam im kurukuka balamak touk wininamake. Luba danamliba yupu kum talamice ninye ara, kanye deibuka mot senamake. Winibikirye, pin-pin kanye bobuka ubikirye, mot senamak ning ara, urdem ati kume. Ara, mok cena kumce, pata mutuku noutamak, Allah arye mek arepliba, mek oplirye banamle. Ninye una kumak babye, mek pu dobuka banamle.
Ati na si Allah Yahweh arye, anti wibuka yukupkina deiyok ara, ani. Ara nara, malye una pia kum diparyuk, diksukumuk ununa ara, ance, ‘Tukwak ninye nirya kel biknamak’ tenen, lak kipdeipnamlama ati, wibuka deipkise. Ati, anda teleb kanye bobuka, diksukumuk upra banamlame. Narye, an taruk talibuka, pia kalikuka melinamkine. Deiyok ara ani. Ara, ‘Na tenena ninye unamak’ tenen, wipdeiamse ninye ati, narye, ‘Wininamlulume, aning ara kum wininamlulume. Winipmunyopura, narye anggunti wininamsine,’ nyapdeipse yupu, ‘Pia diba tenepnamak’ tenen, an dobuka, sik dam dopkwetepnamkine. Anda, mambul pil dopra balaminya ani, deice arye aninye ara, ‘E, dipkoprob nun ni koproba Allah arye nyasilye yupu ara, nong upnamlarya’ tenen, moubuka kel biknamake. Winipminyeba, sik moubuka kel kina ati, ance sik talima pum tam dirina arepnamlyame. Winipmanto ara, lukunyan noutamak ara, ninye arye weisa ubikirye, menekuka bakibuk, yuk ninye awesa dirina eibikirye, teleb bisik balamak touk, ance yuk-yuk mutuku ninye nirya ati, dirina kipdeipnamlame. Ara, ‘Israel yala kum ninye ara, na dirina eibikirye, diba tenepnamniyak’ tenen, dirin deiyoknye erepdeipkine.
Narye mek kumak ati, ninye kum unyak mutuku, pata mutuku noutam mek kintinibuka delinune. Tonda mek kumce talye bukamlye mutuku noutam ara, mek arepneba, mek kutukuka balule. Amambul pil donuna ara, ‘Na wipdeiamse ninye, Israel ninye, ‘Naʼ tenen, ninye unamak,’ tenelamse ninye arye, ‘Amek dibuka, teleb ulamikirye, na si erebuka, nati si erenamniyak’ tenen, wininune. Wininuna ati, ninye arye talibuka kum weilamak ning, bai tam talye ulul ning ayala-ayala nirya ap, bai kam ap, bai ulamlirye lukunyan noutam balamle kupmana obuka dilul maka ap arye, nati si ereninyake. Amek balyopura, na wiamse ninye ati arepneba, dinamake.
Ati, an unamlam mutuku selal selamle tukwak nirya ara, narye mek dikeipkiniba, mek balamlirye telebuk unamle. Tonda, selal selamle tukwak mek arepneba banamle. Na Dib Kanye ara an deice deipkiniba, ance deipminba dadeipdanin banamak ninye sik deice deipnamne. Na mikip sik deice deipniba, teleb kipdeipnamsine. Winipnya deice arye, sik un ning nirya telebuk upliba, sik aninye ara yupa pia weik upra banamake.
Sik aninye ara, din ap, mek ap, ton kum patapnamle. Tonda, mek kumak, pia pata mutuku unamak bukni, sik nong deice keting kum dinamle. Ara, narye sikti, bico tenebuka lyepromsinye, na Allah arye sikti, pia tuba kalikuka melinamne. Pata mutuku noutam unamak bukni, narye sik aninye bobukapnirye mek pu dam delilbanamne.
Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.
Aning ara, urdem ati kum nyapsine. Na mapu koprop Israel ninye arye, pia malye un ning bitinye talibikirye, malye weik unyake. Tonok ning ara, malye unyaka deice arye, sikda na bataknikirye, balye tam kilongoninyake. Nara ninye nirya ati, kam un mek pu atonunye unune. Bukni, sikce nati batakaninyake. Bitinye ning ara, mekwen lukamiki bukni, delilamlye ani, tuku dilikamlye bisik arye, mek weklamlya ani, amek nirya celdolamle. Aning atonun, sik bidamnye kanye aryuk tenebuka si erenyak ning ara, talye ninguk talibuka si erenyak bukni, aning arye sikti, kum meliptue. Yuk talye ning ati si erebikirye, nara bataknikirye, si kum ereninyake, Allah arye nyabuk.
Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.
Atalak ara, pia teleb mek, Yerusalem mutuku noutam arye, kam una deiyok ning arelul mek pu doplirye, Yerusalem mutuku noutam ara weik banamle. Amek bukni, noutam arye bokuka kwaleknamle. Tonok tam mek ara, balamlirye, otam, keting kumul balamle tam mekwen, el si Laut Mati tam kibuka binamle. Ton tam mek ara, wilibuka, otam keting panalyangan tam deibuk laut mekwen noutam, el si Laut Tengah tam kibuka binamle. Amek ara, keting tamun nirya ara, bana uk unamle. Ara mok denelamle talak babye, dou malamle talak babye, pia bana uk upnamle. Amek ara, pia kum cenamle.
Anggunda, talima noutamak malye ulalum nang ara, anggun mapu ati, teleb ning arena ara, akunum kel biklume. Winilalum ning ara, mitik teleb, mitik arilulum bukni, anggun ni Allah, im deice ululnye birye, elti, morobikce ning arenamsil ning ara, weik arye el Dib Kanye arenamsile. Yesus arye el mapu ati nyabuk.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Allah arye diba tenen ninye nirya ati, kam pia bukeipnamsila deiyok ara nyapnusine. Ara, Allah arye ninye mutuku-mutuku nirya ati, bico tenenyamsukce, kanye weik arye areamsuka ati, el Mi Koprop tonokuk ulamuk bukni, tukwak ninye lyena ati arepsuke. Ara, ‘Yata ninye do nirya, el Mi Koprop ati, diba tenebicopura, pia kum dipnamak bukni, bol koplobuka kam una deiyok ning arepnibuk, pia kam unamak’ tenen, el mi tonok arepsuke.
Bukni, yata ninye do nirya, narye arebsinye mek dobuka dibikcopura, tuba tamubuka tonap mek kum patapnamle. Anggun mek patana kum bukni, na arebsinye mek dopropmunyopura, anggun kanye talima noutamak arye, mek pu atonun upsilyeura, mek pu doplirye, panabuka saklamle atonun winipnamsile. Winipnin balamlya ani, aminyan talak ara, pia kam unamlume,” Yesus arye nyabuk.
Nyabikba, Yesus arye tamubuka adomon yupu nyabuk. Roti kwaning kam una deiyok ning ara, na uka. Yuknye ton kume. Yata ninye do nirya, nati moropnikirye, na dam yanamniyak ninye ara, wini talak arye dipdongobuka, doyanamle talak nirya ara, din pia kum patapnamle. Tonda, nati diba tenepnice ninye nirya ara, doyanamle talak nirya ara, mek pia kum patapnamle.
Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.
Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Tonda, mek pia kum uamuk mutuku balamikba, mek weik patabukopura, Allah arye, ninye winipmanto kum pil dobuka deice arye, weik mutuku yangan keil noutamak arye, mek panabuka balamukba, nun apu yapu nirya arye, amek kwebuka kikliman dilamik. Aning mana dilamikce, akeil noutamak arye, mek panabuka balamukba, kwebuka dilamika deice arye, kum dibik. Aning nirya winilamuk touk, aning deice arye, winipmanto ning ton kel biktibye. Mutuku yangan keil noutamak arye, mek balamukba mek kwebuka dilamik touk, dipkoprop ning ara, Kristus menekuka balamukce, el pil dolamuka deice arye, nun apu yapu ati melilamukba, sik kum diamik.
Allah el kanye aryuk lyepsuke nyapmasina ara, talye ati kum nyapmasine. Deiyok ara, ani. Anggunce, Allah ati dib tenelulum deice arye, Allah bico tenepsilirye, talyeuk lyesulule. Aning ara, anggun teleb pil dobuka, diksukum ululuma deice arye, kum lyesulule. El kanye aryuk bico tenepsukce, lyepsuke. El kanye aryuk lyesulula ara, ‘Talye dem aryuk dib tenena deiyok ning arepniba, aninye arye, dib teneptinge’ tenen, arepsilirye, kanye deibuka lyesulule.
Ura, yata ninye do nirya, sik diba tenenyak ning nirya akunum batakikcopura, yata wiribuka arye, tamubuka bobitibyopura, ila tuba tonap, sik malye unyak ning ati bataktingce, urasin tamupting do? Kume, aning ara, kum winipmanto. Minop arye, kunukna akuk ulamik bukni, Allah el dirina dobuka sik talima noutamak aribukba, doprobikce el ulamle ning kel kiyamik. Tonda, Allah arye arisilye ning doprobik. Tonda, Allah arye el Dib Kanye aribukba, sik ton doprobik.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Allah arye nyapnuke yupu ara, ani. “Winira na tenyamse pil nirya ara, akunum sirya dakne. Aning-aning nirya min kum uamuk talak, na akunum ulamse ati, nara deiyok kouna deiyoknye ununa ati, na si ton Alpa nyaninyake. Tonda, aning-aning nirya kum danamle talak babye, nauk ara, pia kam unamna ati, na si ton Omega nyaninyake. Na si ton, Deiyok Kouna Deiyoknye ap, tonda, Sirya Dakna Deiyoknye ap nyaninyake. Yata ninye do nirya, mek pataplyopura, narye sikti, Pia Kam Una Mek kwebuka urdem arenamsine. Ara pia kam una deiyok mek pu arye, kam una mek kwebuka urdem arenamsine. Amek ara kum dekenamake.”
“Allah El Dib Kanye ap, tonda Domba Mi Atonye birye, el dopnamle kil ato nang, sik diba tenenyak ninye ap, sik nirya arye nati, ‘Yanamle,’ nyabuka moroninyake. Ayupu kekebikirye, diba tenenyak ninye nirya arye nati, ‘Yalyame,’ nyabuka moroninyake. Yata ninye do nirya, kam una deiyok mek ati patalul ninye nirya ara, na dam yangana telebe. Tonda, ‘Se, amek ara dobuka diptinye’ tenen, pia pataliba, kanye talima engelul nang nirya ati, narye kam una deiyok mek, dekna kum urdem arye kwebuka arenamsin ati, amek patalul ninye nirya arye kam una deiyok mek dolyangana telebuka.”
Aning ara talya ati kume. Deiyok ara, weik Ninye Deiyoknye bun ning noutamak bululnye, Domba Mi Atonye birye, sik deiyoknye pia unamle. Ara, domba wein nang arye, sik domba bico tenebuka, pia teleb kibuka weilamak touk, elce sikti, namin asa arye melibuka unamle. Elce minopce menekuka balibuk, sikda el aminyan tam dobolbaceura, Kam Una deiyok mek pu dam bobanamsile. Aninye sik mambul kanye bobuka, asing maka saknamle ning ara, Allah arye anang ati engena deiyok ning kum kipdeipnamsile. Kum kibuka deiplirye, asing maka cepdeipnamle ninye ara, tuba tonap pia kum engenamake.” Anye birye nyabuka laka nyapnuke. Na Yohanes arye nyapsine.
ကြော်ငြာတွေ