Yohanes 3:8 - Eipomek

⁸ Winipmanto yupu nyapnukine. Kumanya ara, elcuk tenelul touk talye dolule. El mikip aryuk dolulba, lelim kekelulum bukni, akunuma. Anggunce, ‘E, kumanya lelim kekepmapa ara, atam arye yanganmalaba, otam banmale,’ kum nyaptume. Aning atonun, Allah El Dib Kanye arye kam una deiyok ning areblirye, winiryuk ninye atonun kilisulul ninye ara, aning deiyok nirya ara, laka nyabuka kel kum kiptume. Ara, talye asing arye kum eipmanto ning atia. Yesus arye nyabuk.

Yohanes 3:8 ပူးပေါင်းရင်းမြစ်များ

Mazmur 107:25

Ara, Allah arye, “Winipnamlume,” nyalamuk touk, mikip weik kumanya balamukce, laut mekwen deice yanuka, pubukba, mek ara, longteng-longteng alamukce, weik mek talin-talin deibukce, welelamuk.

Mazmur 107:29

Ara, kumanya mikip weik arye balamuk ning ati, ‘Tunimaplyame,’ nyalamukba, kumanya Allah el yupu kekelamukce, adiparyuk tunimalamuk. Winibukba, weik mek talin-talin welelamuk ning babye, tunimalamuk.

Mazmur 135:7

Winipmanto ara, ani. Tukwak mutuku sirya, im sirya arye, elce arepliba, weik dua welelule. Tonda, elce arepliba, weik bebeya laklamle ning, bebeya lakalule.

Penghotbah 1:6

Tonda, kumanya atonun ulule. Kumanya ara, pu aplirye, bobuka iknapye tam, (arah selatan) tam balule. Atam arye ubuka bilirye, tuba tamubuka dabu tam ara (arah utara) binuka tuba welelule. Abisikuk pia binmalya ani, yanmalya ani, ayanmana, obinmana kilirye, mining bisikuk tamultolule. Asum-asum nirya ara, atam arye, otam ton balyopura, akunuma.

Yehezkiel 37:9

Winibuka, isin kum arepmok ati, Allah arye nati nyapnuke. “Se, anda ninye sirika arye, deiamkiknye ati nyapkine. Ance isin punanye bak, nyapnulyame. Pupun danamuk ninye nong nirya, isin dongona ati ara, winipnulyame. Allah Yahweh aning nirya talibuka, deice tam Weik Erenanye ulirye, ‘Winipnamne’ tenelul touk winilule. Elce nyapsile. Otam ap, eitam ap, outam ap, aulul kumanya nirya, dana-dana tam nirya ara, yamunce, minop talak oltaklamik ninye, sik pupun danamuk ning, yanuka weknulyame. Wini talak, sik nong dukdongobuka nong kipman deiamik ning nirya, nong pum bisik yanuka, pupminba, sik nong nirya buppu upliba, tuba tamubuka kam buknamake,” nyapnuke.

Yohanes 1:13

Allah el mapu kililamsuk nyapmasina ara, talye ninye arye deibiceba, dadeipdanin yangalamak ninye atonun ati kume. Tonda, ninye sik kanye aryuk, ‘Mapu deipnuyap,’ tenelamak atonun winina deice arye kume. Tonda sal arye, ‘Nun kilapu arye mapu deipnamsiyak,’ tenelamaka atonun ati kum nyapne. Aning kum bukni, aninye nirya ara, Allah arye sikti, ‘Na mapu unamak’ tenen, wipdeiamsuk deice arye, Allah el mapu koprop kililamsuke.

Yohanes 3:7

Ati, narye, ‘Yatanye do nirya, Allah arye tuba tamubuka tonap winiryuk ninye atonun kum deipsilyopura, Allah lyeplirye, anye bira el kanye talima kum talinamle,’ nyapmakin yupu ati, lukdanuka teniltona meme.

Yohanes 3:9

Nyabukura, Nikodemus arye, “Se, naio, ayupu nyapnilam ning ara, yata wiribuka winipsutu do?” nyabuka asipdeyuk.

Rasul 2:2

Ubukura, unmeka ani, weik kum anye dobuk akarye lelim weik arye nyalamle touk, weik lelim im deice arye yayukura, sik bukmek aik pum dana-dana nirya wekuk akarye, weik lelim nyanmok.

Rasul 4:31

Akunum morobikopura, sik bulubuka wekmek aik nirya, weik arye long-long abukura, Allah El Dib Kanye sik talima ak nirya wekukura, langdibuka talyamuka deice arye, sik nirya arye ilil kum asa weik mikip arye deiyok koubik akarye, Allah el yupu peterelamik.

1 Korintus 12:11

Allah el mikip arye, el pil dona deiyok ning areselilye ning ara, yala yuk-yuk ulul bukni, anirya ara, Allah El Dib Kanye aryuk aresulule. Tonda, dib tenen ninye nirya ton batakana kum anggun nirya ati, el kanye aniryuk tenesilye touk bokuka yuk-yuk arisulule.

1 Korintus 2:11

Yatanye birye, yuknye biti, anye bira el kanye talima noutamak tenelul ning kel biktu do? Kume, aning kum winipmanto. Aning tenelulnye, eluk ara, el kanye talima noutamak tenelul ning kel bikilule. Aning atonun, Allah El Dib Kanye aryuk, Allah el tenelul ning kel kilule. Ninye nirya arye kel kum kiptibye.

1 Yohanes 2:29

Anggun kele, Yesus ara malye ning tonok babye kum winilule. Pia telebuk ulula ati, el mapu ababye telebuk unyake. Ara, yata nang do, nirya, sik teleb-telebuk unyak ninye ara, sik nong ara kam ulamik bukni, sik kanye tenen ning ap, sik talima ap, dipna atonun ulamukbuk, Yesus lyepsukce kam bukeipsuka ati, wini talak ara, telebuk unyake, nyapne. Ara, nun nirya babye wininyaba ati, na Yohanes arye nyapne.