Yohanes 3:36 - Eipomek

³⁶ Yata nang do nirya, Allah el Mi Koprop ati, diba tenebicopura, Allah arye kam una deiyok ning ariliba, pia kam unamake. Bukni, Allah el Mi Koprop ati, ‘Nun like’ tenen, batakice ninye nirya ara, Allah arye aninye ati, yu kiplirye, weik arye wenebuka opnamle ati, kam un ning kum dopdopnamake. Sik dibikibuk, tuba tamubuka tonap, kam pia kum unamake. Allah arye aninye wenena ati, el yu sik deice tuba delinamle. Yohanes arye ayupu nirya nyabuk.

Yohanes 3:36 ပူးပေါင်းရင်းမြစ်များ

Ayub 33:28

Tonda, anye birye, “Nara walamnik nang unyakak binmanto uapsebuk, Allah elce nati, Anye bira akunum diplamik nang unyakak ara, bana kume,” nyabuka lyepropnuke. Winipnukba, wini talak nara kam tuba unamne. Tonda, dirina ara tuba dinauk unamne,” nyanamle.

Mazmur 2:12

Aning atonun, anggunce Allah el Mi koproba ati, “Nun ni,” nyabuka, el amu tam umunce, el dam yok sirim talibuka, yana kinamlulume. Wininamluma deiyok ara, ‘Allah el si Yahweh arye wenebuka kum opnamsil’ tenen, wininamlulume. Tonda, ‘Mangkau arye Allah el yu nun deice deipsilyak’ tenen, moubuka wininamlulume. ‘Allah el Mi koproba arye, lyepnamsil’ tenen, el dam unyak ninye nirya ara, sik unamak ning nirya ara, telebuk unamle.

Mazmur 36:9

Na nio, an uminyak arye, sik din aning-aning nirya ara, ancuk, an dam unyak nang ati, pia weik arye melibuka arenamsilyame. Winipmanto ara, ninye arye, pia teleb balamle mek noutam arye, ‘Mek dipnuyap’ tenen, mek kwebuka dibikirye, kanye delilamak touk, ance teleb ning nirya melibuka aresiminya deice arye, nun kanye deibuka unamabe.

Mazmur 49:19

Atonun, sik bona weik nang ara, sik kam tuba unyak talak arye, ‘E, nunda pia teleb kibuka unyabe. Nunda pia teleb nang uka,’ tenelanyak bukni, sik babye talye dadipnamakca! Diba, tukwak mutuku noutam, tuba kam unyak talak ara, yuk nang arye, sikti, “Se, anggunda, kel weik bikimunce, teleb pil dobuka bona pia weik tonun talimunya deice arye, pia teleb ululume,” nyabuka, sik anang ati, eibuka si erebikirye, teleb yupu nyanamak bukni,

Habakuk 2:4

Habakuk ance, sik Kasdim mutuku ninye ati, moubuka dimince, tenipnamlyame. Sikda, sik kanye talima erebikirye, ‘Nuncuk nun bidamnye arye, teleb ulilanamabe,’ tenenyake. Sik kanye talima pung unyak ninye kum unyake. Bukni, kanye talima noutam dib tenebuka, moupropnamak ninye ara, nati dib tenekirye, diksukum ninguk wininamake. Ara, sikce na Allah ati, ‘Elcuk nunti kalikuka melinamsile’ tenen, dib tenenyak deice arye unyake.

Bilangan 32:11

“Pia dipkoprob nyapsine. Anggunda, narye, ‘Arepnamsine,’ nyamsese yupu moubuka kum taliplume. Anggunce, ‘Kum wekelebitibye,’ tenepmalumce, ilil upmasila ati ara, na dipkoprob nyapsine, anggun Mesir mutuku noutam ulamlumba, narye lyepsisirye dobuka boyanamsise nang ara, otam mutuku pia kum dinamlume. Ara, keting tamun dua puluh tahun itam akunum kiyamlye nang nirya ara, narye sik apu yapu Abraham ap, Isak ap, Yakub ap ati, ‘Ateleb mutuku arepnamsine,’ nyabukanyalin yupu nyapdeiamse mutuku ara, anggunda kum wekenamlume. Ara, talye ati kume. Deiyok ara, sik anang nirya ara, narye nyamsese yupu kum kekebikirye, kum dobolbanyake. Nati, yanipmaniace, sik kanye pum tam arye, na nyapsi yupu kekebuka kun unyaka atia. Ati, anang nirya ara, oteleb mutuku kum wekuka unamake.

Matius 25:46

Nyapnyopura, adiparyuk, sik malye unyak ninye ara, dopdeipniba, Allah arye wenebuka pia opnamle bukni, sik diksukum unyak ninye ara, telebukirye kam pia unamake. Yesus arye el mapu ati ayupu nirya nyabuk.

Markus 16:16

Peterelbimunyebuk, yata kil do, yatanye do nirya, na yupu diba tenebikceura, mek dongopmunyopura, Allah arye aninye lyenamle. Bukni, yata nang do nirya, na yupu diba kum tenebikceopura, Allah arye aninye ati, el dam kum dobuka deipnamle. Pia weneplirye, yukak dopkweteplibuk, sik ap, el ap, neika pia kum unamake.

Lukas 2:30

Aning ara talya ati kum nyapne. Deiyok ara ninye lyena ati, Lyena Deiyoknye dopkwetepmasilamnye, tukwak lake yalyeura, ninye mutuku-mutuku elinnamake. Tonda na babye, akunum eipmana anya arye, wini talak ara, na dibina telebuka.

Lukas 3:6

Amenyan ara, ninye mutuku-mutuku nirya Allah lyeplirye, ninye kanye talima pia talinamsil ning deiyoknye eipnamaka” atia.’ Yesaya arye nyabuk. (Yesaya 40:3)

Yohanes 1:12

Bukni, yata mutuku ninye do nirya, Kanye pum tam Dirina Deiyoknye bira, el si Yesus ap ati, dib tenebuka, kanye deibuka dololamik ninye nirya ati, weik mambul ning areamuk. Ara, Allah el mapu koprop kilina deiyok ning aribuk deice arye, elti, dib tenelamik ninye nirya, Allah el mapu koprop kililamukba, Allah arye aninye lyelamuk.

Yohanes 10:28

Narye na mapu ati, kam pia una deiyok ning arepnibuk, pia kam unamake. Sik pia kum dipnamake, kume, kumdanamake. Yata nang do nirya, na mapu na taruk pum bisik talinibuk, yuk nang arye dalubuka kum dopropnitinge.

Yohanes 3:3

Nyabukura, Yesus arye domon yupu atonun yupu deice arye tamubuka nyabuk. “Na dipkoprop nyapkine. Yata nang do nirya, nun ni yapu arye winiryuk deipsikikba, winiryuk mapu ulamap touk, nun kanye talima noutamak ara, Allah arye ila tamubuka tonap winiryuk ninye atonun deipnamsile. Kanye talima winiryuk ninye atonun kum deipsilyopura, Allah lyepsilirye, nun kanye talima talinamsil ning nirya ara, aninye kum eibikirye kum dopropnamake,” nyabuk.

Yohanes 4:36

Dipkoprop kwaning yongobuka lin talak atonun talak ara akunuma. Wini talak ara kwaning lina deiyoknye birye, el dekna ning dekuka dololule. Winira, li talak akunum ulula anya arye, ‘Kwaning yala kouamuka deiyoknye ap, kwaning nong lina deiyoknye ap, neika kanye deipnamdak’ tenen, kwaning lina deiyoknye birye akunum lipnin banmale. El kwaning linmal ning nyapmasina ara, domon yupu nyapmasin bukni, ayupu nong ara, kam pia unamak ninye ati, nyapsine.

Yohanes 5:24

Yesus arye ayupu nyabukce, ayupu dukdongobuka nyabuk. Na dipkoprop yupu nyapsine. Yata ninye do nirya, na yupu kekebikirye, na dopdeipnuknye Allah ati, dib tenebiceura, akunuma, adiparyuk kam pia una deiyok ning doprobikirye, kam pia unamake. Sirya talak ara, Allah arye aninye wenebuka kum opnamle. Ara, diba tenena ninye ara, sikce diamikce ninye tam batakuka, kam pia unamak ninye tam akunum kilonyaka ati nyapsine.

Yohanes 6:58

“Adomon yupu nyapmasina deiyok ara, im deice arye yayuk kwaning, nati nyasunune. Nun apu yapu ara, Allah im deice arye dopdeiamuk ning, el si mana kwaning bulubuka dilamik bukni, aminyan diplamik. Bukni, na nyapsin roti dobuka dinyak ninye ara, kam pia unamake. Ara, nati dib tenepnikirye, melinamniak ninye ara, pia kam unamake.” Yesus arye ayupu nirya nyabuk.

Yohanes 8:51

Tonda ayupu dipkopropuk nyapsine. Yata ninye do nirya, na nyasinye yupu diba tenebikirye, pia talibuka dobolbanyak ninye nirya ara, sik nong dibikce babye, pia kamuk unamake,” Yesus arye nyabuk.

Rasul 14:2

Sik diba tenebik bukni, yuk Yahudi yala nang arye, ara, Yesus ati diba kum tenebik nang ara, ‘Paulus ap, Barnabas ap, nun lik ati, yuk nang anyak malye yupu nyaptibyeura, abitinye nang arye sik petererurak ning ati yanipnamak,’ tenebikce, Yahudi yala kum ninye ati minina yupu nyalamika deice arye yu kililamikak Yahudi yala kum ninye arye Paulus ap, Barnabas ap, ati, yuk anye bobik.

Roma 4:15

“Winina meme,” nyana yupu ulul mutuku nirya ara, wenena ap, on ning ap ton aupnamle. Amem yupu kum uptopura, ninye arye ayupu kum yaniptinge bukni, im sirya, mutuku sirya nirya ara, amem yupu aulyeba, kel kinyak deice aryuk, ninye arye yaninyake.

Roma 5:9

Wini talak ara, nun kele. Kristus obikba el ining biyuka deice arye, nun malye un ning nirya kilipsukba, Allah arye, “Yesus apil dobuk deice arye aninye ara, diksukum ninye ubuka deipsine,” nyabuka teleb kipdeipsuke. Aning ati ara, nun kele. Yesus ap kanye talima dukdongobuka unyaba deice, Allah arye malye winin nang nirya ati, yu upliba sikti, lepsisikuka bokeiplirye, amalye winin ninye obuka sirya daknamle talak ara, Kristus arye nun diba tenenyap ninye ati lobuka lyepnamsile.

Roma 8:1

Ura, na kayapo, weik mambul yupu ara nyapnusine. Yata ninye do nirya, Yesus Kristus ati diba tenebikirye, el ap kanye talima dukdongobuka neika unyak ninye nirya ati ara, Allah arye, “Anggunda malye winilulume,” nyabuka kum wenepnamsile. Yesus ap kanye talima dukdongobuka unyak ninye nirya ati ara, Allah arye, kum bataknamsile.

Galatia 3:10

Winisulul bukni, yata ninye do nirya, sikce, ‘Kume, Musa sekamuk yupu, mem yupu kekebibirye, ayupu moubuka talibibirye, teleb kibuka dobolbanyaba deice aryuk, Allah arye kanye deipnamsile,’ tenenyak ninye nirya ara, sikda bicoe. Allah arye anang ati diksukum kum kilinamle. Aninye ara wenepnamle. Aning deiyok ara ani. Allah yupu sekeiyamik yupu noutamak ara ayupu ton aubuk. ‘Musa sekamuk buku noutamak, mem yupu nirya ara, tonok ning babye batakna kum arye, pia teleb kibuka kekebikirye, kum dobolbanyak ninye nirya ara, Allah arye wenebuka oplopnamle. Allah arye nyabuk.’ (Ulangan 27:26) Allah arye nyabuka ati, ‘Musa yupu kekebuka diksukumuk dobolbabya deice arye, Allah lyepnamsile,’ tenenyak ninye ara, sikda bicoe. Ara, amem yupu nirya moubuka talipnirye, tonok ning babye batakna kum arye, diksukum una ara kum winipmanto ati, Allah arye aninguk talinyak ninye ati wenebuka oplopnamle.

Efesus 5:6

Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.

1 Tesalonika 1:10

Tonda, ‘Allah arye el Mi Koprop Yesus dibukce, kam bukeibuknye birye, im deice arye dolyanamsil’ tenen, pia kanye deiplumce, kintinibuka dinauk ululum ning ara, aning ton laka nyaninyake. Ara, Allah arye, malye winilamice nang ap, malye winin ning nirya ap ati, weik arye weneplirye, oplopnamle talak noutamak ara, Yesus arye lyebuka loplopnamsile.

1 Tesalonika 5:9

Aning ara, talye ati kum nyapsiabe. Kume, Allah arye nunti wibuka deiamsuk ning ara, ‘Narye wenebuka opnamne’ tenen, kum wibuka deipsuke. Aning kum bukni, nun Deiyoknye Yesus Kristus arye, pil dopsuka deice arye, ‘Lyen ning, pia kam un ning dopropnamak’ tenen, Allah arye wipsuke.

Ibrani 10:29

Musa sekamuk yupu yanilamik nang oltakalamik ning ara, mitik ikin uamuk bukni, Allah el Mi Kopropa ati, yaniltanyak ninye ati, Allah arye wenebuka onamle ning ara, ikin weik kum unamle do? Kume, na kayapo, anggun ton teneipdelulume. Allah arye, “Wininamsine,” nyabuka, nyalilamsuk yupu deice, diksukum ulisilye ning, ‘Nong unamle’ tenen, Yesus el ining arepsukba, biyuke. Aning ara, weik mambul bukni, sik malye nang arye, ‘Kume, aining ara, talye ninguk ulule. Malye ning uka,’ tenenyak ninye ara, Allah arye aninye ati, weik arye weneplirye, kum onamle do? Tonda, Allah El Dib Kanye arye, bico tenesilirye, el kanye aryuk melisilye Dib Kanye ati, el nong deice malye yupu nyabuka, lyek-lyek alamak ninye ara, weik arye wenebuka kum onamle do? Kume, weika arye opliba, aninye ara ikin weik unamake.

Ibrani 2:3

Malaikat arye, nyalamik yupu mitik mambul bukni, ayupu yanilamik ninye ati, ‘Dauplye,’ tenena kum arye, wenebuka olamuk. Anang olamuka anya arye, wini talak weik mambul lyena ning kintinipsuk ning ara, ‘Mambul kume’ tenen, batakipyopura, Allah arye nunti, ‘Dawaplye. Sikti kum wenepnamne,’ tenepnamsil do, kum do? Kume, aning kum winipmanto ati, Allah arye ninye lyena ati kintinipsuk ning batakipyopura, dipkoprop opnamsile. Ayupu nyapmasina ara, nun Deiyoknye Yesus arye, ninye lyena ati, kai teleb yupu deiyok koubuka minyuma arye laka nyalamukba, el yupu kekelamik nang arye, nun dam yangalamikce nunti, “Yesus arye nyalamuk yupu ara, ani-ani,” nyabuka, nun dam laka nyabuka lak koprop peterelamsike.

Ibrani 3:18

Tonda, Allah arye, “Na mikip arye nyapsine, Aning ara, na ap dikdik sena ati, kintineipsise mutuku ara, pia kum dolonamake,” nyalilamuk ning ara, ‘Yata ninye ati, ayupu nyabuk do?’ tenena kume. Ara, el yupu ati, diba tenena kum arye, yaniltalmik ninye ati nyabuke. Yuk ninye ati kume. Allah el yupu yaniltalamikce, kekebuka kum dobolbalamik ninye ati, yu ubukba batakuke.

Ibrani 3:19

Aning ati ara, nun kel biktibye ning ara, laka akunum upsile. Allah arye dikdik senak ati, teleb mutuku kintinibukak ara, aubuk bukni, sik amutuku kum wekmanto ulamik ning ara, diba kum tenyamika deice arye, ateleb mutuku kum wekmanto ulamik. Yuk deiyok ati kume.

Wahyu 21:8

“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.