Yohanes 20:9 - Eipomek

⁹ (Atalak ara, Yesus el wipdeiyamuk nang ap, el yupu kekelamik ninye nirya ap, Allah yupu noutamak nabi nang arye sekamik ning ara, moubuka kum kel bikamik. Ati, kel bikamika deice arye, ‘E, Yesus dipnamle bukni, tuba tamubuka tonap kam buknamle’ tenen, moubuka kum bikik. Aning ara min kum tenebik.)

Yohanes 20:9 ပူးပေါင်းရင်းမြစ်များ

Mazmur 16:10

Aning ara, urdem ati kum nyapne. Na dipnya babye, Allah ance kum bataknamnilame. Winipnimince, ance wibuka deipnulumnye, pia diksukum winibuka telebuk wininunye bira, dipnyopura, tuku pum tam weipnica babye, nong ara, kum lyupnamnile. Kam bukeipnamnilama ati nyapne.

Mazmur 22:15

Tonda, kira tuku dobuka, ketingak deipmakibuk, keting buppu arye sesal lelamle touk, na mikip ara, akunum kum upnile. Na dilkorona ara, si maka dilkwetena kum upnilirye, sesal lenulula ati, kat ning atonun unulule. Adeice arye, na sitang ara sesal lepniliba, yupu kum nyapmanto unune. Wininye talak ara, na ni Allah ance batakniminyeba, diamice nang butbuta deice malamak atonun unune.

Yesaya 25:8

Dibina deiyok ning akunum kum kipdeiplyopura, Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Ati, el mikip deice arye ninye mutuku sirya im sirya nirya ara engenyaka deiyok ning nirya ara, kum kipdeiplirye sirya daknamle. Tonda Allah arye, ‘Na tenen nang unamakʼ tenen, minop talak wibuka akwamsuk nang ara, tuba tonap teleb kipdeipnamle. Ara, yuk-yuk mutuku nang arye, el ‘Naʼ tenen, nang ati, sik nong deice ikin ning weik delilamikba, alye dakuka ulamik ning deiyok nirya ara, Allah arye aning dobuka pia pere sukum donoknamle. Ura, aning nirya ara, Allah Yahweh aning-aning deice tam mikip weik ululnye birye, el bidamnye akunum nyapdeipsuka ati, aning nirya ara, dipkoprob nong upnamle.

Yesaya 26:19

Nun ni Allah, an mapu koprop bukni, akunum min arye diamik nang ara, aminyan ance kam bukeipminba, kam unamake. Sik deiamik nang ara, akunum tuku palibuka wiamik bukni, sik nong ara, tamubuka kam buknamake! Tamubuka kam bukmunyopura, weik tonun kanye deipmunce, weik yupu weik tonun mot nyapnamlume! Winipmanto ara, mok purye tuku deice saklirye, dua pito weleplirye, dirina arye teleb ulilamle touk upnamle. Aning deiyok ara, Allah ance an mapu akunum diamik ara, tuba tamubuka, kam bukeipnalame.

Hosea 13:14

Anggunda, pia malye-malyeuk winilulum ninye ati, ‘Aninye dibikiba, tuku pum tam weipnamak’ tenen, narye anggunti lyepnamsin do, kum do? Kume, narye amalye winimunye ninye ati, kum lyepnamsine. Anggunda, tukwak mutuku ninye dibinyak ninye unyakakuk, talibuka unamlume. Se, uk din ning, weik arye weleplirye, dilamle bukni, ninye weik tonun dibinamake. Tonda, narye amutuku nirya ara, obukapnirye nirya opneba, dipnamlume. Dipmunyeba, weipsikcopura, anggun nong lyupnamsile. Dipkoprop, anggun malye winilulum ninye ati ara, narye anggunti, bico pia kum tenenamsine. Wenen ninguk arenamsine.

Matius 22:29

Ayupu talye asipdeyikopura, Yesus arye tamubuka nyabuk. “Allah arye nyapdeibukba sekeiyamik yupu ap, Allah el pia mikip weik ululul ning ap, kum kel bikamluma ati, anggun walwal arye asipdenmanulume.

Lukas 24:26

Ninye weik lyeplirye, sik kanye talima talinamlanye, Kristus ara, elti, Allah arye utenebuk. Ara, ‘Sik malye nang arye el nong deice ikin ning weik deibiki bukni, donmalya ani, diplirye, kam bukuka pia teleb dirinak im deice welepnamle,’ tenyamuk ning ara, kum tenepmalumce nyapmanurum do?” nyabuk.

Lukas 9:45

Yesus arye ayupu nyabukura, el mapu ara, kekebik bukni, bita kum kel bikik. Allah arye ayupu deiyok duknubuk anya arye sik bita kum kel bikik. Tonda, sik ilil ubuk ati, “Anyapmasilam yupu deiyok ara, laka nyapsilyame,” nyabuka Yesus ati kum asipdeyik.

Yohanes 2:22

Adeiyok ati nyabuka anya arye, aminyan talak malye nang arye Yesus obikopura, dibuk bukni, Allah arye ila tamubuka Yesus kam bukeibukopura, el mapu ara, ‘Se, aning deiyok ati nyapsuke’ tenen, moubuka tenebikce, bikike. Winibukopura, minop talak Allah yupu sekamik ning ap, Yesus arye nyabuk ning ap ati, diba tenebik.

Rasul 17:3

Paulus arye, “Narye anggunti, ‘Yesus el yupu anye,’ nyabuka lak nyasininye bira, talinye kume. Yesus elda, ‘Allah arye, ninye weik lyepnamle’ tenen, mince wipdeiamukce, wini talak dopkwetepsuknye bira, Mesias akunume. Yesus ara, Kristus ulule,” nyabuka ayupu nirye lak nyalamuk.

Rasul 2:24

Yesus dibuk bukni, Yesus dipnarye, el nong tup ara, lyupmanto kumnye binye arye, Yesus dibuk bukni, Allah arye tamubuka kam bukibuk.

1 Korintus 15:4

Nun wenena ati Allah arye, oplopsutu bukni, nun pununa ati, Yesus obikbuk, dibukopura, el weinak ati el nong dobuka keil deiya pum bisik dongobik. Dongopmeka ani, like winilye sum daunmoka ani, like winilye sum akunum ubukopura, Allah yupu noutamak sekeiyamsik touk, Allah arye, Yesus kam bukeibukba, kam tuba ulule.