Yohanes 20:19 - Eipomek

¹⁹ Asum bukni, akunum inibukba, Yesus el wipdeiyamuk nang nirya, tonok aik bulubuka unmek. Sikce, ‘Se, Yahudi yala deiyok nang arye wenebuka opsicak’ tenen, ilil weik ubuka ati, anyaik buplan tirikdongobikce, kunci dakik. Anyaik pum daunmeka ani, Yesus ara sik kan-kan noutamak talye karin panabuka tikilyayuk. Panabuka tikilyayukce, anang ati nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk.

Yohanes 20:19 ပူးပေါင်းရင်းမြစ်များ

Mazmur 122:8

Aning ati ara, nun kayapu ap, nun weit yapu ap, nun du yapu ap nirya arye, ‘Yerusalem mutuku unyak nang nirya, kanye deipmakirye, tonok kanye bobuka, telebuk wininamak’ tenen, Allah moronamabe.

Matius 10:13

Anyaik nang arye anggunti, nong kanye deibuka melipsikcopura, akunuma. Bukni, anyaik nang arye anggunti, nong kanye deibuka kum melipsikirye, bataksikcopura, ‘Allah arye teleb updeipnamsile,’ nyapmamunye yupu ara, ila tamubuka dopropnamlulume.

Markus 16:14

Daunmeka ani, yuk talak ara, Yesus arye 11 wipdeiamuk nang din dibuka wekmek aik noutamak, Yesus talye karin arye panabuka tikilyayuk. Tikilyayukce asebelas nang ati wenebuk. Ura, Yesus min kum obik talak, kam ulamuk talak arye, ‘Na dipmanya tamubuka kam buknamne,’ nyalamukbuk sik mitik touk diba tenelamika anya arye, el akunum dibukopura, sikce, ‘Kume, akunum dipmale,’ tenebika ati wenebuk. Ton ning ara, Yesus akunum kam bukukbuk, eibik nang, weika arye laka nyanmekbuk, malye kibuka, mankau kanye bobukabikce, diba kum tenepmek ning ati wenebuk.

Yohanes 14:27

Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.

Yohanes 16:22

Aning ara atonun, wini talak ara na mapu anggun kanye imun usilye talak ara, wini talak akunum upsil bukni, aminyan tam na ap, anggun ap ansinibuka eipdabirye, anggun pin-pin asa arye unamlume. Winipmunyopura, yuk ninye arye anggun kanye pin-pin asa unamlum ning ara, kume, kum daneipsitinge.

Yohanes 16:33

Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

Yohanes 20:21

Yesus arye sikti, tuba tamubuka tonap nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk. Tonda, “Na Ni Koprop Allah arye, ‘Na yupu dobuka peterelbinamle’ tenen, dopdeipnuk touk, narye anggunti, ‘Na laka teleb yupu ninye lyen yupu dobuka peterelbinamak’ tenen, dopdeipsine,” Yesus arye el wipdeiyamuk mapu ati nyabuk.

Yohanes 20:26

Tomas arye, nyabukba, sik nirya minggu tonok talye daunmeka ani, like tekbarye sum akunum ubukura, sik mince ulamik aik pumuk bulubuka wekmek. Wekmek ak arye, buplan tirikdongobuka kunci dakmek. Tomas ap, sik nirya anyaik pum neika unmeka ani, buplan tirikdongopmeka babye, Yesus arye sik kan-kan noutamak panabuka tikilyayuk. Panabuka tikilyayukce, nyabuk. “Anggun ilil kanye bona kume. Ilil asa una kumce, kanye deibuka telebuk unamlume,” nyabuk.

Yohanes 21:1

Yesus arye, el mapu dam akunum laka kibukce, anyaik batakuka biyukba, sik nirya daunmeka ani, aminyan talak ara, Yesus tuba tamubuka tonap, el mapu dam talye karin arye panabuka tikilyayuk. Panabuka tikilyayuk mutuku ara, weik mekwen si ara, Tiberias Mekwen dam tikilyayuk. Atalak winipmek ning ara laka nyapnusine.

Yohanes 21:14

Atalak ara, Yesus kam bukuk talak arye diprongobuka, el mapu dam panabuka tikilyayuk ning, like winilye ning akunum kibuk.

Yohanes 7:13

Winibuka yuk-yuk murmurulanmek bukni, sik awekmek ninye nirya arye, ‘Yahudi yala deiyok nang kekepsikirye, malye kanye bobuka wenepsikcak’ tenen, Yesus ati yupu laka kum nyanmek. Murmurulanauk unmek.

Rasul 1:3

Yesus el kanye ikin ning akunum doprobukopura, Yesus elce wipdeiyamuk nang ati, ‘El dipkoprop kam bukmale, tenepnamniak’ tenen, sik dam panabuka tikra balamuk akarye, ‘Yesus ara, dipkoprop kam bukuke,’ tenebikirye, ‘Sik kanye kum boktopnamle’ tenen, el dipkoprop ninguk winilamuk. Ara, ‘Dip do, tilila do, kum tenepnamak’ tenen, dipkoprop ninguk weika arye winilamuk. Winilamuk akarye, el wipdeiamuk nang dam yanuka nyalamuk. Ton sum arye, ton sum arye, yupa weik like 40 talak ulamukce sik kan-kan yangalamuk akarye kutukuka tikilyangalamuka ani, Allah elti, dib tenenyak nang lyepsilirye, talisulul yupu, el mapu ati laka nyalamuk.

Roma 15:33

Narye anggunti Allah morosunun ning ara, tonok ning tonap nyapnusine. Ara, ‘Walana ap, olana ap, ikin kanye bona ap nirya kumce, kanye deibuka teleb una ati, deiyok ning arisilya deiyoknye bira, Allah ulula anya arye, el ap, anggun nirya ap, kanye talima dukdongobuka neikauk umunyopura, telebuk unamlum’ tenen, Allah morosunune. Na Paulus arye, anggun Roma mutuku umunye ninye ati nyapsine.

1 Korintus 15:5

Kam bukeibukura, aminyan ara, ‘Peterus eipnunil’ tenen, laka panabuka tikukba, Peterus arye, Yesus eibuk. Laka tikukba, Peterus eibuk touk, aminyan talak ara, tuba tamubuka tonap el mapu, sik 12 nang unmeka noutamak arye, panabuka tikukba, sikce ton Yesus eibik.

Efesus 2:14

Minop talak ara, nun Yahudi yala nang ap, anggun Yahudi yala kum nang ap, neika dukdongobuka una kumce, pia yuk-yuk ulamubu. Bukni, wini talak ara, Kristus el nong tonok dibuk deice arye, nunda insinipdeipsuke. Min arye, nun danatam, anggun dana tam anoutamak ara, weik cang poka atonun uamukba, kanye talima wilipdanamuburye, eipdanmanto kum ulamubu. Winibuka ulamubu bukni, Kristus arye, apoka atonun domsuk ning ara, daklobukce tonok yala nang atonun, akunum dukdongopsuke. Winipsuka ara, Yesus Kristus arye, nun pununa ati, el dipsuk deice arye, lyepsuke.

Efesus 6:23

Telebe, sik dib tenebik ati, nun weit yapu atonun ninye nirya ati, Allah moronun ning ara nyapnusine. Ara, ‘Nun Ni Koprop Allah ap, nun Deiyoknye Yesus Kristus ap, sik bitinye arye, anggun nirya ati, mambul ning arenamsirak’ tenen, Allah morosunune. Arinamsirak ning ara, ani. Ara, yuk nang ap kanye deibuka, nimalye arye neika una deiyok ning ap, yuk nang ati bico tenebuka melildana deiyok ning ap, Allah ati weik arye diba tenena deiyok ning ap, ‘Adeiyok ning nirya arepsirikceura, pia telebuk unamak’ tenen, narye anggunti, Allah morosunune.

Pilipi 1:2

Nun Ni Kopropa Allah ap, nun Deiyoknye Yesus Kristus ap, sik bitinye arye, anggun Pilipi mutuku dib tenelamlum ninye ati, bico tenesururakce, anggun kanye aryuk melisirice ning ap, ‘Yu ulana kumce, kanye deibuka telebuk neika unamak’ tenen, arisilye ning deiyok ning ap, arisulule. ‘Aning nirya ara, tuba-tuba weik arye tabakuka arenamsirak’ tenen, anggun Pilipi mutuku ululum ninye ati, Allah morosunune.

2 Tesalonika 3:16

Ara, Allah ara ikin una ap, oldana ap, kum arye, pia telebuk ubuka, kanye deibuka una deiyoknye, elce anggunti, atalak-atalak nirya ap, anggun winin ning noutam nirya ap, ‘Kanye deibuka teleb una deiyok ning pia arenamsil’ tenen, Allah morosunune. Tonda, ‘Allah arye, anggun melipsilibuk, el ap, kanye talima dukdongobuka neika unamak’ tenen, Allah morosenyabe.

Ibrani 7:2

Teleb yupu nyapdeibukba, Abraham arye yuk mutuku deiyok nang obukabukce, sik bona ning weik dalubuka yayuka noutam arye, sepuluh persen (10%) bokukabikce, Melkisedek el si erena ati aribuk. Melkisedek el si deiyok ara ani. Malye una kum arye diksukum una deiyoknye ulamuka ati, el si Melkisedek nyalamik. Tonda, mutuku si Salem nyalamika deiyok ara ani. Ara, olana kum arye kanye deibuka telebuk una ati, asi ara Salem mutuku nyalamik. Ati Melkisedek bira, Salem mutuku deiyoknye ulamuka anya arye, el si Raja Salem nyalamika deiyok ara, elda kanye deibuka, teleb una deiyoknye ulamuka ati asi nyalamik.

3 Yohanes 1:14

Deiyok ara, ani. ‘Anggun dam yanirye, sik nong ton eipnamsine,’ tenebuka patanulul ati, anggun dam yanamne talak ara, neika bukibirye yupu sisikinamabe.

Wahyu 1:4

Amapo, na Yohanes arye, anggun Asia tam noutamak bukni, Allah diba tenebuka, tekbarye mutuku ululum ninye ati, “Telebe,” nyapsince, abuku sekeipsene. Na Yohanes arye, anggun Asia tam ululum ninye ati tenenirye, Allah morosunun ning ara, nyapnusine. Ara, Allah el kanye aryuk bico tenesilirye, melisilye ning ap, kanye imun kanye bona kumce, kanye deibuka teleb una ati arisilya deiyok ning ap, ‘Weika arye arenamsile’ tenen, Allah morosunune. Anyapmasin ning arenamsiak ninye ara nyapnusine. Allah ara, minop talak akunum ulamuka ani, anoutam talak ulirye, aminyan sirya talak ara, yanamlanye birye arenamsile. Tonda, aning-aning deice tam ulirye, weik Ninye Deiyoknye una ati, weik buna ning deice bukliba, el urasin tam ara, Allah el melina dib kanye tekbarye bunyake. Sik adip kanye arye ton arenamsiake.