Ati ara, nun si erekinyab Allaho, anda nun Lyena Deiyoknye usilyama ati, ‘Ancuk yanuka melipnamsilam’ tenen, moropkiabe. Ara, talye ati kuma. Deiyok ara, ance lyepropsiminyopura, yuk nang nirya eibikirye, anti, ‘Se, Allah Yahweh ara, dipkoprob mikip weik ap, teleb ap ulule,’ nyabikirye, an siuk erenamkiak tenena ati moropkiabe. Tonda, nun Israel nang ara, ‘Nunce malye weik wininyap ning nirya ara, mangkau kipsimince, aning nirya, kum kipdeipsiminyopura, nun ikin usilye ning ara, melibuka lyepnamsilam’ tenen, moropkiabe na nio. Aning babye talye ati kume. Deiyok ara, ance akunum lyepropsiminyopura, yuk nang nirya eibikirye, anti, sikce, ‘Se, Allah Yahweh ara, dipkoprob pia telebnye ulule,’ nyabikirye, an siuk erenamkiake.
Yohanes 17:11 - Eipomek11 Na mapu ara, tukwak mutuku tuba unamak bukni, nara tukwak mutuku batakuka, an dam yanamne. Naio, anda pia malye ning ton winina kumnye ulyame ati, anda Pia Telebnye ulyame. An si weik mikip weik ukilya deice arye, ‘Na mapu ati kalikinamlam’ tenen, moropkine. An si ara, ance areamnulum si ati nyapkine. An areamnulum si mikip deice, pia kaliklaminye bukni, ‘Sik aminyan talak tonok kanye tenebuka, kanye talima dukdongobuka nong tonok atonun unamak’ tenen, moropkine. Tonda, na ni Allah, an ap, na ap, kanye talima dukdongobuka tonok unyam touk, ‘Sik babye atonun nong tonok atonun unamak’ tenen, moropkine. အခန်းကိုကြည့်ပါ။ |
Yohanes 17:11
48 ပူးပေါင်းရင်းမြစ်များ
Ninye arye, ‘Yuk mutuku ninye ati yanuka opsicak’ tenen, weik cang keil aik dolamikak, pum tam dungnubuka wekelbalamak touk, Allah Yahweh elda, mikip weiknye ulula anya arye, elce elti, dib tenenyak ninye, pia melibuka kalikinamle. Yata ninye do nirya, sik malye unyak ning nirya batakikirye, ‘Allah el yupu nyasilye touk, aninguk talibuka diksukumuk unamabe’ tenen, teleb ubuka unyak ninye arye, Allah el damuk yanganamake. Allah el damak akunum yacopura, Allah arye sikti, pia melibuka kalikinamle.
Winipmanto ara, ninye arye yo uku dongobikiba, uku diplirye sirya dakuka dilamle touk, winipnamle. Tonda, uku dinmalya deice arye, mek buppu opliba yaruk-yaruk alamle atonun, Allah an yanamlam talak ara, atonun winipliba, anti yu tenekinyak nang, ninye mutuku-mutuku nirya eipkikirye, ilil weik upliba, sik nong nirya ara sirim talipnamle. An yanamlam talak ara, anti, ‘Allah ara nun like,’ tenekinyak ninye nirya, ila tamubuka mikip weik ning ap, weik mambul si ap ukilye ning ara, moubuka kel biknamake.
Nun ni Allah ance nunti, ‘Winibuka wininamlulume. Winipmunyopura, pia dib talepsinirye, anggunti teleb kipdeipsinirye, pia melibuka kalikinamsine,’ nyabuka, nyalina yupu nyaiyamsulum ninguk, tamubuka tenepnamsilyame. Ance nunti bataksiminyopura, ‘Yuk ninye nirya arye, an si ati, malye nyapdeipkicak’ tenen, nyababe. Anda aning-aning nirya talibuka, deice tam umince, urasin teleb bulamak ning deice buklumce, nun ninye deiyoknye ulyame. Tonda, anda Weik Erenanye ulyame. Ati, ance nun an ‘Naʼ tenen, ninye ati, bataksiminyopura, yuk nang arye, malye yupu nyapnamkiyake. ‘Nyapkicak’ tenen, nunti yu tenena kume, na nio. Ance nunti, nyalin yupu nyaiyamsulum ning ara, batakana kume. Amutuku ap, nun ap ati, yu kanye bona kume, nyababe.
Nyabukura, Yeremia birye, ayupu nyabuk. Se, nun ni Allah. Ance talye ati, kum nyapmasilame. Dipkoprop nun Israel ninye ara, malye-malye ning weik unyaba deice arye, akunum lak upsilak, yuk nang nirya eibikirye, “Diba, sik Israel ninye ara, malyeuk wininyake,” nyasinyake. Diba, nun ni Allah, nun babye malye wininyap ning, dekna arye wenepnamsilame. Nunce antibuk, malye wininyap anya arye, merekuka wenepnamsilame. Kumopura, an si ati, yuk nang nirya arye, malye nyapnamake. Nyabuka wenepnamsilam bukni, “Naio ance nunti, lyepropnamsilame,” nyabuka moropkiyabe. Ara, ‘An si tuba erenamkiap’ tenen, nyapkine.
Kintinipse bukni, atenepse ning nirya ara, kum winipsirye batakse. Deiyok ara, ‘Na si malye kipdeipnikcakʼ tenen, batakse. Aning nirya bataksa deiyok ara, ‘Kume, ‘Naʼ tenen, nang ati, yu weik arye wenenyopura, sik Mesir mutuku noutam, neika unyak nang ap, amutuku dana-dana unyak nang nirya ap, aning eibikirye, na si malye-malye nyapnikirye, nalipnamniyakʼ tenen, batakamse. Mesir mutuku nang ap, amutuku dana-dana tam ulamik nang ap ara, narye, ‘Naʼ tenen nang, Israel nang lopdeipnirye, Mesir mutuku noutam arye dobuka, bobinirye, teleb kipdeipnamne ning ara, eibikca deice arye, ‘Se, Allah ara, dipkoprob mambul weiknye ululeʼ tenebikirye, nati biknamakʼ tenen, batakse.
Bukni, narye na si teleb kilina ati ara, anggun malye winilamlum ning ati biknirye, anggun malye winin ning kum kipsinirye, tuba tamubuka teleb kipdeipsinyopura, anggunce nati, moubuka biknamnulume. Ara, anggunce, ‘Se elda dipkoprob Yahweh ulule,’ tenen, biknamnulume. Anggun pia malye winilamlum ning ap, malye kilalamlum ning ap ati, adiparyuk wenebuka opsilirye, sirya daknamsiting bukni, aning kum winipsise. Na si teleb ulina ati ara, anggunti, akunum biksirye, tuba tonap teleb kipdeipnamsine. Winipsinyeura, anggun Israel yala nang nirya arye, nati moubuka biknamnulume. Ura, anggun Israel mutuku noutam unamlum nang nirya arye, ‘Se akunuma, nun ni koproba Allah Yahweh ara, aning-aning nirya talibuka, deice tam erebuka, Pia Mikip Weik Deiyoknye ululnye birye ulule! El tonok ulule,’ tenepmunce, moubuka biknamnulume. Na Allah Yahweh arye, akunum nyapmasina ati, aning nirya ara, dipkoprob nong upnamle nyapsine. Allah arye Yeheskiel biti, ayupu nirya nyabuk.
Bukni, aning nirya ara, kum kipdeipsirye batakse. Bataksa deiyok ara, ani. Ara, ‘Kume, ‘Naʼ tenen, nang ati, yu weik arye wenepyeura, sik amutuku noutam unyak nang ap, amutuku dana-dana unyak nang nirya ap, aning eibicopura, na si malye-malye nyapnikirye, nalipnicakʼ tenen batakamse. Mesir mutuku nang ap, amutuku dana-dana tam ulamik nang ap ara, narye ‘Naʼ tenen, nang, Israel nang lobukapsirye, Mesir mutuku tam arye bobisirnye, teleb kibuka lyepdeipse nang ara, eibika deice arye, ‘Se, Allah ara, dipkoprob mambul weiknye ululeʼ tenelamikce, nati bikamnik.
Domba basam tonok bai kam weik ulamice kan-kan ulyopura, bai kam arye domba basam opmanto ulye touk, narye dopdeipsiniba, na yupu bobuka peterelbimunyopura, kanye talima malye kanye bobikirye, yu ulul nang arye, na mapu anggun nong deice ikin ning deibuka, opmanto unamsiake. Aning ati ara, ninye ton kwatima arye, kanye wisibuka ulamle touk, anggunce aning-aning nirya ati weik kel kipmunce, kanye pia moubuka unamlulume. Tonda, yu upsiliba, yu asa una kum bukni, yalma maka talima namin asa ulirye, ninye kum opmanto ulamle touk, anggunce talima namin asa ubuka telebuk unamlulume.
Aning ati ara, anggun ni Allah im deice ululnye birye, ninye nirya ati, bico tenebuka kanye talima talibuka melilul touk, anggun babye ninye nirya ati, kanye talima arenamsile. Anggunda, Allah el mapu ululuma anya arye, anggun ni Allah malye una kum, diparyuk diksukumuk ulye touk, anggun babye atonun, malye winina kum, diparyuk diksukumuk wininamlulume. Yesus arye nyabuk.
Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.
Ara, na ap na Ni Koprop Allah ap, talima dukdongobuka neika unyame. Tonda, anggun ap na ap, talima dukdongobuka unyabe. Anggunda na noutamak ululume. Nara, anggun talima noutamak unune. Aning nirya ara, na ni tenyamuk talak, sirya talak akunum uplyopura, anggunce aning nirya moubuka kel biknamlume.” Yesus arye nyabuk.
Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.
An ap, na ap, kanye dukdongobuka unyame. Na ap, nati dib tenenyak ninye ap, dib tenepnamniak ninye ap, talima dukdongobuka unamabe. Naio, ance aninye nirya ati, ‘Teleb kipdeiptumba, talima dukdongobuka, tonok kanye bobuka, pia telebuk neika unamak’ tenen, moropkine. Ara, sik talima wililana kum aniryuk, kanye yuk-yuk bobuka kum unamak bukni, nimalye arye teleb ubuka neika unamake. Winibuka winiptingeopura, dib tenena kum, talye tukwak ninye nirya arye kel kipnamake. Kel biknamaka ara, ani. Ara, ‘E, dipkoprop Allah arye Yesus dopdeibuk,’ tenena ap, tonda, ‘Allah arye Yesus ati kanye talima arelul touk, Allah arye adib tenen ninye ababye, sikti, talima arelule,’ tenena ap, ‘Aning nirya kel biknamak’ tenen, moropkine, naio.” Yesus arye nyabuka morobuk.
Se, Naio Allah, anda pia Diksukum Unanye ulyame. Malye ning tonok ning ababye kum winilyame. Diba tenena kumce, tukwak mutuku talye wininyak ninye arye, anti kum bikinyake. Sik ap, an ap, talima dukdongobuka kum unyake. Bukni, na bikamkise. An ap, na ap, talima dukdongobuka neikauk unyame. Ance na dobuka tukwak mutuku dopdeipnuluma ara, na mapu arye akunum kel bikamike.
Yesus arye nyabuka Allah ati morobuk. Naio, tukwak mutuku noutamak bukni, ance wibuka areamnulumba, narye wibuka deiamse ninye ati, narye an si ap, an winiminye ning ap, sik kel bikna ati, laka nyalamsiba, akunum kel bikamkike. Ance aninye nirya talyamlume. Talyamlumce, aninye dobuka nati areamnulume. Aninye ara, an yupu kekebuka dobolbanyake.
Minop talak arye, Allah el aminyan winipnamuk ning laka nyalamik nang, el yupu uk kekebuka, el piluk dobuka, pia teleb-teleb kibuka dolamik nang ara, sik nabi nang arye nyalamik yupu deice Allah arye, ‘Aning-aning minop ning nirya ati, tuba punubukapnirye, winiryuk ninguk kintinipnirye arepnamsine,’ nyalilamuk. Anyalilamuk ning min kum winipmalye talak ara, Yesus im deiceuk pia ulamlya ani, anyalilamuk ning kintinibuka delin talak akunum uplyopura, Allah arye Yesus dopkwetepnamle.
Ayupu nyapmasin touk, winipmanto ning ton ulamuk. Ara, minop talak Mesir mutuku talyamuknye el si Firaun, elce Israel ninye talyamukce, yanibuka malye ulamukba, Allah arye elti, nyabuk yupu ara, Musa birye sekiamuk. Ayupu ara ani. ‘Allah arye nyabuk. “Firaun anda, narye erebuka deipkisa deiyok ara, nyapnukine. Ara, ‘Na mikipnye ununa deice arye, anti opbisipkenyopura, ninye mutuku-mutuku nirya kekebikirye, ilil upliba, na Allah si ati, pia erenamniyake’ tenen, an wibuka erepdeipkise,” Allah arye Firaun biti nyabuk.’ (Keluaran 9:16)
Ara, Yesus dib teneluluma ati, nun du weit atonun ululum nango, anggun sal babye, kilapu babye kekepnululume. Nun Weik Deiyoknye Yesus Kristus arye, nati deiyok arepnukbuk, el si deice arye, ‘Wininamlum’ tenen, morona atonun ayupu nyapnusine. Anggun nirya, anggun kanye tenena ara, tonok ninguk talibuka, kanye deibuka neika unamlulume. ‘Wininalum’ tenen, nyapdeipnamasin yupu ara, deiyok ani. Ara, anggun yuk-yuk ululum bukni, anggun tenelulum ning ap, anggunce, ‘Wininamap’ tenen, pil donamlum ning ap, ansinibuka utibirye, tonok ninguk talibuka ulamtumopura, ‘Kanye wililana kum aryuk, teleb kibuka neika unamlume’ tenen, nyapmasine. Ati “Tonok kanye bobuka telebuk unamlulume,” nyapsine.
Winipsuka ati ara, wini talak ara, anggun nirya yala yuk-yuk ninye ululum bukni, Yesus Kristus ap kanye talima dukdongobuka umunya deice arye, anggun nirya ara, nong tonok atonun kibuka, el ap neika ululume. Ati wini talak ara, Allah arye nun diba tenenyap ninye ati tenesulula ara, ani. ‘Sik Yahudi nang ani, Yunani nang ani, kilapu ani, sik bidamang kanye aryuk unyak ninye ani, talye pil dobuka unyak ninye ani, yuk nang arye yo bok deice dekikce, talinyakba, urdemuk pil donyak ninye ani,’ kum tenesulule. Aning kum bukni, nun diba tenenyap ninye ara, Allah arye Yesus Kristus ap, kanye talima dukdongopsuk anya arye, el ap ansinibuka neika atonun unyabe. Nun nirya ara nong tonok atonun unyabe.
Nun dib tenenyap ninye nirya ara, kanye dukdongobuka nong tonok atonun unyabe. Allah El Dib Kanye arye, tonok nong atonun kilisulule. Aning atonun, Allah arye nunti, ‘Aninye lyepnamne’ tenen, yukupsukba, dib tenebuburye wini talak ara, ‘Elcuk dolyasilyopura, el ap, neika pia unamaba ara, dan talak arye, dolyanamsil do’ tenen, aning atibuk kintinipdeibuka dinauk unyabe.
Utenelamukce, aning nirya winibuk ati, Allah arye Yesus dobuka, aning-aning nirya deice tam akunum erepdeibuke. Erepdeibukce, weik mambul si Yesus aribukba si dobuk. Yata ning do nirya, el amutamuk ulule. Weik si dobuka, ara, ‘Aning-aning nirya taliplirye, Weik Deiyoknye unamle’ tenen, weik si aribukura, dobuk. Yata weik si do nirya, asi-asi nirya deice tam, si pia teleb ninguk wibuka dobuk.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Im deice ning arena ara, pia teleb ning uka nyapmasina ara, deiyok ani. Kristus weklamuk aik, pia noutamak aik ara, ninye taruk deice arye domik aik kume. Ninye arye, ‘Dipkoprop ning kum bukni, winipmanto ning dopnamap’ tenen, ninye taruk talibuka domik aik, kukia atonun ning ara, kum wekuk. Aning kum bukni, Kristus ara, im deiceuk wekelbiyukce, wini talak ara, ‘Allah arye tukwak mutuku unyak ninye melinamle’ tenen, nun melina ati, Allah el un dam binuka ulirye, Allah ati morosulule.
Anggunda, Allah el tonok kanye deibuka dobolbalamtum bukni, yuk ning patapsilyeura, kanye delilulama anya arye, sik donyak kil batakuka, yuk kil dololamak nang atonun winilulume. Ara, Allah ti batakuka, yuk ninguk teneluluma atia. Anggunce aning kum tenipmalum do? Talya tukwak ubuk ning ap, diba tenena kum nang arye, Allah El Dib Kanye nyasulul yupu yaniltakirye, malye unyak ning ap, malye ning patapsilye ning ap ara, ‘Allah lik,’ tenebuka winina atonun nyapsine. Yata nang do nirya, ‘Talye tukwak ubuk ning nirya, anyuk talibuka unamne,’ tenebuka ulamice nang ara, atenenyak deice arye, ‘Allah na like,’ tenebuka akunum unyake. Ara tukwak malye ning ap, diba tenena kum ninye arye, malye unyak ning ap, Allah ap neika talibuka kum upmanto atia.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Ura Kain ara, Isa Mutuku Dongonye el yupu kekenanye ulamukce, el weit koprop Habel oplobukce, winilamuk touk kum wininamlulume. Kain arye el weit koprop oplobuk ning ara, yata ati do? Deiyok ani. Kain el winilamuk ning nirya, malyeuk winilamuk bukni, el weit koprop Habel ara, diksukumuk winilamuka ati, Kain arye yu ubukura, Kain arye Habel oplobuk.
Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.
Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.
Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse.
Akam unyak ning dumbarye nirya, sik yuk-yuk bukni, sik pol ara naku barye ubuk. Sik nong bol deice ara, asing pia weik ubuk. Sik pol amu tam babye asing ubuk. Sik nong ap, urasin ap, anyapmasin touk ubukba eipse. Lukunyan babye, keting noutam babye, batakna pia kumce, tuba-tuba ayupu pia nyanyake. “Minop talak ulamuka ani, wini talak tuba ulirye, aminyan sirya talak yanamlanye bira, aning-aning nirya malye kibuka, aning nirya deice tam ulirye, weik mikipnye ulule. Elda nun Weik Deiyoknye ulule. Elda malye winin ning tonok babye kum ulula ati, pia telebuk pia telebnye ulule, pia telebuk pia telebnye ulule, pia telebuk, pia telebnye ulule,” nyabuka mot senyake.
ကြော်ငြာတွေ