Yohanes 16:20 - Eipomek

²⁰ Dipkoprop nyapsine. Sik diba tenena kum, talye unyak ninye mutuku-mutuku nirya kanye deibuka pin-pin arye unamak talak noutamak arye, anggun na mapu ara mambul kanye bobuka engenamlume. Anggunda, imun kanye bobuka engenamlum bukni, aminyan ara anggun engenamlum ning ara, kum daliba, kanye deibuka pin-pin asauk unamlume.

Yohanes 16:20 ပူးပေါင်းရင်းမြစ်များ

Ayub 20:5

Na kanye ara, ance min kum bikamluma ati, aning laka nyapnukine. Ara ani. Talye daunyak nang arye, sik pia malye unyak nang ati eibikirye, ‘Se Sikda telebeʼ tenen, sikti, pinpin kanye bobuka unyak ning ara, dipkoprob tia talak atibuk ulule. Tonda, ninye arye Allah ati, ‘Allah ara nun like, elce nyasulul yupu ara, yaninauk unamabe,’ tenenyakce, malye-malyeuk wininyak ninye ara, sik kanye deibuka unyak talak ara, lo mitik tonun, like tonok talak ulule. Winipmanto ara, ninye arye asing kuplam-kuplam alamak atonun ulule. Anang ara, kum winipnamaka ati nyapkine.

Mazmur 30:11

Ati ara, na ni Allah Yahweh, ‘Bico tenepnutumce, melibuka lyepnutum’ tenen, moropkine na nio. Anda Allah Yahweh arye, ‘Na Melinanye, tonda na Lyena Deiyoknye unilyama ati, pia moropkine na nio!

Mazmur 30:5

Amapo, Allah ati, batakna kumce, pia diba tenebuka, eluk tuba talilum nang nirya ara, nun ni koproba Allah Yahweh ati, kanye delin mot nyapmunyakarye, el siuk erenamlume. Tonda, nun ni Allah ara, malye un ning tonok babye kum ulirye, pia teleb, Leknye ulula ati ara, elti, ‘Telebe,’ nyabuka, si erebuka kinamlume.

Mazmur 97:11

Yata nang do nirya, Allah arye nyasulul yupu moubuka talibikirye, dipkoprob uk wininyak nang ara, Allah arye sikti, lyepdoplirye, dirina deiyok ning arelula deice arye, moubuka bikinyake. Tonda, yata nang do nirya arye, teleb diksukumuk unyak nang ati ara, sik dam ara, pia kanye deibuka, kil-kil una ati, sik anang dam unamle.

Yesaya 12:1

Allah arye, aning nirya akunum winiplyopura, anggun Israel nang arye, mot nyapnamlulume. Anggunce nyanamlum ning ara, ani. “Se, nun ni Allah Yahweh, nunce antibuk, teleb nyapkiyabe. Ara, ikin kanye bobuka ulamupu bukni, ance nun kanye kwa dipsulumce, mikip kipdeipsulume. Minop talak ara, ance nun malye ulampu ning ati, yu upkukba, weik arye wenyamsulume. Bukni atalak ara, ance nunti, yu tenyamsulum ning ara, akunum kum kipmakila ati, kanye deipsilame.

Yesaya 61:3

Elce tenepnukce kintinipnuk ning ara, ani. Ara, ‘Se yata ati upnuk do?’ tenen, ikin kanye bobuka unyak ninye ap, imun kanye bobikirye, malye nyabuka unyak ninye ap ati, ‘Pin-pin kanye bona ap, kanye deibuka teleb kina ap, Allah arye aninye ati winibuka aning arenamla ati, laka nyalbanamle’ tenen, wipdeipnuke. Tonda, Allah arye ninye ati, teleb kipdeipnyopura, sik aninye ukirye, ikin kanye boki bukni, batakuka, telebuk unyakce, kanye lon mot senamake. Winipmanto ning ara, aninye arye Allah tenelye touk pia diksukumuk winibikcopura, yuk nang eibikirye, nyanamake. ‘Se, aninye ara, weik yo tiklirye, taruk leklamle touk unyake. Sik aninye ara, Allah Yahweh elce koubuk yo atonun ninye unyake,’ nyanamake. Winibikirye, teleb kibuka ukirye, diksukum ninguk ukiba, yuk nang eibikirye, ‘Dipkoprop Allah Yahweh ara, weik teleb ulule,’ nyabuka el si erebuka kinamake.

Yesaya 66:5

Nabi Yesaya birye, sik Israel yala nang ati nyabuk. Allah Yahweh arye, akunum nyapdeipsuk yupu ara, moubuka kekepnamlume! Ara, yata nang do nirya, sikce Allah nyalul yupu moubuka kekenamak nang ati nyapsine. Allah Yahweh arye, ‘Aning ara, wininamlume, aning ara, kum wininamlume,’ nyabuka nyasulul yupu nirya ara, moubuka kekebikirye, ‘Se, malye ubibiba, Allah arye wenepsilyakʼ’ tenen, ilil upliba, sirim talibikirye, el yupu uk moubuka talibikirye, dobolbanyak nang ati, nyapsine. Anggunce nati, diba tenibuka, ilil tenebuka moubuka ululume. Anggunce ululum bukni, yuk Yudea tam unyak nang, anggun dam unyak nang ara, anang arye anggunti, malye yupu nyapsikirye, ‘Anggun arye, ‘Allah ara, ila mambulnye ulula ati, el yupu uk talibuka unamyabe,’ nyabuka ululuma ati, nunce anggun ati, nun like. Anggun ap neika una ara, nun like,’ tenepsikirye, nalisinyake. Sik anang ara, nalibikirye, nyanamsiyake. “Wini talak ara, nunce moubuka dinamabe. Allah el mikip weik ap, el teleb una ap deice arye, el dirina, anggun dam lak sukum kipdeipliba, weik tonun kanye deipmunyopura, nun ton aning nirya eilinamabe,’ nyabuka, nalibikirye, ikik-ikik nyanamsiyake. Nyasinyak bukni, dipkoprob aminyan talak ara, ayupu nyanyak nang ara, na Allah arye, sik tibuk wenepniba, sik diamuk alye dakdanamaka atia.

Yeremia 31:25

Sik aninye noutamak, yata ninye do nirya, sikce, ‘Se, nun kum winiptibye,’ tenen, mikip kum mitang uple ninye nirya ara, narye mikip kilinamne. Tonda din patapliba, kisok biribiri alamle ninye ara, din ning arepneba, tuba tonap mikip unamake.” Allah arye nyapdeibukba, Yeremia kekebuk.

Matius 21:38

Dopdeibukba, awa tuku tia talibuka pil dolamik nang dam yanganmokba, eibikce nyabik. “Awa tuku deiyoknye dipliba, el punupnamlanye bira, el mi koprop ayanmala atia. Aning ati ara, nunce el opnamabe. Obibyopura, awa tuku nun damanguk dobuka talipnamabe,” nyabik.

Matius 5:4

Sik kanye deibuka telebuk winin nang ara, ani. Ara, sik babye malye winin ning ap, yuk nang malye winin ning ap ati, ‘Se,’ tenebikirye, mambul kanye bobuka engenamak nang ara, Allah arye, sik talima kwa dibuka melinamle. Aning ati ara, sik kanye deibuka telebuk unyaka atonun, pia unamake.

Markus 14:72

Peterus el ayupu deiya koubuka nyanmok talak ara, adiparyuk yim ayam arye, like bitinye ning kamubuk. Ayam yupu nyabukopura, adiparyuk, Yesus arye Peterus ati nyapmok yupu ara, Peterus ila tonap, tenebuk. Se, Yesus arye, “Yim ayam like bitinye min kum kamupmalye talak ara, ‘Anye bira na walwale,’ nyabuka, like winilye deice arye kunusa dopnamanilame,” nyapmok touk, ‘Akunum winipmane,’ tenebukce, el kanye talima pia ikin ubukura, weik arye engenmok.

Markus 16:10

Yesus arye Maria dam tikilyayukak eibukopura, Yesus ap, melibuka balamik nang unmekak biyuk. Anang ara, Yesus dibuka ati, kanye imun kanye bobuka, malye nyabuka engenmek. Sik engenmekak Maria binuka, elce Yesus eipmok ning ati laka nyabuk.

Lukas 22:45

Yesus arye Allah moronmoka ani, sirya dakukura, el mapu unmekak tamubuka binuka dinmokbuk, ‘Nun ni Yesus obiceura, dipnamale,’ tenenmeka ati, bouku sukun mok ati sik nong mitang upmoka ati manauk manmekak eibuk.

Lukas 22:62

Utenebukce, buru tam binuka el kanye talima pia ikin ubukura, weik arye engenmok.

Lukas 23:27

Yesus menekuka banmokura, ninye weik ton aminyan banmek kan-kan arye, kilapu ton Yesus ati, bico tenebikce, kanye bobuka se tenebuka engepnin banmek.

Lukas 24:17

Sik banmeka ani, bisik noutam ara, Yesus arye abitinye nang ati, asipdeyuk. “Anggun bisik banmarumce, yata yupu talipdanin banmarum do?” nyabuka asipdeyuk. Asipdeyukura, sik bitinye nang atikilbirikce, ‘Se’ tenen, koupdongobuka tukwak dinmarik.

Lukas 24:21

Se, nunda, ‘Yesus arye, Roma mutuku nang amu tam ulamibyak loplopsilirye, Israel ninye nirya lyebuka talipsilirye, nun Weik Deiyoknye eluk unamsil,’ tenelamubu bukni, sik anang arye Yesus obike. Tonda, sikce Yesus obikura, liki winilye sum akunum uple.

Lukas 6:21

Anggun aning-aning nirya pataplibuk ulalum ninye ara, aminyan ara Allah arye arepsilyeura, boupnamsil ati, anggun kanye deibuka unamlume. Anggun wini talak kanye imun usiliba engelulum ninye ara, aminyan talak kanye deibuka agu tunamlum ati, kanye deibuka unamlume. Allah arye lyesilibuk teleb unamlum ati, kanye deibuka unamlume.

Yohanes 16:33

Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

Yohanes 16:6

Min laka nyapmasin yupu kekepmalumce, anggunda, ‘Se, nun ni bilirye, bataknamsil ati, yata wiripnamap do?’ tenen, mambul kanye bobuka unmalume.

Yohanes 20:20

Nyabukopura, ‘Na mapu kel biknuyak’ tenen, el taruk tatang paku dakuka opmek ning ap, el yace yok lukuka opmek ning ap ara, amubukura, sik nirya arye eibik. Yesus wipdeiyamuk nang eibikce, ‘Nun deiyoknye Yesus dipkoprop aunmale’ tenen, kel kibikce, kanye deibuka pin-pin asa arye unmek.

Rasul 5:41

Batakdongobikura, Yesus wipdeiamuk nang Sandeheren nang wekmek ak batakuka yukak biyikopura, utenebik. E sik Sandeheren nang arye, ‘Yesus ap, Yesus el si ap ati, nun like. Ati anang onmabe,’ tenepmasiakce, opmasiaka ati, ‘Allah arye nunti kanye deipmasila ati, opmasiaka babye, telebuka,’ tenebikce kanye deibuka kil-kil asa biyik.

Roma 5:11

Tonda, aninguk kum bukni, minop talak ara, nun ap, Allah ap neikak kum upmanto ninye ulamubu bukni, Yesus Kristus dibuka deice arye nun ap, Allah ap ansinibdeipsukba, Allah ap neika pia unamabe. Wini talak ara, nun Deiyoknye Yesus ap neik kanye talima dukdongobuka upra banamap talak noutamak nirya ara, nun Ni Kopropa Allah ati kanye delinyabe.

2 Korintus 6:10

Tonda, nunce, ‘Se’ tenen, kanye imun kanye bobuka engenyap bukni, aning awabsilya babye, atalak nirya nun talima ak kanye deibuka unyabe. Nunda, aning-aning kum upmasilibuk, talye bona utotowa talina kum ninye unyap bukni, nun mambul pil donyapa deice arye, yuk ninye arye weik mambul ning doprobikirye, bona weik talinanye atonun unyake. Ara, nunda tukwak mutuku noutamak talye auplye ning ati, bona aning-aning nirya talibuka kum unyap bukni, dipkoprop ara nun akunum dopropbupe ning ara, weik mambul ning anya arye, nun kanye ara, bona weik talin nang atonun unyabe.

Galatia 5:22

Ura, amalye-malye winina kum bukni, teleb yo arye, teleb yo duk moulamle touk, Allah El Dib Kanye, el mikip arye melisilyeba, wininamap ning ara nyapnusine. Ateleb winin ning ara, ani. Ara yuk nang ati bico tenebuka melilana ap, kanye deibuka pin-pin asa una ap, kanye teniltona kumce, kanye deibuka una ap, yuk nang arye nunti malye updeipsica babye, talima namin asa arye una ap, yuk nang pataplye ning ati melina ap, diksukum una ap, ikin upsilya babye pil batakna kumce, pi dobuka pia pil dona ap,

1 Tesalonika 1:6

Nun ap, Yesus Kristus ap, winilamubu ning nirya elilamlumce kel bikamlume. Wini talak akunuma, nun winilamubu ning ap, Yesus winilamuk ning ap, anggun babye, atonun winilulume. Anggun diba tenelamlumba, yuk nang arye, ikin ning weika arye anggun nong deice delilamik. Winilamik bukni, anggun kanye imun kanye bona ap, ikin ning ap, ulamsuk bukni, anggun batakna kum, Allah el laka teleb yupu ati, kanye deibuka dololamlume. Allah El Dib Kanye arye, pin-pin kililamsukbuk, kanye deibuka Allah yupu dololamlume.

Yakobus 1:2

Na kayapu, Yesus dib teneluluma ati, nun du weit atonun ninyeo, kekepnuse. Kanye imun ning yala-yala weik upsilye talak nirya ara, teniltona kum, kanye teleb bobukauk unamlulume.

Yudas 1:24

Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.

Wahyu 11:10

Aning kum bukni, tukwak mutuku im sirya, mutuku sirya nirya, atalak unamak ninye nirya arye, abitinye nang obuk ning ati, “Merekuka opmale. Ati nun kanye deipmabe,” nyabuka kanye deibikirye, kil-kil upliba, sik kayapu nang ati, urdem arin ning yuk-yukak nirya babye arilanamake. Deiyok ara, Allah el yupu laka nyan nang, kam ulamrik talak ara, kanye imun uk dina ap, tukwak mutuku mek nirya, ining ubuk ning ap, yuk ikin ning ap, ‘Nun nong deice wenebuka deipsirika ati, merekuka’ tenen, kanye deibuka arelanauk unamake. Aning nirya ara, like winilye sum ap, tonok sum noutamak ap arye wininamake. Awininamak ning nirya ara eipse.

Wahyu 18:7

“Minop talak Babel mutuku ninye arye bona uto-uto talin ning ap, dekna weik ning ap, weik dololamikce arilalamikba, nukmanto kum ulamuk. Bona talin nang weik ulamikba, yuk mutuku ninye arye, ‘Se, sikda pia telebuk unyake,’ tenelamikce, amutuku ninye ati si erelamik. Ati, bona talin nang weik ulamik touk, wini talak ara, Allah arye kanye imun ning pia weika arye, sik nong deice deipliba, pia weika arye engebuka donamake. Babel mutuku unyak ninye sik talima pum tam ara, utenyake. ‘Kume, sik youwak kilapu arye, malye kanye bobuka engelamak touk, kum unyabe. Nunda weik ninye deiyok nang, Raja nang arye talye kanye bobuka pin-pin asauk ulamak touk pia unamabe,’ tenelamik. Winibuka tenelamik bukni, wini talak ara, Allah arye sikti, weik arye wenepnamle.