Yata nang do nirya, Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu, moubuka talibikirye, aninguk dobolbanyak nang ara, Allah Yahweh arye anang ati, weik tonun bico teneplirye, kanye delinamle. Winiplyopura, Allah arye, ‘Wininamsine, wininamsine. Tonda, winibuka teleb kilinamsine,’ nyabuka, nyalin yupu deice arye, nyasilye ning nirya ara, anang ati laka nyapliba, bikinyake.
Yohanes 15:15 - Eipomek15 Ura, talye pil melin ninye ara, sik deiyok nang arye tenenyak ning ap, wininyak ning nirya ap, kum kel bikinyake. Ati wini talak arye diprongobuka, dolyanamsil talak noutamak ara, narye sikti, “Na amu tam pil melin ninyeuk unyake,” kum nyanamasine. Na Ni Koprop Allah arye nyapdeiyamnukba, bikamse ning nirya ara, narye anggunti akunum laka peterelamsise ati, wini talak ara, narye anggunti, “Aninye na weitcapu koprop unyake,” nyabuka akunum nyapsine. အခန်းကိုကြည့်ပါ။ |
Yohanes 15:15
32 ပူးပေါင်းရင်းမြစ်များ
Ton nang ara, “E, nun ap neika dukdongobuka unamabe,” nyabuka, nalina yupu nyanyak bukni, sik ap neika unyak ninye ati, pia malyeuk ulinyake. Sik ap neika unyak ninye sik dam ara, ikin ning pia weik arye yanganamle. Ton nang ara, “E, nun ap neika dukdongobuka unamabe,” nyabuka nyanyak bukni, anang ap neika unamak ninye ara, telebuk unamake. Ara, anang ap, sik kayapu nang ap, pia teleb ubuka melilana uk unamake. Anang arye, sik neika unyak ninye ati, ‘Anang ara, nun du weit atonun unyake,’ tenenyaka anya arye, kanye deibikirye, sik ap neika dukdongobuka unyak ninye ati, teleb ulinyake.
Dipkoprop Allah Yahweh elda, Weik Erena Deiyoknye, aning-aning nirya talibuka, deice tam ulule. Winilula anya arye, Allah elce, ‘Aning nirya ara, winipnamne,’ nyabuka, el yupu lak nyan nang, ‘Nabi-nabi arye kekepnamak’ tenen, lak nyaliba kekenyake. Sikda, el amu tam pil don nang unyake. Allah arye, sik dam lak kum nyapdeiamturye, el pil dolye ning nirya, talye mangkau kibuka kum pil dolule. ‘Winipnamna arye,’ nyabuka, laka nyaliba, nabi nang akunum kekebiceura, Allah arye apil dolule.
Asipdeyikbuk, Yesus arye tamubuka nyabuk. Allah arye ninye weike lyeplirye, sik kanye talima talinamle nyasunun yupu ara, Allah arye nyapdeiamnuk touk, na mapu anggunti yupu nong laka nyasunune. Bukni, yuk talya ninye ati ara, na yupu dib tenebuka, moubuka kum kekenyaka ati, aninye ati domon yupu arye, nong bola deiceuk nyanune.
Yesus arye ayupu nyabukopura, elce wipdeibuk mapu, sik 12 nang ati, ayupu tonap nyabuk. “Na mapu anggunda, ne wininun ning, anggun asing arye teleb kubuka elinululume. Anggun wini talak umunce, na donye pil nirya elinululum ninye ara, anggunce aning-aning nirya, pia mambul ning elilaluma ati, anggunda pia mambule. Ati, pia teleb kanye bobuka unamlume.
Yata ninye do nirya, na amu tam bukuka, na yupu kekebikirye, na pil ati dokcopura, na unye touk adiparyuk wininamake. Na ban bisikuk adiparyuk melinamniyake. Tonda, na unun mutuku nirya, na mapu unamake. Na amu tam bukuka, na yupu kekebikirye, na pil ati donilinye biti ara, na Ni Koprop Allah arye, anye erebuka teleb kipdeipnamle.” Yesus arye nyabuk.
Na dipkoprop nyapsine. Pil deiyok nang arye, “Pil doplulume,” nyabikibuk, sik amu tam pil donyak nang ara, mitik mambuluk unyak bukni, el pil deiyoknye, sik deice tam ululnye bira, weik mambule. Aning atonun, deiyoknye birye, “Na yupu dobuka laka nyalbilyame,” nyalinye bira, weik mambul ulul bukni, el yupu dobuka laka nyalbinulinye bira, mitik mambul uka.
Nyabukce, ayupu dukdongobuka nyabuk. Na akunum nyapdeiyamsise yupu ara, tuba tenenamlulume. Ara, talye pil melin ninye ara, mitik mambul bukni, sik deiyok nang ara, weik mambul unyake. Yuk nang arye deiyok nang ati wininyak atonun, adeiyok nang sik amu tam unyak ninye ati ara, atonun wininamake. Ati, na talye kum nyapsine. Sik malye nang arye, nati, malye yupu nyabuka na nong deice ikin ning weik delilamnike. Aning atonun, anggunda na amu tam ululum ninye ati ara, malye nang arye anggunti, ‘Anang ara, nun lik’ tenen, malye yupu nyabuka, ikin ning anggun nong deice delinamsiake. Bukni, na yupu kekebuka dobolbalamak ninye ara, anggun na mapu nyalulum yupu babye, kekebuka dobolbanamake. Na yupu kum kekenyak ninye ara, anggun na mapu nyalulum yupu babye kum kekepnamake.
Narye na mapu ati an winiminye ning nirya peterelamsiba, kel bikinyake. Aning akunum winilamse touk, sikti, tuba unamne. Deiyok ara ani. Ara, ance nati, weik arye kanye deiamnulum touk, ance sikti, kanye weik arye delinamlyame. Tonda na ap, sik ap, talima dukdongobuka neika unamabe. Nara, sik talima ak unamne. ‘Aning-aning nirya, moropmakin ning nirya winipnamle’ tenen, akunum moropkine, naio.” Yesus arye ayupu nyabuka, el li Allah ati morobuk.
Nyabukura, Yesus arye nyabuk. “Na ni Allah dam tamubuka min kum binmana anya arye, na nong kum talipnunilame. Ance tamubuka, na weit yapu nang nirya ati, ayupu laka nyalbinulyame. Ara, ‘Na Yesus ara, na ni dam, Allah el un dam tamubuka binirye unamne. Na ni bira, anggun ni uka. Na si erenun Allah ara, anggun si erelulum Allah uka. El tonoka,’ nyalbinulyame.” Yesus arye nyabuk.
Tuba-tuba aninguk winuna deice arye, na kanye pia walwal unulule. Aning ara laka nyapnusine. Ara, na kanye talima pum tam arye, ‘Se, ateleb un ninguk wininamne’ tenen, patanulul bukni, dipkoprop teleb ning ara, tuba-tuba kum unune. Na talima pum tam arye, ‘Aning ara malye winin ning ati na like,’ tenenun ning uk, tuba malye upra banune.
Aning ara, tilila ati kum nyapsine. Nabi Yesaya arye, sekamuk yupu noutamak deiyok aupmale. Ayupu ara, ani. ‘Yatanye birye, Allah el kanye talima noutamak tenelul ning ara, akunum min arye kel bikam turye, Allah ati, “Aning winipnalyam, aning ara, kum winipnalyam,” nyaptu do? Kume, Aning ara, kum winipmanto.’ (Yesaya 40:13) Aning ati ara, dib tenena kumce, talye wininyak ninye ara, Allah El Dib Kanye arye peteresulul yupu ara kel kum bikamting bukni, nun dib tenebupuba, Allah El Dib Kanye arye, nun kanye talima talisulul ninye ara, aning moubuka kel biktibye. Deiyok ara, nun Allah yupu peteren nang ara, Allah El Dib Kanye arye, nun talima ak pil dosilya deice arye, Kristus tenelul ning ara, nun babye, atonun tenenyabe. Paulus arye, nyabuk.
Allah arye aning akunum winipsuka anya arye, Yesus ati diba tenyamlumba, wini talak ara, Allah el mapu kopropauk akunum ululume. El mapu umunya ati, el Mi Kopropa Yesus, el Dib Kanye dopdeipsukba, anggun talima pum weksukce tuba aulule. El Dib Kanye arye, Allah ati, nun talima noutamak arye, “Na Ni kopropa Allah,” nyalule.
Tonda, minop talak Allah arye, ninye lyena ati, ‘Kristus deice arye, ninye lyen ning kintinipnamne’ tenen, kanye deibuka akunum tenyamuk bukni, aning nirya duknyamuk arye, ninye nirya kum bikamik. Bukni, wini talak ara, akunum laka kipdeipsuke. Allah arye, ‘Winipnamne,’ tenyamuk ning nirya ati, kanye deiyamuk ati, akunum winipsuke.
Allah arye, Kristus arepsukopura, elce pil dopsuka deice arye kintinipsuk ning ara, minop talak ulamik ninye nirya ati, lak akarye, kum nyalamuk arye, kum biklamik. Bukni wini talak ara, Allah el yupu dobuka peterelbana ati, deiyok kouna, deiyok Rasul nang ap, el yupu laka nyabuka peterena ati nabi-nabi nang ap ati, Allah El Dib Kanye arye, ayupu nirya lak akarye, nyaliba, anang nirya moubuka kel bikinyake. Adeiyok nang nirya ara, Allah arye, wipdeiyamuka anya arye, sikda malye winina kumce, pia pung diksukum nang unyake.
Allah arye nati, “Na yupu petereplyame,” nyapdeipnuk yupu ara, pia mambul yupu bukni, duknuna atonun yupu ara, ‘Deiyok anye’ tenen, kel kum kipmanto yupu nyapdeipnuke. Ara, Allah arye minop talak ulamik ninye nirya ati, ‘Moubuka kel kum kipnamak’ tenen, ayupu nong noutam ning duknupdeiamukba, ‘Deiyok anye,’ kum tenelamik. Bukni wini talak ara, Allah arye, ‘Aninye ara, na tenen ninye unamak’ tenen, wibuka deiyamsukba, elti, dib tenenyap ninye, el mapu ati, ayupu nong noutamak ara, akunum lakak nyalyopura, ‘Deiyok anye’ tenen, moubuka kekenyabe.
Anggun bitinye, neika unamruma ara, minop talak yo bok deice arye, Onesimus dekuka talipmunba, an piluk talye dolamuk touk, wini talak aning atouk kum unamle. Aning ara, mitik teleb bukni, pia teleb ning ara, wini talak an weit koprop atouk, an talimanye akunum kipkile. Onesimus birye, na pia talima aribuka, bico tenenun bukni, ara mitik uka. Wini talak an arye elti, weik arye kanye deibuka, bico tenenamlame. Elda talye tukwaknye bukni, tonda elce nun Deiyoknye Yesus ati, akunum diba tenebukura, Yesus talima dukdongopsukba, neika unyaba anya arye, an weit koprop atonun, an kanye deilinanye ulule. An talimanye unamkile.
Abraham arye awinibuk ning ara, Allah arye nyalilamuk touk winibuk. Allah nyalilamuk yupu ara ani. ‘Abraham arye Allah ati dipkoprop tenebuka deice arye, Allah el kanye ara, ‘Abraham ara pia diksukumnye ulule,’ tenebukce, teleb kipdeipbuk.’ (Kejadian 15:6) Tonda, yuk nang arye, Abraham ati nyabik, ‘Abraham elda, Allah el ka kopropa ulule,’ nyanyake.
Ara, Kristus El Dib Kanye arye, nabi nang sik talima noutamak yupu laka nyalamuk. Laka nyalamuk yupu ara, Kristus ikin upnamuk ning ap, ikin ubukura, aminyan sirya talak, weik mambul ning, pia teleb ubuka dirina weik ning upnamuk ning ap ati, yupu laka nyalamuk. Ayupu laka nyalamukbuk, sik nabi-nabi nang arye, ‘Se ayanamle ning yanamle talak ara ani, ayanamle talak noutamak winipnamle ning ara, anye moubuka kel kiptibye,’ tenelamikce, pia piriltaklamik. Piriltaklamik bukni, aning deiyok ara, moubuka kel kum bikmanto ulamik.
Na kayapu, telebe nyapsine. Asurat ara, na Simon Peterus arye seksene. Yesus Kristus lyebuka talipnuka, ati el piluk donune. Tonda, ‘Na yupu dobuka peterelbanamle. Rasulnye unamle’ tenen, Yesus arye wibuka deipnuke. Allah kanye deipsukce, nunti el yupu ap, nun diba tenen ning ap, areamsukak, dobuka talyamubu ning, pia teleb ulye touk, anggun babye, atonun upsukbuk, diba tenebuka, na nyapman ning talibuka ululume. Nun Lyena Deiyoknye Yesus Kristus ara, Allah ulule. El diksukumuk ulya deice arye anggun ap, nun nirya ap ati, diba tenena ning areamsukak dopdobupu. Anggun nirya ati asurat seksene.
Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.
Ayupu nirya ara, minop talak Allah arye duknyamuk bukni, ‘Aminyan talak Yesus Kristus arye wininamle,’ tenena ati laka nyabuk. Ara, ‘Yesus arye aminyan sirya talak wininamle ning laka nyapliba, el amu tam bukuka, elti, dobolbanyak ninye kekenamak’ tenen, laka nyabuk. Allah arye, el im deice pil donanye, malaikat tonok dobuka dopkwetebukba, Yesus el pil donanye Yohanes dam laka nyalyayuk.
ကြော်ငြာတွေ