Tonda, ance akunum dopnutumba, nun bitinye neika mapmanimnya ani, bereklyopura, beren tam talak koprop arye, an ap, na ap anggur tapu duk wa windam neika bitinimirye, ‘Nun anggur tapu duk, akunum wisipmal do, kabul do?’ tenen, anggur tapu nirya dipdetinimnye. Tonda, aning atonun, nun bitinye neika ansinibuka bitinimirye, ‘Nun anggur tapu kita ara, akunum popmal do, kabul do?’ tenen, dipdetinimnye. Tonda, aning atonun, nun bitinye neika ansinibuka batinimirye, ‘Nun delima yo ara, duk moupnamla ati, el kita ara, akunum polamle do, kabul do?’ tenen, dipdetinimnye. Aning nirya akunum dipdetinimnyopura, narye anti, ‘Telebe, wini talak neika maptinimnye,’ nyabuka, moropkitinyopura, neika maptinimirye, na pia kanye deipkitinye!
Yohanes 15:1 - Eipomek1 Yesus arye el mapu ati, ayupu nirya nyabuk. Nara, anggur tapu deiyok atonun unune. Na ni koprop ara, anggur tapu koun wa tuku talina Deiyoknye ulula anya arye, elda parang ya talina deiyoknye ulule. Ara aya arye dobuka atapu sekliba kwa leklamle. အခန်းကိုကြည့်ပါ။ |
Yohanes 15:1
28 ပူးပေါင်းရင်းမြစ်များ
Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.
Yerusalem mutuku talibuka unamlum ninye nirya ara, pia telebuk ukirye, diksukumuk unamake. Tonda sik unamak mutuku ara, min kum kum danamle, bukni pia atuba wamliba talibuka unamake. Ara, talye ati kume. Ninye arye ‘Nun koun ning koubikiba, aminyan paplirye, weik papnamle’ tenen, mitik yala ning doklamak touk, narye anggun Israel ninye ara, na bidamang Allah aryuk koulamakto wamsa atia. Anggunda pia teleb-teleb unamluma ara, na bidamang taruk ap, na bidamang mikip deice ap arye, mambul pil dolamseba, sirya talak ara, pia teleb unamlume. Aning nirya pil dolamse ning deiyok ara, ‘Ninye mutuku-mutuku nirya arye, na siuk erenamniyak’ tenen, pil dolamse. Ati, aning ara dipkoprob nong upnamlarya.
Elce tenepnukce kintinipnuk ning ara, ani. Ara, ‘Se yata ati upnuk do?’ tenen, ikin kanye bobuka unyak ninye ap, imun kanye bobikirye, malye nyabuka unyak ninye ap ati, ‘Pin-pin kanye bona ap, kanye deibuka teleb kina ap, Allah arye aninye ati winibuka aning arenamla ati, laka nyalbanamle’ tenen, wipdeipnuke. Tonda, Allah arye ninye ati, teleb kipdeipnyopura, sik aninye ukirye, ikin kanye boki bukni, batakuka, telebuk unyakce, kanye lon mot senamake. Winipmanto ning ara, aninye arye Allah tenelye touk pia diksukumuk winibikcopura, yuk nang eibikirye, nyanamake. ‘Se, aninye ara, weik yo tiklirye, taruk leklamle touk unyake. Sik aninye ara, Allah Yahweh elce koubuk yo atonun ninye unyake,’ nyanamake. Winibikirye, teleb kibuka ukirye, diksukum ninguk ukiba, yuk nang eibikirye, ‘Dipkoprop Allah Yahweh ara, weik teleb ulule,’ nyabuka el si erebuka kinamake.
Yuk mutuku ninye deiyok kibuka unyak nang arye, na anggur wa nirya ara, akunum yanuka, malye kipdeipnike. Tonda, na wa wiamsak nirya ara, akunum yaniptaplopnike. Tonda, na tuku pia urasin teleb wamnuk mutuku nirya ara, sik yuk mutuku nang arye, ninye deiyok kibuka talibikce, pia malye kipdeibikba, bataklamaka mutuku, ninye kum ulamak mutuku atonun, oldem kipdeipnike. Ara, yuk mutuku yu nang arye, ‘Naʼ tenen nang, Israel nang ati, akunum olyanganyaka ati, nyapne.
Winipmanto ara, ninye arye anggur tapu yala pia teleb ning koulamak touk, narye anggunti teleb yala ninye noutamak arye wipdeiamsise. Ara, ‘Anggun teleb unamak’ tenen, wipdeiamsise. Tonda ninye arye anggur tapu duk yala teleb ning arye wibuka, tuku telebak doklamak touk, narye anggun melina ati, pia telebak boyanamsise. Bukni, wini talak ara anggunda akunum tamupmalume. Winipmaluma deice arye, bai tam talye palamle ning bobuka yanuka koulamak touk upmalume. Anggunda, talye palamle ning atonun akunum unmalume. Anggunda, pia malye ululuma ati nyapsine. Anggunda narye pia teleb yala ning atonun dokamsise bukni, yata wininmaluma deice arye, wini talak ara, pia malye ninguk unmalum do? Ara, nong kum upnamle ning talibuka unmalum do? Ara, nong kum upnamle ning talibuka, unamluma ati nyapsine.
Allah arye aning akunum nyabukopura, ayupu ton dukdongobuka nyabuk. Ura wini talak ara, yuk domon yupu deice arye nyapnusine. Ara ani. Anggun Israel nang, anggun capu kil ara, anggur tapu winilamuk touk ulamuk. Ara, mitik tonun nemuk bukni, ninye arye, ‘Anggur tapu paplibibirye, aning bobinuka, yuk telebak koupnamap’ tenen, atapu palibikce, bobuka mitik tonun mek pu dobuka, balamuka kup-kup ak, mitik tonun wa ton wibika noutam arye, koubikba tiklamuk. Ura, atapu ara, amek dam koubika ati ara, anggur tapu yo ara, pia teleb kibuka, palamuk taruk uamukce, anggur tapu duk pia moubuka ulamuk. Winibuka pia teleb moulamuka deiyok ara, amek balamuka deice arye, duk teleb kibuka moulamuk. Winilamukba, el taruk ap, duk ap ara, pia weik tonun yamubuka arelamuk.
Allah arye nyapdeibukba, nabi Hosea birye sekuk yupu ara, ani. Anggun Israel nang nirya ara, minop talak anggur tapu pia weik moulamle atonun ulamlume. Bukni, winibuka telebuk upnin balamik talak ara, sikce, ‘Talye ning si erenamapʼ tenen, isa si erena ap, isa arena ap ati, sikce pala keil dobuka, yangapdeiamikce, mesba-mesba weik tonun kintinip deiamik. Atonun, sik Israel nang telebuk upnin balamik touk, ‘Isa Asyera si erenamapʼ tenen, lak kin ning, el si ‘tugu berhalahʼ, cang weik yo weik tonun tonap ikukabikce, isa si erena ati moulamikce, aisa mer si erelamikce, malye weik ulamik.
Ati ara, an Yosua ap, an amu tam pil donamak talye imam-imam nang, an kwitcapu imam nang ap, anggun nirya moubuka kekepnululume! Ara, an amu tam pil donamak imam-imam nang, sik nirya ara, aminyan talak winipnamle ning ati, aminyan talak pia teleb ning yanamle ati, sikda bikilin nang unyake. Aning deiyok ara, ani. Ara, aminyan talak ara, narye na amu tam pil donamlanye dobuka, lak deipnamnarya. Winipmanto ara, weik yo deiyok arye, mitik Yo Taruk leklamle atonun, pia mambul pil donamlanye, Mesias dopdeipniba, anggun dam yanuka unamle.
Yesus arye, “Domon yupu ton nyapnusina ati, kekelulume,” nyabukce ayupu ton nyabuk. Ara Yahudi yala nang arye, Allah ati arilbalamik aik dam, Yesus tuba tikmokce, abulubuka wekmek ninye ati, ayupu nyabuk. Tonok talak ara, anggur duk moulamuk tapu talyamuknye ulamuk. Anggur tapu kouamukce, awa dana-dana tam nirya keil arye poka dobuka antanabuka denepdongamuk. Winyamukce, anggur duk teikna ati, keil kum ubuka kintinyamuk. Tonda, awa kalikuka dina ati, awa dam weik cang yo arye ikukce, adeice ak kalikna aik domuk. Aning nirya akunum kintinipdeibukce, ‘Yuk nang arye awa ara tia talakuk talibuka pil donamak’ tenen, yuk nang ati aribukba, anang arye awamuk ning dekna ati, awa tuku deiyoknye biti yo bok arebik. Winibikopura, awa deiyoknye birye, el kayapu ap neika mana ati, yuk pera mutuku biyuk.
Yahudi yala nang arye Allah ati arilbalamik aik dam, Yesus tikmokce, abulubuka wekmek nang ati, domon yupu deice arye peterenmok. Yesus arye ayupu nyabuk. Tonok talak ara, anggur duk mouamuk tapu talyamuknye ulamuk. Anggur tapu kouamukce, awa dana-dana tam nirya keil poka wibuka denepdongamuk. Winibukce, anggur duk teiknak ati, keil kum ubuka kintinipdeiyamuk. Tonda, awa kalekuka dina ati, awa dam weik cang yo ikukce, adeice arye kalikna aik dobuk. Aning nirya akunum kintinibuka deibukce, ‘Yuk nang arye awa ara, tia talak talibuka pil donamak’ tenen, yuk nang ati aribukura, anang arye awa ning pununa ati yo bok arebik. Winibikopura, awa deiyoknye birye, yuk pera mutuku ninye asik uruna ati biyuk.
Ayupu nyapmasina deiyok ara, ani. Ara, Allah arye, ‘Wininamlume, aning ara kum wininamlume,’ nyapdeiamukba, Musa kekebukce sekeiyamsuk mem yupu nirya ara, Musa deice arye areamsuk. Bukni, dipkoprop winina deiyok ning ap, Allah arye el kanye aryuk nunti bico tenesilirye, melibuka lyesulul ning deiyok ning ap, tukwak ninye ati melilana deiyok ning ap, ninye lyena deiyok ning nirya ap ara, Yesus Kristus deice arye arisulule.
Nati, diba tenebuka, na ap talima dukdongobuka unyak ninye ara, anggur tapu taruk atonun unyake. Na ni koprop arye, anggur tapu taruk duk kum moulamle ning ara, sekuka batakalule. Bukni, atapu taruk arye duk teleb ubuka moulamle ning ara, ‘Tapu duk pia teleb ubuka, weik arye moupnamle’ tenen, yuk malye tapu koupdongobuk ning ap, talye taruk ap, sekloplirye, moulilule.
Ura, na kayapo, winipmanto yupu tonap nyapnusine. Duk teleb moulamle yo, el si ara, Ara yo, ninye arye ayo kouamikibuk, teleb ubuka kwapu bongona kum arye, duk mouna kum diparyuk, kolupyopura, akolupmalye yo taruk ara, deiltakanyake. Ayo taruk seklobikirye, yuk talye buru mutuku palamle yo taruk dobuka, ‘Yo duk teleb ubuka moupnamle’ tenen, ayo taruk seklopmaca deice yanuka dukulongonyake. Winibikiba adukdongopmace yo, el yating ara, kum ulamle yating ap, nong ap, taruk ap arye, teleb ning doproplirye, teleb ubuka palule. ‘Min arye teleb kibuka papnamle’ tenen, kouamikiba, palamle ning ap, aminyan dukdongobice ning ap ara, tukwak teleb ubuka bongoplirye, duk moupnamle. Aning atonun, anggun Yahudi yala kum ninye ara, aminyan talak dukulongolamak yo taruk atonun ululume.
Anggun Korintus mutuku ninye ara, Allah el wa dam atonun ululume. Tonda, anggunda, Allah el asik atonun ululume. Anggun Korintus mutuku ululum ninye ara, na ning kum ululume. Aning atonun Apolos, el ning kum ululume. Na ap, Apolos ap ara, Allah el amu tam pil melin nanguk unyame. Ati, na ap, Apolos ap, neika pil melibuka donyame.
Asekman yupu ara, winiryuk yupu kum nyapmasin bukni, ton mitik winiryuk ning atouk ulule. Ara, “Wininamlulume,” nyapmasin yupu ara, Yesus el ulamuk ning ap, Yesus el yupu dopdoplumce, telebuk winilamlum ning ap, adeice arye, ‘Ara dipkoprop winibuka,’ tenebuka elinyabe. Allah yupu deice arye, kanye kunuknak ning, dirina uprebanmala ani, kanye dirina ning ara, akunum dirina upmale. Ati ara, “Allah yupu kekebuka dodoplum ning ara, ayupu ara, dipkopropuk ulule,” nyapmasine. Yesus ara, dirina atouk ulula anya arye, dipkoprop dirina ning ara, akunum elinyabe.
ကြော်ငြာတွေ