Yohanes 14:21 - Eipomek

²¹ Nyabukce ayupu ton dukdongobuka nyabuk. “Yata ninye do nirya, na yupu dobuka kekebikirye, ayupu uk talibuka pia dobolbanyak ninye ara, dipkoprop nati dib tenebuka talima arinyake. Nati, talima arilulnye bira, na Ni Koprop Allah arye anye biti, bico tenebuka, kanye deiplirye, melinauk unamle. Atonun, naryuk anye biti bico tenebuka, kanye deipnirye, melinamne. Tonda, ‘Atonye birye na wininye ning kel biknamnil’ tenen, laka kipdeipnebuk, kel biknamle.” Yesus arye nyabuk.

Yohanes 14:21 ပူးပေါင်းရင်းမြစ်များ

2 Raja-Raja 18:6

Hizkia bira, ‘Nun ni Allah el si Yahweh, el tonok atibuk moubuka talipnirye, el amu tamuk pia unamne. El ti batakana kumce, Yahweh arye, nyapdeiamsuk yupu moubuka talipnirye, aninguk wininamne tenelamuk. Tonda, ‘Allah el si Yahweh arye, Musa biti, ‘Aning ara wininamlume, aning ara ton kum wininamlume,’ nyapdeiamuk yupu, aninguk talipnirye dobolbanamne,’ tenelamuk.

Mazmur 35:27

Bukni, yata nang do nirya, sikda, ‘Allah arye Daud biti, akunum moubuka yupu bokeibukce, tuba tamubuka, akunum telebuk kipdeibukba, telebuk unamle,’ tenen, pataplyeba, nati, kanye deilininyak nang nirya ara, kil-kil kanye bobikirye, kanye deibuka yupu weik arye, “Aning ara, pia telebe,” nyanamake. Narye, ‘Winipting’ tenen ati, an Allah ati moropkine na nio. Tonda, nati kanye deilininyak nang nirya ara, tuba-tuba nyanamake. Ara, sikce, “Se, nun ni Allah, el si Yahweh ara, pia mikip weik ap, pia teleb ap ulule,” nyanamake. Tonda sikce, “Se, nun ni Allah ara, elti, diba tenebuka, el amu tam ulirye, el piluk talibuka ulye ninye deiyoknye Daud biti, Allah arye, el Daud ati, bico teneplirye, kanye deibuka melipliba, telebuk wininamle,” nyanamake.

Keluaran 33:18

Nyabukopura, Musa birye tamubuka Allah ati morobuk. “Wini talak ara, an dirina koproba ara, ‘Na eiptinye’ tenen, nati lak kipdeipnilyame,” nyabuk.

Amsal 8:17

Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.

Yeremia 31:31

Na Allah Yahweh arye nyapne. Na tenepse talak akunum uplyopura, narye sik Israel yala ninye ap, Yehuda mutuku ninye ap ati, nyalina yupu winiryuk ning, sikti, ‘Winipnamsine,’ nyapdeipnamne.

Zefanya 3:17

Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.

Lukas 11:28

Nyabukopura, Yesus arye akil ati tamubuka nyabuk. “Kume, yata ninye do nirya ara, Allah yupu moubuka kekebikirye, diba tenebuka, diksukumuk unyakce Allah ati dobolbanyak ninye ara, sikda pia mambule. Aninye ara, Allah arye teleb ulinamle,” Yesus arye nyabuk.

Yohanes 14:15

Yesus arye ayupu ton dukdongobuka nyabuk. “Anggunce nati, dipkoprop dib tenebuka kanye talima deipnumunyeura, na nyasinye yupu nirya kekepmunce, ayupu uk talibuka wininamlulume.

Yohanes 14:18

“Anggunda na mapu ululuma anya arye, narye anggun batakseneba, talye kwaknan mapu atonun kum unamlume. Aminyan talak, narye anggun dam yanamne.

Yohanes 15:14

Narye anggunti, “Aning wininamlulume, aning ara kum wininamlulume,” nyalisinye yupu, dipkoprop kekebuka winipmunyopura, narye, “Anggunda na weitcapu nang koprop,” nyanamsine. Narye nyasinye yupu kum kekepmunce, batakmunyopura, ‘Anggunda na weitcapu nang,’ nyabuka kanye kum delinamsine.

Yohanes 16:14

Na yupu nyapnyopura, elce na yupu ap, na wininun ning ap dobuka, anggunti laka peterepsiliba, anggunce kel biknin banamlume. Winibuka wininmalye deice arye, na si weik arye ereipnamnile. Tonda, wininamla deice arye, ninye nirya arye na pia teleb winin ning ara, kel bikikirye, na si erepdeipnamniyake.

Yohanes 16:27

Kume, na ni Allah el kanye aryuk talima aresulule. Ara, anggunce nati, ‘Allah arye Yesus dopdeibukura, yasuke. Elti nun diba tenepmabe’ tenen, diba akunum tenyamnuluma ati, Allah arye anggunti kanye talima aresulule.

Yohanes 17:23

An ap, na ap, kanye dukdongobuka unyame. Na ap, nati dib tenenyak ninye ap, dib tenepnamniak ninye ap, talima dukdongobuka unamabe. Naio, ance aninye nirya ati, ‘Teleb kipdeiptumba, talima dukdongobuka, tonok kanye bobuka, pia telebuk neika unamak’ tenen, moropkine. Ara, sik talima wililana kum aniryuk, kanye yuk-yuk bobuka kum unamak bukni, nimalye arye teleb ubuka neika unamake. Winibuka winiptingeopura, dib tenena kum, talye tukwak ninye nirya arye kel kipnamake. Kel biknamaka ara, ani. Ara, ‘E, dipkoprop Allah arye Yesus dopdeibuk,’ tenena ap, tonda, ‘Allah arye Yesus ati kanye talima arelul touk, Allah arye adib tenen ninye ababye, sikti, talima arelule,’ tenena ap, ‘Aning nirya kel biknamak’ tenen, moropkine, naio.” Yesus arye nyabuka morobuk.

Rasul 22:18

Eipseura, nyapnuk. “Wini talak minopce Yerusalem mutuku batakuka yukak bindoplyame. Amutuku nang nati laka nyanamlam yupu ara, kekebuka kum dopropnamaka atia,” nyapnuk.

2 Korintus 12:8

Winipnukba, like winilye talak deice arye, Allah ati moropse. “Naio, aikin unilye ning ara, ance aning dobuka, ila tuba tamubuka tonap teleb ubuka kipdeipnutume,” nyabuka moropse.

2 Korintus 3:18

Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.

2 Korintus 4:6

Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.

Ulangan 11:13

Ati anggunda, arup arye, ‘Aning ara, wininamlume. Aning ara, pia kum wininamlume,’ nyapman yupu nirya, Allah arye nyapdeipmanuba, narye nyapmasin ning ara, kekepmunce, moubuka talipmunce, wininamlume. Tonda, anggun si erelamlum Allah, anggun ni koproba Allah Yahweh atibuk, kanye delina ap, el si erena ap umunce, anggun kanye pum tam nirya, el deiceuk delinamlume.

Ulangan 7:13

“Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”

2 Tesalonika 2:16

Telebe na kayapu, nun ni Allah arye, nun nirya ati, bico tenenyamsukce, el kanye aryuk talye areamsuk ning ati nyapnusine. Ara, ‘Pia upnamsil ning, ilil una kum aryuk, kanye deibuka, dupsice arye una deiyok ning ap, aminyan teleb ning yanamsil’ tenen, kanye deibuka, dinauk un ning ap, areamsuke.

2 Timotius 4:22

Nun Deiyoknye Yesus ap, an ap, talima dukdongobuka neika unamkil talak noutam, ‘Melinamkil’ tenen, Allah morokunune. Tonda, ‘Allah el kanye aryuk bico tenekilirye, talye melinamkile,’ tenen, Allah morokunune. Telebe, na Paulus arye nyapkine. Asukum anyuk deipkine.

1 Yohanes 2:5

Bukni, yata ninye do nirya, Allah el yupu moubuka kekebuka dobolbanyake nang ara, sikce Allah ati, ‘Nun nie’ tenen, dipkoprop kanye pia deibuka unyake. Anang ara, sik talima ak, bico tenena ning ara, akunum wisibuka ati, Allah arye ninye tukwak ninye bico tenelul touk, sik babye ninye ati, bico tenenyake. Yuk nang ati bico tenenyaka ara, kum suktalipnamle.

1 Yohanes 3:1

Na kayapu, na mambul yupu nyapnuna ara, kekepnululume. Nun ni Allah arye bico pia weike tenesulule deice arye, el mapu kilisulule. Winisilye ara, talye kume. Dipkoprop Allah arye el mapu kilisulula ati, dipkoprop el mapu unyabe. Talya unyak ninye ara, Yesus diba kum tenebika ati, sikce nunti ning ara, ‘Sikda Allah el mapu unyake’ tenen, diba kum tenesinyake. Sik babye Allah mapu dipkoprop diba tenebuka kum unyake.

1 Yohanes 5:3

Dipkoprop Allah ati kanye delinyaba ara ani. Ara elce, “Wininamlulume,” nyasilye yupu nirya ara, ‘Diba’ tenen, kekebuka dobolbanyabe atia. Yuk ning ton kume. El yupu kekebuka dobolbalamtibya deice aryuk, “Allah ati kanye delinyabe,” nyaptibye.

2 Yohanes 1:6

Ara, bico tenebuka melilanauk unamap nyapman ning ara, ani. Yatato una do, kume. Ara, Allah arye, “Wininamlulume,” nyapsuk yupu nirya kekebuka dobolbanauk unamabe. Yuk ton kume. Allah arye, “Wininamlulume,” nyasulul yupu ara, aninguk ulule. Ati, anggun diba teneplum talak arye kekelamlum touk, wini talak tuba anggun nirya arye, bico tenebuka melilanauk unamlulume.

Wahyu 2:17

“Aning ati ara, anggun amul aupsililiba, ‘Ayupu deiyok ani’ tenen, kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, ‘Nun like’ tenebikirye, malye kilamice ninye nirya ati ara, narye duknyamse kwaning, el si ara manna, bokuka arenamsine. Tonda anggun winiryuk si ati, tenebuka wipnirye, silye keil kurun ning deice seknyopura, aninye ati arepnamsine. Anggun winiryuk si ara, yuk ninye kum kel biknamake. Doprobica ninye aryuk, sik bidamang siuk kel biknamake. Ayupu nirya ara, Pergamus mutuku unyak diba tenena ninye ati nyapnamlyame,” nyapnuke. Ninye Mi Koprop Atonunye arye, na Yohanes ati nyapnuke.

Wahyu 22:14

“Ninye arye, sik baju nininga bolpipliba, ‘Lek upnul’ tenen, mek liklamak touk, yata nang do nirya, na Yesus ati diba tenebica deice arye, sik malye ning kum daneiamsesi ninye ara, Allah arye aninye ati teleb kipdeipliba, kanye deibuka telebuk unamake. Aninye ara, Kam Una Deiyok Yo, el duk dakuka diptinge. Tonda, ananguk Yerusalem Winiryuk dana-dana dobik poka buplan noutamak arye, talye urdem wektingce, anyasik noutamak talye urdem wekenamake.

Wahyu 3:20

Nara, anggun dam akunum yanmasine. Anggun aik buplan dam tiknirye, ‘Bublan kukeipnuniyak do?’ tenen, bisik lorum-lorum asunune. Yata nang do nirya, na yupu kekebikirye, sik buplan kukeipnicopura, na adiparyuk sik aik weknirye, sik ap, na ap dine dibuka neika unamabe.”