Yohanes 12:6 - Eipomek

⁶ Yudas arye ayupu nyabuk ara, talye bona utotowa talina kum ninye ati, bico tenebukce kum nyabuk. Tenepce nyabuk. Ayupu nyabuk deiyok ara, elda ubula donanye ulamuka anya arye, Yesus ap el mapu silip ap arye, sak pum bisik dongobuka delilamik yo bok talibuka, kaliknanye ulamuk. Winilamuk bukni, el patalamuk touk, asak pum bisik arye talye ubula dololamukce, el babye tenelamuk ning ati, dekelolamuk.

Yohanes 12:6 ပူးပေါင်းရင်းမြစ်များ

Mazmur 14:1

Allah ati, diba kum tenenyak nang ati ara, ‘Allah dipkoprob kum ulule,’ nyanyak bukni, ayupu nyanyak ninye ara, sik pia walwal nang arye nyanyake. Adeice, sikce wininyak ning aning-aning nirya ara, malye ninguk wininyake. Sik anang ara, tonoknye babye, teleb kum ulule. Sik nirya malyeuk wininyake.

Amsal 29:7

Teleb ubuka ukirye, dipkoprob ninguk talibuka diksukumuk unyak nang ara, mikip pia kum ninye ap, bona utotoa talina kum ninye ap ati, ‘Diksukumuk ubuka ubirye, aninye ati teleb kilin ning ara, ani-ani,’ tenebuka, moubuka kel bikinyake. Bukni, malye ninguk talibuka unyak nang ara, bona utotoa talina kum ninye ap, mikip pia kum ubuka ulamice ninye ap ara, sik patalamle ning ati, pia kum tenenyake.

Yehezkiel 33:31

Dan mutuku do nirya winilamak touk, amutuku unyak nang babye, ‘Mambul weik yupu kekepnuyapʼ tenen, ninye weik tonun bikbik abuka bulubikirye, anang arye, an dam yanuka bunyake. Wininyaka ara, na Allah, na mapu koproba atonun winibikirye, weik tonun an dam yakirye, an yupu nyanamlam ning ara, pia moubuka kekenamake. Amol deice arye kekenyak bukni, ance, “Aning ara, winipnamlume. Aning ara, kum winipnamlume,’ nyabuka, nyapminye ning ara, sikce moubuka talibikirye, kum dobolbanamake. Deiyok ara, sik anang ara, sik si bam bol deice arye, ‘El kanye deipnamsilʼ tenen, kekena teleb yupu nyapnamak bukni, sik talima noutam arye teninamak ning ara, pia yuke. Ara, sikce, ‘Nun tenina deice arye, tilila yupu nyabibiba, yuk nang arye arepsikiba, nun diamuk teleb kipdeipdatibye. Nun dem aryuk, teleb ning dopropnamabe,’ tenenyake.

Matius 21:13

Wininmok talak ara, aunmek nang ati, ayupu nirya peterenmok. Allah arye nyapdeibukba, nabi Yesaya arye sekeiamuk yupu ara kum tenelulum do? Ayupu ara ani. ‘Ninye mutuku-mutuku nirya arye, na aik ati, “Ninye mutuku-mutuku nirya Allah ati arelbalamikce, el si erelamikce, Allah ati moronyak aik ani,” nyanamake,’ nyabuk.’ (Yesaya 56:7) Tonda Yesus arye ayupu nyabuk. “Allah arye nyapdeibukba Yesaya arye anyapmasin yupu sekeipsuk bukni, ayupu ton aupmale. ‘Anyaik ara na aik bukni, anggunda, ubula nang arye ubula dobuka, duknubuka ulamak aik atonun, na aik akunum malye kipdeiplume.’ (Yeremia 7:11) Nabi Yeremia sekamuk yupu dobuka akunum nyapsine,” Yesus arye anang ati nyabuk.

Lukas 8:3

Tonda, Herodes el aik pil dolamuknye Kusa, el kil Yohana ap, Susana ap, ton yuk kilapu weik ton ap neika balamik. Akilapu nirya arye, sik talilamik ning deice arye, Yesus ap, el mapu ap, sik patapne ning ara, dekuka arelamik.

Yohanes 10:13

Domba basam weina ati, talye melinanye birye, adomba ati dipkoprop bico kum tenelule. Kanye kum delilule. Elda, ‘Kume, yo bok arepnikce deice arye, talye piluk donamne,’ tenelulnye binya arye, ‘Adomba ara bataklirye, dauplye’ tenen, domba batakuka, bik-bik abuka balule.

Yohanes 12:5

Yudas arye nyabuk. “Anintong teleb mek ara, yata ati talye dikipmal do? Amek dobuka, yuk nang ati dekmatipyopura, yo bok weik doproptibirye, ninye bona utotowa talina kum nang melibuka ati areptibye. Amek dekna ara, mitik kume. Tonoknye keting tamun tonok deice arye pil dolamtua ani, keil uang dinge weik 300 denari doproptue.” Yudas arye nyabuk.

Yohanes 13:29

Ton nang ara, ‘E, Yudas ara nun yo bok talilinye ulula anya arye, Yesus arye ‘Kwalin ning dekelbinul’ tenen, nyapmal do?’ tenenmek. Ton nang ara, ‘Talye bona utotowa talina kum ninye yo bok melibuka arilbinul’ tenen, nyapmal do? Sik walwal asauk unmek.

1 Korintus 6:10

Ara, ubula donyak ninye ap, ‘Bona weik doproptibye’ tenen, pia patalye ninye ap, yu mek ninye kanye wangalamak mek dilamak ninye ap, yuk nang ati tilila yupu nyabuka lululilamak ninye ap, ‘Yo bok weik dopropnamap’ tenen, tenepce talye yupu nyabuka, winilamice ninye ap, anang nirya ara, Allah lyeplirye, kum talinamle. Sik awininyak ninye ara, wenebuka bataknamle.

Galatia 2:10

Sik anang arye, nunti, “Anggun peterelbinamlum talak nirya noutamak arye, aning-aning nirya kum talinyak ninye, talye bona utotoa talina kum ninye luba kina kum arye, melinauk unamlulume,” nyapsik. Nyapsik bukni, na babye atonun, ‘Bona utotoa talina kum ninye ati, kanye deibuka melinamabe,’ min arye akunum tenyamse.

1 Tesalonika 5:22

Malye winin ning yala-yala nirya ara, pia leibuka yukak unamlulume. Tonok ning babye, winina meme.

Yakobus 2:2

Winipmanto ning nyapnusine. Ura, anggunce, ‘Allah yupu kekepnuyap’ tenen, Allah yupu aik akunum wekelyatum talak ara, tonok sisinanye, bona weik talinanye birye, dekna weik ning, emas taruk duk dongolul ning ap, pia teleb ongon baju ap ongobuka, wekelyatu bukni, atalak aryuk pia talye kankanye ton, pun deibuka kwiliksakamtu baju ongobuka wektuopura, anggunce yatato yupu nyaptum do?

Yakobus 2:6

Kankan ninye wibuk bukni, anggunce, ‘Kankan ninye mambul kume,’ tenepmatum deice arye, anang sik nong deice malye yupu nyaplulume. Ton tenipdelulume. Sik bona weik talin ninye arye, anggun nong deice ikin ning deipsikirye, anggun ning dobuka malye ulisinyak ara, kum tenipmalum do? Tonda, sik sisin ninye bona weik talin ninye arye, ‘Anggun talipdongobuka, sik ning dalubuka dopropnamap’ tenen, yupu bokolina deiyok nang dam bobasinyak ara kum tenipmalum do?